وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

د.ئەحمەد نەقیبزادە: دەوڵەتێك بۆ كورد كە هاوخوێنمانن لە بەرژەوەندیی ئێرانە

لەلایەن فوئاد رەحیم 15/3/2019
د.ئەحمەد نەقیبزادە، بیرمەندی ناسراوی ئێرانی و پسپۆڕی زانستە سیاسییەكان بۆ (رووداو): ئەگەر كوردستانی عێراق سەربەخۆ ببێ لەدایكبوونی ئێرانێكی دیكە دەبینین
د.ئەحمەد نەقیبزادە، بیرمەندی ناسراوی ئێرانی و پسپۆڕی زانستە سیاسییەكان بۆ (رووداو): ئەگەر كوردستانی عێراق سەربەخۆ ببێ لەدایكبوونی ئێرانێكی دیكە دەبینین

رووداو - هەولێر

بەپێچەوانەی سیاسەتوانان و كاربەدەستانی وڵاتەكەی، سەربەخۆیی كوردستان بە گرنگ دەزانێ و پێیوایە لە بەرژەوەندی ئێرانە. د.ئەحمەد نەقیبزادە، بیرمەندی ناسراوی ئێرانی و پسپۆڕی زانستە سیاسییەكان، میوانی فۆرومی هەولێر بوو كە لە سەرەتای ئەم مانگە لەلایەن ناوەندی لێكۆڵینەوەی رووداو لە ژێر ناونیشانی (ئاسایش و سەروەری لە رۆژهەڵاتی ناوەڕاست) بەڕێوەچوو. نەقیبزادە لە هەڤپەیڤینێكدا لەگەڵ (رووداو) روانگەی خۆی لەبارەی گشتپرسی، پەیوەندیی ئێران و عێراق، ململانێی ئەمریكا و ئێران و چەند پرسێكی دیكە دەخاتەڕوو.


رووداو: ئێوە لە كاتی گشتپرسییەكەی باشووری كوردستان، وتارێكتان نووسی بە ناونیشانی: "گشتپرسی هەرێمی كوردستان.. لەدایكبوونی ئێرانی دووەم". مەبەستتان لەو شوبهاندنە چی بوو؟

نەقیبزادە: زۆر نادادپەروەرانەیە 30 تا 40 ملیۆن كەس كە لە یەك نەتەوەن، خاوەنی دەوڵەت نەبن. ئێمە ئاگاداری هەستیاریی حكومەتەكانی ناوچەكەشین. راستە ئێرانییەكان بەرامبەر بە كورد هەست بە هاوسۆزی دەكەن. من كارم بە حكومەتەكانەوە نییە، بەڵام لە توركیا گرووپێكی تەواو جیاواز هەن كە تەنانەت بوونی كوردیش رەتدەكەنەوە و بە توركی كێوی دەیانناسن. من زۆر دڵم لەگەڵ گشتپرسیی كوردستان بوو، پێموابوو سەردەكەوێ و كوردستان سەربەخۆ دەبێ. بەڵام بەداخەوە هەندێ تاكتیكی هەڵە گیرانەبەر، خۆزگە ئەو گشتپرسییە لە كاتێكی دیكە بكرایە و ئەنجامی دڵخوازی لێبكەوتایەتەوە، بەڵام بەهەرحاڵ ئەم كارە هەر دەبوو بكرێ. كەسانێكیش كە دژی سەربەخۆیی هەرێمی كوردستانن، لە هەڵەدان و لە داهاتووشدا زیانی ئەو هەڵەیە بەرۆكیان دەگرێت.

رووداو: هۆكاری ئەم قسانەی ئێوە لە چییەوە سەرچاوەی گرتووە؟

نەقیبزادە: مێژوو و كولتوور. سەیركەن، كورد بناغەدانەری پاشایەتیی ئێرانن، هەمیشەش لە ناوچەكەدا ئامادە بوون. ناوچەیەك كە لەڕاستیدا جوگرافیای كولتووریی ئێرانە و دەزانن زۆربەی جارەكان ئێران لە هەمبەر ئیمپراتۆریای رۆم سەردەكەوت و ئێمەش لە ناوچەكەدا كەمینەیەكین و زۆربەی ناوچەكە عەرەبن. ئەگەر ئێمە وڵاتێكی هاوڕێ و دراوسێ و هاوخوێنمان هەبێ، زۆر بە قازانجمانە لە داهاتوودا. بەڵام بەداخەوە حكومەتەكەی ئێمە بونیاتی ستراتیژیی خۆی لەسەر وڵاتانی عەرەبی رۆناوە و ئەوانیش بەڕای من جێی متمانە نین. بەڵام پێموایە ئەگەر كوردستانی عێراق سەربەخۆ ببێ، ئێمە لەدایكبوونی ئێرانێكی دیكە دەبینین و دەتوانین ساڵانێكی زۆر بە باشی پێكەوە بژین.

رووداو: واتە دەبێ‌ ئێران پشتیوانی لە كوردستانێكی سەربەخۆ بكات؟

نەقیبزادە: بە جدی و بە توندی دەبێ پشتگیریی سەربەخۆیی كوردستان بكات، چونكە عێراق لە رووی جیۆستراتیژییەوە كێشەی زۆری لەگەڵ ئێمە هەیە و دیار نییە كاتێك كێشە ناوخۆییەكانی چارەسەر دەبن، چۆن لەگەڵ ئێمە هەڵسوكەوت دەكات. سووریاش كاتێك حكومەتی بەشار ئەسەد بڕووخێ یان نەمێنێ، هەموو ئەو سەرمایەیەی كە ئێران لەسەری دایناوە، بەفیڕۆ دەچێت. بۆیە سەربەخۆیی هەرێمی كوردستان لەڕاستیدا دەرفەتێكی باشە كە یەكەم: كێشەیەك بەناوی عێراق بۆ هەمیشە بۆ ئێران كۆتایی بێت. دووەم: هاوڕێیەكی نوێی لە ناوچەكەدا ببێ. هاوڕێیەكی خوێنی و كولتووری. بۆ ئەمەش هیچ هۆكارێك نابینم كە كوردستانی عێراق ببێتە هۆی نیگەرانیی ئێران و هەرچیی تێدایە هەمووی بەرژەوەندییە. ئێمە وڵاتێكمان نەبووە بە ناوی عێراق، لەڕاستیدا ئەمە لە تێكەڵكردنی سێ گرووپی ئەتنی و ئاینیی جیاواز پێكهاتووە و لە ساڵی 1921 لەدایك بووە. ئێمە بینیمان لە رەوتی شۆڕشە ئازادیخوازییەكان و سەربەخۆیی دەوڵەتەكاندا، هەموو ئەو دەوڵەتانەی پاش شەڕی دووەمی جیهانی و لە نەتەوەی جیاجیا پێكهاتبوون، هەموویان لێكترازان. سەیری چیكۆسلۆڤاكیا بكەن، سەیری یۆگوسلاڤیا بكەن. عێراقیش لە ناوچەكەدا لەژێر دەسەڵاتی ئیمپراتۆرییەتێكدا بوو دەنا ئەویش هەمان چارەنووسی دەبوو، بەڵام ئێستا ئەمە هاوكات بووە لەگەڵ شەپۆلی بەجیهانیبوونیش، بۆیە بەبۆچوونی من سەربەخۆبوونی كوردستانی عێراق، بێ سێ و دووە و حاشاهەڵنەگرە.

رووداو: باشە بۆچی ئەوەندە دژایەتی كوردستانێكی سەربەخۆ دەكرێ‌؟

نەقیبزادە: لەبەر بۆچوونێكی هەڵە. بۆچوونەكە ئەوەیە كە كاتێك كوردستان سەربەخۆ ببێت، كوردی ئێرانیش داوای سەربەخۆیی دەكەن، لە كاتێكدا وا نییە. كوردی ئێران خۆیان بە ئێرانی دەزانن و لەوانەیە تەنیا داوای خودموختاری بكەن و خودموختاریش نابێتە كێشە. لە بەرژەوەندیی توركیا و ئێرانیشە كوردستانی عێراق سەربەخۆ ببێت. ئەوكاتە ئەوانیش سەقامگیریی زیاتر بەخۆیانەوە دەبینن، چونكە كاتێك كورد دەوڵەتێكیان بۆ خۆیان هەبێت، لەڕاستیدا متمانەبەخۆبوونیان زیاتر دەبێ و ئۆقرە دەگرن و ئەوسا تەنیا داوای خودموختاری دەكەن، بەڵام ئەگەر ئەم كارە نەكرێ و كورد دەوڵەتێكیان نەبێ، ئەم سەربەخۆییخوازییە بە ناوچەكەدا بڵاودەبێتەوە. ئەوكاتە دەكرێ دۆخەكە زۆر خراپتر بێت لەوەی كە خودموختارییان پێ بدرێت.

رووداو: ئەم بۆچوونەی بەڕێزتان تا چەند لە سیاسەتی دەرەوە و ناوچەیی ئێراندا دەبینرێ‌؟

نەقیبزادە: بەداخەوە ئێران سیاسەتێكی ناوچەیی دروستی نییە و لەسەر عەرەبەكان سەرمایە دادەنێ و قووڵایی ستراتیژیی خۆی لەسەر سووریا و عێراق پێناسە دەكات. لە كاتێكدا ئەوانە ئەو وڵاتانە نین كە لە درێژماوەدا لەگەڵ ئێران بمێننەوە. قووڵایی ستراتیژیی ئێمە دەوڵەتی كوردستانە ئەگەر سەربەخۆیی وەربگرێ. ئەوەی كە تۆ بتەوێ سەرمایە لەسەر لوبنان و سووریا دابنێی، لە كورتماوەدا ئەنجامی دەبێ، بەڵام لە درێژماوەدا نا.

رووداو: هەرێمی كوردستان لە سیاسەتی ناوچەیی ئێران چ پێگەیەكی هەیە؟

نەقیبزادە: بە خۆشحاڵییەوە ئێران لە سیاسەتی كرداریدا بە هەمان شێوەی سیاسەتی ستراتیژی ناجووڵێتەوە. من دەبینم لە هەمانكاتدا كە دژایەتی سەربەخۆیی كوردستانی عێراق دەكات، هاوكاریی باشیشی لەگەڵ هەرێم هەیە. ئەمەش خۆی دەبێتە بنەمایەك بۆ پەیوەندییەكانی داهاتوو.

رووداو: ئەگەر رۆژێك ئەنجامی گشتپرسی كاری پێ بكرێ‌، ئایا ئێران هەمان هەڵوێستی پێشتری دەبێ‌؟

نەقیبزادە: ئەوە ددەوەستێتە سەر ئەوەی كە شەپۆلەكە چەندە بەهێز دەبێ. ئەگەر شەپۆلی سەربەخۆییخوازی زۆر بەهێز بێ، ئێرانیش نەرم دەبێت. بەڵام ئەگەر شەپۆلەكە سست و لاواز بێ، ئەو كارە سەرناگرێ و دیسان ئێران دژایەتی دەكات.

رووداو: ئێوە ئەو داواكارییە لە چ ئاستێكدا دەبینن؟

نەقیبزادە: لە ئاستێكی بەرزدا دەیبینم. سەربەخۆییخوازیی كوردستان بۆ كورد هیوایەكە و من پێموایە ئێوە قۆناغێكتان تێپەڕاندووە و ئەم كارە مسۆگەرە. من قەت پێموانەبوو هەرێمی كوردستان هێندە پێشكەوتوو و جوان و رازاوە بێت. پێموابوو ساڵانێكی زۆر لەژێر دەسەڵاتی رژێمی سەدام حوسێندا سەركوت كراون و دەبێ ئێستا شارێكی وێران ببینین، بەڵام بە خۆشحاڵییەوە ئاوەدانی زۆر هەیە و خەڵكی لێرە خۆیان بە كورد دەزانن و حكومەتی عێراق لە خۆڕایی وزەی خۆی بەفیڕۆ دەدات بۆ دژایەتیكردنی سەربەخۆیی كوردستان.

رووداو: یەكەمین سەردانتانە بۆ كوردستان، ئەو تایبەتمەندیانەی دەوڵەتبوون چین كە لێرە بینیتان؟

نەقیبزادە: من پێموابوو هاتوومە وڵاتێكی ئەوروپیی پێشكەوتووی دیموكراسی. ئاستی دیموكراسی زۆر لەسەرەوەیە. بونیاتنانەوە و ئاوەدانكردنەوە و جوانكردنی سیمای شارەكان لە ئاستێكی بەرزدایە. بۆیە ئەو وێنا و بۆچوونەی من پێشتر هەمبوو، زۆر كەمیش بووە بۆ ئێرە. ئێستا من گەیشتوومەتە ئەو دڵنیاییەی كە لەم ساڵانەدا هەرێمی كوردستان سەربەخۆ دەبێت و ئەمە شتێك نییە پێشی پێ بگیرێت.

رووداو: پێتانوایە ئەوە چەند دەخایەنێ‌؟

نەقیبزادە: ئەوە دەبێ چاوەڕێی رووداوێك بن، چاوەڕێی رەوتێك بن كە لەڕووی زەینی و فیكرییەوە بوار خۆش بكات. بەڕای من توركیا بەربەستێكی گەورەترە لە ئێران، بەڵام بەڕێز ئەردۆغان قسەیەكی كردووە كە سەرنجڕاكێشە. لەڕاستیدا بەشێوەی دووپاڵوو سەربەخۆیی هەرێمی كوردستانی قەبووڵ كردووە. گوتوویەتی: ئێمە لێرە كوردمان نییە، ئەگەر كەسێك دەیەوێ كورد بێ، با بچێت بۆ كوردستانی عێراق، واتە دانی بەوەدا ناوە كە ئێرە لەڕاستیدا شوێنێكە بۆ كورد. بۆیە ئەویش كەمێك نیگەرانی سەربەخۆییخوازیی كوردی توركیایە كە ئەویش بەڕای من نابێ نیگەران بێ، چونكە كێشەی ئەوانیش تا ڕادەیەكی زۆر دەكرێ بە خودموختاری چارە بكرێت، بەڵام ئەوەی كە گرینگە ئەوەیە كورد هەر دەبێ دەوڵەتێكی خۆیان هەبێ، باشترین دەرفەت و دۆخیش بۆ ئەمە، كوردی عێراقن كە بگەنە سەربەخۆیی و كوردی دیكەش خودموختاری وەربگرن یان ئەگەر بارودۆخ لەبارتر بوو ئەوانیش هەنگاوی دیكە هەڵبگرن.

رووداو: خۆڕاگری كورد لە عێراق، توركیا و سووریا بەشێكە لە پاراستنی شارستانیەتی ئێران؟

نەقیبزادە: من كورد بە ئێرانی دەزانم بێئەوەی مەبەستم ئەوە بێ كە كوردی ئێران دەبێ وڵاتێكی جیا پێكبێنن، چونكە چ لە دوو وڵاتدا بن یان سێ‌ وڵات، هەر یەكێكن. بەڵام سیاسەتی پەكەكەم قبووڵ نییە، چونكە ئێستا سەردەم سەردەمی خەباتی چەكداری نییە. سەردەمی چالاكیی كولتووری و ئامادەیی فیكری و بەتایبەت چالاكیی میدیاییە، كە دەبێ زەینەكان لە هەموو جیهاندا ئامادە بكرێن و لایەنگر پەیدا بكەن، بۆ نموونە ئەمریكا لەگەڵ پێكهێنانی دەوڵەتی كوردستانە لە هەموو ناوچەكان، ئەمە خۆی دەستكەوتێكی گرنگە. پاشان وڵاتانی دیكەش رازی بكرێن. تەنیا پێویستە لەم بوارەدا بە هێمنی و بە پارێزەوە هەنگاو بنرێت و بەتایبەتی ئێران و توركیا نابێ نیگەران بكرێن. چونكە ئەگەر نیگەران بكرێن، پێكەوە یەكدەگرن و پێش بە زۆر شت دەگرن.

رووداو: لە كاتی گشتپرسی هەندێك لایەن هەرێمی كوردستانیان بە ئیسرائیلی دووەم ناوبرد؟ ئایا ئەو بەراوردە لە جێی خۆیەتی؟

نەقیبزادە: ئەوە بۆچوونێكی زۆر هەڵەیە، چونكە كورد تا ئێستا شەڕكەر و خەباتكار بوون و پەیوەندیی باشیشیان لەگەڵ ئیسرائیل و وڵاتانی ناوچەكە هەیە، بۆیە پێیانوایە لە داهاتوودا ئێرە دەبێتە پێگەیەك بۆ ئیسرائیل. بەڵام ئەگەر پەیوەندییان لەگەڵ وڵاتانی ناوچەكە باش بێ، بۆ دەبێ تەنیا لەگەڵ ئیسرائیل پەیوەندییان هەبێ؟ ئیسرائیل دەتوانێ وڵاتی بیستەم یان سییەم بێت لە پەیوەندیی دەرەوەیی هەرێمی كوردستاندا. من پێموایە دەبێ نیشان بدرێت كە كورد زۆر جیاوازن لەگەڵ ئیسرائیل. بیری ئازاد و پەیوەندیی دروستی كورد لەگەڵ وڵاتانی دیكە، نابێتە هۆكار بۆ ئەوەی كە ئەوانیش هاوشێوەی ئیسرائیلن.

رووداو: لەبارەی مافەكانی كورد لە ئێران و رۆژهەڵاتی كوردستان، چ تێبینییەكتان هەیە، چ پێشنیازێكتان بۆ ئێران هەیە؟

نەقیبزادە: ماف بەو جۆرەی لەسەر كاغەز نووسراوە، هیچ جیاوازییەك نییە لەنێوان ئێرانییەكاندا، چ كورد بن، تورك بن، یان عەرەب. ئەو جیاوازییەی كە دەیبینن ئەو ناڕەزایەتییەی كە هەیە، ئەوە تا رادەیەكی زۆر رەهەندی سیاسی و مەزهەبی هەیە، چونكە بەشی زۆری كورد نیشتمانپەرست و ئێرانپەرستن. ئێمە نوخبەگەلێكمان هەیە لە كرماشان و ناوچە شیعەنشینەكان كە زۆر زۆر ئێراندۆستن. بەڵام بەداخەوە حكومەتەكەی ئێمە حكومەتێكی ئایدیۆلۆژی مەزهەبییە و هەندێك توندە لەگەڵ سوننە و پشتگوێیان دەخات. ئەگەر ئەو پرسە نەبووایە، پێموایە هیچ جیاوازییەك لەنێوان كورد و فارسدا نییە، توندییەكانی حكومەتیش زیاتر پەیوەندیی بەخۆیەوە هەیە. ئەگەر كوردێك گوێڕایەڵی بێت، رەنگە بگاتە پێگەیەكی باشتر لە فارسەكەش. ئێمە دەبێ زۆر زیاتر لەگەڵ كورد نەرم بین و مافەكانیان بە فەرمی بناسین بۆ ئەوەی لەگەڵ ئێمە بمێننەوە. حكومەت هەندێ كاری كردووە وەك دابینكردنی كارەبا و ئاو و قیرتاو، بەڵام ئەوانە بەس نین دەبێ لە بواری كولتووریشدا هەندێ ئازادییان پێ بدرێت.

رووداو: ئایا مافی كورد وەكو نەتەوە تا چەند لەلایەن حكومەتی ئێرانەوە پارێزراوە؟

نەقیبزادە: پرسی ناوی ئیتنیك و نەتەوە، هەندێ باسی مافناسی هەڵدەگرێ كە نەتەوە چۆن پێناسە دەكرێت. بەڵام بەهەرحاڵ وەك كەمینەیەك ناسراوە كە جیاوازی لەگەڵ زۆرینە هەیە. شتێك كە لە ئێراندا هەیە و لە هیچكام لە وڵاتەكانی دیكە نییە، ئەوەیە كە پێكهاتەی كۆمەڵگەی ئێران، هیچ كێشەیەكی لەگەڵ كورد نییە. واتە كورد زۆر خۆشەویستن و هەموو گەلی ئێران دەزانن كە كورد لە گەلە كۆنەكانی ئێرانن. حكومەت وەك گوتم تێڕوانینەكەی زیاتر سیاسییە.  تێڕوانینێكی سیاسی ئەمنیی هەیە بۆ دەوروبەری جا هەر كوێ بێت. چونكە سیاسەتی سعودیە هەندێك لەسەر بەهێزكردنی سوننەكان بونیاتنراوە. ئێران هەست بە مەترسی دەكات لەلایەن سوننەكانەوە بە گشتی و هەندێك نیگەرانە كە سعودیە تا چەند دەچێتە پێشەوە. خۆ دەزانن هەندێ بەڵگەشی هەیە و لەخۆڕا قسە ناكات. بۆ نموونە هەندێ كەس دەستگیركراون كە پارەیان لە سعودیە وەرگرتووە. بۆیە تێڕوانینی حكومەت تێڕوانینێكی دیاریكراوی سەركاغەزە، كاتێك دەنووسێ سەرنجێكی زیاتر بدرێتە سوننەكان، ئیدی هەمووی دەگرێتەوە، بەڵام ئێستا وەك ئاماژەم پێكرد، هیچ كێشەیەكی لەگەڵ كوردە شیعەكان نییە و لە دەسەڵاتیشدا رۆڵیان هەیە، لە شوێنە هەستیارەكانی ئیدارەی ئێرانیشدا هەن، بەڵام بەرامبەر كوردی سوننە زۆر هەستیارە.

 رووداو: ئێستا ململانێیەك لە نێوان نەریتخواز و ریفۆرمیستەكانی ئێراندا هەیە، پێتانوایە ئەو ململانێیە بەرەو كوێ‌ دەڕوات؟

نەقیبزادە: من پێمباشە سەبارەت بە داهاتووی ئێران قسە نەكەم، چونكە هەندێ شت هەن ناتوانم بیانڵێم. هەندێ شتیش دەوڵەتی ئێمە پێی قبووڵ ناكرێ، بەڵام بەداخەوە قەیرانێك كە ئەمریكا بۆ ئێران دروستی كردووە، ئەو قەیرانە تا ئاستێكی زۆر كاریگەری داناوە و پەرەی بە قەیرانەكانی ناوخۆی ئێران داوە. نەریتخوازەكان وڵات و شۆڕش بە هی خۆیان دەزانن. ریفۆرمخوازەكانیش پێیانوایە نەریتخوازەكان وڵات بەرەو هەڵدێر دەبەن، بۆیە لە نێوان ئەم دوو لایەنەدا هەرگیز ئاشتی پێكنایە. لە كۆتاییشدا نەریتخوازەكان دەیبەنەوە، چونكە ئەوان توندڕەوترن و هەمیشە توندڕەوی لە بەرامبەر میانڕەویدا زیاتر بەختی بردنەوەی هەیە. 

رووداو: لە وتارێكدا دەڵێی حكومەتی ناوەندیی بەهێز لە عێراق لە بەرژەوەندی ئێران نییە، بۆچی؟

نەقیبزادە: لەبەر ئەوەی ئێمە لەگەڵ عێراق هەندێ ناكۆكیی جیۆستراتیژیمان هەیە كە پەیوەندی بە دەسەڵاتە سیاسییەكانەوە نییە. ئێمە لە كاتی رژێمی شادا كێشەمان لەگەڵ عێراق هەبوو، لە كاتی كۆماری ئیسلامیشدا هەمانبوو. ئێستا حكومەتێك لە عێراقدا نییە، تۆ دەتوانی لەوێ بە ئاسانی هەژموون و دەسەڵات بنوێنی، بەڵام تا كەی؟ دواجار رۆژێك ئەم دەسەڵات و نفوزە كۆتایی دێت و عێراقییەكان لەسەر پێی خۆیان دەوەستن، كاتێك لەسەر پێی خۆیان وەستان، بە ئێرانییەكان دەڵێن لەو وڵاتی ئێمە بچنە دەرەوە. كە كەمێكیش هێزیان بەدەستهێنا، دیسان رووی تفەنگەكانیان لە ئێران دەكەنەوە. ئەمە لە داهاتوودا روودەدات. بۆیە كاتی ئەوە بوو كە ئێران پشتی سەربەخۆیی كوردستانی بگرتایە، دەسەڵات و كاریگەری لە بەسرە و ناوچە شیعەنشینەكان زیاتر دەبوو، دەسەڵاتی لە ناوچەی كوردستانی عێراقیش زیاتر دەبوو.

رووداو: پێتانوایە داهاتووی ململانێی ئێران و ئەمریكا بە كوێ‌ دەگات؟

نەقیبزادە: جارێ ئێران لە گەمارۆیەكی زۆر قورس و تاقەتپڕووكێندا چەقیوە. ئەگەر تا دوو ساڵی دیكە حكومەت لە ئەمریكا نەگۆڕدرێ، من پێموایە ئەو گرفتانەی ئێران هەیەتی، وڵاتەكە لەپێ دەخات. بەڵام ئەگەر دیموكراتەكان بچنە سەر دەسەڵات، هەر وەك خۆیشیان گوتوویانە رێككەوتنی ئەتۆمی بە فەرمی دەناسن. هەموو شتێك پەیوەندی بە سیاسەتی ئەمریكاوە هەیە، من پێموایە ئەمریكا بەرەو رووخاندنی رژێم و لەنێوبردنی كۆماری ئیسلامی هەنگاو دەنێت.

رووداو: پێتانوایە پێكدادانێكی فیزیكی لە نێوانیان رووبدات؟

نەقیبزادە: ئەو ئەگەرە هەیە. هەڵبەت نەك شەڕێكی بەردەوام و چڕ، بەڵام شەڕێكی سنووردار. واتە بدات لە خاڵێك و خاپووری بكات، پاشان بچێت خاڵێكی دیكە خاپوور بكات.

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟
نیشانەکردن : د.ئەحمەد نەقیبزادە
3853 ژمارەی بینین

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

ره شید | 26/03/2019 10:31:51 ص
سه رکه وتوو بی دوکتور گیان ؛ باسی کاراکته ره نوییه کانی نیوی پارتی و یه کیه تیک کرد ، ئه مه مه سه له یه کی زور هه ستیاره به نیسبه ت هه ریمی کوردستان...
دكتۆر بەرهەم؛ چارەسەر یان كێشە؟
| 8 کاژێر لەمەو بەر | (1)
داود | 24/03/2019 05:53:24 ص
زۆر بە داخەوە بۆ خەلکی مووسلی بەڕێز،هاوخەمی لێقەوماوین،زوای گەورە دلنەوایی و ئارامییەن پێ ببەخشێت،خوا تۆلەیان لە سیاسی و دەسەلاتدارانی بەغدای عیراق...
120 تەرم لە رووباری دیجلە دەرهێنراون
| 23/3/2019 | (1)
ئەحمەد | 24/03/2019 05:19:56 ص
بەردێک نەزانێک بیخاتە گۆمەوە، بە دە زانا، دەرنایەتەوە. باشترین چارەسەر قەدەغەکردنی یەکجارەکی دیاردەی چەکدارییە.
دوو ئامۆزا لەسەر كێشەیەكی بچووك دەكوژرێن
| 22/3/2019 | (1)
Azad Azad | 22/03/2019 10:34:07 ص
پیرۆز بێت له‌ روداو و خانمه‌ جوانه‌كه‌ی روداو به‌ڕێز ئاڵا شاڵی به‌راستی شایانی ئه‌و ناسنامه‌یه‌یه‌ هه‌ر سه‌ر كه‌وتو بن.
Nishtiman | 23/03/2019 08:38:40 ص
زور پیرۆزە، بەراستی زۆر چالاکە و هەموو رۆژێک چاوەرێی راپۆرتە بەنەرخەکانی دەکەم، ئالا خان نە تەنیا یی روداوە بگرە یی کورد هەر هەموویە. سپاس بۆ روودا ـ...
ئه‌نجوومەنی یەكێتی ئەوروپا وێنەی ئاڵا شاڵی لە پێشانگەکەیدا دادەنێت
| 22/3/2019 | (2)

لە بەشەکانی دیکەی رووداوەوە

پارێزگاری کەرکووک داوایەکی بەپەلە لە رێکخراوە نێودەوڵەتییەکان دەکات 6 کاژێر لەمەو بەر |

پارێزگاری کەرکووک داوایەکی بەپەلە لە رێکخراوە نێودەوڵەتییەکان دەکات

دەیەوێت هاوکاری سەنتەری شێرپەنجە بکەن زۆرتر
 لە ئیتاڵیا منداڵێک دوای ئەوەی لەماڵەوە خەتەنەدەکرێت، گیانلەدەستدەدات 8 کاژێر لەمەو بەر |

لە ئیتاڵیا منداڵێک دوای ئەوەی لەماڵەوە خەتەنەدەکرێت، گیانلەدەستدەدات

ساڵانە لە ئیتاڵیا 5000 منداڵ خەتەنەدەکرێن زۆرتر
هەنگاوەکانی وازهێنان لە جگەرەکێشان دوێنێ کاژێر 01:07 |

هەنگاوەکانی وازهێنان لە جگەرەکێشان

جێگرەوەکانی نیکۆتین بەکاربهێنە زۆرتر
0.172 seconds