Xaneqîn (Rûdaw) – Encûmena qezaya Xaneqînê bi amadebûna hemû endamên encûmenê civiya û biryar da li gel rêbeberiya Germiyanê beşdarî giştpirsiya Başûre Kurdistanê bibe. Encûmenê daxwaz kir, ku li navçeya wan sindoqên dengdanê werin danîn.
Serokê Encûmena Qezaya Xaneqînê Semîr Nûr Mihemed ji Rûdawê re ragihand: “Îro Encûmena Xaneqînê, ku nûnertiya pêhateyên qezayê dike, civîneke awarte saz kir. Di civînê de biryar hate dayîn, ku qezaya Xaneqînê jî beşdarî gişptirsiya 25ê Îlonê ya serxwbeûna Kurdistanê bibe. Hevdem bingehên dengdanê jî li Xaneqîn û derdora wê werin danîn.”
Semîr Nûr Mihemed herwiha got: “Ev daxwaza me ne ya îro ye. Me di sala 2006ê de daxwaz kir, ku Xaneqîn vegere ser Herêma Kurdistanê. Herwiha di nivîsîna jimare 131 a Encûmena Qezaya Xaneqînê ya 21ê Tebaxa 2006ê de me bi awayekî yasayî daxwaz kiriye, ku Xaneqîn vegere ser Herêma Kurdistanê.”
Serokê Encûmena Qezaya Xanewînê da zanîn, ku wan nivîsîna xwe bi fermî pêşkeşî hikûmeta Herêma Kurdistanê, Parlamentoya Iraqê û Parêzgariya Diyala kiriye û got: “Lê paşî mijara madeya 140 hate pêş û ev mijar hate paşxistin.”
Nûr Mihemed got: “Mafê me ye daxwaz bikin li gel Herêma Kurdistanê beşdarî giştpirsiyê bibin. Çimkî Xaneqîn navçeyekî Kurdistanî ye. Emê vê daxwaza xwe pêşkeşî Serokatiya Herêma Kurdistanê û aliyên pêwendîdar bikin da ku daxwaza gelê Xaneqinê pêk were.”