وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

سەرۆكی ئەنجوومەنی ئاسایش: خۆپیشاندانەكانی عێراق ئەنجامی سرووشتی قۆناخی دوای داعشە

لەلایەن مەجید نیزامەدین گلی 9/8/2018
ئولوف سكووگ، سەرۆكی ئەنجوومەنی ئاسایشی نێودەوڵەتی بۆ (رووداو):  زۆر جار لەگەڵ نوێنەرانی كورد كۆبووینەتەوە
ئولوف سكووگ، سەرۆكی ئەنجوومەنی ئاسایشی نێودەوڵەتی بۆ (رووداو): زۆر جار لەگەڵ نوێنەرانی كورد كۆبووینەتەوە

رووداو - نیویۆرك

ئەو ئێستا بە تەنیا باڵیۆزی سوێد نییە لە نەتەوە یەكگرتووەكان، بەڵكو سەرۆكی ئەم خولەی ئەنجوومەنی ئاسایشی نێودەوڵەتیشە كە دووەم جارە ئەو پۆستە وەردەگرێ‌. ئولوف سكووگ، سەرۆكی ئەنجوومەنی ئاسایشی نێودەوڵەتی لە هەڤپەیڤینێكدا لەگەڵ (رووداو) وەڵامی ئەو پرسیارە دەداتەوە كە ئایا ئەنجوومەنی ئاسایش بایەخی ماوە، لە كاتێكدا چەندین قەیران لە جیهاندا بە چارەسەرنەكراوی ماونەتەوە، لەوانەش قەیرانی سووریا؟

رووداو: بەهۆی شكستی ئەم ئەنجوومەنە لە مەسەلەی سووریا و بابەتی دیكە، پرسیار و گومانێكی زۆر هەیە لەسەر بایەخی ئەنجوومەنی ئاسایشی نێودەڵەتی. ئایا لەسەر ئاستی نێودەوڵەتی ئیتر ئەنجوومەنی ئاسایش گرنگییەكی ماوە؟

ئولوف سكووگ: پرسیاری زۆر لەو بارەوە دەكرێت. ئایا كەموكورتی نەتەوەیەكگرتووەكانە؟ ئایا بەهۆی ئاڵۆزیی رەوشی سووریایە؟ یان هەردوو هۆكارەكە؟ پێموایە هەردوو هۆكارەكەیە. هەروەها ئەو راستییەش هەیە كە ئەنجوومەنی ئاسایش ئاستەنگی بۆ دروست دەبێت بەهۆی ڤیتۆی هەندێ وڵاتەوە. ئەگەر ئەو ناكۆكییە هەبێت لەنێوان ئەو وڵاتانەی مافی ڤیتۆیان هەیە، ئەوە ئەنجوومەنی ئاسایش بەشێوەی ئۆتۆماتیكی پەكی دەكەوێت. بەڵام دەبێ دان بەوەشدا بنێین كە رەوشی سووریا لە راددەبەدەر ئاڵۆزە. چەند ئەزموونێكی رابردووش هەن كە وا دەكەن نەتوانین رێكاری سەربازی لەدژی سووریا بگرینەبەر. ئەزموونی لیبیامان هەیە كە هێزی دەرەكی دەسەڵاتی ئەو وڵاتەی رووخاند، بەڵام هیچ پلانێك نەبوو بۆ دوای ئەوە. ئێستاش هەندێ وڵاتی جیهان باجی ئەوە دەدەن كە لە لیبیا روویدا. بەكارهێنانی هێزی سەربازی مەسەلەیەكی زۆر ئاڵۆزە. ئەنجوومەنی ئاسایش ئەو بژارەیەی لەبەردەمە، بەڵام بەكارهێنانی شتێكی زۆر سەختە.

رووداو: ئێستا هەندێك دەڵێن  رۆڵی ئەنجوومەنی ئاسایش لە ئاستی نێودەوڵەتی گەورەكراوە و لە قەبارەی خۆی زیاتر حیسابی بۆ دەكرێت. بەڕێزتان هاوڕان؟

ئولوف سكووگ: نەخێر، پێموانییە رۆڵی ئەنجوومەنی ئاسایش گەورەتر لەخۆی نیشاندرابێت. لە نێو ئەنجوومەن گفتوگۆ هەیە لەبارەی سنوورەكانی و ئەگەرەكانی بەردەمی، بەڵام دەبێ ئەوەش بپرسین بەدیل چییە؟ ئەگەر ئەنجوومەنی ئاسایش نەبا، ئەگەر نەتەوە یەكگرتووەكان نەبا. من رازیم نەك تەنیا لە كاری ئەنجوومەنی ئاسایش، بەڵكو لە كاری نەتەوە یەكگرتووەكانیش بەگشتی. كە چۆن گفتوگۆی بەردەوام هەیە لە نێوان ئەو وڵاتانەی هەموو كاتێك پێكەوە هاوڕانین، تەنانەت هەندێكیان لە شەڕدان لەگەڵ یەكدی. لێرە كۆدەبنەوە، بەردەوام نێوبژیوانییان لەنێواندا دەكرێت. ئەوە كارێكی بەردەوامە. بە رۆژێك و دوو رۆژ ئەنجاممان دەستناكەوێ. كۆریای باكوور بۆ نموونە، ئەنجوومەنی ئاسایش كۆدەنگ بوو فشار بخرێتە سەر ئەو وڵاتە، تاوەكو ئەو كاتەی پێشێلی بڕیارنامەكانی ئەنجوومەنی ئاسایش بكات، تاقیكردنەوەی مووشەكی بكات و بەرنامە ئەتۆمییەكەی بەرەو پێش ببات. ئەنجوومەنی ئاسایش ئابڵوقەی توندی خستە سەر ئەو وڵاتە. ئەو سزایانە گوشاری زۆریان لەسەر كۆریای باكوور درووست كرد، ئەو گوشارانە بوونە هۆی رازیبوونی كۆریا بە گفتوگۆ و هەوڵی دیپلۆماسی. پێموایە مەسەلەی كۆریای باكوور دەتوانرێ وەك نموونەیەك بەكاربهێنرێت بۆ سەركەوتوویی ئەنجوومەنی ئاسایش.

رووداو: ئەو سەركەوتنەی لە بابەتی كۆریای باكوور كە باسی دەكەن، بەبێ هەماهەنگی لە نێوان ئەمریكا و رووسیا رووینەدەدا و هەروەها رۆڵی چینیش گرنگ بوو. بێ ئەو جۆرە هەماهەنگییە ئەم ئەنجوومەنە ناتوانێت بجوڵێتەوە، بەڵام ئێستا هەماهەنگی لە نێوانیان لە ئاستێكی نزمدایە..

ئولوف سكووگ: بەڵێ و نەخێر، خراپتر بووە. لەماوەی ئەو ساڵ و نیوەدا كە سوید ئەندامی ئەنجوومەنی ئاسایشە، واتە لە 2017ەوە، چەندینجار روویداوە كە بە ئاشكرا هەندێك لە ئەندامەكان دەمەقاڵێیان هەبووە و قسەی ناشیرینیان بەیەك گوتووە و بێڕێزییان بەیەك كردووە. من هەمیشە هەڵوێستم نەرێنی بووە بەرامبەر ئەو جۆرە هەڵسوكەوتانە. چونكە وەك باستكرد، رێزی ئەنجوومەنی ئاسایش كەم دەكاتەوە وەك ئەنجوومەنێك كە ئیش بۆ پاراستنی خەڵك دەكات. دەبێ وریا بین ئەنجوومەنی ئاسایش وا بەكاربهێنین كە ئەنجام بەرهەم بهێنێ بۆ ئەنجامدانی گۆڕانكاری مەیدانی، لەبری ئەوەی تەنیا كورسییەكی بێ مانابێت بۆ دەربڕینی هەڵوێستی وڵاتانمان. ئەوە پەیامێكە كە هاوكارەكانم لە ئەنجوومەنی ئاساییش زۆر ماندوون هێندەی بیبیستن، چونكە من زۆر جەخت لەسەر ئەو خاڵە دەكەمەوە. هەر 15 باڵیۆزەكەمان مانگی نیسان بردنە سوێد لەگەڵ سەرۆكی ئەنجوومەن، چووینە ناوچەیەكی دوور تەنیا بۆ ئەوەی پێكەوە كات بەسەر ببەین، بۆ گفتوگۆكردن لەسەر چۆنێتی پێكەوە كاركردن و زانینی ئامانجە هاوبەشەكانمان، بە لەبەرچاوگرتنی چاوەڕوانییەكانی خەڵك و نەتەوە یەكگرتووەكان. 

رووداو: هاوتا رووسیەكەت لێرە پێیگوتین پەیوەندییەكانی نێوان رووسیا و ئەمریكا لە سەردەمی شەڕی سارد خراپترە. ئەو لێكدانەوەیەی باڵوێزی رووسیات پێ راستە یان نا؟

ئولوف سكووگ: نەخێر، لەوەدا لەگەڵی هاوڕا نیم. بێگومان ئەو گلەیی لەوە هەیە پەیوەندی نێوان رووسیا و ئەمریكا لەسەر ئاستی باڵا زۆر گەرم نییە، كە پێموایە رووسیا دەیەوێ باشتر بێت. رەنگە مەبەستی قسەكەی ئەوە بێت. بەرەوپێشبردنی ئەو پەیوەندییانە سوودی دەبێت بۆ ئاشتی جیهان. بەڵام وەك باڵیۆزی سوێد لە ئەنجوومەنی ئاسایش پێویستە بڵیم چەند پرەنسیپێك هەن كە دەزانین رووسیا پەیڕەوییان ناكات. ئێمە ناتوانین واز لەو پرەنسیپانە بێنین تەنیا بۆ رازیكردنی رووسیا. ئێمە زۆر رەخنەمان هەبووە لە هەندێك لە رووداوەكانی سووریا، وەكو پێشێلكردنی یاسای نێودەوڵەتی مافی مرۆڤ، رووسیا پشتگیری  حكومەتێك دەكا كە یاسای نێودەوڵەتی پێشێل كردووە. لە ئۆكراینا و  ئەوروپا پێشێلكردنی یاسا نێودەوڵەتییەكان لەلایەن رووسیاوە بەردەوامە. ئێمە ناتوانین واز لەو پرەنسیپانە بهێنین، بەڵام لەبەر سوودی هەندێ ئەجێندای دیكە، باشكردنی پەیوەندییەكانی نێوان ئەمریكا و رووسیا شتێكی باش دەبێت.

رووداو: كاتێك دێیتە سەر بابەتی پرۆژە بڕیاری 2254 ئەنجوومەنی ئاسایش كە دەربارەی دەستپێكردنی پرۆسەی سیاسیە لە سووریا. هەموو وڵاتان لێرە لەسەری هاوهەڵوێستن بە ئەمریكا و رووسیاشەوە. بەڵام پرۆژە بڕیارەكە زۆر گشتگیرە و وردەكاری شێوازی جێبەجێكردنی تێدا نییە.  رووسیا ئێستا خەریكە ئەو وردەكاریانە دیاری دەكات لە رێگەی كۆنفرانسەكانی سۆچی، رووسیا رۆڵی سەرەكی هەیە نەك ئێوە، نەك هێزە رۆژئاواییەكان و نەك ئەندامانی دیكەی كۆمەڵگای نێودەوڵەتی و نە خەڵكی سووریاش زۆر رۆڵیان هەیە. باشە ئێوە بەدیلتان هەیە بۆ ئەم پرۆسەیە كە رووسیا سەركردایەتی دەكات؟

ئولوف سكووگ: پێموانییە هیچ شوێنگرەوەیەك هەبێت بۆ بڕیارنامەی 2254، بەڵام بێگومان گۆڕانكاری مەیدانی روویداوە لەدوای دەرچوونی بڕیارنامەكە. ترسی هەندێكمان ئەوەیە كە حكومەتی سووریا ئێستا لە مەیدانی شەڕ سەركەوتووترە، بۆیە كەمتر ئامادەیی نیشان دەدات بۆ چوونە نێو دانوستنادنی سیاسی جددی. كە لەو بڕیارنامەیەدا ئاماژەی پێ كراوە. بێگومان بابەتەكە تەنیا حكومەت نییە، پێویستە كۆمیتەیەكی دەستووری هەبێت بۆ ئۆپۆزسیۆن و نەتەوەیەكگرتووەكان لەو نێوەدا رۆڵی خۆی ببینێت. بەڵام ئێمە ناتوانین چاوپۆشی بكەین لەوەی لە سووریا روودەدات. یەك رێگە هەیە كە بۆ ئێمە پرەنسیپێكی زۆر گرنگە. چەند یاسایەك هەن كە دەبێ لە كاتی شەڕیشدا پەیڕەو بكرێن و پێشێل نەكرێن. لە سووریا دەمێكە ئەو یاسایانە پێشیلكراون. لەم مانگەدا لە  ئەنجوومەنی ئاساییش چەند دەست پێشخەرییەكمان راگەیاند بۆ ئەوەی لانیكەم بتوانین بەشێك لە دانیشتووانی سووریا بپارێزین لە خراپترین نەهامەتییەكانی شەڕ. بڕیارنامەیەكمان ئامادە كردووە بۆئەوەی هەنگاو بنێین و بیخەینە بواری جێبەجێكردنەوە  بەتایبەتی لە سووریا. 

رووداو: لە سەرەتای قەیرانی سووریا، ئەمریكا و وڵاتانی ئەوروپا هەڵوێستێكی روونیان هەبوو كە بریتی بوو لە پشتگیری لە خەڵكی سووریا. ئێستا ئەو خەونە كۆتایی هات. ئێستا حكومەتی سووریا كۆنترۆڵی بەشێكی زۆری سووریا دەكات. ئایا ئێستا كاتی ئەوە نەهاتووە كە بڵێین ئەمریكا و وڵاتە ئەوروپیەكان دەستیان لە سووریا شوشتوەتەوە و خەونی گۆڕانكاری  لە سووریا كۆتایی هات؟

ئولوف سكووگ: نەخێر، پێموانییە كۆتایی هاتبێت. بێگومان نائومێدی هەیە لەبارەی رووداوە مەیدانییەكانی سووریا، بەڵام بڕیارنامەی ئەنجوومەنی ئاسایش هەن كە دەمانەوێ جێبەجێیان بكەین بۆ هێنانەدی چارەسەرێكی دیموكراسیانەی گشتگیر. ئایا رۆڵی ئەسەد چ دەبێت لەو گواستنەوەیەدا، ئەوە مشتومڕی لەسەر دەكرێت. بڕیارنامەكان بە تەواوی روون نین لەبارەی ئەوەوە، بەڵام  بڕیارنامەكان زۆر روونن لەبارەی پڕۆسەیەكی سیاسی گشتگیر. بەوجۆرەی ئێمە دەیبینین، هەڵبژاردنێكی ئازاد و دادپەروەر بكرێ‌. هەموو ئەو كەسانەی سووریایان جێهێشتووە بتوانن دەنگ بدەن. ئەگەر هەڵبژاردنێكی ئازاد بكرێ‌، بە بۆچوونی من زۆر زەحمەتە سەرۆكی ئێستای سووریا لە دەسەڵاتدا بمێنێتەوە.

رووداو: من رەشبینم و لەو باوەڕە نیم ئەوە بەمزووانە لە سووریا رووبدات، بەڵام لە لایەنی ستراتیژیەوە ئەنجامێكی روونی دیكەی ئەم شەڕە هەیە. ئەویش بوونی رووسیایە لە دەریای ناوەڕاست. راستە پێشتر رووسەكان هەر لە بنكەی سەربازی تەرتووس بوون، بەڵام ئێستا قەبارەی سەربازیان زۆر فراوانترە و سیستەمێكی مووشەكی ئاڵۆزیان هێناوەتە ناوچەكە كە دەتوانن كاریگەریان هەبێت لەسەر دەریای ناوەڕاست. من زۆرجار لە هاوتا ئەوروپیەكانیشتم پرسیوە كە بۆچی ئەوروپا وا دەرناكەوێت كە زۆر نیگەرانە و  ناترسێت لەو راستییە نوێیە كە رووسیا خەریكە دەبێتە هێزێكی دەریای ناوەڕاست، دەریایەك كە وەكو باخچە پشتەوەی هەموو ئەوروپا وایە؟

ئولوف سكووگ: من ناڵێم ئێمە نیگەران نین، پێشتر گوتم نائومێدییەكی زۆرمان هەیە بەرامبەر رووداوەكانی سووریا بەدرێژایی ساڵانی رابردوو. ئەو خۆپیشاندان و ناڕەزاییە سرووشتی و ئاشتیانە لەدژی رژێمی دیكتاتۆری سووریا سەریانهەڵدا و دواتر گۆڕان، بەڵام لە مەیدانەكەشدا گۆڕانكاری روویداوە، كە ناچارماندەكات واقیعمان قبووڵبێت. بەڵام وازمان لە خەونی سووریایەكی دیموكراسی نەهێناوە. كە پێویستە رووسیاش كار بۆ ئەوە بكات. ئێمە نیگەرانین لەوەی كاریگەری رووسیا ببێتە مایەی پێشێلكردنی پرەنسیپەكانی ئەوروپا. با راستگۆ بین، وڵاتانی یەكێتی ئەوروپا، كە زۆریان ئێستا ئەندامی ئەنجوومەنی ئاسایشن، زۆر زۆر چالاكن لە هەموو هەوڵە سیاسییەكاندا بۆ دۆزینەوەی ئەو چارەسەرە سیاسیەی كە بەدوایدا دەگەڕێین.  ئەگەر سەركەوتووبن، ئەوە كاریگەری رووسیا كەمتر دەبێتەوە. كاتێك لە لۆژیكی سەربازییەوە شتەكان دەگۆڕی بۆ لۆژیكی سیاسی، كاریگەری رووسیا و هەر وڵاتێكی دەرەكی سنووردار دەبێت. 

رووداو: لە سووریا كۆمەڵێك وڵات سەربازیان هەیە نەك هەر رووسیا. دەربارەی توركیا و عەفرین. هەرچەندە لە میدیاكانی رۆژئاوایی زۆر باس ناكرێت، بەڵام كێشەی زۆر لە عەفرین هەیە. توركیا هێشتا نەیتوانیوە سەقامگیری ئەو ناوچەیە بە تەواوی بپارێزێت و دەیان هەزار ئاوارەی كورد ناتوانن بگەڕێنەوە سەر ماڵ و حاڵی خۆیان. لە ماوەی ئەم مانگە لە ئەنجوومەنی ئاسایش هیچ چالاكی و گفتوگۆیەك هەبووە لەسەر ئەم بابەتە؟

ئولوف سكووگ: سوێد و چەند وڵاتێكی دیكە نیگەرانی خۆیان دەربڕیوە لەبارەی عەفرین. ئێمە بەشێوەیەكی بەردەوام لەگەڵ هەمو قۆناخەكانی ئەو شەڕە ناڕەزایی خۆمان دەربڕیوە، هەر لە حەڵەبەوە بۆ ناوچەكانی باشوور، عەفرینیش بە هەمانشێوە. ئێمە پرەنسیپێكمان هەیە، بەڵێ هەمووان مافی شەرعی خۆیانە بەرگری لە خۆیان بكەن لەدژی ئەو رێكخراوە تیرۆرستیانە، ئەوانەی لەلایەن نەتەوە یەكگرتووەكانەوە خراونەتە لیستی تیرۆرەوە. بەڵام ئەو هەوڵە شەرعییە پێویستە بەپێی یاسا نێودەوڵەتییەكان بێت. نابێ زیانی مەدەنی هەبێت. هەموو ئەو پرەنسیپانە لەبەر چەند هۆكارێك لە سووریا پێشێل كراون. 

رووداو: تاكە لایەن كە رۆڵی لە قەبارەی خۆی بچووكتر دەبینرێت و زۆر گوێ لە بۆچوونی ناگیرێت كوردە. ئەوان رۆڵیان لە زۆر لایەنی دیكە زیاترە. هەست ناكەیت كە گوێنەگرتن لەو لایەنانەی كە دەوڵەت نین كاریگەری نێگەتڤی هەبوو لەسەر كارەكانی ئەم ئەنجوومەنە؟

ئولوف سكووگ: بەڵێ من حەزدەكەم قسە بۆ هەموو ئەوانە بكەم كە كاریگەرییان هەیە و لەمەیدانەكە چالاكن. بەدڵنیاییەوە ئێمە بایەخی زۆر بە بینینی نوێنەرانی كورد دەدەین كاتێك سەردانی نیویۆرك دەكەن. بەشێكی لەبەرئەوەی ئەوان ئاگاداری راستییەكانن كە لە مەیدانی سووریا چ روودەدات، بەڵام لەهەمانكاتدا دەبینین كە دانیشتووانی كورد لە عێراق و سووریا رۆڵێكی گەورەیان هەبوو، بۆ نموونە لە شەڕی داعش لە عێراق و سووریا. باوەڕموایە نەتەوە یەكگرتووەكان، هەرچەند تەنیا نوێنەری حكومەتەكانی تێدان،  پێویستە كاری باشتر بكات و قسە لەگەڵ هەموو ئەو لایەن و پێكهاتە و رێكخراوەكانی كۆمەڵگەی مەدەنی بكات بەشێوەیەكی زۆر باشتر لە ئێستا. بەڵێ ئەوە كارێكە كە دەكرێ بكرێ، هیودارم هەمووان ئەو شێوازە بگرنەبەر.

رووداو:  لە عێراق داعش هیچ شار و ناوچەیەكی گەورەی لەدەست نەماوە، بەڵام ئێستا ترس هەیە كە شەڕ و ئاژاوەیەكی دیكە لە عێراق دروستبێتەوە. ئێستا خۆپیشاندانی فراوان هەیە لە عێراق. هەڵوێستی ئەنجوومەنی ئاسایش چییە؟

ئولوف سكووگ: هەڵوێستی سوێد ئەوەیە هەرچیمان لەدەست بێت بیكەین لە رێگەی نەتەوە یەكگرتووەكان و بە تەنیاش بەرنامەی باشمان هەن لەگەڵ كورد و حكومەتی عێراقیش. پێموایە ئێستا لە قۆناخی پێكهێنانی حكومەت داین، هیوادارم رێز بگیرێت لە ئەنجامی ئەو دانوستاندنانە. بەشێوەیەكی باش مامەڵەی لەگەڵ بكرێت. هەوڵێكی گشتگیری نا تائیفی هەبێت بۆ پێكهێنانی حكومەتێك كە نوێنەرایەتی هەموو خەڵكی عێراق بكات.  بەباوەڕی من ئەو خۆپیشاندانانە شتێكی نائاسایی نین، تووڕەیی گەورەیە بەرامبەر سیاسییەكان، رێژەی بەشداری لە دەنگدان كەم بوو، كە بەبۆچوونی من ئەوە جۆرێكە لە بێڕێزی بەرامبەردەسەڵاتداران. مانای وایە كە ئەوان پێداویستییە راستەقینەكانی خەڵكیان دابین نەكردووە. كاتێك داعش خەریكە بە تەواوی نامێنێت، چاوەڕوانییەكانی خەڵك دابینكردنی پێداویستییەكانی رۆژانەیە، باشكردنی رەوشی ئابووری و نەهێشتنی گەندەڵی. بەرپرسانی باش كە داواكاری خەڵك دابینبكەن، پێداویستییە بنەڕەتییەكانی رۆژانە وەكو كارەبا و ئاو و خۆراك. پێموایە ئەوە پێشبینی خەڵكی عێراقە لەو بەرپرسانەی بەهۆی ئەم هەڵبژاردنەوە دەچنە نێو دەسەڵات. هیوادارم نەتەوە یەكگرتوەكان هاوكاربێت بۆ چارەسەركردنی هەموو ئەو كێشانە.

رووداو: مانگی رابردوو ئەنجوومەنەكە لە كۆبوونەوەیەكی 15 خولەكیدا ماوەی كاری یۆنامی و بەرنامەی نەتەوەیەكگرتووەكانی لە عێراق درێژكردەوە. ئەمەش لە لایەن هەریمی كوردستانەوە رەخنەی لێگیرا. ئەوان پشێنیازیان هەبوو كە یۆنامی رۆڵی زیاتر بگێڕێت لە چارەسەكردنی كێشەی ناوچە ناكۆكی لەسەرەكان. بۆچی ئەو پێشنیازەی كوردتان پشتگوێخست؟ بۆچی ئەو پەلەیەتان كرد لە دەنگدان لەسەر پرۆژە بڕیارەكەی یۆنامی؟

ئولوف سكووگ: درێژی ماوەی كۆبوونەوەكان مانای گرنگی و ناگرنگی بابەتەكان نییە.  دوای پرۆسەیەكی درێژی دانوستاندن كارنامەكان نوێدەكرێنەوە. پێداچوونەوە بە رۆڵی یونامیدا كرا. دەخوازرێت چاوی وردمان لەسەر پاراستنی ئاشتی و ئەرك و ئۆپەراسیۆنە مەیدانییەكانی یونامی بێت. پێموایە لە عێراق پاڵپشتی گەورە لە یونامی دەكرێت. بەڵام ئەنجامی كۆتایی ئەو دانوستاندنانە، كە 15 ئەندام دانوستاندیان كرد لەسەر كارنامەكە، بێگومان هەمیشە سازش هەیە. پێموانییە هیچ كەسێك هەست بكات مەسەلەی كەركووك و كێشەی دابەشكردنی داهاتی سەرچاوەكانی عێراق بەسەر دانیشتوواندا وەك هەڵوێستی دژی كورد ببینرێت. پێشنیازی من ئەوەیە سەیری ئەو راستییە بكەن كە نەتەوە یەكگرتووەكان بە تەواوی ئامادەیە رۆڵی خۆی ببینێت بۆ چارەسەركردنی ناكۆكییەكانی عێراق. بەڵام چارەسەرەكان هەمیشە جێگیر و بەردەوامترن ئەگەر ئیرادەی سیاسییان لە پشت بێت.

رووداو: دوا بابەت دەمەوێت پرسیار لەسەر بكەم دەربارەی ئێران و رێكەوتنامە ئەتۆمییەكەیە.  ئەمریكا كشایەوە و بەمزووانە سزای قورسی ئەمریكی لە دژی ئێران دەچێتە بواری جێبەجێكردنەوە. بە بۆچوونی ئێوە كۆتایی ئەم یاریە چۆن دەبێت؟

ئولوف سكووگ: پێموانییە نزیك بین لە كۆتایی ئەم مەسەلەیە. ئێمە هێشتا هیواخوازین بتوانین ئەو دابەشبوون و لێكدووركەوتنەوەیە هەڵبگێڕینەوە بۆ هەماهەنگی و كاری هاوبەش. بەرای من ئەگەر هەموو سەركردەكانی رۆژهەڵاتی نێوەڕاست سەیری سەركردەكانی ناوچەكانی دیكەی جیهان بكەن كە چۆن زوو زوو كۆدەبنەوە، چەندین وانە هەن كە فێری بن. بەرای من پێویستە سەركردەكان بیر بكەنەوە ئایا باشترە بەردەوام بن لە ململانێ لەگەڵ دراوسێكانیان یان باشترە بەدوای چارەسەری ئاشتیانەدا بگەرێن. هەماهەنگی بكەن. ئیسڕائیل لە پێگەیەكی زۆر باشتردا دەبوو ئەگەر لەگەڵ فەلەستیینیەكان لە ئاشتیدا بووایە. سعودیە و ئێران هەردووكیان لە پێگەیەكی باشتردا دەبن ئەگەر تەنیا سەیری ئەگەرەكانی هەماهەنگی بكەن لەبری گرژی و ئاڵۆزی. لەبارەی پرسیارەكەت لەسەر ئەمریكا، بەرای من پێویستە ئەوەی ئێمە بیكەین وەك ئەمریكا و ئەوروپا، هانی ئەو هەماهەنگییە بدەین، پێویستە رێگە بە دابەشبوونی زۆرتر نەدەین. ئێمە پشتگیری گەورەمان لە رێككەوتن لەگەڵ ئێران كرد، چونكە بەرنامە ئەتۆمییەكە دەخاتە ژێر چاودێری. ئێستا دەزانین لە كوێین چونكە پشكنین و چاودێریی ورد و كاریگەرمان هەیە. ئەوە ئیمتیازی رێككەوتنەكەیە، مانای ئەوە نییە كە بەتەواوی رازی بین بەوەی لە ئێران روودەدات.

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Ayub | 15/08/2018 09:46:36 ص
له وبڕوایه دانیم بتوانێت بیباته وه
مارسێلۆ و رامۆس لە دەستکەوتێکی مێژوویی نزیکدەبنەوە
| دوێنێ کاژێر 01:52 | (1)
جه‌وده‌ت سۆفی | 15/08/2018 07:35:45 ص
ئه‌م هه‌واڵه‌ دڵمی ته‌زاند. چونكه‌ هه‌ڵسوكه‌وتی ئه‌و خانمه‌ و منداڵه‌كانی كه‌ له‌گه‌ڵ ئه‌و پیاوه‌ ده‌یكه‌ن گه‌وره‌ترین به‌ها و پیرۆزیه‌تی كورد...
بریندارێكی شەڕی داعش لەلایەن خێزانەكەیەوە ئەشكەنجە دەدرێ‌
| دوێنێ کاژێر 08:58 | (1)
ڕیبوار مەحمود | 14/08/2018 05:00:49 م
زۆر ڕاستە کۆمپانیای کیو نێت قۆڵبڕینی زۆری تێدایە و ئیشەکەشیان حەرامە و سووخۆری تێدایە، بۆیە پێویستە ئەوەی موسوڵمانە لیی بەدوور بێت ، پێویستە حکومەتی...
yahya | 15/08/2018 06:43:54 ص
من ده بينم ئه وه ى ناوى خوى ناوه ئازاد ئازاد بيريزى به رامبه ر به ئايينى بيروزى كورد كردوه كه ئاينى ئسلامه وبه ليزنه ى بلاى فتوه به حكومه تى...
لیژنەی باڵای فەتوا: مامەڵەکردن لەگەڵ كۆمپانیای كیونێت دروست نییە
| 13/8/2018 | (3)
Awat | 14/08/2018 05:54:18 م
زور گرنگە پەرە بەو جوورە هەنگاوانە بدری هەتا متمانە مابەینی هاولاتی و دکتور پسپور ئاسایی بی
لە هەولێر پزیشکی ساڵ دیاریکرا
| دوێنێ کاژێر 08:46 | (1)

لە بەشەکانی دیکەی رووداوەوە

 لە ئەمریکا ئالوودەبوونی خانمانی دووگیان بە ئازارشکێنەکان زیادیکردووە 11 کاژێر لەمەو بەر |

لە ئەمریکا ئالوودەبوونی خانمانی دووگیان بە ئازارشکێنەکان زیادیکردووە

لەنێوان ساڵی 1999 تاوەکو ساڵی 2014 رێژەکە زۆر زۆرتر
توێژینەوە: شۆرتی فراوان ژمارەی تۆوەکانی پیاوان زیاددەکات 12 کاژێر لەمەو بەر |

توێژینەوە: شۆرتی فراوان ژمارەی تۆوەکانی پیاوان زیاددەکات

هۆرمۆنەکانی پەیوەست بە سێکس رێکدەخات زۆرتر
دەرمانێک هەستی گەیشتن بە لێواری مردن درووستدەکات 16 کاژێر لەمەو بەر |

دەرمانێک هەستی گەیشتن بە لێواری مردن درووستدەکات

ئەوانەی دەگەنە لێواری مردن هەستێکی تایبەتیان هەیە زۆرتر
0.171 seconds