وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

هەڤاڵ كوێستانی: ناونیشانی كتێبەكەم لە قسەیەكی مام جەلال وەرگرتووە

لەلایەن كاوە ئەمین 12/12/2018
هەڤاڵ كوێستانی ، نووسەری كتێبی (ئەو رۆژانەی نیشتیمان هی هەمووان بوو) : لەسەر وتارێكی رەخنەیی وازم لە یەكێتی قوتابیان و پارتی هێنا
هەڤاڵ كوێستانی ، نووسەری كتێبی (ئەو رۆژانەی نیشتیمان هی هەمووان بوو) : لەسەر وتارێكی رەخنەیی وازم لە یەكێتی قوتابیان و پارتی هێنا

رووداو- سلێمانی 

هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو) كە بیرەوەرییەكانی نووسەرە لە سەردەمی پێشمەرگایەتی، لەم هەڤپەیڤینەدا كە پوختەی بەرنامەیەكی پەنجەمۆری كەناڵی (رووداو)ـە و بەچەند ئەڵقەیەك بڵاودەبێتەوە، باسی پەیوەندیكردنی خۆی بە كۆمەڵەی رەنجدەرانی كوردستان و چوونی بۆ قەرەداغ و دواتریش سەركردایەتی یەكێتی، هەروەها باسی جیابوونەوەی بزووتنەوەی سۆسیالیست لە یەكێتی و ناكۆكییەكانی نێوان یەكێتی و حیزبی دیموكراتی كوردستان دەكات.


رووداو: با هەر لە كتێبەكەتەوە دەستپێبكەین: "ئەو رۆژانەی نیشتیمان هی هەمووان بوو"، بۆچی ئەو ناوەت هەڵبژارد، ئێستا هی هەمووان نییە؟

هەڤاڵ كوێستانی: ئەوكاتەی من بووم بە پێشمەرگە، یان چوومە رێكخستنە نهێنییەكانەوە، نەك من هەموو ئەوانەی دەچوونە رێكخستنەكان یان دەبوونە پێشمەرگە، ژیانی خۆیان دەخستە سەر دەستی خۆیان و ئامادەبوون بۆ قوربانیدان لە پێناوی نیشتیماندا. ئێمە نیشتمانمان بە هی هەمووان دەزانی، بۆیە دەمانتوانی خۆمانی لەپێناودا بەخت بكەین. من ئێستاش نیشتیمان بە هی هەمووان دەزانم، بەڵام بەداخەوە خەڵك زۆرجار دەسەڵات و نیشتیمان تێكەڵ بە یەكدی دەكەن، پێیوایە نیشتیمان نیشتیمانی دەسەڵاتە، نەخێر. دەسەڵات هی كەمینەیەكە، بەڵام نیشتیمان هی هەمووانە و بۆ هەمووانە. 

دەمەوێ‌ ئاماژە بەوە بدەم، ناونیشانەكە لە دێڕێكی نێو كتێبەكە وەرگیراوە، باسی ئەوە دەكات كە بەفرێكی زۆر باریوە، كۆمەڵێك پێشمەرگە سەنگەری خۆیان جێهێشتووە و هاتوونەتە خوارێ‌، مام جەلال دەیانبینێ‌ و لێیان تووڕە دەبێ‌ و پێیاندەڵێ‌ بڕۆنەوە سەنگەرەكانتان، بۆ وا دەزانن نیشتیمان هی منە، نیشتیمان هی هەمووانە.

رووداو: ئەگەر بگەڕێینەوە سەردەمی منداڵی و گەنجێتیت، كەی تێكەڵ بە سیاسەت بووی؟

هەڤاڵ كوێستانی: هەر لە سەرەتای چوونم بۆ قوتابخانە شۆڕشی ئەیلوول دەستیپێكرد، ئیدی ئەو ناوچەیەی ئێمە (بیتوێن) هێزی چەكداری زۆری لێ‌ كۆبووەوە كە زۆرتر هێزی عەشایری بوون. بەهۆی ئەو شەڕانەی لەو ناوچەیە دەكران، ئیدی هەر لە منداڵییەوە ئاشنایەتیمان لەگەڵ شەڕ و تەقوتۆق پەیدا كرد، ئەو كاتەشی لە قوتابخانە بووین، هەمیشە مەترسی بۆردومانی فڕۆكە هەبوو، مەترسی هێرش هەبوو، بۆیە زۆرجار لە ترسی بۆردومان دەچووینە دەشت بۆ شوێنی خۆشاردنەوە.

رووداو: ئەوكات سەركردایەتیی شۆڕش دەهاتنە ئەو ناوچانە؟

هەڤاڵ كوێستانی: بەڵێ‌ دەهاتن. من بۆ یەكەمجار مام جەلالم لە چوارقوڕنە بینی، هاتبوو بۆ پرسەیەك. زۆر منداڵ بووم، رەنگە ساڵی 1962 بووبێ‌. دواتر لە ساڵی 1963 كە گفتوگۆ لە نێوان شۆڕش و حكومەتی عێراق دەستیپێكرد، یەكێك لە دانیشتنەكان لە چوارقوڕنە بوو، تەنانەت بارزانی بەخۆی و هێزەكەیەوە چەند رۆژێك لە قوتابخانەكەی ئێمە مانەوە. دواتر كۆبوونەوەی تر لە رانیە كرا. بۆیە ناوچەكەی ئێمە هەمیشە ناوچەی چڕبوونەوەی هێزەكانی پێشمەرگە بووە.

رووداو: تۆ لەگەڵ یەكێتیی قوتابیان سەروكارت نەبووە؟

هەڤاڵ كوێستانی: من دوای بەیاننامەی 11ی ئادار چوومە ریزەكانی یەكێتیی قوتابیانەوە، لە چوارقوڕنە ئەندامی دەستەی بەڕێوەبردنی قوتابیان بووم. چالاكی زۆریشمان هەبوو. من لە قوتابیان چالاك بووم، بەڵام لە شوێنێك لە قوتابیان كشامەوە، بەهۆی نووسینی بابەتێكی رەخنەییەوە بوو كە ناوچەی پارتی لە رانیە بە نووسینەكەم ناڕەحەت بوون.   

رووداو: نووسینەكە چی بوو؟

هەڤاڵ كوێستانی: یەكێتی لاوان لە رانیە شانۆگەرییەكیان پێشكەشكرد، منیش هەندێك سەرنجم لەسەر شانۆگەرییەكە نووسیبوو، ناردم بۆ رۆژنامەی برایەتی كە زمانحاڵی پارتی بوو، لەوێ‌ بڵاوكرایەوە، ئەوان پێیانخۆش بوو گوتیان ئەوە رەخنەیە لە شانۆگەرییەكە و شانۆكارەكان. 

بەشێوەیەكی ناڕاستەوخۆش رەخنە لە چالاكڤانەكانی پارتی، بۆیە گوتیان یان دەبێ‌ داوای لێبوردن بكەی یان شتێك بنووسە لەسەر دیوە باشەكانی شانۆگەرییەكە، یان دەبێ‌ تەجمیدت بكەین، منیش گوتم لە جیاتی هەموو ئەمانە دەست لەكار دەكێشمەوە. ئیدی وازم لە یەكێتی قوتابیان هێنا.

رووداو: لە ساڵی 1975 كە شۆڕش تێكدەچێ‌، ئێوە هەندێكجار بە "ئاشبەتاڵ" ناوی دێنن. دواتر لەسەر ئەمەش قسە دەكەین، ئێوە دەتانەوێ‌ دەست بە شۆڕش بكەنەوە، بەڵام لە رێگەی شیعرەوە...

هەڤاڵ كوێستانی: رەنگە ئەوكاتە سەرەتای شیعری من بووبێ‌. ئەوكات یەكێك لە شیعرەكانم بۆ رادیۆی شۆڕش نارد و بڵاوكرایەوە. ئەمە بۆ من هاندانێكی باشبوو. بەتایبەتی ئەوكات كۆمەڵێك ئەدیب و رۆشنبیر بەرنامە ئەدەبییەكانی رادیۆیان بەڕێوەدەبرد. دوای ئەوەش هۆنراوەیەكی دیكەم نووسی بۆ یەكەمجار لە گۆڤاری بەیاندا بڵاوكرایەوە كە هۆنراوەیەكی شۆڕشگێڕی بوو. لە دوای ئاشبەتاڵیش كە تۆ دەڵێی تۆ وای پێدەڵێی، دیسان بەردەوام بووم لە شیعرنووسین. ئەوكاتەی كە سەنگەری سیاسی و پێشمەرگە چۆڵ بوون، ئەدەب رۆڵێكی گرنگی بینی، بە تایبەتی شیعر لە پڕكردنەوەی ئەو سەنگەری بەرگرییەی كە دەبوو بەرامبەر رژێمی بەعس هەبێت.

رووداو: بەرەی پارتی دەڵێن نسكۆی شۆڕش، بۆچی بەرەكەی دیكە وەكو ئیستفزاز وشەی ئاشبەتاڵیان بەكارهێنا؟

هەڤاڵ كوێستانی: ئەو وشەیە لە ئەدەبیاتی یەكێتی پەرەی پێدرا، بەڵام بەر لە دروستبوونی یەكێتی، وشەی ئاشبەتاڵ وەكو وشەیەكی میللی بڵاوبوو. هەر ئەو رۆژەی بڕیاری كۆتاییهاتنی خەباتی چەكداری درا، خەڵك ئەو وازهێنانەیان بە ئاشبەتاڵ ناوبرد. وشەی ئاشبەتاڵ وشەیەكی میللییە و هیچ پەیوەندی بە ئایدۆلۆژییەوە نییە، بۆ پشتیوانی لایەنێك یان دژایەتی لایەنێكی دیكە نییە، بۆیە حەقە وشەكە وەكو خۆی وەربگیرێ‌.

رووداو: شیعرێكت هەیە بەناوی "دیسان بەفر گڕی گرت" ئەوە هی سەردەمی پێشمەرگایەتیە یان پێش ئەوەی بچیتە دەرەوە؟

هەڤاڵ كوێستانی: ساڵی 1979 قوتابیانی كورد ئەوانەی لە زانكۆی مووسڵ دەیانخوێند، گەشتێكیان سازكرد بۆ ناوچەی دڵۆپە لە هەولێر. منیش بەڕێكەوت ئەوكاتە لەوێ‌ بووم، دەعوەتیان كردم لەگەڵیان بچم. لەوێش داوایان لێكردم شیعرێك بخوێنمەوە. ئەو شیعرەی كە من خوێندمەوە نووسیبووم بۆ ئەوەی بیدەم بە میهرەجانی دووی شیعری كوردی، بەڵام لەوێ‌ خوێندمەوە بەناوی "ئەمجارە بەفریش گڕ دەگرێ‌". ئەمە پەیوەندییەكی زۆری بە شۆڕشەوە هەبوو، بەڵام دوای ئەوەی شیعرەكەم خوێندەوە، باری ئەوێ‌ كەمێك تێكچوو، هەندێك لە برادەرەكانم ئامۆژگارییان كردم كە ئەوێ‌ بەجێبێڵم چونكە گەشتەكە لەژێر چاودێریی ئەمندایە. ئیدی منیش ئەوێم جێهێشت و گەڕامەوە بۆ هەولێر. 

رووداو: شیعرەكەت پێشكەشی میهرەجانەكە نەكرد؟

هەڤاڵ كوێستانی: با ناردم، بەڵام دوو سێ‌ رۆژ پێش میهرەجانەكە ئاگاداریان كردمەوە كە بڵاوناكرێتەوە، چونكە زۆر توندە، ئەگەر بڵاوی بكەنەوە، من و ئەوانیش تووشی سەرئێشە دەبن. بۆیە بە شیعرێكی دیكە بەناوی "دوا نامە" بەشداریم كرد.

رووداو: ئیدی ئەمە دوا نامە بوو، چوویتە دەرەوە؟

هەڤاڵ كوێستانی: كە ناوم لە شیعرەكە نا دوا نامە، زۆرتر مەبەستم ئەوە بوو كە رەنگە ئەمە دوا شیعرم بێ‌ و لەسەر ئەو شیعرە تووشی گیران و تەنانەت لەسێدارەدانیش ببم. هەرچەندە وادەرنەچوو. بەڵام بوو بە دوا شیعری من لەناو شاردا. ئیدی دوای ئەوە بووم بە پێشمەرگە. 

رووداو: تۆ كەی پەیوەندیت كرد بە ریزەكانی كۆمەڵەوە، لەڕووی فكرییەوە خۆت ئامادە كردبوو ببیتە ئەندامی كۆمەڵە؟

هەڤاڵ كوێستانی: من 18 ساڵم تەواو نەكردبوو كە بە ئەندامی پارتی وەرگیرام. بەڵام دوای وازهێنام لە پارتی و یەكێتی قوتابیان، فیكری چەپ بوو بە هاندەری من بۆ ئەوەی بەرەو ئەو لایەنە بڕۆم. 

زۆرتر دیراسەی ئەو بابەتانەم دەكرد كە پەیوەندیان بە فیكری چەپەوە هەبوو، زیاتریش لە سەرچاوە فەلەستینییەكانەوە، ئەوكات گۆڤاری هەدەف دەردەچوو كە نووسەرە فەلەستینییەكان دەریاندەكرد، لە رێگەی ئەوانەوە فیكری چەپ زیاتر لەلای ئێمە بڵاوبووەوە. جگە لەوەش كتێبەكانی ماوتسی تۆنگ كە هەندێكیان كرابوون بە كوردی. كتێبەكانی لینین كە هەندێكیان كرابوون بە عەرەبی. 

رووداو: ئێوە ئاگاداری دروستبوونی كۆمەڵە بوون، دەتزانی ئەو رێكخراوە هەیە.

هەڤاڵ كوێستانی: نەخێر نەماندەزانی. دەمەوێ‌ ئەوەش بڵێم تێكشكانی رەوتی ناسیۆنالیستی لەنێو كورد لە ساڵی 1975 بەدواوە، وایكرد گەنجان زۆرتر بیر لە بەدیل بكەنەوە. ئەوكاتیش رەوتە ماركسییەكان رەواجێكی زۆریان هەبوو. 

رووداو: خۆ ئەوكات شیوعیش هەبوو، بۆچی نەبوون بە شیوعی؟

هەڤاڵ كوێستانی: ئێمە زیاتر چاومان لە رێكخراوە ماركسییە شۆڕشگێڕەكان دەكرد، ئەوان كاریگەرییان لەسەر ئێمە هەبوو، بەڵام حیزبی شیوعی چونكە كەوتبووە فەلەكی سۆڤیەتەوە، ئەوكات ئێمەش سۆڤیەتمان بە پشتیوانی دەوڵەتی بەعس دەزانی، نەدەكرا كەسێكی شۆڕشگێڕی ماركسی ببێ‌ بە شیوعی. 

رووداو: چۆن پەیوەندیت بە كۆمەڵەوە كرد؟

هەڤاڵ كوێستانی: من سەرەتا ئاگاداری دروستبوونی كۆمەڵە نەبووم. لە نەورۆزی 1976 لە زانكۆی سلێمانی كۆڕێكی شیعر خوێندنەوە هەبوو. دوای كۆڕەكە بەشێوەی خۆپیشاندان لە زانكۆ هاتینە دەرەوە، دەستمان بە هوتاف كێشان و گوتنی سروود كرد. دوای ئەوەی پیاوانی بەعس پەلاماریان داین و هەر یەكەمان بەلایەكدا رامانكرد، من بە رێكەوت لەگەڵ یەكێك لە خۆپیشاندەران چووینە كۆڵانێك، لەوێ‌ چووینە ماڵێك كە خزمی ئەو كەسە بوو. ئیدی وردە وردە ئاشنایەتیمان زیادی كرد و ئەو پێیگوتم كۆمەڵە هەیە. من لە ساڵی 1976 چوومە ریزەكانی كۆمەڵە.  

رووداو: پێشتر كە كەسێك دەچووە دەرەوە، دەبووایە كەسێكی بناسیایە، جا لە رێكخستنی نهێنی بووایە، یان دەیانناردەوە شار چالاكییەكی بكردایە و بیسەلمێنێ‌ كە دژی حكومەتە. تۆ نامەت پێبوو؟ ئەو جۆرە مامەڵانەت پێ‌ شتێكی راست بوو؟

هەڤاڵ كوێستانی: من لەسەر داوای رێكخستن چوومە دەرەوە و نامەی ئەوانیشم پێبوو. من بەنیازبووم بچمە دەرەوە خوێندنی باڵا بخوێنم، بەڵام ئەوان گوتیان زۆر پێویستمان بە كەسی وەكو تۆیە بچیتە شاخ. بەڵام ئەوكاتە كە خەڵك دەچووە دەرەوە یان دەبووایە خەڵكی ناسیاوی ناوچەكە بووایە، یان دەبووایە نامەی رێكخستنی پێبێ‌، یان كەسێك ببێ‌ بە كەفیلی. ئەگەر گومانیان لێكردبایە رەنگە ماوەیەك ئازاریان بدایە، نەوەك جاسووسی حكومەت بێ‌، یان نارنجۆكێكیان دەدایێ‌ بڕوات چالاكییەك لەناو شاردا بكات. ئەمە ئالیەتێكی خراپ بوو بۆ وەرگرتنی پێشمەرگە، چونكە ئەو كەسە چەكی نەدیوە، راهێنانی نەكردووە، رەنگە بەو هۆیەوە خۆی بەربكەوێ‌ یان خەڵكی دیكە بكوژێ‌. بەڵام لەبەر ئەوەی بەعس جاسووسی دەنارد بۆ ناو پێشمەرگە، رەنگە ئەوانیش لەو قۆناغەدا لەو ئالیەتەیان زیاتر شك نەبردبێ‌. دواتر وردە وردە ئەم میكانیزمەش نەما.

رووداو: تۆ ساڵی 1979 دەبیتە پێشمەرگە، سەرەتا دەچی بۆ قەرەداغ، بەڵام دواتر لەوێ‌ نامێنی؟

هەڤاڵ كوێستانی: من لە قەرەداغ بە ناونیشانی كادیری ناوچەی قەرەداغ دەستبەكاربووم، بەڵام كە مەلا بەختیار لەوێ‌ منی بینی، گوتی دەبێ‌ تۆ بێیت بۆ سەركردایەتی، لەوێ‌ شوێنی باشتر هەیە بۆ توانا و كار و چالاكی تۆ. ئیدی منیش لەگەڵی چووم بۆ سەركردایەتی.

رووداو: شەهید ئارام لە ناوچەی تەنگیسەر شەهید دەبێ‌، لەوێ‌ گومان لە چۆنیەتی كوژرانەكەی دەكرێ‌، لە نێو كۆمەڵە باسی ئەو گومانانە دەكرا؟

هەڤاڵ كوێستانی: من بەر لەوەی قەرەداغ جێبهێڵم، چووین بۆ تەنگیسەر بۆ سەر گۆڕی شەهید ئارام، تەنانەت لەوێ‌ شیعرێكیشم خوێندەوە كە بۆ شەهیدبوونی ئەو نووسیبووم. لەوێ‌ زۆر باسی شەهید ئارام دەكرا، زۆرتر باسی دیوە جوانەكانی شەهید ئارام دەكرا. بەڵام بۆ مەسەلەی گومان لەوەی خەڵك دەستی هەبووە لە شەهیدكردنیدا ئەوكات ئەو شتە باس نەدەكرا. دواتر كە چوومە سەركردایەتی و لە ئەنجامی هەستكردن بەو ناكۆكیانەی لە سەركردایەتی هەبوو، باس لەو گومانانە دەكرا. 

رووداو: ئەوكاتە پەیوەندی یەكێتی لەگەڵ دیموكرات و كۆمەڵە چۆن بوو؟

هەڤاڵ كوێستانی: ئەوكاتەی لە ئێران ئینقیلاب كرا، سەركردایەتی دیموكرات لە عێراق بوو، كە شۆڕش سەركەوت گەڕانەوە. كۆمەڵەش رێكخراوێك بوو تازە دەركەوتبوو. یەكێتی بۆ یارمەتیدانی دیموكرات و كۆمەڵە هێز و كادیرێكی زۆری نارد، بەڵام دواتر كە ئێمە بەو ناوچە سنووریانەی ئەوێدا رەتبووین كە دەكەوتنە ژێر كۆنترۆڵی ئەوان، هەستمان بە شتێك لە ناكۆكی دەكرد لە نێوان یەكێتی و حیزبی دیموكرات، بەڵام كۆمەڵە وانەبوو، بەهۆی كۆمەڵەی رەنجدەرانەوە پەیوەندییەكی بەهێزمان هەبوو. بەڵام دوای ئەوەی كۆماری ئیسلامی كەوتە سەرپێ و سوپای پاسدارانی دروستكرد و پەلاماری كوردستانی دا، بەشێكی زۆر لە هێزە كوردییەكان ناوچەكانی خۆیان جێهێشت و هاتنە ناو زەنگ، بە هێزە فارسییەكانیشەوە. یەكێتی پشتیوانی زۆریشی كردن، بەڵام گرژییەك لە نێوان یەكێتی و حیزبی دیموكراتدا هەبوو، ئەمە كۆمەڵێك هۆكاری هەبوو، لەوانە دیموكرات پێیوابوو كۆمەڵە دروستكراوی یەكێتییە و بۆ دژایەتی ئەوانە. خاڵێكی دیكە ئەوە بوو كە حیزبی دیموكرات پەیوەندییەكی پتەویان لەگەڵ حكومەتی عێراقدا هەبوو، رەنگە لە ترسی بڕینی ئەو كۆمەك و هاوكارییەی لە بەعسەوە بۆیان دەهات، نەیانویستبێ‌ پەیوەندییان لەگەڵ یەكێتی بەهێز بێ‌. 

رووداو: ئەوكات مام جەلال هەوڵی دروستكردنی بەرەیەكی دا، بەڵام سەری نەگرت؟

هەڤاڵ كوێستانی: مام جەلال كۆمەڵێك هەوڵی دا شتێك لە شێوەی یەكێتی نیشتیمانی لە ئێران دروست ببێ‌. لە نێوان دیموكرات و كۆمەڵە و هێزەكەی شێخ عیزەدین، هێزەكەی مەلا شێخ جەلال، بەڵام دیارە ئەمە سەرینەگرت. هەروەها هەوڵی زۆری دا گفتوگۆ لە نێوان كۆماری ئیسلامی و هێزە كوردییەكان دروستبكات، كۆمەڵێك دیداریش كران.

رووداو: لەوێ‌ كە نوێنەرایەتی كوردی رۆژهەڵات دروست دەبێ‌، یەكێك لە مەرجەكان بۆ گفتوگۆ دەركردنی قیادەی مۆقەت بوو، ئایا یەكێتی یان مام جەلال دەستیان لەوەدا هەبوو؟

هەڤاڵ كوێستانی: ئەو ناكۆكییەی بەناوی باڵی جەلالی و مەلایی كە دروستبوو، دوای ئاشبەتاڵ و دەستپێكردنەوەی شۆڕش كە یەكێتی بە شۆڕشی نوێ و پارتی بە شۆڕشی گوڵان ناوی دەبات، درێژەیان هەبوو. ئیدی كۆمەڵێك كارەساتی بەدوادا هات، لەوانەش كارەساتی هەكاری، بەڵام كاتێك كە شۆڕشی ئیسلامی لە ئێران سەریگرت. قیادەی مۆقەتە پاڵیان دایە پاڵ كۆماری ئیسلامی. ئەمە وایكرد زەمینە بۆ یەكێتی ئاسانتر بێ‌ ئەو شەڕە كۆن و درێژخایەنەی كە هەیە پاساوی زۆرتری هەبێ‌ بۆ درێژەدان بە شەڕەكە. خاڵێكی دیكە لەو شەڕانەی كە لەنێوان دیموكرات و سوپای پاسداراندا دەكرا، باس لەوە دەكرا كە قیادە هاوشانی پاسداران شەڕ لە دژی دیموكرات دەكات.

ئەوانە ئەو زەمینە دەروونییەی لەلای ئێمە سازكردبوو كە لێدانی قیادە مۆقەتە وەكو ئەركێكی نیشتیمانی تەماشا بكرێ‌. بۆیە كاتێك كە هێزە كوردییەكانی ئێران كۆبوونەوە و لە ئەنجامی ئەو گفتوگۆیانەی كە باسمانكردن لە نێوان كۆماری ئیسلامی و هێزە كوردییەكان، بەیاننامەیەكی هەشت خاڵییان ئامادە كرد خاڵی هەشتەمی بەیاننامەكە باسی دەركردنی قیادە مۆقەتە دەكات لە ئێران. 

بە بڕوای من ئەوە قورسایی و كاریگەری مام جەلالی زۆر تێدابوو، ئەوكات حیزبی دیموكرات لەسەر ئەو خاڵە رازی  نەبوون. ئەوان داوایان دەكرد كە تەنیا سەرانی قیادەی مۆقەتە بگرێتەوە. 

رووداو: كەی مام جەلالت بینی، ئەوەی لە خەیاڵی خۆت وێنات كردبوو بۆ مام جەلال وادەرچوو؟

هەڤاڵ كوێستانی: ئەوكاتە بوو كە لەگەڵ مەلا بەختیار لە قەرەداغەوە چووین بۆ سەركردایەتی.

هەر ئەو رۆژە لەگەڵ مەلا بەختیار و ملازم عومەر چووین بۆ سەردانی مام جەلال كە بارەگاكەی لە توژەڵە بوو. كە چووین بۆ لای مامۆستا شێخ عیزەدین حوسێنی و كاك سەڵاح موهتەدی لەلای بوون. 

رووداو: پێشتر مام جەلال تۆی دەناسی؟

هەڤاڵ كوێستانی: مام جەلال دووربەدوور منی دەناسی. رەنگە بەهۆی ئەو شیعرە بووبێ‌ كە لە میهرەجانی دووی شیعری كوردی خوێندمەوە، چونكە زۆربەی شیعرەكان خرانە سەر كاسێت و نێردران بۆ شۆڕش، مام جەلال گوێی لێگرتبوو، زۆر زۆر پێی خۆشحاڵ بووبوو. تەنانەت كە چووین بۆ بارەگاكەی هەڵسایەوە و بەدەم خوێندنەوەی كۆپلەیەكی شیعرەكەمەوە پێشوازی لێكردین. 

رووداو: بزووتنەوەی سۆسیالیست لە یەكێتی جیادەبێتەوە، تۆ سەردانیان دەكەی، لەسەر ئەمە گلەییت لێدەكرێ‌، ئەمە چۆن بوو؟

هەڤاڵ كوێستانی: من كە گەیشتمە سەركردایەتی بزووتنەوە جیاببوونەوە، لەگەڵ ئەوەدابوون حیزبی یەكگرتووی سۆسیالیستی كوردستان دروست بكەن. سێ‌ برادەرم لەوێ‌ هەبوون، كاك شێخ محەممەدی سەرگەڵوو و فەقێ‌ بایز و موحسین بایز. حەزم كرد سەردانیان بكەم. من زۆر گوێم بەوە نەدەدا ئێمە ناكۆكیمان هەیە. هێشتا میكرۆبی رق و كینە و دووبەرەكی نەهاتبووە جەستەی منەوە. 

تەنیا پرسم بە مامۆستا جەعفەر كرد، پێمگوت دەچم بۆ سەردانی ئەو برادەرانە. ئەوان ئەوكات خەریكی گفتوگۆ بوون لەگەڵ حكومەتی عێراق و بەنیازبوون لە بەرامبەر ئەو مافانەی گوایە حكومەت پێیاندەدات، بچنەوە شار. دوای ئەوەی كە گەڕامەوە، من هەر بە سروشتی وەرمگرت، بەڵام لە كۆبوونەوەیەكی كادیرانی كۆمەڵەدا رەخنە لەو سەردانەی من گیرا. 

رووداو: دەگوترێ‌ یەكێتی و كۆمەڵە هیچ حیسابیان بۆ بزووتنەوە نەدەكرد، بۆیە جیابوونەوە.

هەڤاڵ كوێستانی: بزووتنەوە لە دوو باڵ پێكهاتبوو، باڵێكی درێژەكێشانی باڵی جەلالی و باڵەكەی دیكەش مەلایی. باڵی جەلالی لە كارەساتی هەكاری كۆتایی هات، ئیدی باڵی مەلایی زاڵ بوو بەسەر بزووتنەوەدا. ئەوان پێیانوابوو نابێ‌ چیدی لەژێر سێبەری مام جەلال و یەكێتیدا بمێننەوە. ئەوان بانگەشەی ئەوەیان دەكرد كە خەتی سێیەم بن لە نێوان پارتی و یەكێتی. خاڵی جەوهەری ئەوە بوو ئەوان پێیانوابوو مادام یەكێتی دروشمی رووخانی رژێمی هەڵگرتووە، بواری گفتوگۆ لە نێوان یەكێتی و حكومەتی عێراقدا نییە. ئەوانیش بەرنامەی خەباتی خۆیان لەسەر ئەوە دانابوو لە رێگەی گفتوگۆوە مافەكانی كورد بەدەستبهێنن. هەرچەندە دڵنیا نیم بەڵام دەگوترێ‌ قاسملووش رۆڵی هەبووە لە هاندان و جیابوونەوەی بزووتنەوە لە یەكێتی، ئەوان پێیانوابوو بەمە یەكێتی لاواز دەبێ‌. لاوازبوونی یەكێتیش واتە لاوازبوونی خەتی كۆمەڵە و هێزەكەی شێخ عیزەدین حوسێنی.


 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

ره شید | 19/01/2019 10:49:00 ص
هه تا کوردستان به شیک بیت له عیراق ئه مریکا و ئه وانیتریش ناتوانن کورد وه ک حه لیفیکی ستراتیژیک بو خویان دا بنین ! به واتایه کی دیکه کورد هه تا نه...
سرهد | 22/01/2019 08:30:35 ص
لێکدانەوەیەکى واقیعبینانەیە، دەست خۆش برا.
لە چاوەڕوانیی گۆڕانكارییە هەرێمییەكاندا
| 19/1/2019 | (2)
Azad Azad | 21/01/2019 08:38:25 م
ده‌ست خۆش بۆ بۆچونه‌كانت كاك مه‌جید گلی، به‌قه‌ناعه‌تی من ئه‌مه‌ریكا ده‌یه‌وێت توركیا راگرێت به‌ ئارامی وه‌ك هاو په‌یمان به‌ڵام له‌ راستیدا بۆ...
سیناریۆ و نهێنییەكانی پشت ناوچە ئارامەكەی سووریا
| 21/1/2019 | (1)
Azad Azad | 21/01/2019 07:25:55 م
تاوانی هه‌ر گه‌وره‌ و درندانه‌ منداڵ كوشتنه‌ ...!!! حه‌قی وایه‌ له‌هه‌ر كۆی دونیابێت بی هێنرێته‌وه‌ دادگای بكرێت و سزای هه‌ڵواسینی بۆ ده‌ركرێت.
وردەکاریی کوژرانی باوک و کوڕە سێ ساڵانەکەی لە حاجیاوا
| 21/1/2019 | (1)
Rebwar | 21/01/2019 12:09:08 م
Dastxosh
Rizgar Khoshnaw | 21/01/2019 05:08:48 م
خوێندنه وه ی شته کانی ڕێبوار تامێکی زۆر تایبه تی هه‌ یه ، هه‌ رچه نده له وانه یه ڕێک وه کو ئه و بیر نه که یته وه ، به ڵا م ئه وه نده ورده کاری به...
دوای ئۆكتۆبەرچییەكان نۆرەی بەرهەم ساڵحە
| 21/1/2019 | (2)

لە بەشەکانی دیکەی رووداوەوە

فلتەرەکانی سناپچات، هۆکارن بۆ ئەنجامدانی نەشتەرگەری جوانکاری 3 کاژێر لەمەو بەر |

فلتەرەکانی سناپچات، هۆکارن بۆ ئەنجامدانی نەشتەرگەری جوانکاری

نەشتەگەری لووت، فیلەر و بۆتۆکس زۆرتر
بەریتانیا.. میوزیک، دانس و وێنەکێشان وەک دەرمان بۆ نەخۆش دەنووسرێن 15 کاژێر لەمەو بەر |

بەریتانیا.. میوزیک، دانس و وێنەکێشان وەک دەرمان بۆ نەخۆش دەنووسرێن

دەیانەوێ لە زۆربەکارهێنانی دەرمان رزگاریان ببێت زۆرتر
لە ئوسترالیا ئەپلیکەیشنێك پشکنینی توانای بیستنی قوتابییان دەکات 16 کاژێر لەمەو بەر |

لە ئوسترالیا ئەپلیکەیشنێك پشکنینی توانای بیستنی قوتابییان دەکات

د. گێما کوخ: زوودەستنیشانکردنی کەمبیستن زۆرتر
0.219 seconds