Were hundir/Xwe tomar bike

Wekî mêvan babetan dane

Her kes e-maila we nabîne
Têkeve ji bo şexsîkirina şîroveyê

Wek mêvan şîrove bike

Her kes e-maila we nabîne
Têkeve ji bo şexsîkirina şîroveyê

Têkeve

Yan bi awayê bikarhêner pêwendî ligel me dane
 

E-mail

 

Rudaw

Nêrîn

Selîm Berekat û komkujiya Kurdên Êzdî

Ji aliyê Besam Mistefa 31-8-2017
Besam Mistefa
Besam Mistefa

Herçiqasî helbestvan û romannivîsê Kurd yê ji Rojavayê Kurdistanê Selîm Berekat bi zimanê erebî dinivîse jî, lê mijar û naveroka piraniya berhemên wî kurdî ne. Bi taybetî berhemên wî yên pêşî hemû li dora êş û bêtarên Kurdan wek gel û wek takekes hatine nivîsandin. Romana wî ya vê carê ku berî demekê ji aliyê Dezgeha Erebî ya Lêkolîn û Belavkirinê hat weşandin, bi navê (Sebaya Sincar) e, ango Sebiyeyên Şingalê, nexasim jinên Kurdên Êzdî yên ku ji aliyê Rêxistina Dewleta Îslamî li Iraq û Şamê (DAIŞê) ve hatin sebîkirin û êxsîrkirin. Berekat dixwaze di vê romanê de bêje ku ne tablo û ne jî ziman têra vegotina êşa Şingalê nakin.

 

Di (Sebaya Sincar) de, ku berhema 23an e di nav romanên Selîm Berekat de û ji 445 rûpelan pêk tê, Berekat berovajî piraniya berhemên xwe yên din ku bi zimanekî herî zehmet û aloz hatine nivîsandin, vê carê zimanekî sivik û fambar ku li gorî naveroka berhemê û êş û xemgînî û nalîna tê de li hev dike bikar tîne. Serlehengê romanê yan karaktera sereke ya berhemê şêwekarê Kurd Sarat e ku li welatê Swêdê dijî û di gelek aliyan de dişibe Berekat ê ku tevî înkara wî lê behreya wî di warê resimandinê de jî heye û ew bi xwe jî niha li Swêdê dijî. Berekat wêneyên bergên çend berhemên xwe yên ku vê dawiyê li zimanê kurdî hatin wergerandin û li Tirkiyê û Bakurê Kurdistanê belav bûn kişandine.

 

Hemû karakterên sereke yên vê romana Berekat mirovên mirî ne. Pênc keçên Kurdên Êzdî bi navên Şahîka, Anîşa, Nînas, Kîdîma û Yada wek penaber digihin Swêdê. Herwiha çar çekdarên pisporên talan û kuştin û sebiyê yên DAIŞê bi navên Ednan, Îhsan, Elî û Sadûn bi awayekî xeyalî li goleke avê ya nêzîkî mala Saratê şêwekar bicih dibin.

 

Ev roman şêwekarî û edebiyatê tîne ba hev. Sarat hewl dide tabloyekê li ser karesata Kurdên Êzdî û Çiyayê Şingalê biresimîne ku di tebaxa 2014an de ket nav lepê tawankar û hovên DAIŞê de, lê meziniya êşê û hovîtiya dagîrkeran ji wê yekê mezintir in ku di çarçoveya cawekî spî de bên kurtkirin. Ew dike nake nikare rojhilatekî bêserûber û di nav xwîn û kuştinê de werbûyî biresimîne. Nikare êş û xemgîniya sebiyê, talanê, dîlîtiyê, kuştin û serjêkirinê bi tabloyekê bîne zimên.

 

Selîm Berekat di romanê de rewşa kambax a Rojhilata Navîn wesf dike û bi taybetî li ser rewşa Sûriyeyê radiweste û bi tundî dewletên mezin ên cîhanê wek Rûsya û Amerîkayê rexne dike, herwiha hinek welatên navçeyê jî rexne dike, nexasim Îran û Tirkiyeyê. Berekat piştgiriya Îran û Rûsyayê ji serokê Sûriyeyê Beşar Esed re wek sedema sereke ya bobelata welatê Sûriyeyê ku ji 2011an ve berdewam e dibîne û wiha dibêje: "Di rojhilatê ku ez jê hatime de, ji bo tu tiştî destûrxwestin û molet ne pêwist e. Pêwistiya perçiqandin û tarûmarkirina gel û miletan bi destûrxwestinê nîne. Pêwistiya pelixandina dewletan bi destûrxwestinê nîne."

 

Ev roman romana êş û xemgîniyê ye. Spîtiya tabloyê ji Sarat re dibêje: "Çiyayê Şingalê wek ku heye biresminîne. Şingal çiyayekî xemgîn e." Bi rastî jî, karesat û komkujiya Kurdên Êzdî li Şingalê nayê gotin û ziman û şêwekarî li ber wê lal dibin. Hov û çekdarên DAIŞê êrişekê gelekî mezin û bi kîn û xedarî birin ser şêniyên Şingalê. Komkujiyên pir mezin anîn serê zarok, jin, xort, keç, pîrejin û kalemêrên Kurdên Êzdî û bi vî awayî fermaneke din li fermanên dîroka Kurdên Êzdî ya tijî ferman û xemgînî hat zêdekirin. Mêr hatin kuştin, zarok ji tîbûn û birçîna mirin û keç û jin hatin revandin û firotin û Kurdên Êzdî li hemû aliyên dinyayê bûn derbider û koçber. Gelo wê tabloyek an kitêbek çawa bikare vê jana bêsînor bîne ziman!

 

Berekat li ser hovîtî û wehşiyeta DAIŞê li Şingalê û Sûriyê disekine û di paragrafeke romanê de dîmenê bangxwazekî DAIŞê ku zarokan fêrî kuştin û serjêkirinê dike nîşanî me dide û wiha dibêje: “Bangxwaz ji zarokan pirsî: Hûn ê çi bikin ji wan? Zarokan got: Em ê gawiran bikujin. Bersiv ne bi dilê bangxwaz bû. Wî rûyê xwe tirş kir û ji zarokan pirsî: Hûn ê wan wiha bi nermî bikujin? Zarok har bûn û bi yek dengî gotin: Em ê serê wan jêbikin. Û her zarokekî kêrek ji çenteyê xwe derxist!”

 

Di beşê dawî yê romanê de ji nişkê ve segekî mezin digire ser mala Saratê şêwekar û hemû tiştî tê de serobinî hev dike. Rebenê Sarat jî tiştê ji ber kûçik difilite û rengên rijiyaî û tevlîhevbûyî hildigire û li bin guhê dîwarê xaniyê xwe dixe. Wek ku bixwaze rûyê rasteqîn ê vê qonax û serdemê, alozî û tevlîhevî û kuştina bê sînor li rojhilatê birîndar nîşan bide.

724 hatiye dîtin

Bibe beşek ji Rûdawa Te

Wêne, vîdyo û çîrokan ligel Rûdawê parve bike.

Gotina te

Seid Ferhad Seid Mistefa | 2017-10-18 10:32:05 AM
Camêrê Kosret Resûl Erkê xwe bi cîh anî û merdane li ser Postê xwe li Sengerê Şerî ma...lê Bavil Talibanî û Hêro-Xanê Xîyanetek bêhemta li Kurd, li...
Kosret Resûl: Navê çend kêmfamên YNKê dê bikeve nav rûpelên reş ên dîrokê
| 18 demjimêr berê | (1)
naw | 2017-10-18 10:18:39 AM
hukumate kurdistan bela bibine, medyayi tirk jibo peşmerge u hukumeta kurd çı dibejin. buxunin meze bıkın.
ROJEVA TIRKIYE – Kurd û Iraq piştî Kerkûkê vegeriyan ser hesabê berê
| 22 demjimêr berê | (1)
wan | 2017-10-18 9:30:27 AM
Deste barzani sax be
Kurdên Xurmato banga alîkariya lezgîn dikin
| 20 demjimêr berê | (1)
rasti | 2017-10-18 7:59:12 AM
jashe iranen na hezi iraqi. chiawazye beyni hez u jash.
McGurk: Em hewl didin pêşiya şerê pêşmerge û hêzên iraqî bigrin
| 23 demjimêr berê | (1)

Li beşên din ên Rûdawê

Erebên sunnî yên Iraqê jî daxwaza referandûmê dikin 7-10-2017 |

Erebên sunnî yên Iraqê jî daxwaza referandûmê dikin

Ji bo herêmeke xweser lîjne ava dikin Zêdetir
0.469 seconds