وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

هەڤاڵ كوێستانی: مام جەلال پێیگوتم تۆ لە ئاش ئاشتری

لەلایەن كاوە ئەمین 2/1/2019
هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو) بۆ رووداو: مام جەلال گوتی ئەگەر یەكێتی نووری حەمەعەلی و شەفیق ئاغای كوشتبێ‌، واز لە یەكێتی دێنێ‌
هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو) بۆ رووداو: مام جەلال گوتی ئەگەر یەكێتی نووری حەمەعەلی و شەفیق ئاغای كوشتبێ‌، واز لە یەكێتی دێنێ‌

بەشی چوارەم و كۆتایی

رووداو – سلێمانی

هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو) لە بەشی چوارەم و كۆتایی هەڤپەیڤینەكەی لەگەڵ بەرنامەی پەنجەمۆردا كە شەوی هەینی سەعات 22:05 خولەك لە كەناڵی رووداو پەخش دەكرێ‌، باسی ناكۆكییەكانی نێو كۆمەڵەی رەنجدەرانی كوردستان دەكات كە لە كۆنفرانسی سێیەمدا گەیشتە لوتكە و بە ئاشكرا هەست بە سەرهەڵدانی دوو باڵی جیاواز لەنێو كۆمەڵەدا دەكرا، باڵی دەسەڵاتدار بە رابەرایەتی نەوشیروان مستەفا، هەروەها باڵی كۆمیتەی هەرێمەكان بە رابەرایەتی مەلا بەختیار كە دواجار ئاڵای شۆڕش دروست دەكەن.

رووداو: كاك نەوشیروان دەیگوت لە سەركردایەتییەك كار ناكەم، سالار عەزیز و مامۆستا جەعفەری تێدابێ‌، ئەم ناكۆكیانە شەخسی بوون، یان فیكری بوون؟

هەڤاڵ كوێستانی: ئەوەی كە باست كرد لە كۆنفرانسی یەكەمی كۆمەڵە روویدا، ناكۆكییەكان هەڵبەتە تێكەڵەیەك بوون لە ناكۆكی فیكری، سیاسی و شەخسی. ئەوان ماوەیەكی زۆر بوو بە یەكەوە كاریان دەكرد. گەیشتبوونە شوێنێك كاركردن بە یەكەوە بۆیان زەحمەت بوو. بۆیە كاك نەوشیروان پێیوابوو ئەگەر ئەوان لەو سەركردایەتییە بن، ئەو كار ناكات. 

رووداو: بەڵام دواجار ئەوان لە سەركردایەتییەكەدا بوون؟

هەڤاڵ كوێستانی: كۆنفرانس بۆ چەند رۆژێك دواكەوت، دواتر بە هەوڵی چەند كەسێك گرژییەكان خاوبوونەوە. بەڵام كاك سالار و مامۆستا جەعفەر نەهاتنە نێو سەركردایەتی كۆمەڵەوە كە لە كۆنفرانسی یەك هەڵبژێردران.

رووداو: جیاوازیی بۆچوون هەبوو لەسەر ناوی كۆمەڵە، كێ بوون ئەوانەی داوایان دەكرد ناوی كۆمەڵەی رەنجدەرانی كوردستان/ عێراق بێ‌؟

هەڤاڵ كوێستانی: دوو بۆچوون هەبوو، هەر لە سەرەتاوە كە كۆمەڵە لە ساڵی 1970 دروستبووە، بەناوی كۆمەڵەی ماركسی لینینی ئەندێشەی ماوتسی تۆنگ كوردستان بووە، كۆمەڵە بۆ ئەوە دامەزرابوو لە چوارچێوەی سنووری كوردستانی عێراق ئیش بكات. لە كۆنفرانس بەرەیەك كە زیاتر بەرەی كاك نەوشیروان و گروپی زیندان بوون، پێداگرییان لەسەر ئەوە دەكرد كە نابێ‌ وشەی عێراق بە كۆمەڵەی رەنجدەرانەوە بێ‌، بەرەكەی دیكە ئەوانەی خۆیان بە درێژەپێدەری كۆمیتەی هەرێمەكان یان خەتی شەهید ئارام دەزانی، لەگەڵ ئەوەدا بوون كۆمەڵەی رەنجدەرانی كوردستان/ عێراق بێ‌، بۆ ئەوەی سنووری كاركردنی كۆمەڵە دەستنیشان بكات. بەڵام كە خرایە دەنگدانەوە، بوو بە كۆمەڵەی رەنجدەرانی كوردستان. 

رووداو: تۆ لە كتێبەكەتدا دەڵێی مام جەلال كوردستانی بوو، بەڵام وەكو داش عێراقییەكان بیری دەكردەوە؟

هەڤاڵ كوێستانی: مام جەلال زۆری مەبەست بوو باڵانسی ناكۆكییەكانی ناو كۆمەڵە رابگرێ‌، بەڵام لە واقیعدا زیاتر پشتیوانی لەبەرەی كاك نەوشیروان دەكرد، چونكە بەرەكەی دیكەی بە بەرەیەك دەزانی كە رەنگە رۆژێك لە رۆژان لە خەتی ئەو دەربچن یان لەگەڵ ئەو گیانە چەپی و گەنجییەیان تووشی رووبەڕبوونەوە ببێ‌. من پێموایە مام جەلال زۆرتر عێراقی بوو وەكو سیاسییەك، وەكو سەركردەیەكی عێراقی بیری دەكردەوە. مەبەستم ئەوەیە لە چوارچێوەی كوردستانی عێراق بیری دەكردەوە.

رووداو: لە ساڵی 1980 – 1981 كۆمەڵێك كەس لەناو شاری سلێمانی تیرۆركران، وەكو نووری حەمەعەلی، عەبدولی سوران، شەفیق ئاغا، ئەمانە بۆچی كوژران؟ ئەو نامانەی كە بۆ وریا نێردرابوون، تۆ لە كتێبەكەتدا سەرپێیی باست كردوون، بۆچی؟ 

هەڤاڵ كوێستانی: من لە هەر شتێكدا كە شایەتحاڵ نەبووبم، یان زانیاری زۆر زۆر دروستم لەسەر راستیی رووداوەكە نەبووبێ‌، باسم نەكردووە. من هیچ لەو نامانەی وریام نەبینیوە. مام جەلال زۆر ناڕەحەت بوو، تەنانەت بەیاننامەیەكیشی دەركرد كە ئەوە بە تاوان دەزانێ‌ و كوژراوەكان بە شەهید لە قەڵەم دەدا. تەنانەت هەڕەشەی ئەوەی كرد كە ئەگەر دەركەوت یەكێتی ئەو كارەی كردبێ‌، واز لە یەكێتی دێنێ‌. 

رووداو: هەندێك سەركردەی یەكێتی دەڵێن ئەو نامانەی بۆ وریای وەهاب نووسراون، خەتی كاك نەوشیروانن؟

هەڤاڵ كوێستانی: من بۆ خۆم ئەو نامانەم نەبینیون، تەنیا بیستوومە ئەو نامانە نێردراون بۆ وریا و دواتریش وریا لەسەری كوژرا. بەڵام گومان دەكەم ئەو نامانە بە خەتی كاك نەوشیروان نووسرابن، چونكە كاك نەوشیروان هەر پەیوەندییەكی هەبووبێ‌ بە رێكخستنەكانی ناوشار، لەڕێی سەركردایەتیی ناوخۆی كۆمەڵەوە پەیوەندی كردووە، نەك بۆ كادیرێك یان ئەندامێكی رێكخستنەكانی ناوشار نامە بنووسێ‌. 

رووداو: ئەی شێركۆی شێخ عەلی و جەمالی عەلی باپیر بۆچی كوژران؟

هەڤاڵ كوێستانی: جەمالی عەلی باپیر یەكێك بوو لە فەرماندە زۆر ئازاكانی یەكێتی. فەرماندەی هەرێمی چوار بوو. شێركۆش یەكێك لە فەرماندە زۆر ئازاكانی حیزبی سۆسیالیست بوو. فەرماندەی هەرێمی پێنج بوو. ئەوان هەردووكیان لە یەك ناوچە بوون. ئەوان جیا لە فەرماندەی هەرێمەكانی دیكە توانیبوویان جۆرێك لە هەماهەنگی لە ناوچەكەی خۆیان بەرقەرار بكەن. ئەو پاساوەی كە سەركردایەتی هەیبوو بۆ نەهێشتنی هێزی سۆسیالیست لەو ناوچەیە كە ئەنجامەكەی بە كوژرانی شێركۆ و جەمال و 10 پێشمەرگەی دیكە و برینداربوونی نۆی دیكە كۆتایی هات، ئەوە بوو كە گوایە نامەیەكیان دەستكەوتووە، تاهیری عەلی والی ناردوویەتی بۆ سەركردایەتی سۆسیالیست، لە نامەكەدا باسی پلانێك دەكات كە بەدەستیانەوەیە بۆ پەلاماردانی سەركردایەتی یەكێتی لە ناوچەی نێوزەنگ، بەگوێرەی ئەو پلانە هێزەكانی سەید كاكە و شێركۆی شێخ عەلی لە پشتی قەڵادزێوە پەلاماری سەركردایەتی یەكێتی دەدەن. لەولاشەوە هێزەكانی سۆسیالیست لەگەڵ قیادەی مۆقەتە لە دیوی ئێرانەوە پەلاماری هەمان ناوچە دەدەن و دەتوانن ئابڵوقەی سەركردایەتی بدەن. 

سەركردایەتی گەیشتە ئەو بڕوایەی ئەگەر ئەم دەستپێشخەرییە نەكەن، ئەوان پەلاماری سەركردایەتی دەدەن. من نازانم ئەم زانیارییە تا چەند راست بوو، بەڵام لە هەموو حاڵەتەكاندا ئەگەر ئەو پلانە هەبووبێ‌ یان نا، ئەو حاڵەتەی لە نێوان جەمال و شێركۆدا روویدا، حاڵەتێكی نادروست بوو، زیانی زۆری بە یەكێتی و سۆسیالیست و بەگشتی بە شۆڕشی كورد گەیاند.

رووداو: ئەگەر باسی شەڕی پشتئاشان بكەین، تۆ باس لەوە دەكەی كە ئەو بەڵگانەی خرابوونە بەردەستی ئێوە جیاواز بوون لەگەڵ ئەوانەی بە فیعلی هاتنە دەستتان. بە تایبەتیش لەوێ‌ باسی حاڵەتێك دەكەی كە پێشمەرگەیەك فانیلەیەكی سپی دەرهێناوە و دەیەوێ‌ خۆی تەسلیم بكات، بەڵام بەداخەوە بەوپەڕی دڕندەییەوە دەكوژرێ‌، ئەم هەموو رق و كینەیە لەچییەوە سەرچاوەی گرتبوو؟ 

هەڤاڵ كوێستانی: جوڵانەوەی كورد ئەوەندەی رق و كینەی بەرامبەر نەیارەكانی ناوخۆ هەبووە. 

ئەوەندە رق و كینەی بەرامبەر دوژمنە سەرەكییەكانی نەبووە. هەمیشە بە چاوی پیلانگێڕی سەیری یەكدیمان كردووە. ئێمە پێمانوابوو قیادەی مۆقەتە دروستكراوی ئێران و بە پلان و بەرنامەی ئێران دێن بۆ تێكشاندنی شۆڕشی نوێی گەلەكەمان. ئەوانیش بە هەمان دید سەیری شۆڕشی نوێیان كردووە و پێیانوابووە بۆ لەباربردنی ئەو بەرنامەیە هاتووە كە پێشتر شۆڕشی ئەیلول هەیبووە. حیزبەكانی دیكەی وەكو سۆسیالیست، پاسۆك و شیوعی و.. كەوتوونەتە ژێر كاریگەری یەكێك لەو بەرانە. ئەو دوو بەرەیە بۆ ئەوەی شەرعیەت بدەنە كارەكانی خۆیان، هەوڵیانداوە لایەنی بەرامبەر بە موئامەرەچی و پیلانگێڕ وێنا بكەن. من لە شەڕی پشتئاشان نموونەیەكی بچووكم هێناوەتەوە، بەشێكی بۆ ناشیرینكردنی كوشتنی مرۆڤە، بەشێكی دیكەشی بۆ ئەوەیە بڵێم ئەو هێزانەی پێیانوایە حەقیقەتی رەهایان لایە وانییە، چونكە ئەو بەڵگانەی دەخرانە بەردەم و گوێی ئێمە، هێزیان دەدا بە نووسینەكانی ئێمە بۆ هاندانی پێشمەرگە و كادیر و رێكخستنەكانی خۆمان. یان بۆ تێگەیاندنی جەماوەر كە حەقیقەت لای ئێمەیە و لایەنەكەی دیكە زۆر مەترسیدارن لەسەر شۆڕش. بەهەمانشێوە لایەنەكانی دیكەش هەمان كاریان دەكرد. بەڵام كاتێك تۆ بەڵگەكان دەبینی، ئەوەندە بەهێزنین پاساوت بدەنێ‌ بۆ ئەوەی تۆ پەلاماری لایەنێكی دیكە بدەی. من دوای شەڕی پشتئاشان قەناعەتێكم لەلا دروستبوو كە لە نووسیندا كارێك نەكەم لایەك شەڕكردن بەرامبەر بە لایەنێكی دیكە بە ڕەوا بزانێ‌. یان خەڵك هان بدەم بۆ شەڕكردن.

رووداو: یەكێتیی نووسەران لە شاخ، یەكێتیی نووسەرانی یەكێتی بوو یان یەكێتیی نووسەرانی هەموو نووسەرانی كوردستان؟ 

هەڤاڵ كوێستانی: ئەوكاتەی من بووم بە پێشمەرگە لە ساڵی 1979، لەوێ‌ كۆمەڵێك نووسەری دیكەم بینی وەكو رەفیق سابیر و ئەحمەد دڵزار، هەردووكیان ئەندامی نووسەرانی كورد بوون لە شار، من یەكێتی بووم، ئەوان شیوعی بوون. لەناو هەموو حیزبەكاندا كۆمەڵێك نووسەر هەبوون، بەڵام بەهۆی ئەو دابڕانە قووڵەی لە نێوان پارتی و یەكێتیدا هەبوو، هیچ جۆرە هاتوچۆیەك لە نێوان نووسەرانی ئێمە و پارتی نەبوو. ئەو نووسەرانەی لەگەڵ سۆسیالیست و شیوعیدا بوون و لە یەك ناوچەی جوگرافیدا دەژیاین، دوای گۆڕینەوەی بیروڕا گەیشتینە ئەو قەناعەتەی مادام ئێمە بێبەشبووین لەوەی نووسینەكانمان لە بڵاوكراوە فەرمییەكانی عێراقدا بڵاوبكرێنەوە، دەبێ‌ قەوارەیەك دروست بكەین بۆ نووسەرانی كورد لە شاخ، هەمیش بڵاوكراوەیەكمان هەبێ‌ بۆ ئەوەی نووسینەكانی خۆمانی تێدا بڵاوبكەینەوە.

رووداو: یەكێك لەو نووسەرانەی هاتنە دەرەوە حەمەسەعید حەسەن بوو، كتێبێكیشی نووسی، تۆ لە كتێبەكەتدا دەڵێیت كاك نەوشیروان مستەفا گوتوویەتی كتێبەكە ببینین و بۆی چاپ بكەین، بەڵام ئەو خۆی دەڵێت مام جەلال بڕیاری داوە نەك نەوشیروان.

هەڤاڵ كوێستانی: كاك حەمەسەعید ساڵی 1983 هاتە دەرەوە، ئەوكات كاك نەوشیروان لە دەشتی هەولێر بوو، مام جەلالیش لە ناوچەی خۆشناوەتی، پشتیوانی ئەندازیار كە ئێستاش ماوە ئاگاداری كردمەوە كاك نەوشیروان دەیەوێ‌ سەعات چوار پەیوەندیت پێوە بكات. كاك حەمەسەعیدیش كە زانی كاك نەوشیروان پەیوەندیم پێوە دەكات، گوتی: منیش حەز دەكەم قسەی لەگەڵ بكەم، كتێبێكم هەیە دەمەوێ‌ چاپی بكەم، بەڵام بەر لە چاپكردنی حەز دەكەم رای ئەویش وەربگرم. من لە پەیوەندییەكەدا كە كاك حەمەسەعیدیش ئامادەبوو، پێمڕاگەیاند كاك حەمەسەعیدیش هاتووەتە دەرەوە، كاك نەوشیروانیش خۆشحاڵیی خۆی دەربڕی و بەخێرهاتنی كرد. ئینجا پێمگوت نووسینێكی هەیە دەیەوێ‌ چاپی بكات، بەڵام پێش ئەوە دەیەوێ‌ بیبینی، ئەویش بە دەق گوتی: "بینینی منی ناوێ‌، خۆ ئێمە حیزبی بەعس نین سانسۆرمان لەسەر كتێب هەبێ‌. چی نووسیوە وەكو خۆی بۆی چاپ و بڵاوبكەنەوە".

رووداو: بەڵام حەمەسەعید دەڵێت ئەوەی لەسەر منی نووسیوە هیچی راست نییە؟

هەڤاڵ كوێستانی: ئەوە مەیلی خۆیەتی، من وەڵامی قسەكانی ئەو نادەمەوە. ئەو میوان بووە لە كەرتی پارێزگاریی رادیۆ نەك لە رادیۆ. 

رووداو: زنجیرە وتارێكت نووسی بەناوی (قیادە مۆقەتە لە نێوان لاوەكی و سەرەكیدا) مەبەستت ئەوە بوو كە بڵێی حكومەت سەرەكییە و قیادە مۆقەتە لاوەكییە؟

هەڤاڵ كوێستانی: مەبەستم ئەوە بوو بڵێم قیادەی مۆقەتە لە باتی ئەوەی حكومەتی عێراق بە دوژمنی سەرەكی خۆیان بزانن، یەكێتییان بە دوژمنی سەرەكی خۆیان دەزانی. بە پێچەوانەوە ئێمە قیادەی مۆقەتمان بە دوژمنی سەرەكی نەدەزانی و نابێ‌ ئەوانیش ئێمە بە دوژمنی سەرەكی خۆیان بزانن.

رووداو: تۆ دژی ناردنی هێزی پشتیوانی بووی بۆ رۆژهەڵاتی كوردستان، تەنانەت ئامادە نەبووی بەیاننامەی یەكێتی نووسەرانیش واژوو بكەی كە لە دژی كۆماری ئیسلامی ئێران بوو.

هەڤاڵ كوێستانی: ئەو شەڕەی لە ساڵی 1982 لە نێوان یەكێتی و ئێران روویدا، شەڕی پشتیوانی لە حیزبی دیموكرات بوو، زۆر پێشمەرگە تەنانەت سەركردەش لەگەڵ ئەو شەڕەدا نەبوون. من پێموابوو ئەو شەڕە لە قازانجی یەكێتی نییە و پاساویش دەدەینە ئێران بۆ ئەوەی پەلامارمان بدەن، هەروەها ئێمە ناچار دەكات بەرەو ئەوە بچین لەگەڵ حكومەتی عێراق رێكبكەوین. سەبارەت بە بەیاننامەكەش، كاك محەممەدی حەمەباقی نامەیەكی بۆ كاك نەوشیروان ناردبوو، نووسیبووی ئێمە وەكو یەكێتی نووسەرانی كوردستان پێویستە پشتیوانی لەو هەڵوێستە نەتەوەییەی  یەكێتی بكەین. داوای لە كاك نەوشیروان كردبوو كە من بەیاننامەكە بنووسم. بۆ نەمنووسی؟ من پێموانەبوو ئەوە شەڕێكی نەتەوەیی بێ‌، ئێمە شەڕێك دەكەین دەرەقەتی نایەین. بێجگە لەوە نووسەری لایەنەكانی دیكەشمان تێدابوو. ئەو مافەمان نییە بە ناوی نووسەری لایەنەكانی دیكەش پشتیوانی لە هەڵوێستی یەكێتی بكەین. 

رووداو: دەگوترێ‌ ئەو شەڕەی یەكێتی لە دژی ئێران بۆ خۆشكردنی زەمینەی گفتوگۆ بوو لەگەڵ حكومەتی عێراق، گفتوگۆش كرا.

هەڤاڵ كوێستانی: من پێموابوو ئەو حاڵەتە یەكێتی بە ناچاری بەرەو گفتوگۆ دەبات، چونكە لە هەموو لایەكەوە بە نەیار و دوژمنەكانی ئابڵوقە درابوو، تەنیا لایەك بتوانێ‌ هەناسەیەكی تێدا بدات، ئەوەیە لەگەڵ حكومەتی عێراق رێكبكەوێ‌. بەڵام من نەمدەزانی لە ژێرەوە پەیوەندی هەیە بۆ ئەوەی ئەو گفتوگۆیە بكرێ‌. جگە لەوەش پێشتر هەوڵێكی ئاشتەوایی هەبوو لە نێوان یەكێتی و قیادەی مۆقەتە، من پێموابوو بەهۆی ئەو شەڕەوە ئەو هەوڵە لەبار دەچێ‌. چونكە قیادەی مۆقەتەش بەشدار بوو لەو شەڕەی دژی دیموكرات. خاڵێكی دیكە پێموابوو ئەوەندەی مەزاج و سۆز رۆڵی بینیوە لەو بڕیارەدا، ئەوەندە لێكدانەوە و شیكردنەوەی ورد و زانستیانەی واقیعەكە رۆڵی نەبینیوە.

رووداو: كچ و كوڕێك كە رەدووكەوتوون، لەلایەن پێشمەرگەوە تەسلیمی خێڵ دەكرێنەوە و هەردووكیان دەكوژرێن، ئەمە چۆن لەگەڵ یاساكانی ئێوە دەگونجا كە بە حیساب ئێوە حیزبێكی پێشكەوتنخواز بوون.

هەڤاڵ كوێستانی: ئەوانەی كە ئێمە پێیاندەڵێین شۆڕشی كورد، لە سەرەتاوە شۆڕش نەبوون، ئەوەندەی راپەڕینی چەكداری یان عەشایەری بوون. راستە ئێمە وەكو بەرنامەی تەرحكراو ئاماژەمان پێدابوو كە شۆڕش دەبێ لە ئاستی گۆڕانی كۆمەڵایەتی و ئابووری و سیاسیدا بێ‌، بەڵام لە واقیعدا ئەو گۆڕانكارییانەمان بۆ نەكرا. من باسی رەدووكەوتنم كردووە بۆ ئەوەی بڵێم ئەو شۆڕشەی ئێمە نەیتوانی ئەو حاڵەتە كۆمەڵایەتییە بچووكانە چارەسەر بكات.

رووداو: جیابوونەوەی ئاڵای شۆڕش بۆچی روویدا؟

هەڤاڵ كوێستانی: من كە چوومە دەرەوە دوای ماوەیەك هەستم بەو دووبەرەییەی نێو كۆمەڵە كرد، بەرەی كاك نەوشیروان و بەرەی كۆمیتەی هەرێمەكان. دواترش گرووپی زیندان كە هاتنە دەرەوە چوونە پاڵ بەرەی كاك نەوشیروان. ناكۆكیی نێوان ئەو بەرەیە بە فیكری و شەخسییەوە گەیشتنە شوێنێك بە روونی دیار بن، بەرەی دەسەڵات پێیوابوو بەرەكەی دیكە هەوڵی رێكخستنی ژێربەژێر دەدەن، هەوڵ دەدەن كۆمەڵە و یەكێتی لاواز بكەن. لایەنەكەی دیكەش پێیانوابوو ئەوان لایەنێكی مەزڵوومن، پۆست و پلەیان لێدەسەندرێتەوە. من پێموایە رەفتاری لایەنی دەسەڵات لەناو كۆمەڵەی رەنجدەران كارێكی وای كرد ئەو لایەنەی دیكە خۆیان بە قوربانی و مەزڵووم بزانن. بۆیە ناچاربوون بیر لەوە بكەنەوە وەكو رەوتێكی فیكری و سیاسی رەفتار بكەن.

رووداو: تۆ بۆخۆت لەگەڵ ئاڵای شۆڕش بووی؟ بۆچی ئەو تۆمەتەیان دەخستە پاڵ تۆ؟

هەڤاڵ كوێستانی: من هاوڕێیەتییەكی گەرمم لەگەڵ زۆربەی برادەرانی ئاڵای شۆڕش هەبوو. 

هاوسۆزیش بووم لەگەڵ كۆمەڵێك هەڵوێست و بۆچوونیاندا. كۆمەڵێك سەرنج و بۆچوونم هەبوو لەسەر سیاسەتی سەركردایەتی كۆمەڵە و یەكێتی كە زۆرجار لەگەڵ بۆچوونی ئاڵای شۆڕش یەكی دەگرتەوە، بەڵام قەت ئیشم لە رێكخستنەكانی ئاشدا نەكردووە. 

رووداو: بەڵام لە دیدارێكت لەگەڵ مام جەلال، ئەو پێتدەڵێت شیعرەكەت بوو بە شەفاعەت بۆت؟

هەڤاڵ كوێستانی: مام جەلال چەند بەڵگەنامەیەكی خستە بەردەستم و گوتی تۆ پەیوەندیت بە ئاڵای شۆڕشەوە هەیە، تەنانەت پێیگوتم تۆ لە ئاش ئاشتری. دواجار مام جەلال چاوپۆشیكردنی لەو تۆمەتانەی دەیخستە پاڵ من، بۆ ئەوە گێڕایەوە كە كاتی خۆی شیعرێكم لە میهرەجانی دووی شیعری كوردی خوێندووەتەوە كە بۆ پێشمەرگە و شۆڕشم نووسیوە. ئیدی شەفاعەتەكەی خستە پاڵ شیعرەكە. 
 
رووداو: ساڵی 1989 تۆ جارێكی دیكە مام جەلال دەبینی و یەكێك لەو داواكارییانەی لێی دەكەی ئەوەیە كە مەلا بەختیار ببینی، بۆ؟

هەڤاڵ كوێستانی: مام جەلال لە دەرەوە گەڕابووەوە، زۆربەی خەڵك چوونە تاران بۆ پێشوازی، بەڵام من نەچووم. هەواڵی منی پرسیبوو، گوتبووی فڵان رۆژ دەگاتەوە قاسمەڕەش و با بێت بیبینم، منیش چووم بۆ قاسمەڕەش، خەڵێكی زۆری لێبوو، من لە ژوورەكەی كاك مولازم عومەر بووم، ئازادی سەگرمەش لەوێ‌ بوو، زۆر بە سەختی بریندار بووبوو، كاتێك مام جەلال هات بۆ لامان باوەشێكی گەرمی پێداكردم و ستایشی كردم، پاشان گوتی: شەو وەرە بۆ لام قسە دەكەین، كە چووم بۆ لای زۆر بە گەرمی پێشوازی لێكردم، تەنانەت پێیگوتم من بەناوی خۆم و مەكتەبی سیاسی و سەركردایەتی یەكێتیشەوە داوای لێبوردنت لێدەكەم كە كاتی خۆی هەڵوێستێكی نادروستمان بەرامبەر بە تۆ وەرگرتووە. لەوێ‌ داوای لێكردم كار بكەمەوە لەگەڵ یەكێتی. یان پێویستییەكم هەبێ‌ بۆم جێبەجێ‌ بكات، منیش گوتم، سوپاستان دەكەم هیچم ناوێت، تەنیا دەمەوێ‌ مەلا بەختیار ببینم كە ئەوكات لە زیندان بوو. لە قسەكانی مام جەلال تێگەیشتم كە دەیانەوێ‌ بەم نزیكانە مەلا بەختیار ئازاد بكەن، من كاتێك مەلا بەختیارم بینی، ئەو دیدەی مام جەلالم پێگەیاند. هەرچەندە ئەو پێیوابوو ئازادی ناكەن.


کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟
نیشانەکردن : هەڤاڵ كوێستانی
4464 ژمارەی بینین

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Rebwar | 21/01/2019 12:09:08 م
Dastxosh
دوای ئۆكتۆبەرچییەكان نۆرەی بەرهەم ساڵحە
| 19 کاژێر لەمەو بەر | (1)
سیپان | 19/01/2019 08:19:55 ص
به راستى كاره ساته..وەک کوردیک روژ نیه خەفەت نەخوم بو کچانى کوردى ئیزیدى.گریانم دیت.ئەوەى کچى کوردى ئیزیدى بە ناموسى کورد نەزانیت با خوى به کورد...
بەکرحەسەن | 19/01/2019 11:21:23 ص
زۆر دەستخۆش، هیوادارم هەر بەردەوام بیت، کارێکی زۆر جوانە،کارێکی زۆر بەرزە،هیوادارم بیکەیت بە کتێب،دڵنیاش بە وەک ئەدەبیش بەشێک دەبێت لە ئەدەبی...
هەموو شتێكی داعشی پێ جوان بوو تەنیا كەنیزەكڕاگرتن نەبێ
| 19/1/2019 | (2)
ره شید | 19/01/2019 10:49:00 ص
هه تا کوردستان به شیک بیت له عیراق ئه مریکا و ئه وانیتریش ناتوانن کورد وه ک حه لیفیکی ستراتیژیک بو خویان دا بنین ! به واتایه کی دیکه کورد هه تا نه...
لە چاوەڕوانیی گۆڕانكارییە هەرێمییەكاندا
| 19/1/2019 | (1)

لە بەشەکانی دیکەی رووداوەوە

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات 12 کاژێر لەمەو بەر |

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات

ساڵانە رێگە بە 1500 پزیشكی بیانی دەدرێت زۆرتر
کەمخەوی درێژخایەن هۆکارە بۆ توڕەبوونی بەردەوام 18 کاژێر لەمەو بەر |

کەمخەوی درێژخایەن هۆکارە بۆ توڕەبوونی بەردەوام

کاتی خەوتن مێشک هەموو زانیارییەکان دەگۆڕێت زۆرتر
0.25 seconds