وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

هەڤاڵ كوێستانی: زۆربەی ئەندامانی سەركردایەتی یەكێتی شایستەی پۆستەكانیان نەبوون

لەلایەن كاوە ئەمین 25/12/2018
هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو)

رووداو - سلێمانی

بەشی دووەم

هەڤاڵ كوێستانی، نووسەری كتێبی (ئەو رۆژانەی نیشتیمان هی هەمووان بوو)، لە بەشی دووەمی هەڤپەیڤینەكەی لەگەڵ بەرنامەی پەنجەمۆردا كە سەعات 22:05ی شەوی هەینی لە تەلەڤزیۆنی (رووداو) پەخش دەكرێ‌، باسی ناكۆكییەكانی نێو كۆمەڵەی رەنجدەرانی كوردستان دەكات، هەروەها باسی دانانی نەوشیروان مستەفا بە سكرتێری كۆمەڵە دەكات و دەڵێت هەرچەندە شەهید ئارام دژی ئەوە بووە نەوشیروان مستەفا ببێتە سكرتێری كۆمەڵە، بەڵام مام جەلال داینا، ئەویش بۆ راگرتنی باڵانس و بەهێزبوونی باڵی كۆمەڵە بەرامبەر بە باڵی بزووتنەوە بوو.

رووداو: مام جەلال داوات لێدەكات ببیتە ئەندامی سەركردایەتی بزووتنەوە، بەڵام تۆ رەتیدەكەیتەوە، بۆ؟

هەڤاڵ كوێستانی: دیارە سەركردایەتی بزووتنەوە، عومەر دەبابەی لێدەرچێ‌، هەموویان جیاببوونەوە، تەنیا 3-4 كادیر مابوون. مام جەلال پێویستی بەو چەترە هەبوو كە بەناوی یەكێتییەوە دروستی كردبوو، چونكە كارەكە بە تەنیا بە كۆمەڵە و خەتی گشتی نەدەكرا. چونكە ئەگەر تەنیا كۆمەڵە و خەتی گشتی مابووایە، پۆستەكانی سەركردایەتی و فەرماندەییەكان وەكو یەك دابەش دەكران. بەڵام ئەگەر سێ‌ باڵ بوونایە، كۆمەڵە یەك لەسەر سێی ئەو پۆستانەی بەردەكەوت، مام جەلالیش حەزی نەدەكرد هەموو پۆستەكان لەلای كۆمەڵە بن، بۆیە دروستكردنی بزووتنەوە بۆ مام جەلال گرنگ بوو، بۆ ئەوەی بەشێك لەو پۆستانە ببات. دروستكردنی بزووتنەوەش لەلای مام جەلال وەكو دروستكردنی رێكخراوێكی سەربەخۆی بوو. خەتی گشتی دروستكراوی خۆی بوو، بزووتنەوەش دیسان رێكخراوێكی دیكەی خۆی بوو، مام جەلال دەبووە خاوەنی دوو رێكخراو بەرامبەر بە رێكخراوێك. بۆیە كە دەبووە دەنگدان زۆرینەی دەنگ بۆ ئەو بەرەیە دەچوو كە مام جەلال رابەرایەتی دەكرد. 

مام جەلال بە منی گوت لە كاتێكی زۆر باشدا هاتووی، بەنیازم تۆ بكەم بە ئەندامی سەركردایەتی بزووتنەوە. نامەم بۆ كۆمەڵێك خەڵكی دیكەش ناردووە. بەمزووانە ئەوانیش دەگەنە ئێرە و سەركردایەتییەكی رێكوپێكی لێ دروست دەكەین، بەڵام لەبەر ئەوەی ئەندامی كۆمەڵە بووم، باوەڕم بەوە نەبوو لە یەك كاتدا لە دوو شتی جیاوازدا بم. جگە لەوەش گەنج بووم و ئەزموونی سیاسیم زۆر كەم بوو، ئەزموونی پێشمەرگایەتیم هەر نەبوو، بۆیە خۆم بە شایستەی ئەو پۆستە نەدەبینی، بە مام جەلالم گوت ببوورە من ئەندامی كۆمەڵەم، لەبەر ئەوە ناتوانم. بەڵام ئەگەر ئەندامی كۆمەڵەش نەبوومایە، قبوڵم نەدەكرد، چونكە خۆم بە شایستەی ئەو پۆستە نەدەزانی. 

رووداو: خەڵكانێك بەو پێوەرەی تۆ باسی دەكەی گەیشتبوونە سەركردایەتی؟

هەڤاڵ كوێستانی: من ئەوكاتە زۆربەی سەركردەكانم نەدەناسی، دواتر ناسیمن، زۆربەی ئەوانەی لە سەركردایەتی یەكێتی بوون، جیاوازییەكی ئەوتۆیان نەبوو لەگەڵ كادیرانی ئاسایی، زۆربەیان شایستەی ئەو پۆستە نەبوون. بەتایبەتی ئەوانەی سەركردایەتی بزووتنەوەیان لێ دروستكرا، زۆربەیان لەناو شاردا بوون و ئەزموونی پێشمەرگایەتی و سیاسییان ئەوەندە زۆر نەبوو. 

رووداو: مام جەلال هیچ هەوڵی دا سەركردەكانی بزووتنەوە بگەڕێنێتەوە ناو یەكێتی؟

هەڤاڵ كوێستانی: ئەوكاتەی سەردانی هاوڕێیانی بزووتنەوەم كرد، چاوم بە د.مەحموود كەوت. زەرفێكی لە جانتاكەی دەرهێنا لەسەر زەرفەكە نووسرابوو جەلالیات، زەرفەكەی كردەوە و كۆمەڵێك نامەی دەرهێنا، دەیگوت ئەوە ئەو نامانەن كە مام جەلال بۆ كۆمەڵێك كادیر و فەرماندەی ئێمەی ناردووە، ئەوانەی كە مام جەلال پێیاندەڵێت خەڵكی عەشایەر و نەخوێندەوار، ئەوەتا داوایان لێدەكات بگەڕێنەوە ناو یەكێتی.

رووداو: كاتێك نەوشیروان مستەفا دەگەڕێتەوە، حەز ناكات لەناو كۆمەڵە ئیش بكات، بەڵام لەسەر داوای مام جەلال دەبێ‌ بە سكرتێری كۆمەڵە. خۆیشی گوتوویەتی زۆر بڕوای بە ماركسیەت نەبووە و دواجاریش دەڵێت كۆمۆنیزم گەڕ و گول بووە. ئایا مام جەلال دەیویست لە رێگەی نەوشیروانەوە دەست بەسەر كۆمەڵەدا بگرێ‌؟

هەڤاڵ كوێستانی: وەكو باسدەكرێ‌ كۆمەڵە لە سێ‌ رەوت دروستبووە، یەكێكیان مام جەلال رابەرایەتی كردووە، یەكێكیان شەهید شەهاب و ئەوی دیكەشیان كاك نەوشیروان. بەڵام كاتێك كۆبوونەوە دەكرێ‌ و كاك نەوشیروان دەزانێ‌ مام جەلال بەشدارە لە دروستكردنی كۆمەڵەدا، ئەو دەكشێتەوە، بەڵام هانی هاوڕێكانی دەدات بەشداری بكەن. بۆیە كاك نەوشیروان لە دروستبوونی كۆمەڵەدا بەشدار نەبوو. 

رووداو: دەڵێن كاك ئارام حەزی نەكردووە كاك نەوشیروان بێتە ناو كۆمەڵە، راستە؟

هەڤاڵ كوێستانی: كاك ئارام پێی خراپ نەبوو كاك نەوشیروان بێتە سەركردایەتی كۆمەڵە، بەڵام رازی نەبووە ببێ‌ بە سكرتێری كۆمەڵە.

رووداو: تۆ بەشداریی كۆنفرانسی یەكەمی كۆمەڵەت كرد، دەڵێن لەوێ‌ ئاراستەی جیاواز لەنێو كۆمەڵەدا دەركەوتن؟

هەڤاڵ كوێستانی: خۆی پێش كۆنفرانس لەو كۆبوونەوانەی دەكران یان لە بارەگاكان كە گفتوگۆ دەكرا، هەستت بە ئاراستەی جیاواز دەكرد، بەڵام لە كۆنفرانس لانیكەم دوو هێڵی زۆر روونت دەبینی. هێڵێك ئەوانەی كە درێژەپێدەری كۆمیتەی هەرێمەكان بوون، خۆیان بە خەتی شەهید ئارام دەزانی. پێداگرییان لەسەر ئەوە دەكرد كە دەبێ‌ كۆمەڵە رێكخراوێكی چینایەتی ماركسی بێ‌ و لە چوارچێوەی عێراقدا كار بكات و پەیوەندی نەبێ‌ بە پارچەكانی دیكەی كوردستانەوە، بەڵام بەرەكەی دیكە كە لایەنگرانی كاك نەوشیروان مستەفا بوون و گرووپی زیندانیان پێدەگوتن، پێیانوابوو دەبێ‌ كۆمەڵە رێكخراوێكی كوردستانی بێ‌. 

رووداو: خۆت لەگەڵ كام ئاراستە بووی؟

هەڤاڵ كوێستانی: من لەگەڵ ئەو ئاراستەیە بووم كە كۆمەڵە رێكخراوێكی كوردستانی ماركسی بێ‌، بەڵام لە چوارچێوەی كوردستانی عێراقدا ئیش بكات. كاك نەوشیروان خۆی بڕوای بە خەباتی ناو عێراق هەبوو، بڕوای بە خەباتی دەرەوە نەبوو، تەنانەت مام جەلال خۆیشی زیاتر بڕوای بە خەباتی عێراقی هەبوو تا خەباتی كوردستانی، بەڵام پشتیوانی لەو بەرەیە دەكرد كە خۆیان بە كوردستانی دەزانی.

رووداو: دەڵێن یەكێك لە هۆكارەكانی جیابوونەوەی بزووتنەوە ئەوە بوو كە مام جەلال حیسابی بۆ نەدەكردن؟

هەڤاڵ كوێستانی: ئەوان كۆمەڵێك پاساوی دیكەیان هەبوو، لەوەی مام جەلال هەموو دەسەڵاتی دارایی و رێكخستن و پەیوەندییەكانی دەرەوەی خستووەتە ژێر دەسەڵاتی خۆی. لە دابەشكردنی چەك و هاوكاریدا زیاتر بەلای كۆمەڵەدا دەیشكێنێ‌. 

رووداو: تۆ سەردانێكی بزووتنەوە دەكەی، ئەوان خەریكی گفتوگۆ بوون لەگەڵ رژێم، تەنانەت دەگوترێ‌ د.مەحموود عوسمان، سەدامیشی بینی. تۆ لەو دانیشتنە چیت بۆ دەركەوت؟

هەڤاڵ كوێستانی: مەحموود عوسمان لە پاڵ بەردێك دانیشتبوو، گوێی لە رادیۆی بی بی سی گرتبوو. هەوڵی دەدا قەناعەت بە من بێنێ‌ كە رێگەی گفتوگۆ باشترە لە شەڕی درێژخایەن. ئومێدی زۆریان بەوە هەبوو كە بەغدا داواكارییەكانیان جێبەجێ‌ بكات.

رووداو: هیچ بەڵێنێكیان پێدابوون؟

هەڤاڵ كوێستانی: د.مەحموود هیچی لەو بەڵێنانە لەلای من باس نەكرد، بەڵام لێمپرسی ئێوە كە دەڕۆنەوە ناترسن ئەزموونی شەڕی جەلالی و مەلایی جارێكی دیكە لەڕێگەی ئێوەوە دووبارە ببێتەوە؟ ئەو گوتی: ئێمە كە لەگەڵ حكومەت رێكدەكەوین هەموو داخوازییەكانمان جێبەجێ‌ دەكات. بۆیە ئێمە قەناعەتمان وایە دوای ئەوەی كە خەڵك مافەكانی بەدەستهێنا، كەس لەگەڵ جەلال نامێنێ‌. هیچ كەس نامێنێ‌ كە شەڕ دژی ئەو دەستكەوتانە بكات.

رووداو: تۆ لەسەر ئەو سەردانە رەخنەت لێدەگیرێ‌، بە تایبەتی لەلایەن سالار عەزیز. ئەو رەخنەیە لەجێی خۆیدا بوو؟

هەڤاڵ كوێستانی: چونكە من زۆر نەبوو لە شارەوە هاتبووم، بۆ من زۆر غەریب بوو. من كە لە شار بووم، هاوڕێی بزووتنەوە، پارتی، شیوعی، سۆسیالستم هەبوون و سەردانم دەكردن، بیرم لەوە نەدەكردەوە لە چ حیزبێكن، لەلای من گرنگ ئەوە بوو ئەوانە لە بەرەی گەل و بەرەی نیشتیماندان لە دژی حكومەتی عێراق. هەر بەو گیان و بەو رۆحیەتەوە ئەو سەردانەم كرد، لەلای من رەخنەكە لەجێی خۆی نەبوو، بەڵام بە مەنتقی ئەوكات دەبێ‌ رەخنەكە لەجێی خۆیدا بووبێ‌، چونكە ئەو دیسپلینە حیزبییەی كە هەبوو من هێشتا لەگەڵی رانەهاتبووم.   

رووداو: دوای سەردانەكەت بۆ لای بزووتنەوە، تۆ بەشداری كۆبوونەوەیەكی كۆمەڵە دەكەی، لەو كۆبوونەوەیە باسی چی كرا؟

هەڤاڵ كوێستانی: نزیكەی 20- 25 كادیر بەشدارییان لە كۆبوونەوەكەدا كرد، ژمارەیەك لە ئەندامانی ناوەندی كۆمەڵە كۆبوونەوەكەیان بەڕێوەدەبرد. زۆرتر باسی بارودۆخی كۆمەڵە و رێكخستنەكانی كۆمەڵە و بارودۆخی گشتی كوردستان و پەیوەندی كۆمەڵە و یەكێتی و جیابوونەوەی بزووتنەوە و هاتنی هێزێكی قیادەی مۆقەتە بوو بۆ چیای جاسووسان.

رووداو: لەو كۆبوونەوەیە هەستت بە ئاراستەی جیاواز لەناو كۆمەڵەدا كرد؟

هەڤاڵ كوێستانی: ئەوە یەكەمجاربوو هەست بەوە بكەم شتێك لە ناكۆكی رەنگە لەناو كۆمەڵەدا هەبێ‌. هەستم دەكرد ناكۆكییەك لە نێوان دەستەی ناوەندی و كاك نەوشیرواندا هەیە. 
رووداو: هەر لەبەر ئەو ناكۆكیانە بوو كە كاك نەوشیروان بەشداری كۆبوونەوەكەی نەكرد، یان هۆكاری دیكە هەبوون؟

هەڤاڵ كوێستانی: پێموابێ‌ هەر ئەو هۆكارە بوو، كاك نەوشیروان بەشداری لە كۆمەڵێك كۆبوونەوەی سەركردایەتیشدا نەكرد، بەهۆی ئەو ناكۆكیانەی كە لەگەڵ ئەو برادەرانە هەیبوو. شتێكی دیكە كە من لەو كۆبوونەوەیەدا هەستم پێكرد، ئەوە بوو كە لە دوایین رۆژی كۆبوونەوەكەدا مام جەلال بەشداری كرد، لەوێدا بەراوردێكی نێوان خەتی گشتی و بزووتنەوە و كۆمەڵەی كرد و گوتی: ئەگەر خەتی گشتی و بزووتنەوە دەست و قاچی یەكێتی بن، ئەوە كۆمەڵە دڵی یەكێتییە. ئەو لەوێدا باسی لەوە كرد كە ئەو یەكێكە لە دامەزرێنەرە سەرەكییەكانی كۆمەڵە و تا ئێستاش لە سەركردایەتییەكەیدا بووە و وازی نەهێناوە. من ئەوە یەكەمجارم بوو ئەوە بزانم، چونكە پێشتر وامدەزانی كۆمەڵە دوور لە جەلالیەت و كاریگەریی مام جەلال دروستبووە.  

رووداو: تۆ دەتەوێ‌ بڵێی سێبەری جەلالیەت بەسەر كۆمەڵەوە هەبوو؟

هەڤاڵ كوێستانی: وەك پێشتر گوتم كۆمەڵە لە سێ‌ گروپ دروستبووە، كاك نەوشیروان هانی گروپەكەی دەدات بەشداری دامەزراندنی كۆمەڵە بكەن، بەڵام خۆی ئامادەیی دەرنابڕێ‌، چونكە كاتێك زانیویەتی مام جەلال بەشداری دەكات، خۆی كێشاوەتەوە، ئەو پێیوابوو كە مام جەلال لەناو ئەو رێكخراوە تازەیەدا بێ‌ مۆركی جەلالیەت دەنرێ‌ بە نێوچەوانی رێكخراوەكەوە و ناكۆكیی لەمێژینەی نێوان جەلالی و مەلایی دەگوازرێتەوە بۆ نێو كۆمەڵە. كاك نەوشیروان ناڕازیش بووە لەوەی گروپی شەهید شەهاب و هاوڕێكانی بەشداربن، چونكە پێیوابوو ئەوان ئەهلی دروستكردنی رێكخراوێكی ماركسی لینینی نین.

رووداو: بەڵام دواتر مام جەلال قەناعەتی پێدێنێ‌ كە ببێتە سكرتێری كۆمەڵەش ! ئەم مەتەڵە چییە كە كاك نەوشیروان دەڵێت من ماركسی نەبووم، بەڵام دواتر رابەرایەتی رێكخراوێكی ماركسی دەكات؟ 

هەڤاڵ كوێستانی: ئەوانەی كۆمەڵەیان دروستكردووە رەنگە كاك نەوشیروان لەوان ماركسیتر بووبێ‌، چونكە ئەوكاتەی ئەو لە گۆڤاری رزگاریدا بانگەشەی بۆ ماركسیزم دەكرد، باوەڕ ناكەم ئەوانی دیكە هێندە بە قووڵی باوەڕیان بە ماركسیزم هەبووبێ‌، زۆرتر لەژێر كاریگەری ئەزموونی ماوتسی تۆنگدا بوون. بۆ نموونە كاك فەرەیدوون عەبدولقادر كە یەكێك بووە لە دامەزرێنەرانی كۆمەڵە و رەنگە یەكێك بووبێ‌ لە رۆشنبیرترینەكانی گروپی شەهابی شێخ نووری، دوای 47 ساڵ لە كتێبەكەیدا بەناوی هەڵۆ سوورەكانی قەندیل دەڵێت: ئێمە تیۆری ماركسیزممان وەكو تاكتیك بەكارهێنا، ئەگینا بڕوامان بەوە نەبوو وەكو بەرنامە پەیڕەوی بكەین. بەڵام من پێموایە باوەڕنەمانی كاك نەوشیروان بە ماركسیزم زۆرتر دوای ئەوە بوو كە چووە ئەوروپا و ئەزموونی شیوعییەكانی لە ئەوروپا بینی، لەوێ گەیشتووەتە ئەو قەناعەتەی كە ماركسیزم هیچی دیكە ناتوانێ‌ نوێنەرایەتی خەباتی گەلان بكات.  

رووداو: بەڵام بوو بە سكرتێری كۆمەڵە، مام جەلال چۆن توانی قەناعەتی پێبهێنێ‌؟

هەڤاڵ كوێستانی: مام جەلال خۆی سكرتێری یەكێتی بوو، ئەو پێیوابوو مادام كۆمەڵە لەژێر چەتری یەكێتیدایە، ئیدی بۆ خۆی سكرتێری ئەویشە. من لە كۆبوونەوەی مالیمۆسیش گەیشتمە ئەو قەناعەتەی كە مام جەلال تا ئەو كاتەش هەر خۆی بە سكرتێری كۆمەڵە زانیوە. لەوەش زیاتر هەموو ئەوانەی لەدوای ئەوەوە هاتوون مام جەلال هەر بە سێبەری خۆی زانیون لەناو كۆمەڵەدا. 

رووداو: واتە مام جەلال كاك نەوشیروانی بە سێبەری خۆی زانیوە لەناو كۆمەڵە؟ 

هەڤاڵ كوێستانی: پێموایە بەڵێ. مام جەلال كە هەوڵی دەدا قەناعەت بە كاك نەوشیروان بكات، رەنگە لەبەر دوو هۆ بووبێ‌. یەكەم: ئەو پێیوابوو كە ئەندامانی سەركردایەتی كۆمەڵە زۆربەیان زۆر گەنجن و ئەزموونی سیاسییان بایی ئەوە نییە رێكخراوێكی وەكو كۆمەڵە بەڕێوەبەرن. پێیوابووە وجودی كاك نەوشیروان یارمەتی كۆمەڵە دەدات. دووەم: ئەو برادەرانەی سەركردایەتی ئەوكاتەی كۆمەڵە، جگە لە شەهید ئارام، پێیانوابوو كە هاتنی كاك نەوشیروان بۆ ناو كۆمەڵە جۆرێك لە هاوسەنگی لە سەركردایەتی دروست دەكات لە نێوان ئەوان و سەركردایەتی بزووتنەوە، چونكە سەركردایەتی بزووتنەوە كەسانی وەكو عەلی عەسكەری، دكتۆر خالید و ساڵح یوسفی تێدابوو، ئەوانە كەسانی دیار بوون. بۆیە مام جەلال پێیوابوو وجودی كاك نەوشیروان لەنێو كۆمەڵەدا ئەم هاوسەنگییەیان بۆ دروست دەكات.

رووداو: كەواتە دەتوانین بڵێین تەنیا كاك ئارام نیگەران یان ناڕازی بووە لەوەی كاك نەوشیروان بێتە ناو كۆمەڵە؟

هەڤاڵ كوێستانی: كاك ئارام دژی ئەوە نەبوو كاك نەوشیروان بێتە ناو كۆمەڵە، بەڵكو دژی ئەوە بوو ببێتە سكرتێری كۆمەڵە. بەڵام كاك نەوشیروان ئەو كاتەی بووەتە ئەندامی سەركردایەتی كۆمەڵە، باوەڕی بە رێكخراوی ماركسی لینینی نەماوە، حەزیشی نەكردووە بێتە ناو كۆمەڵە و ببێتە ئەندامی سەركردایەتی، بەڵام بە تەكلیفی مام جەلال بووەتە سكرتێر بۆ ئەوەی وەكو خۆی دەڵێ ئەو برادەرانەی كۆمەڵە بە رێگەی راستدا ببات و نەهێڵێ‌ تووشی توندڕەوی و چەپڕەوی ببن.

رووداو: باشە ئەوە پارادۆكسێكی سیاسی نەبووە لە فیكری كەسێكدا باوەڕی بە كۆمەڵە نەبێ‌ و ببێ‌ بە سكرتێری؟

هەڤاڵ كوێستانی: هیچ بەدووری نازانم، بۆچوونەكانی كاك نەوشیروان لەسەر كۆمەڵە، یان لەسەر رێكخراوی ماركسی لینینی لە كوردستان، زۆر راست و لەجێی خۆی بووبن. بەڵام ئەوەی لەلای من غەریبە، ئەوەیە كە كاك نەوشیروان دەبوو هەر لە سەرەتاوە ئەو قەناعەتانەی خۆی رابگەیێنێ‌ بۆ ئەوەی هەوڵ بدات قەناعەت بە ئەوانی دیكەی سەركردایەتیش بكات كە لەجیاتی رێكخراوێكی ماركسی لینینی، رێكخراوەكە زیاتر جەماوەری و فراوانبێت‌. 

رووداو: پێش كۆنفرانسی یەكەم، كۆمەڵە رێكخراوێكی خاوەن فكرێكی یەكگرتوو بوو، یان هەر بەرامبەر دەرەوە خۆی وا نیشاندەدات؟

هەڤاڵ كوێستانی: كۆمەڵە هەر لەسەرەتای دروستبوونیەوە تا ئەو كاتەی هەڵوەشایەوە، یەكەیەكی فیكری و ئایدیۆلۆژیی زۆر پتەو نەبووە. هەمیشە ناكۆكی فیكری لەنێودا هەبووە. هەر لەسەرەتاوە ژمارەیەكیان جیابوونەوە و پێیانوابوو دەبێ‌ رێكخراوەكە عێراقی بێ‌. دوای ئەوانیش جەماعەتی رەنجدەران جیابوونەوە. دوای گیرانی سەركردایەتی كۆمەڵە كە كۆمیتەی هەرێمەكان هەبوو، پێش ئەوانیش كۆمیتەی شارەكانیان هەبوو، عادەتەن لەنێو رێكخراوی ئایدیۆلۆژیدا ناكۆكی فیكری زوو زوو سەرهەڵدەدەن. بەڵام ئەو ناكۆكیانە بەلای ئێمەوە ئاسایی بوون، چونكە پێمانوابوو هەموو رێكخراوێكی ماركسی لینینی بە ناكۆكی فیكرییەوە گەشە دەكات. من لە كتێبەكەشم گوتوومە،  پێموابوو سەركردایەتی كۆمەڵە لە تیپی مۆسیقایەك دەچن كە هەر یەكەیان ئامێرێك دەژەنێ‌ و لە ئەنجامدا مۆسیقایەك دەژەنن كە سەرنجی گوێگران رادەكێشێ‌، بەڵام لە دواییدا وردە وردە ناسیمن و تێگەیشتم ناو كۆمەڵە گرفتی تێدایە.

رووداو: با باسی كۆنفرانسی یەكەمی كۆمەڵە بكەین، لەوێ‌ تۆ كاك نەوشیروان هەڵدەبژێری رەخنەی لێ بگری، بۆچی ئەوت هەڵبژارد؟

هەڤاڵ كوێستانی: چونكە پێموابوو كاك نەوشیروان كاریگەرترین كاراكتەری نێو كۆمەڵەیە، پێشموابوو كە كاك نەوشیروان هەم هەڵدەبژێردرێتەوە، هەمیش بە سكرتێری كۆمەڵە هەڵدەبژێردرێتەوە. رەخنەكانیشم لە ناوەڕۆكدا پرسیار بوون یان شتێك لە ترس بوون. بۆ نموونە یەكێك لەوانە من دەڵێم كاك نەوشیروان كاتی خۆی كە گەڕاوەتەوە حەزی نەكردووە بێتە ناو سەركردایەتی كۆمەڵە، قەناعەتی وا بووە كە حیزبێكی جەماوەریی فراوان دروست ببێ‌ و هەموو باڵەكانی یەكێتی لەناویدا بتوێنەوە. جا پرسیارەكەی من ئەوە بوو كە ئایا ئەگەر كاك نەوشیروان ببێتەوە سكرتێری كۆمەڵە هەمان بەرنامە جێبەجێ‌ دەكات یان ئەوەتا هەوڵی پاراستنی سەربەخۆیی كۆمەڵە دەدات؟ رەخنەی دووەمیشم ئەوە بوو كە كاك نەوشیروان پەیوەندییەكی بەهێزی لەگەڵ مام جەلالدا هەیە، ئایا ئەمە نابێتە پردێك بۆ پەڕینەوەی هەیمەنەی مام جەلال بۆ ناو كۆمەڵە؟

رووداو: دواتر ترسەكانی تۆ بوون بە واقیع؟

هەڤاڵ كوێستانی: رەنگە كادیری دیكەش هەمان ترسیان هەبووبێ‌، بەڵام من نووسیومن یان دەرمبڕیون. 

رووداو: سالار عەزیز و مەلا بەختیار ناكۆكییان لەگەڵ نەوشیروان مستەفا هەبوو، ناكۆكییەكە فیكری بوو یان لەسەر پۆست بوو، تەنانەت دەگوترێ‌ مەلا بەختیار لەو كۆنفرانسە بە شەڕەشەق دەرچوو؟

هەڤاڵ كوێستانی: مەلا بەختیار دەنگی كەمی هێنا. چونكە ئەندامانی كۆنگرە زیاتر لەو بەرەیە بوون كە پشتیوانییان لە بۆچوونەكانی كاك نەوشیروان دەكرد. بۆیە دەرنەچوونی كاك سالار و كاك جەعفەر و ئەو برادەرانەی دیكە و دەنگە كەمەكانی كاك مەلا بەختیار ئەنجامێكی چاوەڕوانكراو بوو. مەلا بەختیار لەوە ناڕەحەت بوو، ئەوەی زیاتر ناڕەحەتی كرد ئەوە بوو كە د.كەمال خۆشناو دوای كاك نەوشیروان زۆرترین دەنگی هێنابوو لەكاتێكدا تاوەکو بەستنی كۆنفرانس ئەندامی مەكتەبی سیاسی بوو لە خەتی گشتی، لەوێ ئیعلانی كۆمەڵەبوونی خۆی كرد. مەلا بەختیار پێیوابوو هۆشیاریی ئەندامانی كۆمەڵە لەوە كەمترە كە پاڵێوراوەكان هەڵبسەنگێنن.

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟
نیشانەکردن : هەڤاڵ كوێستانی
3391 ژمارەی بینین

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Rebwar | 21/01/2019 12:09:08 م
Dastxosh
دوای ئۆكتۆبەرچییەكان نۆرەی بەرهەم ساڵحە
| 19 کاژێر لەمەو بەر | (1)
سیپان | 19/01/2019 08:19:55 ص
به راستى كاره ساته..وەک کوردیک روژ نیه خەفەت نەخوم بو کچانى کوردى ئیزیدى.گریانم دیت.ئەوەى کچى کوردى ئیزیدى بە ناموسى کورد نەزانیت با خوى به کورد...
بەکرحەسەن | 19/01/2019 11:21:23 ص
زۆر دەستخۆش، هیوادارم هەر بەردەوام بیت، کارێکی زۆر جوانە،کارێکی زۆر بەرزە،هیوادارم بیکەیت بە کتێب،دڵنیاش بە وەک ئەدەبیش بەشێک دەبێت لە ئەدەبی...
هەموو شتێكی داعشی پێ جوان بوو تەنیا كەنیزەكڕاگرتن نەبێ
| 19/1/2019 | (2)
ره شید | 19/01/2019 10:49:00 ص
هه تا کوردستان به شیک بیت له عیراق ئه مریکا و ئه وانیتریش ناتوانن کورد وه ک حه لیفیکی ستراتیژیک بو خویان دا بنین ! به واتایه کی دیکه کورد هه تا نه...
لە چاوەڕوانیی گۆڕانكارییە هەرێمییەكاندا
| 19/1/2019 | (1)

لە بەشەکانی دیکەی رووداوەوە

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات 12 کاژێر لەمەو بەر |

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات

ساڵانە رێگە بە 1500 پزیشكی بیانی دەدرێت زۆرتر
کەمخەوی درێژخایەن هۆکارە بۆ توڕەبوونی بەردەوام 18 کاژێر لەمەو بەر |

کەمخەوی درێژخایەن هۆکارە بۆ توڕەبوونی بەردەوام

کاتی خەوتن مێشک هەموو زانیارییەکان دەگۆڕێت زۆرتر
0.25 seconds