وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

عەلی باپیر: بەڕاستمان نەزانی رەوایەتی بە كۆبوونەوەی پەرلەمان بدەین

لەلایەن هیوا جه‌مال 19/9/2017
عەلی باپیر، ئەمیری كۆمەڵی ئیسلامی كوردستان
عەلی باپیر، ئەمیری كۆمەڵی ئیسلامی كوردستان

رووداو- هەولێر

عەلی باپیر، ئەمیری كۆمەڵی ئیسلامی كوردستان، لە هەڤپەیڤینێكدا لەگەڵ (تۆڕی میدیایی رووداو), دەڵێت ئەگەر دانیشتنەكانی داهاتووی پەرلەمانی كوردستان، وەكو دانیشتنەكەی رۆژی هەینی رابردوو بن، ئەوا بەردەوام دەبن لەسەر هەڵوێستی خۆیان و بەشداری ناكەن. سەبارەت بە بەشداری حیزبەكانی دیكەش، دەڵێ ئەوان شتیان بۆ عەرز كراوە یان بەهۆی فرە بۆچوونیی نێو حیزبەكەیان بەشدارییان كردووە. هەروەها دەڵێت "زۆر لەوە زیاتریان پێدەداین كە خەڵكی دیكەی پێ رازی كراوە"، ئەو دەڵێت كێو بجوڵێ‌، لەسەر هەڵوێستەكانی خۆیان ناجوڵێن.

رووداو: هۆكاری بەشدارینەكردنی كۆمەڵی ئیسلامیی كوردستان لە دانیشتنەكەی پەرلەمان چی بوو؟ 

 بەڕاستمان نەزانی رەوایەتی بە كۆبوونەوەی پەرلەمان بدەین

عەلی باپیر: هۆكاری سەرەكی ئەوەیە ئەمجارە پەرلەمان بە حیساب كارا كرایەوە، بەڵام بەبێ‌ گەیشتنە رێككەوتنێكی سیاسی كە ئێمە لە كۆبوونەوەی سێ‌ قۆڵی لەگەڵ شاندی پارتی و یەكێتی پێمانگوتن ئێمە بەشداری كۆبوونەوەی پەرلەمان دەكەین، بەڵام بە مەرجێك پێشتر بگەینە رێككەوتنێكی سیاسی كە پەرلەمان چی بكات و چۆن بكات؟

رووداو: بەڵام ئێوە پێشتر دەتانگوت پەرلەمان ئاسایی بكرێتەوە، ئینجا گفتوگۆ بكەین.

عەلی باپیر: ئەو كاتە كە باس لەوە دەكرا پەرلەمان كارا بكرێتەوە، ئەو هەڵەیەی كە پارتی كردوویەتی زووتر راستی بكاتەوە، باسی ریفراندۆم لە ئارادا نەبوو، بەڵام ئێمە لە شاندی هاوبەشی پارتی و یەكێتیمان بیست پەرلەمان تەنیا بۆ ئەوە كارا دەكرێتەوە رەوایەتی بدات بەو بڕیارەی كۆمیتەی باڵای ریفراندۆم دەریكردووە، وامان لێ خوێندەوە. ئێمە گوتمان ئەگەر ئێوە بە بڕیاری كۆنكرێتی هاتوون كە هیچ مەجالی قسەی تێدا نییە، ئەو كۆبوونەوەیە زیادە، ئەگەریش هاتوون دیالۆگ بكەین، یان ئێوە ئێمە ئیقناع بكەن بمانهێننە سەر قسەی خۆتان، یان ئێمە ئێوە ئیقناع بكەین كە ئەو وادەیەی دانراوە بۆ ریفراندۆم وادەیەكی نەگونجاوە. نەگونجاوە لەڕووی ناوخۆیی، لەڕووی هەرێمایەتی و نێودەوڵەتی، ئەگەر شتێكی واتان هەیە پێی پشتئەستوورن، ئێمەش بەرچاو روون بكەن، بۆ ئەوەی ئێمەش رامان وەكو ئێوە بێ‌. 

رووداو: واتە ئێوە تەنیا بۆ دەنگدان بە گشتپرسی نەچوونە پەرلەمان، ئەوە بووە مەرجێك بۆ ئێوە؟

 پارتی و یەكێتی پێیانگوتین پەرلەمان تەنیا بۆ ریفراندۆم كارا دەكەینەوە

 

عەلی باپیر: نەخێر. ئێمە دەبووایە پێشتر رێككەوتنی سیاسی بكەین لەسەر كۆمەڵێك شت، یەكێك لەوانە پەرلەمان چی بكات. تۆ ئاگاداری ئەوەی لەو كۆبوونەوەیە رێگە بە پەرلەمانتاران نەدراوە قسە بكەن، تەنیا گوتوویانە دەی دەنگ بدەن. پەرلەمان كە كۆدەبێتەوە دەبێ‌ قسەی لێ بكرێ‌. ئیشی پەرلەمان لێكۆڵینەوەیە، تاوتوێكردنە. بڕیارێكی حیزبی دراوە، چەند حیزبێك كۆبوونەتەوە، كۆمیتەیەكیان دروستكردووە. ئەی پەرلەمان نوێنەری خەڵك نییە؟ ئەی ئێمە ریفراندۆم بۆ ئەو خەڵكە ناكەین!

رووداو: ئەو قسەی جەنابت تەقریبەن دژیەكییەكی تێدایە، یەكێكیان ئەوەیە كە دەڵێی پێویستە رێككەوتن بكرێ‌، دووەمیان دەڵێی پێویستە لە پەرلەمان گفتوگۆ لەسەر ئەو پرسانە بكرێ‌، ئەی پەرلەمان ئیشی چییە، كامەیانتان قبوڵە. لە پەرلەمان گفتوگۆ بكرێ‌، یان پێشوەخت رێككەوتنی حیزبی بكرێ‌؟

عەلی باپیر: رێككەوتنی حیزبی بۆ ئەوەی پەرلەمان چ پەرلەمانێك بێ‌. پەرلەمانێك بێ‌ جارێكی دیكە بە بڕیارێكی حیزبی دابخرێتەوە، یان پەرلەمانێك بێ‌ خاوەنی ئیرادەی خۆی بێ‌؟
رووداو: پەرلەمان چۆن خاوەنی ئیرادەی خۆی دەبێ‌، ئەگەر ئێوە پێشوەخت رێككەوتنی حیزبی لەسەر بكەن؟

عەلی باپیر: رێككەوتنی پێشوەخت بۆ ئەوە نا لە جیاتی پەرلەمان بڕیار بدەین، رێككەوتنی پێشوەخت بۆ ئەوەی كە پەرلەمان چ پەرلەمانێك بێ‌. حكومەت چ حكومەتێك بێ‌. حیزب لە كوێی پرۆسەی سیاسی بێ‌، پەرلەمان لە كوێ‌ بێ‌، حكومەت لە كوێ‌ بێ‌، شەخس لە جیاتی پەرلەمان بڕیار بدات یان نا. ئەوە بەلای منەوە رەفزە كە ئێمە پەرلەمانێكی دەستەپاچەمان هەبێ‌، هەر كاتێك عەقڵمان نەیبڕی خانەنشینی بكەین، هەر كاتێك پێویستمان بوو بیهێنینەوە.

  ئەگەر كۆبوونەوەكانی داهاتووی پەرلەمانیش وەكو ئەوەی یەكەم بن بەشداری ناكەین

رووداو: مادام پەرلەمانتارەكان بە دەنگی خەڵك رۆیشتوون، ئێوە بۆچی ئەو مافەیان نادەنێ‌. ئێوە بۆچی ئەوە لە پەرلەمانەوە رەتناكەنەوە، هەتا فراكسیۆنەكەی ئێوە هاتن بۆ پەرلەمان. باشە پەرلەمان مەیدانی شەڕی خەڵك نییە؟

عەلی باپیر: راستە. بەڵام ئێمە وەكو حیزب وەكو سەركردایەتی بەڕاستمان نەزانی. 

فراكسیۆنەكەشمان هەمان قەناعەتیان هەبوو، بە راستمان نەزانی رەوایەتی بەو كۆبوونەوەیە بدەین كە بۆ مەبەستێكی دیاریكراو كۆدەبێتەوە، نەك بۆ كاری ئاسایی خۆی كە چاودێریی حكومەت و بڕیاردان و یاسادەركردنە.

رووداو: ئەگەر لە پەرلەمان دەنگ بۆ دواخستنی گشتپرسی درابایە بەشداریتان دەكرد؟ 
  گشتپرسی یان ناكرێ‌، یان نیوەچڵ دەبێ‌

عەلی باپیر: ئێمە گوتمان نابێ‌ پەرلەمان بۆ پرسێك كە بۆی دیاری بكرێ‌، كۆببێتەوە. نابێت كەس ئەمر و نەهی بەسەر پەرلەماندا بكات. پەرلەمان دەبێ‌ دەستی كراوە بێ‌.

رووداو: ئێستا كۆبوونەوەیەك كرا و بەشدار نەبوون، لە كۆبوونەوەكانی داهاتووی پەرلەمان بەشداری دەكەن بەم ستافەی ئێستای؟

عەلی باپیر: تەماشا دەكەین، ئایا كۆبوونەوەكانی دیكەش ئەوها دەبن؟ ئەگەر هەروا بن، هەمان هەڵوێستمان دەبێ‌.

رووداو: بەو سەرۆكایەتییەی ئێستا ئێوە ئامادەن بەشداری كۆبوونەوەی پەرلەمان بكەن؟

عەلی باپیر: من باسی لایەنێكی كۆبوونەوەكەم كرد. لایەنی یاساییش كێشەی هەبوو. سەرۆكی پەرلەمان و سكرتێر بەشدار نەبوون. كۆمەڵێك خەلەلی دیكەش هەبوون، ئەگەر هەر بەو خەلەلانەوە پەرلەمان كۆببێتەوە دیارە هەمان هەڵوێستمان دەبێت. 

  دەبوو پێش كاراكردنەوەی پەرلەمان رێككەوتنی سیاسی بكرێ‌

رووداو: ئێستاش قەناعەتتان وایە كە دەبێ‌ گشتپرسی دوابخرێ‌؟ ئەوە تا چەند پەیوەندی بە دژایەتی ئێرانەوە هەیە؟

عەلی باپیر: زۆر شت دەگوترێ‌، خەڵكێك ئەگەر ئەهلی ئینساف بێ‌ ئەو شانە بە ئێمە ناڵێت. وەڵڵا ئەوە لەبەر ئێران وا دەكەن. لەبەر سعودیە وا دەكەن، لەبەر فڵان وادەكەن. لە دژی فڵان وا دەكەن. ئێمە وەكو كۆمەڵی ئیسلامی، كۆمەڵێك پرەنسیپمان هەیە، بەپێی ئەو پرەنسیپانە بەڕێوەدەچین. من لە ساڵی 1984 كتێبی سۆزی نەتەوایەتیم نووسیوە، لەوێدا گوتوومە وەكە چۆن توركمانستان و عەجەمستان و عەرەبستان و پاكستان و ئەفغانستان هەیە، كوردستانێكیش هەیە، وەكو چۆن ئەوانە حەقیانە خاوەنی دەوڵەت و قەوارەیەكی سیاسی بن، ئێمەش ئەو مافەمان هەیە. لە ئێران شاندی پارتی و یەكێتی و سۆسیالیستمان لەگەڵ بووە، كە لە تاران دانیشتووین، لە ئەنقەرە دانیشتووین. 

دیارە كە ئێمە چۆن قسەمان كردووە، خەڵكیش چۆن قسەی كردووە. ئێمە سەد لەسەد لەگەڵ ئەوەداین كە ئەو گەلەی ئێمە چ رۆژهەڵاتەكەی كە بە ئێرانەوە لكێندراوە، چ باكوورەكەی كە بە توركیاوە لكێنراوە، چ رۆژئاوایەكەی كە بە سووریاوە لكێنراوە، چ باشوورەكەی كە بە عێراقەوە لكێنراوە. ئەو كوردستانە بەشبەش كراوە تەواوی حەقی خۆی هەیە كە دەوڵەتی خۆی هەبێ‌.

رووداو: ئەمە وەكو دروشم، ئەی وەكو واقیع؟

 ئێمە چوار ساڵ لەمەوبەر پرۆژەی دەوڵەتی كوردیمان راگەیاند


عەلی باپیر: وەكو واقیع. ئێمە لە ساڵی 2013 پرۆژەی دەوڵەتی كوردیمان راگەیاند و دامانە لایەنە سیاسییەكان. بەڵام كەس بەلامانەوە نەهات، ئێمە پێمانوایە ئەو كاتە لە ئێستا زۆر گونجاوتر بوو.

رووداو: دواخستنەكە لەبەرئەوەیە كە پێتانوایە راستەوخۆ سەربەخۆیی راناگەیەنرێ‌، ئەگەر راستەوخۆ لەگەڵ ئەنجامدانی گشتپرسی سەربەخۆیی رابگەیەنرێ‌ ئێوە لەگەڵین؟

عەلی باپیر: ئێمە لەبەر چەند هۆكارێك پێمانوایە هەلومەرجەكە گونجاو نییە بۆ ریفراندۆم، یەك: ئێمە پێمانوایە دەوڵەت پێویستی بە سەرزەمینێكە، ئەو سەرزەمینەی كوردستان ئێستا چوار پارچەیە. پارچەیەكی لەبەردەستی پارتیدایە. پارچەیەكی لەبەردەستی یەكێتیدایە. پارچەیەكی لەبەر دەستی پەكەكەدایە، پارچەیەكیشی ناوچە ناكۆكی لەسەرەكانە. دوو: دەوڵەت دەبێ‌ سوڵتەیەكی سیاسی یەكگرتووی هەبێ‌، ئێستا ئێمە دوو ئیدارەین. سێ‌: دەوڵەت دەبێ‌ خەڵكێكی یەكگرتووی هەبێ‌، ئێستا خەڵك دابەش بووە، تووشی جەمسەرگیرییەكی توند بووە. چوار: دەوڵەت دەبێ‌ مەقبولیەتێكی ناوچەیی و نێودەوڵەتی هەبێ‌ كە ئێمە ئێستا لە هەموو كات خراپترین لەو رووەوە. ئێمە ئێستا دونیا لە دژمان هاتووەتە سەر خەت. هەر باسی ریفراندۆم دەكەین لێمان هاتوونەتە سەر خەت، ریفراندۆمەكەش جارێ‌ دیار نییە كە سەربەخۆیی بەدوادا دێ یان نا. ئایا ئەو خەڵكەی ئێمە هێندە دڵی خۆشە بەو دەسەڵاتە و بەو قەوارە سیاسییە، هێندە بەختەوەری كردووە، هێندە دادگەریی چەسپێندراوە كە متمانەی پێی هەبێ‌ ئەم هەرێمە شێواوەی بۆ بكات بە دەوڵەتێكی تەواو. ئێمە بۆیە دژین، چونكە هیچكام لەو چوار توخمە كە بۆ دەوڵەت پێویستن، هیچیان نین.

  ئێستا باشووری كوردستان چوار پارچەیە

رووداو: لە گوتارێكدا لە 7/7/2017 دەڵێی هەڵەیە هەڵوێستی نەرێنیانەی حكومەتی مەركەزیی یان وڵاتانی دراوسێ یان وڵاتانی رۆژهەڵات و رۆژئاوا دژ بە ریفراندۆم بكەینە بەڵگەی ئەنجامنەدانی، ئێستا ئەم بیانووانە پێچەوانەی ئەو قسانەت نین؟

عەلی باپیر: پێچەوانە نییە. من لەبەر چاومە نەك ئێستا بزانم، من دەزانم لە ساڵی 1916 لە سایكس بیكۆوە ئەو وڵاتەی ئێمە پارچە پارچە كراوە. ئەوە ئێران و توركیا و عێراق و سووریا نەبوون ئێرەیان پارچە پارچە كرد، ئەوە ئەو زلهێزانە بوون كە ئێمە چاوەڕێی دیموكراسی و مافی مرۆڤیان لێدەكەین. بە خەیاڵپڵاوەوە تەماشایان دەكەین. بەڵام من دەڵێم ئەوانیش ئێستا بیانوویان هەیە. دەزانی كە شاندی كوردی چووە بۆ پەرلەمانی ئەوروپا چییان گوتووە؟ گوتوویانە هاتوون لێرە باسی سەربەخۆیی و پشتگیری دەكەن، جارێ‌ بڕۆن پەرلەمانەكەی خۆتان چاك بكەنەوە.

رووداو: ئەوە چاكیان كرد، ئەوە هەموو مەرجەكانیان لابرد، بەڵام ئێوە هەر نەهاتنەوە؟

عەلی باپیر: ئەوە چاكیان كردەوە، وەكو چۆن كەسێك تایەكی قورسی هەبێ‌، دەرزییەكی پرۆكاینی لێدەدەن بەس بۆ كاتێكی دیاریكراو ئازارەكەی نەمێنێ‌. ئەوە چاككردنەوەی پەرلەمان نییە. تۆ واز لە توركیا و ئێران بهێنە. كاكە ئێمە بارودۆخی نێوخۆمان تەواو نییە.

رووداو: بەڵام ئێستا ئەوە ئێوەن لە رێڕەوەكە لاتانداوە، بۆچی لەو داواكارییەی لە پارتیتان هەیە نایەنە خوارەوە؟ 

عەلی باپیر: ئێمە ئەو گلەییەمان لە خەڵكی دیكە هەیە كە لەبەرامبەر هەندێك بەرژەوەندیی شەخسی و حیزبی، ئیقراری شتێك دەكەن كە دەزانن قازانج سەری مایە دەخوات. ئیقراری بڕیارێكی حیزبی دەكەن كە دەزانن بە كەڵك نایەت. ئێمە شتمان بۆ عەرز كراوە، بەڵام رەتمانكردووەتەوە. هەڕەشەمان لێكراوە گوێمان پێنەداوە. گوتوومانە پابەندیمان بە پرەنسیپەكانی خۆمان بەلاوە گرنگترە لە پارێزگاریكردن لە بەرژەوەندییەكانمان.

رووداو: ئەوە كێیە كە بەرژەوەندیی شەخسی پێشخستووە. ئەوەی ئێوەش بۆتان تەرح كراوە و رەتتانكردووەتەوە چییە؟

عەلی باپیر: هەندێك شت بە گشتی بگوترێ‌ باشە، زۆر ورد نەكرێتەوە. من بە گشتی قسە دەكەم كە هەندێك حیزب بڕیاری بۆ نادرێ‌، بڕیاری نەداوە، یان رەگەڵ بارودۆخێك دەكەوێ‌ كە قەناعەتی پێی نییە. كە دوایی لای من دەڵێت منیش قەناعەتم پێی نییە. ئەی بۆ وا دەكەی، ئاخر لەبەر فڵان شت و فڵان شت. یان لە نێوخۆیدا فرەبۆچوونە. بەڵام هەندێك شت هەر بە گشتی بگوترێ‌، ئەوە عادەتی پێغەمبەر بووە كەسێك كە هەڵەیەكی دەكرد ناوی نەدەهێنا، دەیگوت بۆ كەسانێك ئاوا دەڵێن و ئاوا دەڵێن. خۆ مەرج نییە هەر یەك كەس بێت، كۆمەڵێك خەڵك دەگرێتەوە، هەندێك كەس بۆ پارێزگاریكردن لەو پارەیەی كە مانگانە وەریدەگرێ‌ هەڵوێستە سیاسییەكەی تەبەنی دەكات.

رووداو: ئەوەی لە قسەی جەنابت دەخوێندرێتەوە، مەبەستت یەكێك لەوانە یەكگرتووی ئیسلامی كوردستانە؟

عەلی باپیر: ئەوە تۆ وادەڵێی. من بەگشتی قسە دەكەم.

رووداو: ئەو شتانە چین كە خستوویانەتە بەردەم ئێوە و قبوڵتان نەكردووە؟

عەلی باپیر: لەوەی خەڵكی دیكەی پێ رازیكراوە زۆرتریش بۆ ئێمە عەرز كراوە. چەندینجار خەڵك هاتووەتە لای ئێمە كە وەزع چاك بكەین، كۆبوونەوە بكەین، ئێمە پێمان باش نەبووە. پێیانگوتووین ئەگەر كۆبوونەوە بكرێ‌ و وەزع باش بێ‌، وەزعتان زۆر باش دەبێ‌ و ئەو حاڵەی كە ئێستا تێیدان ئەوە نامێنێ‌. هەندێك خەڵك كە بە خۆڕایی دەگیرێ‌ و سیناریۆی بۆ دروست دەكرێ‌ ئەوە نامێنێ‌. ئێمەش گوتمان ئێوە ئارەزووی خۆتانە چۆن مامەڵە دەكەن، بەڵام ئێمە كێو بجوڵێ‌ لەسەر هەڵوێستەكانی خۆمان ناجوڵێین.

  كێو بجوڵێ‌ لەسەر هەڵوێستەكانی خۆمان ناجوڵێین


رووداو: ئێستا وەزعتان خراپە؟

عەلی باپیر: وەزعی خۆمان زۆر بە باش دەزانین، چونكە لەگەڵ مەبدەئەكانی خۆمان راستین. من زۆرجار گوتوومە لەسەر پارەی حەڵاڵیش حەسوودی بە خەڵك نابەم چجا لەسەر پارەیەك كە بە گەندەڵی و حەرامی كۆدەكرێتەوە.

رووداو: ئێستا ئێوە پێتانخۆشە گشتپرسی دوابخرێ‌؟

عەلی باپیر: نەك پێمانخۆشە، ئێمە پێمانوایە گشتپرسی یان ناكرێ‌، یان نیوەچڵ دەبێ‌ و زیانی لە قازانجی زیاتر دەبێ‌. بۆیە هەرچی زووترە لەو بڕیارە حیزبییە پاشگەز ببینەوە باشترە، واقیعبینانەتر تەماشای دونیا بكەین. لەمەودوا هەر هەنگاوێكمان ویست بینێین جێپێی خۆمان ببینین.

رووداو: بەدیلی تۆ بۆ گشتپرسی چییە؟

عەلی باپیر: بەدیلی من ئەوەیە چاو بە شێوەی حوكمڕانی خۆماندا بخشێنینەوە، ئێمە لە 26 ساڵی رابردوودا حوكمڕانییەكی سەقەتی ئەو وڵاتەمان كردووە. بە شێوەیەك بووە یاسامان پێشێل كردووە، كارمان بۆ بە دامەزراوەكردن نەكردووە، دادگەری نەبووە، گەندەڵییەكی زۆر هەیە. حیزب هەمە كارە بووە. ئێمە دەبێ‌ لە نێوخۆدا تەبایی و ئاشتەواییەكی باش بكەین. هەردوو حیزبی حوكمڕان بێنە سەر تەلەفزیۆن و بڵێن خەڵكینە ئێمە داوای لێبوردنتان لێدەكەین لە كاتێكدا ئەو وڵاتە پڕ بوو لە خێر و بێر، بودجەیەكی زەبەلاحمان لە بەغداوە بۆ دەهات، نەوتێكی زۆر دەفرۆشین، باج و گومرگێكی زۆر كۆدەكرێتەوە، بەڵام ئێمە فەشەلمان هێنا و داوای لێبوردنتان لێدەكەین، نەمانتوانی حوكمڕانییەكی باش بكەین.
  لەسەر ئەو پشتگیرییەی ئیسرائیل بۆ ئێمە قەرزدار دەبینەوە

رووداو: رات چییە لەسەر پشتگیریی ئیسرائیل بۆ دەوڵەتی سەربەخۆ؟ 

عەلی باپیر: هەر كەسێك پشتگیری ئێمە بكات بۆ دەوڵەتی سەربەخۆ دەستخۆشی لێدەكەین. بەڵام لەم ئانوساتەدا كە دونیا لە دژی تۆ هاتووەتە سەر خەت، پێموایە ئیسرائیل بۆ ئێمە دەبێتە عەدەدی ناقیس. واتە لەسەری قەرزدار دەبینەوە.

کۆمێنتەکان

 
dayki roj | 20/9/2017
zor başe da daweî hîç mafek jî maken dawaî gîştperî
نیشانەکردن : عەلی باپیر
5021 ژمارەی بینین

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Bawer | 13/12/2017 06:10:35 م
Dastkkhosh sarkawtubet
عوسمان بایدەمیر بەهۆی بەکارهێنانی ناوی کوردستان سزادرا
| 15 کاژێر لەمەو بەر | (1)
rizgar | 12/12/2017 10:38:45 م
به ڕێزم هه‌ ڤال من له گه ڵتم ، قسه کانت زۆر جوانن ، به ڵا م ئه گه ر شه ڕ ڕویدا ئه وا به شێکی زۆری کورد پاڵپشتی عیڕاق ئه که ن . ئه شبێت به...
Haidari | 13/12/2017 07:59:58 ص
Dast xosh qsekant zor rasten
قوباد قەوماندی!
| 12/12/2017 | (6)
Rebwar | 13/12/2017 06:31:46 ص
dastxosh
حەشدی دوای داعش
| دوێنێ کاژێر 08:14 | (1)

لە بەشەکانی دیکەی رووداوەوە

تووشبون بە رۆماتیزمی جومگە لە رێگەی سێکس تۆمارکرا 2 کاژێر لەمەو بەر |

تووشبون بە رۆماتیزمی جومگە لە رێگەی سێکس تۆمارکرا

بەهۆی بەکتریای شیگیڵلا روویداوە زۆرتر
ژمارەی تووشبووان بە وەناق لە یەمەن گەیشتە 283 کەس 13 کاژێر لەمەو بەر |

ژمارەی تووشبووان بە وەناق لە یەمەن گەیشتە 283 کەس

34 کەسیان مردوون زۆرتر
تۆماری دەنگدەران گەورەترین ئاستەنگی بەردەم هەڵبژاردنە 19 کاژێر لەمەو بەر |

تۆماری دەنگدەران گەورەترین ئاستەنگی بەردەم هەڵبژاردنە

هەڵسوڕاوێکی گۆڕان: متمانەمان بە كۆمیسیۆن نییە زۆرتر
0.484 seconds