Hewlêr (Rûdaw) - Berpirsa Karûbarên Derve ya Yekîtiya Ewropayê Federica Mogherini ragihand ku ew ji ber operasyona leşkerî ya Tirkiyê ya li ser Efrînê û navçeyên din dilgiran in.
Îro li Brukselê wezîrên derve yên Yekîtiya Ewropayê dicivin û rewşa Sûriyê, Iraq û welatên din yên Rojhilata Navîn gotûbêj dikin.
Berî destpêkirina civînê, Federica Mogherini ji rojnamevanan re axivî û ragihand ku ew ji ber rewşa li Efrînê çêbûye dilgiran in.
Mogherini got: “Me dilgiraniya xwe derbarê rewşa Efrînê nîşan daye, bi giştî ez û wezîran gelekî ji rewşa ku li Efrînê diqewime, dilgiran in.”
Federica Mogherini diyar kir, ku divê hersê welatên gerenor ên Astanayê, wate Rûsya, Îran û Tirkiyê berpirsiyareke taybet bigrin ser xwe û ji proseya agirbestê piştrast bibin, ne ku aloziyan zêde bikin.
Mogerinî di derbarê wê agirbestê de ku Encûmena Asayişa Navdewletî erê kiribû ragihand ku rewşa li ser erdê û bi taybetî jî ji aliyê mirovî ve gelekî dijwar e.
Berpirsa Karûbarên Derve ya YE got: “Me karên xwe gihandin New Yorkê. Bi hewlên nûnerên Yekîtiya Ewropa di Encûmena Asayişê de projebiryarek hate erêkirin, lê ev yekem kar bû. Divê raste rast ev proje were bicîkirin û mekanîzma çavdêrîkirina wê jî hebe.”
Her wiha da zanîn ku wê sibe li ser agirebestê li gel kesê duyem yê Netewên Yekbûyî Mark Lokok bicive.
Mogherini bal kişande ser rewşa mirovî û got: “Ji wê demê ve me zengê hişyariyê lêda ku rewş ji aliyê mirovî ve gelekî dijwar e.”
