Tehran (Rûdaw) – Wezareta Derve ya Îranê ragihand, ku yekparçebûna xaka Iraqê ji bo Îranê pir giring e, lewma helwesta wan a derbarê giştpirsiya Başûrê Kurdistanê de nayê guhertin, li ser vê yekê danûstandinan jî nakin.
Peyvdarê Wezareta Derve ya Îranê Behram Qasimî, îro Duşemê 10-07-2017, di civîneke çapemeniyê de ragihand, helwesta welatê wî ya derbarê giştpirsiya Başûrê Kurdistanê de nayê guhertin, serweriya niştîmanî û yekparçebûna xaka Iraqê ji bo Îranê pir giring e, lewma jî ew ne amade ne li ser vê mijarê danûstandinan bikin.
Qasimî got, ku yekîtiya Iraqê di berjewendiya hemû nîştecihên vî welatî de ye, guhertina vê rewşê dikare Iraqê bixe nava ne aramî û qeyranan de.
Ev helwesta Îranê di demekê de ye, ku Civata Bilind a Giştpirsiya Başûrê Kurdistanê biryar daye roja 25ê Îlona 2017ê giştpirsî were kirin. Herwiha biryar daye ji bo danûstaninên li gel welatên derve şandan pêk bîne.
Beriya niha Rêberê Komara Îslamî ya Îranê Elî Xamaneyî dijitiya Tehranê ji bo giştpirsiya Başûrê Kurdistanê anîbû ziman û ev yek weke planeke Amerîkayê û kawilkirina Iraqê binavkiribû.