رووداو - هەولێر
بەپێی رووپێوێكی وەزارەتی پلاندانانی حكومەتی هەرێمی كوردستان، یەك ملیۆن و 241 هەزار و 417 كەس، كە تەمەنیان گونجاوە بۆ كاركردن، كارناكەن و بەدوای كاریشدا ناگەڕێن. ئەو ژمارەیەش دەكاتە 22.3%ی دانیشتووانی هەرێمی كوردستان.
بەپێی ئاماری وەزارەتی پلاندانانی حكومەتی هەرێمی كوردستان. ئێستا ژمارەی دانیشتووانی هەرێمی كوردستان 5 ملیۆن و 549 هەزار و 100 كەسە. لەو ژمارەیە 3 ملیۆن و 362 هەزار و 611 كەسیان تەمەنیان لە نێوان 15-64 ساڵدایە و دەكەونە بازاڕی كارەوە. هەروەها 224 هەزار و 508 كەس تەمەنیان لە سەرووی 64 ساڵەوەیە و دەكەونە دەرەوەی بازاڕی كار. 646 هەزار و 573 كەس تەمەنیان لە پێنج ساڵ كەمترە. ئەوانەشی تەمەنیان لە 5-15 ساڵدایە ژمارەیان یەك ملیۆن و 315 هەزار و 408 كەسە. لەوانەش ملیۆنێك و 127 هەزار و 683یان قوتابین.
بەپێی ئامارەكە ئەوانەی تەمەنیان لە نێوان 15- 64 ساڵدایە و بە "هێزی كار" ناودەبرێن، ژمارەیان یەك ملیۆن و 382 هەزار و 285 كەسە، لەوانە یەك ملیۆن و 195 هەزار و 263 هەزار كەسیان كار دەكەن. هەروەها 187 هەزار و 22 كەسیان بێكارن، بەڵام ئارەزووی كار دەكەن و بەدوایدا دەگەڕێن.
هەر بەپێی ئامارەكانی وەزارەتی پلاندان، رێژەی بێكاری لە هەرێمی كوردستان 13.5%ە، ئەوانەشی لە چوارچێوەی بازاڕی كاردان و كاردەكەن رێژەی 52%یان لە كەرتی گشتیدان كە ژمارەیان 627 هەزار و 501 كەسە.
لە هەرێمی كوردستان هێزی كار و كەسانی ناكارا، هاوتان، 1.3 ملیۆن كەس كار دەكەن یان دەیانەوێت كار بكەن و بەشوێنیدا دەگەڕێن، بەڵام 1.2 ملیۆن كەس كار ناكەن و بەشوێن كاریشدا ناگەڕێن.
زاگرۆس فەتاح، بەڕێوەبەری گشتیی لە وەزارەتی پلاندانان، لەبارەی ئەو ژمارەیەی كە كار ناكەن و بەدوای كاریشدا ناگەڕێن، بە (رووداو)ی گوت :"زۆربەی ئەو كەسانەی دەكەونە ئەو خانەیەوە ئافرەتن، یان كەسانێكن پێویستیان بەكار نییە".
هۆكاری ئەوەی زۆربەی ئەو ژمارەیە ئافرەتن، بەپێی قسەكانی زاگرۆس فەتاح، بەشێكی لایەنی كۆمەڵایەتییە كە بەربەستە لەبەردەم كاركردنی ئافرەتاندا لەهەرێمی كوردستان، بەشێكی دیكەشی ژینگەی كاركردنە لەهەرێمی كوردستان كە بۆ ئافرەتان گونجار نییە.
وەك زاگرۆس فەتاح دەڵێت "كۆمەڵێك یاسا و رێنمایی لە هەرێمی كوردستاندا گرفتی بۆ كاركردنی ئافرەت دروستكردووە، بەتایبەتی لە كەرتی تایبەت، چونكە ئاسانكاری كەمتری تێدایە بۆ ئافرەتان، بۆ نموونە ئەو ئافرەتانەی منداڵیان هەیە یان دەیانەوێت مۆڵەتی دایكایەتی وەربگرن لە كەرتی تایبەت كەمتر ئاسانكارییان بۆ دەكرێت، ئەمەش وایكردووە ئافرەت زۆر روو لە كەرتی تایبەت نەكات".
