وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

ئابووری

نێچیرڤان بارزانی: دابەشکردنی مووچە بەردەوامدەبێت

لەلایەن گۆڤەند مستەفا 13/11/2017
نێچیرڤان بارزانی، سەرۆکوەزیرانی هەرێمی کوردستان
نێچیرڤان بارزانی، سەرۆکوەزیرانی هەرێمی کوردستان

رووداو - هەولێر

نێچیرڤان بارزانی رایدەگەیێنێ، ئەم مانگە و مانگی داهاتووش دابەشکردنی مووچەی فەرمانبەران بەردەوامدەبێت.

نێچیرڤان بارزانی، سەرۆکوەزیرانی هەرێمی کوردستان، رۆژی دووشەممە 13-11-2017 لە هەولێر، لەدوای کۆبوونەوەی ئەنجوومەنی وەزیران لەبارەی بوومەلەرزەکەی شەوی رابردوو و رەشنووسی بودجەی عێراق کۆنگرەیەکی رۆژنامەڤانی سازکرد و رایگەیاند، ئەم مانگە و مانگی داهاتووش مووچەی فەرمانبەران ئامادەیە و دابەشدەکرێت.

نێچیرڤان بارزانی لە سەرەتای کۆنگرەکەدا سەرەخۆشی لە قوربانیانی بوومەلەرزەکەی شەوی رابردوو کرد و رایگەیاند، 7 شەهید و ژمارەیەک بریندار هەن، گوتیشی: "لیژنەیەک بۆ هەڵسەنگاندنی زیانەکانی بوومەلەرزەکە پێکدەهێنین".

هەر پەیوەست بەو رووداوە سوپاسی حکومەتی تورکیای کرد بۆ ناردنی هاوکارییەکان و گوتی: "دەستبەجێ نووسینگەی سەرۆککۆماری تورکیا پەیوەندییان پێوەکردین و ئامادەییان بۆ هەموو جۆرە هاوکارییەک دەربڕی، هاوکارییشیان بۆ زیانلێکەوتووانی بوومەلەرزەکە ناردووە، سوپاسیان دەکەین و هەر ئەوەیان لێ چاوەڕوان دەکرێ لەکاتی تەنگانە فریامان بکەون".

لەبارەی کردنەوەی دەروازەکانیش گوتی: "لەگەڵ بەرپرسانی ئێران لەسەر خەتم و بەڵێنیان داوە سەرجەم دەروازەکان بکەنەوە، چونکە ئێمە پێمانوایە کردنەوەی دەروازەکان لە بەرژەوەندی هەردوولایە".

بڕیاری دادگای فیدراڵی لەسەر گشتپرسی کە رایگەیاند بەپێی دەستوور هیچ پێکهاتەیەک مافی جیابوونەوەی لە عێراق نییە، یەکێک بوو لەو پرسیارانەی ئاراستەی سەرۆکوەزیرانی هەرێمی کوردستان کرا، ئەویش لەوەڵامدا رایگەیاند: "بەوردی خوێندنەوەمان بۆ بڕیارەکە کردووە و لە رۆژانی داهاتوودا بەفەرمی وەڵامی دەدەینەوە".

سەبارەت بە گفتوگۆکردن لەگەڵ بەغداش رایگەیاند: "تێبینییەکانمان لەبارەی بودجە بۆ عەبادی ناردوون و ئەو بڕگانەمان دیاریکردوون کە پێمانوایە دەستووریان تێدا پێشێل کراوە،  هیچ وادەیەکیش بۆ دەستپێکردنی گفتوگۆ لەگەڵ بەغدا دیارنییە و، هیچ کاتێکیش بۆ چوونی شاندی کوردستان بۆ بەغدا دیارینەکراوە".

لەبارەی رۆڵی ئەمریکاش لە چارەسەرکردنی کێشەکان رایگەیاند: "بەداخەوە ئەمریکا لەجیاتی راگرتنی هاوسەنگی زیاتر لایەنگری بەغدا دەکات".

هەر لە کۆنگرەکەدا نێچیرڤان بارزانی باسی کێشە نێوخۆییەکانی کوردستان و بەتایبەت بزووتنەوەی گۆڕانی کرد و رایگەیاند: "پێشوازی لە هەر پڕۆژیەکی بزووتنەوەی گۆڕان دەکەین و ئامادەین بۆ گفتوگۆ، بڕیارە وەک حیزبیش پارتی سەردانی گۆڕان بکات".

 

بەشێک لە قسەکانی نێچیرڤان بارزانی:

هەروەکو ئاگاداران شەوی رابردوو بوومەلەرزەیەک بە گوڕی 7.3 بە پلەی رێختەر هەڵەبجە و دەربەندیخان و هەموو شارەکانی کوردستانی گرتەوە، بەم بۆنەیە سەرەخۆشی خۆم ئاراستەی قوربانیانی ئەو کارەساتە دەکەم، هیوای چاکبوونەوەش بۆ بریندارەکان دەخوازم.

ئێمە هەر لە دوێنێ شەوەوە پەیوەندی تەلەفۆنیمان لەگەڵ پارێزگاری سلێمانی بەوەکالەت و قائیمقامی دەربەندیخان و بەرپرسانی ئیدارەی گەرمیان هەبووە و لەسەرهێڵ بووینە، بەپێی ئەو ئامارەی بەدەستمان گەیشتووە و بەپێی ئەو راپۆرتانەی ئەمڕۆ ئێمە هەمانە، دیارە تائێستا 7 کەس شەهیدبوون، هەندێک خەڵکیش برینداربووە، هەندێکیش تووشی شۆک بوونە.

ئێمە لە ئەنجوومەنی وەزیرانەوە بڕیاری ئەوەمان هەیە لیژنەیەک بنێرینە ئەو سنوورانە و هەڵسەنگاندنێک بۆ ئەو دۆخە بکات، ئەوەی ئێمە پێمانبکرێت لەو کارەساتەی بەسەر ئەو خەڵکەدا هاتووە، بە تەئکید حکومەتی هەرێمی کوردستان درێخی ناکات".

هەر لە دوێنێ شەوەوە، کە ئەو رووداوە روویدا، بە سوپاسەوە نووسینگەی سەرۆککۆماری تورکیا پەیوەندیان لەگەڵ ئێمە کرد، هەروەها کونسوڵی تورکیا لە هەولێر و وەزارەتی دەرەوەیان پەیوەندییان کرد و دەستبەجێ هاوکارییان لەڕێگەی ئیبراهیم خەلیلەوە نارد، فڕۆکەیەکیشیان ناردووە بۆ سلێمانی بۆ گەیاندنی ئەو هاوکاریانەی کە پێویستن بۆ خەڵکەکە، من دەمەوێت لێرەوە سوپاسی خۆم ئاراستەی دەزگای ئافاتی تورکی و نووسینگەی سەرۆککۆماری تورکیا و جەنابی سەرۆککۆمار بکەم، هەر ئەوەش چاوەڕوان دەکرێت لە رۆژانی تەنگانەدا ئەوان یارمەتی هەرێمی کوردستان بدەن، بەسوپاسەوە ئەمجارەش هەر دەستبەجێ لە یەکەم ساتەکانی کە ئەم رووداو روویدا بڕیاری خۆیان جێبەجێکرد بۆ هاوکاری و یارمەتیدانی لێقەوماوان.

هەروەها دەمەوێت سوپاسی دەزگاکانی ئیداری پارێزگای سلێمانی و ئیدارەی گەرمیان بکەم، کە لە دوێنێ شەوەوە چ لە دەزگا ئیدارییەکان چ پۆلیس و چ ئاسایش چ فریاکەوتن، هەموویان پێکەوە دەستبەجێ چوونە ئەو شوێنانە و ئەوەی پێویست بووە هەر لە دوێنێ شەو و ئەمڕۆ بەیانی کردوویانە بۆ خزمەتکردنی هاووڵاتیانی هەرێمی کوردستان.

لەلایەکی دیکەوە لەبارەی پڕۆژەیاسای بودجەی عێراق ئێمە تێبینییەکانی خۆمان بەفەرمی بۆ سەرۆکوەزیرانی عێراق ناردوون، ئەو شوێنانەی کە پێمانوابووە کێشەن بۆ مەسەلەی بودجە و یاسایی و دەستووری نین، ئێمە هەموومان خستوونەتەڕوو، تەئکیدمان لەسەر بەشە بودجەی هەرێمی کوردستان کردووەتەوە، بەپێی ئەو رێککەوتنەی کە پێشتر هەمانبووە لەبارەی 17% بەفەرمی بۆمان ناردوون، تاوەکو ئێستا وەڵاممان وەرنەگرتووەتەوە، بەداخەوە، تا راددەیەک کێشە دروستبووە لە ناردنی دەرمانیش بۆ هەرێمی کوردستان، بێگومان ئەوە شتێکە کە یەکجار زۆر پێویستە، لەبەرئەوەی وەک خۆتان دەزانن ئێمە هەتا ئێستاش جگە لە هەرێمی کوردستان نزیکەی میلۆنێک و 400 بۆ 500 هەزار ئاوارە و پەنابەری سووری لە هەرێمی کوردستان هەن، کێشە دروستکردن لەوڕووەوە و نەناردنی دەرمان بەدڵنیاییەوە کێشەکان زیاتر دەبن.

لەڕووی سەربازییەوە تائێستا هیچ جموجۆڵێکی سەربازی لە بەرەکاندا نییە، وەکو هەرێمی کوردستان ئێمە پێشتریش گوتوومانە و تەئکیدیش دەکەینەوە لەوەی ئێمە دیالۆگێکی رێک و پێک لەسەر بنەمای دەستووری عێراق بە چارەسەر دەزانین بۆ هەموو ئەو کێشانەی ئەمڕۆ لەنێوان هەرێمی کوردستان و بەغدا هەن.

لە وەڵامی رۆژنامەڤاناندا

پرسیار: لەماوەی رابردوودا سەرۆکایەتیی حکومەتی هەرێمی کوردستان، بەڕێزتان لە هەفتەی رابردوو چەندینجار پەیامی ئەوەتان ئاراستەی بەغدا کردووە کە گفتوگۆ بکەن، ئێستا دوایین وەڵامی ئەوان چییە، بۆچی تاوەکو ئێستا نەگەیشتوونەتە چارەسەرێک؟

نێچیرڤان بارزانی: تائێستا وەڵامیان نەداوەتەوە، هەڵوێستی ئێمە هەر ئەوەیە، ئێمە پێمانوایە هەڵوێستی خۆمان دووبارەدەکەینەوە لەوەی دەبێت ئێمە لەسەر بنەمای دەستووری عێراق کێشەکان چارەسەر بکەین.

پرسیار: ئایا ئێوە وەکو حکومەتی هەرێمی کوردستان کەی سەردانی لایەنە سیاسییەکان دەکەن، کاتەکە دیاریکراوە؟

نێچیرڤان بارزانی: سەبارەت بە سەردانی لایەنە سیاسییەکان، هەندێکیان لێرە نەبوون لەبەرئەوە دواخرا، لەگەڵ جێگری سەرۆکوەزیران کاک قوباد بڕیارمانداوە دوای گەڕانەوەی ئەو برادەرانە دەست دەکەین بە سەردانی لایەنە سیاسییەکان، دوای سەردانیشمان بۆ لای لایەنە سیاسییەکان، ئێمە دۆخەکە هەڵدەسەنگێنین کە چۆن پێکەوە کاربکەین، هەوڵیش دەدەین دوای ئەوە وادەی هەڵبژاردنیش لە هەرێمی کوردستان دەستنیشان بکەین.

پرسیار: ئێستا وەرزی سەرما و سۆڵەیە، هاووڵاتیان باس لەوە دەکەن کە پێویستیان بە نەوتە، ئایا حکومەتی هەرێمی کوردستان ئەمساڵیش لە توانایدا نییە نەوت بۆ هاووڵاتیان دابین بکات؟

نێچیرڤان بارزانی: سەبارەت بە نەوت ئیمکانییەتی ئێمە سنووردارە لەوبارەیەوە، لە هەوڵەکانمان بەردەوام دەبین، بەڵام ئیمکانییەتی ئێمە سنووردارە.

پرسیار: بڕیاروابوو شاندێک لە پارتی پێکبهێندرێت و سەردانی گۆڕان بکەن، ئەمە بەکوێ گەیشت؟ ئەگەر گۆڕانکاری بکەن، ئەو پاکێجەی بزووتنەوەی گۆڕان دەیدا بە ئێوە، خاڵە ئیجابییەکانی چی دەبێت تاوەکو ئێوە لێیان وەربگرن؟

نێچیرڤان بارزانی: نازانم پاکێجەکەی گۆڕان چییە؟ نازانم پاکێجەکەم نەبینیوە.

پرسیار: ئەو پاکێجەی داوای پێکهێنانی حکومەتێکی کاتی دەکات.

نێچیرڤان بارزانی: خۆ ئەم حکومەتە خۆی کاتییە، ئەم حکومەتە خۆی هەشت مانگ مۆڵەتی پەرلەمان درێژکراوەتەوە، دەبێت لەماوەی هەشت مانگدا هەڵبژاردن بکرێت، ئەم حکومەتە خۆی حکومەتێکی کاتییە، بەڵام بەهەرحاڵ ئێمە هەر بۆچوون و رایەک هەبێت کە بتوانێت یارمەتی ئەو بارودۆخەی هەرێمی کوردستان بدات، ئێمە دیراسەتی دەکەین و ئامادەین گوێبیستی هەموو رایەک ببین، سەبارەت بە سەردانی پارتیش بەڵێ بڕیارە پارتی وەکو حیزب سەردانی برادەرانی گۆڕان بکات، ئەگەر پەیوەندیش نەکرابێت، پەیوەندی دەکرێتەوە لەگەڵ ئەوان و دانیشتن دەکرێت و وەکو دوو حیزب لەگەڵ یەکدی دادەنیشن.

پرسیار: ماوەیەک بەر لە ئێستا سەردانی دەروەتان کردبوو، ئەو گرێبەستەی لەگەڵ داناغاز هەتانە، ئایا ئێوە ئەو قەرزەتان لە رۆزنەفت دایەوە بە داناغاز؟

نێچیرڤان بارزانی: ئێمە کێشەیەکمان هەبوو لەگەڵ داناغاز، ئەوەبوو ئەو کێشەیە چووە بۆ چارەسەرکردن چووە لەندەن، دوای ئەوە ئێمە لەگەڵ داناغاز رێککەوتین، کێشەکان چارەسەرکران، بەدڵنیاییەوە کۆمپانیای رۆزنەفتیش یارمەتیدەر بوو بۆئەوەی ئەو کێشەیە لەگەڵ داناغاز چارەسەر بکرێت.

پرسیار: چەند رۆژێک پێش ئێستا دادگای فیدراڵی عێراق باسی لەوەکرد کە جیابوونەوە لە عێراق نادەستورییە، رای ئێوە لەسەر ئەمە چییە؟

نێچیرڤان بارزانی: رای ئێمە لەسەر دادگای فیدراڵی، ئێمە زۆر بەدیقەت ئەو بڕیارەی دادگای فیدراڵیمان تاوتوێکردووە، لەم نزیکانەش بەفەرمی لەلایەن حکومەتی هەرێمی کودستانەوە رای خۆمان لەسەر ئەو بابەتە دەردەبڕین، نامەوێت لێرە وەڵام بدەمەوە، چونکە بەفەرمی وەڵامی دەدەینەوە.

پرسیار: چەند رۆژێک پێش ئێستا باس لەوەکرا لە کۆنگرێسی ئەمریکا بودجەیەک بۆ پێشمەرگە تەرخانکراوە، کەچی لەهەمان کاتیشدا پێشمەرگە بەشێکە لە سیستەمی بەرگریی عێراق، کەچی ناوی پێشمەرگە لە بودجەی عێراقدا نەهاتووە؟

نێچیرڤان بارزانی: ئێمە رێککەوتنێکمان لەگەڵ وەزارەی برگریی ئەمریکا هەیە و پێشتر واژۆکراوە، ئەوان هەندێک یارمەتییان بە پێشمەرگە داوە، ئەو گرێبەستەی کە کراوە ئەوە تەواوبووە، ئێمە ئێستا خەریکی ئەوەین ئەو گرێبەستە نوێبکەینەوە لەگەڵیان بۆ یارمەتیدانی  هێزەکانی پێشمەرگە، لە کۆنگرێسی ئەمریکاشدا ئەوە رەچاوکراوە، بەسوپاسەوە بە تەئکید پێشمەرگە پێویستی بەو یارمەتییە هەیە وەکو بەشێک لە سیستەمی بەرگریی عێراق و بەتایبەتی مەسەلەی شەڕی تیرۆریستانی داعش لە عێراق و لە کوردستاندا. 

پرسیار: پەیامتان لەسەر نەخۆشکەوتنی کۆسرەت رەسول عەلی، جێگری یەکەمی سکرتێری گشتیی یەکێتیی نیشتمانیی کوردستان

نێچیرڤان بارزانی: لەڕاستیدا بە بیستنی ئەو هەواڵە زۆر نیگەران  و خەمبار بووین، رۆژانە لەسەر خەتین لەگەڵ دکتۆرەکانی و لەگەڵ کاک دەربازی کوڕی، ئەوەی ئەمڕۆش پێمانگەیشتووە سوپاس بۆ خوا باری تەندروستی بەڕێزیان بەرەو جێگیربوون و باشتربوون دەڕوات، ئەوەی ئێمە تەمەننا دەکەین ئەوەیە کە ئینشائەڵڵا بە خێر و خۆشی باری تەندروستی باشبێتەوە و دەست بە کارەکانی خۆی بکاتەوە.

پرسیار: دوای ئەوەی حکومەتی عێراق بەشە بودجەی هەرێمی کوردستانی کەمکردووەتەوە، لە ئەگەری رێکنەکەوتنی هەرێمی کوردستان یان زیادنەکردنەوەی پشکی هەرێمی کوردستان، ئایا حکومەتی هەرێمی کوردستان دەتوانێت مووچەی فەرمانبەرانی دابین بکات، ئەگەر هاتوو ئەو بارودۆخە ماوەیەکی زۆری پێبچێت؟

نێچیرڤان بارزانی: سەبارەت بە یاسای بودجە، تاوەکو ئێستا رەشنووسە، ئەمەش خراپترین رەشنووسی یاسای بودجەی عێراقە، ئەو پێناسە و دەستەواژانەی کە لەنێو ئەو یاسایەدا بەکارهاتوون بۆ هەڵوەشاندنەوەی قەوارەی سیاسی هەرێمی کوردستانن بەتەواوەتی، لەوڕووەوە هەڵوێستی ئێمە روونە، ئێمە دەستوورێکمان هەیە ئەو دەستوورە پێناسەی قەوارەی سیاسیی هەرێمی کوردستانی کردووە وەکو حکومەتی هەرێمی کوردستان، هەڵوێستی پارێزگاکانیش زۆر روون بووە کە لەگەڵ حکومەتی هەرێمی کوردستان یەک دەنگن و تەئکید لەسەر ئەوە دەکەنەوە کە دەبێت ئەو قەوارەیە بپارێزرێت وەکو ئەوەی هەیەتی.

ئێمە دەمانەوێت بگەینە رێککەوتنێک لەگەڵ بەغدا، بەغدا لەسەر ئەو بابەتە باسی ئەوە دەکات ئەوەی لە یاسای بودجەی عێراقدا هاتووە، هەر هەمووی ئەوەی دایانناوە ئەو زوڵمەی لە هەرێمی کوردستان کردوویانە، بەشی مووچەی یەک پارێزگاش ناکات.

من پێشتر تەئکیدم کردووەتەوە، ئێستاش دەمەوێت دووپاتی بکەمەوە ئەگەر بەغدا فعلەن ئامادەبێت مووچە بدات، ئێمە سیستەمێکی بایۆمەتری زۆر رێکوپێکمان هەیە، هەرچی مووچەخۆرانی هەرێمی کوردستان هەن لەو سیستەمەدا جێگیرکراون، بەغدا بیەوێت مووچەی مووچەخۆرانی هەرێمی کوردستان بدات، ئێمە زۆر بەخۆشحاڵییەوە قبووڵی دەکەین و دەشمانەوێت ئەوە بکرێت، بەڵام بەڕاستی ئەوەی ئێستا بەغدا دەیەوێت، بەغدا دوولایەنە ئیشدەکات، لەلایەکەوە دەیەوێت بە خەڵک بڵێت من مووچەتان دابیندەکەم، لەلایەکی دیکەوە یاسای بودجەیەک دەنێرێت بۆ پەرلەمان کە نەک تەنیا ناتوانێت گەرەنتی مووچەی مووچەخۆرانی هەرێمی کوردستان بکات، دەیەوێت بە بەکارهێنانی هەندێک دەستەواژە قەوارەی سیاسیی هەرێمی کوردستانیش تێکبدات کە لە دەستووردا دانی پێدا نراوە.

ئەمە روونە دەیەوێت بە دوو شێوە ئیش دەکات، لەلایەک بە خەڵک دەڵێت من ئامادەم بەڵام ناشیکات، لەلایکی دیکەشەوە ئەم یاسای بودجەیە رەنگدانەوەی ئەوەیە کە بەڕاستی نایەوێت ئەو شتە جێبەجێ بکات، ئەگەر دەیەوێت ئەو شتە جێبەجێ بکات ئێمە وەکو حکومەتی هەرێمی کوردستان دیسانەوە دەڵێین ئامادەین، بایۆمەتریمان کردووە، با بفەرموون وردبینی ناوەکانیش بکەن، ئامادەبن ئەوە جێبەجێ بکەن، ئێمە ئامادەین.

پرسیار: دەنگۆیەک بڵاوبووەتەوە گوایە بەڕێزتان بەنیازی ئەوەن  بەسەرۆکایەتیی شاندێک سەردانی بەغدا بکەن تا چەند ئەمە راستە؟

نێچیرڤان بارزانی: مەسەلەی چوون بۆ بەغدا نەخێر هەتا ئێستا وادەی چوون دیارنییە بۆ بەغدا، بەڵام هەڵوێستی ئێمە ئەوەیە، دەبێت کێشەکانی هەرێمی کورستان و بەغدا لەسەر بنەمای دەستوور چارەسەر بکرێت، ئێمە وەکو هەرێمی کوردستان ئامادەین بۆ ئەوەی گفتوگۆیەکی بونیادنەرانە دروست بکەین، لەگەڵ بەغدا بکەوینە گفتوگۆیەکی زۆر جددی بۆ هەموو ئەو کێشانەی کە هەن لە چوارچێوەی دەستووری عێراق چارەسەریان بکەین، ئەو رەغبەتە لای ئێمە هەیە، ئەگەر لایەنی بەرامبەریش ئەو رەغبەتەی هەبێت بەدڵنیاییەوە ئامادەیی لەلایەن ئێمەوە هەیە.

پرسیار: دابەشکردنی مووچەی ئەم مانگە کۆتایی پێدێت، ئایا حکومەت پارەی لەبەردەستە بۆئەوەی مووچەی مانگەکانی داهاتوو دابەش بکات؟

نێچیرڤان بارزانی: مووچەی ئەو مانگە و مانگێکی دیکەش دابەشدەکرێت، دابەشکردنی مووچەی ئەم مانگە تەواو ببێت، دەست بە دابەشکردنی مووچەی مانگێکی دیکە دەکەین.

پرسیار: ئەی راستە کۆمپانیای رۆزسەفت ملیارێک دۆلاری بە حکومەتی هەرێمی کوردسان داوە؟

نێچیرڤان بارزانی: نەخێر شتی وا نییە، بەپێی رێککەوتنێک کە پێشتر هەمانبووە هەندێک پارە بە هەرێمی کوردستان دراوە، بەپێی ئەو گرێبەستە، بەڵام هیچ شتێکی نوێ یان پارەیەکی نوێی بە هەرێمی کوردستان نەداوە.

پرسیار: بەشێک لە میدیای کوردی، کە هەندێکیان میدیای تورکییان کردووەتە سەرچاوە بۆ شکستهێنانی دوو هەوڵی جەنابتان بۆئەوەی سەردانی تورکیا بکەن، ئایا ئەمە تا چەند راستە، ئەگەر راستنییە کەی بەنیازن سەردانی تورکیا بکەن؟ 

نێچیرڤان بارزانی: تورکیا دراوسێی ئێمەیە، هەوڵەکانی ئێمە هەمیشە وابووە کە حەزمانکردووە لەگەڵ وڵاتانی دراوسێ پەیوەندی باشمان هەبێت و سەردانیان بکەین، بەتەئکید ئەگەر بارودۆخە بڕەخسێت بۆ سەردانی تورکیا ئێمە پێمانخۆش دەبێت و ئامادەین سەردانی تورکیا بکەین، بەڵام هیچ هەوڵێک نەبووە تاوەکو شکستی هێنابێت.

پرسیار: لە دوێنێ شەوەوە ئایا حکومەتی عێراق پەیوەندی بە ئێوە کردووە سەبارەت بە هاوکاریکردنی لێقەوماوانی بوومەلەرزەکەی کوردستان؟

نێچیرڤان بارزانی: بەڵێ وەزیری تەندروستیی عێراق پەیوەندی بە وەزیری تەندروستیی هەرێمی کوردستانەوە کردووە، داوای لیستی بریندارەکانی کردووە، تائێستا هەر ئەوەندە کراوە.

داڕشتنەوە: دەرباز ساڵح


 

داڕشتنەوە: دەربا ساڵح

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Ahoora | 23/11/2017 11:19:19 م
گوران باشتر وایه پروژه و پلانی هبی بو هلوشانوه و راست و دروست بوونی خویی، هلوشینیتوه و دستی هاوکاری بو حکومتی کوردی دریژ بکا و پشت و متمانه یی...
گۆڕان پرۆژەکەی بۆ حکومەتی کاتی بڵاودەکاتەوە
| 18 کاژێر لەمەو بەر | (1)
ره شید | 23/11/2017 10:05:10 م
نه ته وه یه کگرتوه کان له ژیر هه ژموونی ئه مریکا دایه و سیاسه تی زلهیزه کان وه ک به رژه وه ندیه کانیان عه ینی حه لقه کانی زنجیر به یه ک به ستراونه ته...
یان کوبیش: ئەو هێزانەی هاتنە کەرکووک هێزی فیدراڵی عێراق بوون
| 16 کاژێر لەمەو بەر | (1)
bawer | 23/11/2017 05:44:03 م
kura aw flimana dameka hana
Rondek Be Dang | 23/11/2017 09:33:18 م
پیڕۆز به‌ت و به‌ هیواێ ژیانه‌ک خۆش بۆ هموو کورده ک و کوردوستانیک و ئه‌وانه‌ی کوردیان و کوردوستانیان خۆش ده‌ۆه‌ت۰
بەهۆی كچێكی نەمسایی بە ئاواتی خۆی دەگات
| 20 کاژێر لەمەو بەر | (2)
Azad Azad | 23/11/2017 06:42:15 م
ته‌نیا ڕێگا بۆ حكومه‌تی كوردستان ئه‌ویش ده‌بێت پارتی بیكات ئیعلانی مقاوه‌مه‌ بكات بۆ ئه‌وه‌ی گۆمه‌كه‌ بشڵقێنێت نه‌ێڵن ئه‌مانه‌ جێی پێی خۆیان قه‌یم...
جەواد یارئەحمەدی | 23/11/2017 08:21:26 م
کاربەدەستانی هەرێم باش دەزانن کە تاکه کەسێکی دەزگای فیدراڵی باوەڕی بەو دەستوورە نیە کە ئەمان هەموو ڕۆژێک پەنای بۆ ئەبەن. دەستوور تەنیا هێزە، لە...
حکومەتی هەرێمی کوردستان وەڵامی لێدوانه‌‌كانى عه‌‌بادی دەداتەوە
| 18 کاژێر لەمەو بەر | (3)

لە بەشەکانی دیکەی رووداوەوە

شەوە رووناکەکانی ئێستا زیانی تەندروستییان هەیە 2 کاژێر لەمەو بەر |

شەوە رووناکەکانی ئێستا زیانی تەندروستییان هەیە

مرۆڤ ماندوو دەکەن و خەوی تێکدەدەن زۆرتر
نەخواردنی نانی بەیانییان مەترسی رەقبوونی خوێنبەرەکان زیاددەکات 4 کاژێر لەمەو بەر |

نەخواردنی نانی بەیانییان مەترسی رەقبوونی خوێنبەرەکان زیاددەکات

زۆربەی ئەوانەی نانی بەیانییان ناخۆن لە رەگەزی زۆرتر
رۆژانە چوار کووپ قاوە مەترسی مردن کەمدەکاتەوە 20 کاژێر لەمەو بەر |

رۆژانە چوار کووپ قاوە مەترسی مردن کەمدەکاتەوە

توێژینەوەیەکی نوێ دەریخستووە زۆرتر
0.235 seconds