وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

هەڤاڵ كوێستانی: كۆمەڵە پێیوابوو خەباتی چینایەتی شەڕكردنە لە دژی بنەماڵەی بارزانی

لەلایەن کاوە ئەمین 27/12/2018
هەڤاڵ كوێستانی، نووسەری كتێبی (ئەو رۆژەی نیشتیمان هی هەمووان بوو) بۆ رووداو: كاك نەوشیروان بۆ گفتوگۆ چوو بۆ لای سۆسیالیست، ئەوان گرتیان
هەڤاڵ كوێستانی، نووسەری كتێبی (ئەو رۆژەی نیشتیمان هی هەمووان بوو) بۆ رووداو: كاك نەوشیروان بۆ گفتوگۆ چوو بۆ لای سۆسیالیست، ئەوان گرتیان

رووداو - سلێمانی

بەشی سێیەم

هەڤاڵ كوێستانی، نووسەری كتێبی (ئەو رۆژەی نیشتیمان هی هەمووان بوو) لە بەشی سێیەمی هەپڤەیڤینەكەی بەرنامەی پەنجەمۆری كەناڵی رووداودا، شایەتی لەسەر چەند رووداوێكی دیكەی شۆڕش دەدات، لەوانەش بە بارمتەگرتنی بیانییەكان لەلایەن یەكێتی، بەیاننامەكەی شوبات، وتارەكەی مەلا بەختیار، ناڕەزایی كۆمەڵە لە دژی دانانی دوو ئەندامی تازە بۆ مەكتەبی سیاسیی یەكێتی، جیابوونەوەی محەممەدی حاجی مەحموود لە یەكێتی، گرتنی نەوشیروان مستەفا لەلایەن سۆسالیست و چۆنیەتی رزگاربوونی لە زیندانەكەی سۆسالیست لە چیای سوورێن. بەرنامەی پەنجەمۆر سەعات 22:05ی شەوی هەینی لە كەناڵی (رووداو) پەخشدەكرێ‌.

رووداو: بەیاننامەیەك بەناوی بەیاننامەی شوبات بڵاوكرایەوە، ناكۆكییەكانی كۆمەڵەی قوڵتر كردەوە، كێ‌ ئەو بەیاننامەیەی نووسی؟

هەڤاڵ كوێستانی: بەیانی شوبات لە ساڵی 1976 لەلایەن كۆمیتەی هەرێمەكان نووسرا، ئەوكاتە سەركردایەتی پێشووتری كۆمەڵە، شەهابی شێخ نووری و فەرەیدوون عەبدولقادر و عەلی بچكۆل و عومەری سەید عەلی و جەعفەر عەبدولواحید و ئەنوەر زۆراب، لە زیندان بوون. بەڵام بەیانەكە وەكو كۆمیتەی هەرێمەكان خۆیان دەڵێن بە ژمارەیەكی زۆر كەم بڵاوكراوەتەوە. زۆر بە نهێنیش بووە و تەنیا دراوەتە چەند كەسێكی دیاریكراو. بەیانەكە باسی بارودۆخی كۆمەڵە دەكات، باسی رۆیشتنی برادەرانی سەركردایەتی دەكات بۆ ئێران كە لەوێوە بە تەمابوون بڕۆن بۆ سووریا. بەیانەكە ئەمەی بە جۆرێك لە راكردن لە قەڵەم دابوو.

رووداو: دوای ئەوە وتارێك لەلایەن مەلا بەختیارەوە دەنووسرێ‌، وەك دەڵێن قوڕەكەی خەستتر كرد؟
 
هەڤاڵ كوێستانی: ئەم وتارەی مەلا بەختیار ساڵی 1980 لە ژمارەی شەشی گۆڤاری كۆمەڵەدا بڵاوكرایەوە. ئەوكاتە بوو كە حكومەتی عێراق لێبوردنی گشتی دەركردبوو. ئەو برادەرانەی پێشووتری سەركردایەتیی كۆمەڵە كە گیرابوون، بەر ئەو لێبوردنە گشتییە كەوتبوون زۆربەیان هاتنە دەرەوە، وتارەكەش كەوتە ئەوكاتە. وتارەكە باسی بارودۆخی كۆمەڵە دەكات. جارێكی دیكە باسی رۆیشتنی ئەو برادەرانە دەكات. باسی كۆمیتەی هەرێمەكان دەكات كە چۆن جارێكی دیكە كۆمەڵەیان هەڵساندەوە. لەوێدا دیارە رەخنە لە سەركردایەتی پێشووی كۆمەڵە دەگرێ‌. ئەو برادەرانە ئەمەیان بە پێشوازییەكی زۆر سلبی زانی و پێیانوابوو ئەوە بۆ شكاندنی ناوبانگی ئەوانە. بۆ لاوازكردنی پێگەی ئەوانە لە ناو كادیران و ئەندامانی و پێشمەرگەكانی كۆمەڵە. من پێموانییە مەلا بەختیار بە مەبەست وتارەكەی نووسیبێ‌، چونكە وتارەكە كاتێك نووسراوە، كە ئەو برادەرانە هەر لە زیندان بوون.

رووداو: ئەوە راستە خاڵە شیهاب و هاوڕێكانی ویستوویانە مۆڵەتی دامەزراندنی حیزب لە حكومەتی عێراق وەربگرن؟

هەڤاڵ كوێستانی: لەدوای نسكۆی 1975 بەشێك لە سەركردەكانی كۆمەڵە پێیانوابوو بۆشاییەكی سیاسی گەورە دروستبووە. ئەوان دەتوانن كاری زۆر جیددی تێدا بكەن. سەركردایەتی ئەوكاتی كۆمەڵە لەسەر بنچینەی تێزی سێ‌ جیهان كە ئەوان باوەڕیان پێی بوو، حكومەتی عێراقیان نەدەخستە خانەی دوژمنی سەرەكییەوە. دەیانخستە خانەی دوژمنی لاوەكییەوە. بۆیە پێیانوابوو ئەگەر حكومەت مۆڵەتیان بداتێ‌، دەتوانن خەباتی سیاسی بكەن.  

  كاكە حەمە دەیزانی یەكێتی سزای دەدات، بۆیە جیابووەوە


رووداو: یەكێك لە ئەركەكانتان ناونووسكردنی ئەندامانی كۆمەڵە بووە، ئایا مەبەست لەوە چی بوو؟ بۆ ئەوە بوو لە باڵەكانی دیكەی یەكێتی جیایان بكەنەوە؟ 

هەڤاڵ كوێستانی: یەكەمجار كە یەكێتی دروست بوو، تاكە رێكخراو كە تێیدابوو تەنیا كۆمەڵە بوو، نە بزووتنەوە هەبوو، نە خەتی گشتی. كۆمەڵە كە خەڵكی رادەكێشا بۆ ناو رێكخستنەكان سەرەتا لە رێگەی یەكێتییەوە قسەی لەگەڵ دەكردن. دواتر هەڵیدەسەنگاندن تا چەند باوەڕیان بە ماركسیەت هەیە. ئینجا داوایان لێدەكردن ببنە كۆمەڵە. بۆیە زۆربەی رێكخستنەكانی یەكێتی و كۆمەڵە تێكەڵاو بوون. بەشی زۆری ئەوانەی ئەندامی یەكێتی بوون، لە رێگەی كۆمەڵەوە رێكخرابوون. ساڵی 1980 دوای ئەوەی خەتی گشتی دروست بوو، ئینجا بزووتنەوە هەبوو. سەركردایەتی كۆمەڵە بیری لەوە كردەوە كاتی ئەوە هاتووە رێكخستنەكانی خۆی لەو دوو باڵە جیا بكاتەوە. لیژنەیەك بە سەرپەرشتی مەلا بەختیار پێكهێنرا. دواتر عومەری سەید عەلی بووە سەرپەرشتیاری لێژنەكە. سەرەتا لە هەرێمی پارێزگاری ئەوانەی پارێزگاریان لە سەركردایەتی دەكرد دەستمان پێكرد. هەموو ئەوانەی لە رێكخستنەكانی كۆمەڵەدا بوون، جیامان كردنەوە. دواتر پرۆسەكە گوازرایەوە بۆ هەرێمەكان و شوێنەكانی دیكەش. 
  كاك نەوشیروان لە زیندانی سۆسیالیست ئازاد نەكرا، بەڵكو رایكرد

رووداو: تۆ زۆرجار لە دەرەوەی حیزب هەندێك كارت كردووە، بۆ نموونە بەیاننامەیەك دەردەكەی و داوای خەباتی مەدەنی دەكەی، باشە لەو سەردەم چۆن بەرامبەر رژێمێكی دڕندەی وەكو سەدام خەباتی مەدەنی دەكرا، وابزانم مام جەلال لەسەر ئەمە لێت نیگەران دەبێ‌؟

هەڤاڵ كوێستانی: من زۆر نەبوو لە نێو شاردا هاتبووم، دەمزانی خەڵك چەند تووڕە و بێزارە لەو رژێمە. خەڵك ئامادەی قوربانیدانی هەیە. ئەمانە هۆكارێك بوون بۆ ئەوەی ئەو بیرۆكەیە لەلای من دروستببێ‌. هۆكارێكی دیكە، دوای ماوەیەك تێگەیشتم ئەو بەرنامەیەی ئێمە هەمانە بە شۆڕشی درێژخایەن و شەڕی پارتیزانی ناتوانین بەرامبەر بە رژێم بوەستین. من بیرۆكەكەم لەگەڵ مامۆستا جەعفەر باسكرد كە ئەوكات بەرپرسی دەزگای راگەیاندن بوو، ئەویش بیرۆكەكەی لەلا باشبوو. ئیدی من بەیاننامەكەم نووسی و مامۆستا جەعفەریش پێیداچووەوە و بەدڵی بوو، بە ژمارەیەكی زۆر چاپ و بڵاومان كردەوە. ئێمە لەبەیاننامەكەدا داوامان كردبوو لە پاڵ شۆڕشی چەكداری پێویستە دەست بە خەباتی مەدەنیش بكەین. مام جەلال كە بەیاننامەكەی بینیبوو زۆر تووڕە بووبوو. 

رووداو: لێپرسینەوەی لەگەڵ كردن؟

هەڤاڵ كوێستانی: وەكو لێپرسنەوە نەخێر. قسەی لەگەڵ مامۆستا جەعفەر كردبوو، مام جەلال گوتبووی دەزگای راگەیاندن ئەو مافەی نییە بەیانێك دەربكات و دەستكاری ستراتیژی یەكێتی بكات كە شەڕی درێژخایەن بوو لە دژی رژێم. راستییەكەی رەخنە و تووڕەبوونەكانی مام جەلال لە جێی خۆیدا بوون، ئێمە ئەو دەسەڵاتەمان نەبوو.

رووداو: یەكێك لە تێكۆشانەكانی ئێوە خەباتی چینایەتییە، بەڵام ئێوە ستراتیژییەتی خەباتی چینایەتی خۆتان بەستبووەوە بنەماڵەی بارزانییەوە. 

هەڤاڵ كوێستانی: بۆ مەسەلەی خەباتی چینایەتی و دانانی ماڵی بارزانی بە دوژمنی سەرەكی و خەباتی چینایەتیمان لە دژی ئەوان، زۆرتر دەگەڕێتەوە بۆ سەرەتای دامەزراندنی كۆمەڵە. كۆمەڵە سەرەتا زۆر لەژێر كاریگەری خەباتی ماوتسی تۆنگدا بووە، لەوێ‌ ئەوان خەباتی چینایەتی و نەتەوایەتیان بە یەكەوە كردووە، خەباتیان لە دژی كۆمیتانگ كردووە كە ماوەیەكی زۆر حوكمی چینیان كردووە. لە هەمانكاتدا خەباتیان دژی سەرمایەدار و ئیمپریالیزمی جیهانی كردووە. برادەرانی سەركردایەتی كۆمەڵەش بە هەمان پێودانگ هاتوون سروشتی كۆمەڵگەی كوردەواریان پێوانە كردووە بە سروشتی كۆمەڵگەی چینی. ماڵی بارزانیان خستووەتە جێگەی كۆمیتانگ. ئەوان پێیانوابوو خەباتی نەتەوایەتی رزگاركردنی نیشتیمانە لە دەست داگیركەران و خەباتی چینایەتیش شەڕكردنە دژی بنەماڵەی بارزانی. 

رووداو: جا ئەمە بەراوردكردنێكی رەوایە؟

هەڤاڵ كوێستانی: ئەم لۆجیكە تاوەكو كۆنفرانسی یەك و واوەتریش مابوو، بەڵام ئێستا كە سەیری ئەوە بكەی نەخێر لۆژیكێك نییە كە لە جێی خۆیدا بێ‌. خەباتی چینایەتی بۆ رێكخراوێكی ماركسی خەباتە لە دژی سەرمایەداری. نەك توێژێكی دیكەی كۆمەڵایەتی كە ناچنە خانەی سەرمایەدارییەوە. پۆلێنكردنەكە هەڵە بوو.
  مام جەلال قەت داوای گفتوگۆی لە رژێم نەكردووە

رووداو: ئێوە دەچنە بانە لەوێ‌ چەك لە رێكخراوێكی ئیسلامی رۆژهەڵات وەردەگرن كە پەیوەندییشی لەگەڵ عێراق هەبووە، لە كاتێكدا ئێوە رێكخراوێكی ماركسی لینینین، ئەمە چۆن بوو؟

هەڤاڵ كوێستانی: مەرج نییە سەرچاوەكانی چەكت هەمیشە ئەو وڵات و ئەو رێكخراوانە بن كە هەمان ئایدۆلۆژیا و بیركردنەوەی تۆیان هەیە. ئێمە لەو قۆناغەدا زۆرجار چەكمان لە رێگەی جاش و قاچاخچییەوە كڕیوە. ئینجا ئەو چەكانەی كە رێكخراوی خەبات بە ئێمەی دەدا، دواتر من زانیم، چەكەكان لە رێگەی عەبدولڕەحمان زەبیحییەوە دابین كرابوون. ئەوان و دیموكراتیش زۆرتر چەكەكانیان لە رێگەی عێراقەوە بۆ دابین دەكرا. زەبیحی پەیوەندییەكی باشی لەگەڵ مام جەلال و یەكێتیدا هەبوو، هەر ئەو كۆمەك و یارمەتییانەشی بووە هۆی ئەوەی لەلایەن رژێمی عێراقەوە دەستگیربكرێ‌ و بێسەروشوێن بكرێ‌.

رووداو: بۆچی كۆمەڵە دژی ئەوە بوو جەمال ئاغا و عەلی حەوێز ببنە ئەندامی مەكتەبی سیاسی؟

هەڤاڵ كوێستانی: ناڕەزاییەتییەكەی سەركردایەتیی كۆمەڵە لەسەر ئەو بنەمایە بوو كە كۆمەڵە بەشی هەرە سەرەكی یەكێتی پێكدێنێ‌. بۆیە ناهەقییەكی زۆر بوو بەرامبەر كۆمەڵە دەكرا. كاتێكیش ئەو دوو بەڕێزە وەكو بزووتنەوە پێشنیازكران بۆ ئەوەی ببنە ئەندامی مەكتەبی سیاسی. سەركردایەتیی كۆمەڵە ناڕازی بوون، چونكە هەردوویان ماوەیەكی كەم بوو هاتبوونە دەرەوە. بەشداری خەباتی ناو شاریشیان كەم بوو. ئیدی سەركردایەتی كۆمەڵە پێیوابوو بەپێی ئەو توانایەی ئەوان هەیانە. شایستەی ئەوە نین ببنە ئەندامی مەكتەبی سیاسی. پێیانوابوو ئەمە هەم بۆ مەكتەبی سیاسی باش نییە، هەمیش بۆ نوێنەرانی كۆمەڵەش لە مەكتەبی سیاسی باش نییە. 

رووداو: بەڵام دواتر بە هەڕەشەیەكی مام جەلال رازی دەبن.

هەڤاڵ كوێستانی: مام جەلال ناڕازی بوو، هەڕەشەی دەستلەكاركێشانەوەی كرد ئەگەر ئەوانە دانەنرێن. سەركردایەتیی كۆمەڵەش سووربوون لەسەر ئەوەی هەڕەشەكان قبوڵ نەكەن. بەڵام كاتێك كاك نەوشیروان كەوتە نێوانیان، كێشەكە چارەسەر بوو. ئەگەر كاك نەوشیروان نەیتوانیبا سەركردایەتی بە دانانی ئەو دوو كەسە رازی بكات، رەنگە مام جەلال وازی هێنابا و یەكێتی دوو لەت بووایە.

رووداو: كەواتە دواجار مام جەلال هەموو بڕیارێكی دەدا.

هەڤاڵ كوێستانی: سەت لە سەت هەموو بڕیارێك بە دڵی مام جەلال دەرنەدەچوو. بۆ نموونە مام جەلال حوسێن سنجاری و عومەر عەزیزی بە نوێنەرایەتی بزووتنەوە و خەتی گشتی نارد بۆ دەزگای راگەیاندن، بەڵام ئێمە قبوڵمان نەكرد، چونكە پێمانوابوو ئەوان ئەزموونی نووسین و راگەیاندنیان نییە تا بتوانن بەرپرسیارێتی لەو دەزگایە وەربگرن. بەڵام زۆربەی كارەكان مام جەلال بە رەزامەندی یان هاوكاری كاك نەوشیروان توانیویەتی جێبەجێیان بكات. 
 
رووداو: یەكێتی لە هەشتاكان خەڵكی بیانی دەگرێ‌، دواتر هەندێكیان بە پارە ئازاد دەكرێن و دەگوترێ‌ هەندێكیشیان دەكوژرێن. باشە ئەوە بڕیاری سەركردایەتی یەكێتی بوو، یان سەركردایەتییە لۆكاڵییەكان ئەو كارانەیان دەكرد؟

هەڤاڵ كوێستانی: ئەمە بڕیاری سەركردایەتیی یەكێتی بوو. ئەوان ئەمەیان بۆ ئەوە بوو كە كۆمپانیا بیانیانەی لە كوردستانن، ئەندازیار و تەكنیككار و شارەزاكانیان بگیرێن و دواتر كۆمەڵێك دەستكەوتیان هەبێ‌، یەكێكیان لەوانە پێیانوابوو كە وا دەكات شۆرشی كورد لە هەموو جیهان بناسرێ‌، دوو: وا دەكات ئەو وڵاتانە بێنە سەر خەت و پەیوەندی بە شۆڕشەوە بكەن. كۆمەڵێك لە كەسی ئێمە كە لە زیندانەكانی حكومەتن لە رێگەی گوشاری ئەو دەوڵەتانەوە، ئازاد بكرێن. ئەو بەرنامەیە پێموایە لە ئەنجامی كاریگەری خەباتی فەلەستینییەكان بوو لەسەر یەكێتی. ژمارەیەك كادیری ئێمە لەلای فەلەستینییەكان راهێنانیان كردبوو، مام جەلال ماوەیەكی زۆر لەگەڵ فەلەستینییەكان كاری كردبوو. ئەم كاریگەرییەی فەلەستینییەكان لەسەر یەكێتی هەر لە سەرەتاوە هەبوو، تەنانەت یەكێتی لە ژێر كاریگەری بەرەی رزگاریخوازی گەلی فەلەستینیدا دروستبوو. ئەوانیش كۆمەڵێك رێكخراو بوون لەژێر یەك چەتردا بوون و یەك سەركردەی سەربازیان هەبوو،  بەڵام حكومەت نەكەوتە ژێر ئەو گوشارانە، ئەو دەوڵەتانەش ئامادەنەبوون هیچ لە داخوازییەكانمان بێننەدی. لە كۆتاییدا ناچاربووین لە رێگەی پارە ئازادیان بكەین. ئەمە بە دیوێكدا وەكو كارێكی جەردەیی سەیر دەكرا. 

رووداو: تۆ كەسێكی شاعیر بووی، بەڵام پێشنیازی دروستكردنی دەزگایەكی زانیاری دەكەی لە نێو شۆڕشدا، لە كاتێكدا ئێوە رەخنەتان لە پارتی دەگرت كە دەزگای پاراستنی هەیە، ئەم دەزگایە بۆچی؟

هەڤاڵ كوێستانی: ئێمە لە دەزگای راگەیاندن سەرچاوەی هەواڵ و زانیاریمان زۆر زۆر كەم بوو، هەروەها سەركردایەتیی یەكێتیش سەرچاوەی زانیاری وردیان زۆر كەم بوو. دەزگایەك نەبوو بتوانێ‌ بایەخ بە كۆكردنەوەی زانیاری بدات لەسەر عێراق و وڵاتانی دەوروبەر. مەبەستی من دەزگایەك بۆ كۆكردنەوەی زانیاری بوو، نەك دەزگایەكی ئیستیخباراتی.

رووداو: مام جەلال بڕیار دەدات گفتوگۆ لەگەڵ رژێم بكرێ‌، ئەوە بڕیاری خودی مام جەلال بوو یان سەركردایەتیی یەكێتی؟

هەڤاڵ كوێستانی: بیرۆكەی دانوستاندن هەر لەسەرەتاوە لەلایەن یەكێتی و لایەنەكانی دیكە هەبووە. تەنانەت ئەو كاتەی مام جەلال هێشتا لە سووریا بووە. حكومەتی عێراق عومەر دەبابە رادەسپێرێ‌ بۆ ئەوەی مام جەلال ببینێ‌ و پێشنیازی گفتوگۆی لەگەڵ دەكات. جارێكی دیكەش حكومەت لە رێگەی شێخ محەممەدی شێخ رەشیدی لۆلان داوا لە یەكێتی دەكات گفتوگۆ بكەن. هەروەها جارێكی دیكەش لە رێگەی شێخ محەممەدی كارێزە، هەورەها لە رێگەی هەمزەئاغای پێشدەرێ‌ داوای گفتوگۆ دەكات. هەموو هەوڵەكانیش لەلایەن حكومەتەوە بووە، مام جەلال قەت داوای گفتوگۆی لە حكومەت نەكردووە. 

رووداو: حیزبی دیموكرات هیچ رۆڵیان هەبووە لە رێكخستنی ئەو گفتوگۆیانە؟

هەڤاڵ كوێستانی: لە گفتوگۆی ساڵی 1982دا بەڵێ‌ حیزبی دیموكرات بە تایبەتیش شەخسی قاسملوو رۆڵیان هەبوو لە دیداری نێوان سەركردایەتیی یەكێتی و نوێنەرانی حكومەتی عێراق. 

رووداو: لە كتێبەكەت باس لەوە دەكەی كە دزی و جەردەیی لە نێو شۆڕشدا هەبووە، خەڵك بەبێ‌ دادگایی كوژراوە، بەڵام لەگەڵ ئەوەشدا قبوڵتان كردووە، بۆچی قبوڵتان كرد؟

هەڤاڵ كوێستانی: ئەوكارانە لە زۆر شوێن كراون، بەڵام زۆرتر لەلایەن فەرماندە لۆكاڵییەكان بەبێ‌ ئاگاداری سەركردایەتیی كراون. تەنانەت كاك نەوشیروان دەڵێت ئەوكاتەی ئامر هەرێمی یەك بووە لە ناوچەی هەورامان باسی روودانی هەندێك حاڵەتی شڕەخۆری و دزی و ئازاردانی خەڵك دەكات و دەڵێت: بەڵام نەماندەتوانی لێپرسینەوەیان لەگەڵدا بكەین، چونكە بانگی هەر كەسێكت دەكرد، رایدەكرد بۆ لای قیادە مۆقەتە یان لایەنێكی دیكە. بۆیە زەحمەت بوو تۆ بتوانی لێپرسینەوە لەگەڵ ئەوانەدا بكەی.

رووداو: زۆر باسی جیابوونەوەی كاكە حەمەی حاجی مەحموود دەكرێ‌، چ كاریگەرییەكی لەسەر یەكێتی هەبوو بە تایبەتی لە رووی سەربازییەوە؟

هەڤاڵ كوێستانی: ناكۆكییەكی زۆر لە نێوان كادیرانی هەرێمی یەك و كاك محەممەد هەبوو كە ئەو بەرپرسیان بوو. كادیرەكان ئەویان تۆمەتبار دەكرد بەوەی شڕەخۆری و راوەڕووت دەكات و سەرانە لە خەڵك دەستێنی. ئەویش كادیرەكانی بە توندڕەو و سەرەڕۆ و رێگر لە بەردەم كار و چالاكییەكانی خۆی تۆمەتبار دەكرد. 
  یەكێتی لەژێر كاریگەری بەرەی رزگاریخوازی فەڵەستین دروستبوو

رووداو: كامەیان راستیان تێدابوو؟

هەڤاڵ كوێستانی: هەردووكیان راستیان تێدابوو. ئەو كێشانە هێنرانە سەركردایەتی، ماوەیەكی زۆر كادیرەكانی ئەوێ‌ كە زۆربەیان كۆمەڵە بوون، مانیان گرت. بڕیاریان دا نەچنەوە هەتا ئەو كێشەیان بۆ چارەسەر نەكەن. مام جەلال زۆر هەوڵی دا كێشەكە چارەسەر بكات، بەڵام چارەسەر نەبوو. دواجار مام جەلال و كاك نەوشیروان لەوێ‌ نەبوون، مەكتەبی سیاسی هەردوولای بانگ كردن. لێژنەیەكی لێكۆڵینەوەیان دروستكرد. لەوكاتەدا رژێم پەلاماری چیای مامەندەی دا، لەولاشەوە قیادەی مۆقەتە هاتبوونە چیای جاسووسان بە تەمای پەلاماردانی سەركردایەتی بوون. ئەمە وایكرد پرۆسەی لێكۆڵینەوەكە نەگاتە ئەنجام. ئەگەرنا كاكە حەمە سڕ دەكرا. كاكە حەمە دەیزانی ئاكامی لێپرسینەوەكە بە زەرەری خۆی تەواو دەبێ‌، شەوێك فرسەتی هێنا و بەهێزێكەوە ناوچەكەی بەجێهێشت و گەڕایەوە هەرێمەكەی خۆی. كۆمەڵێك كەرت و مەفرەزەی لە خۆی كۆكردەوە و دوای ماوەیەك پەیوەندی بە حیزبی سۆسیالیستەوە كرد. باسی چۆنایەتی ناكەم، بەڵام لە رووی چەندایەتییەوە یەكێتی زەرەری كرد، چونكە ئەو هێزێكی زۆری لەو ناوچەیە كۆكردەوە و سەرئێشە و كێشەی بۆ یەكێتی دروستكرد. 

رووداو: ئەی مەسەلەی گرتنی كاك نەوشیروان لەلایەن سۆسیالیستەوە چۆن بوو، تا ئێستاش شێوازی ئازادبوونەكەی روون نییە، هەر كەسێك بەشێوەیەك دەیگێڕێتەوە؟

هەڤاڵ كوێستانی: كاك نەوشیروان بۆ بینینی كەسوكارەكەی چووبووە ناوچەی شارباژێڕ. لەو كاتەدا گرژییەكی زۆر لە نێوان یەكێتی و سۆسیالیستدا هەبووە و نزیك بووە لە شەڕ. كاك نەوشیروان بە فرسەتی زانیوە مادام لەوێیە فتیلی شەڕەكە بكێشێتەوە، بە باشی زانیوە پەیوەندی بە تاهیری عەلی والییەوە بكات. بەڵكو چارەسەرێك بۆ ئەو كێشەیە بدۆزنەوە. لە شوێنی دیدارەكە هێزێكی زۆر كۆدەكەنەوە و كاك نەوشیروان دەگرن و دەیبەن بۆ ئەشكەوتێك لە چیای سوورێن. ترسێكی زۆر هەبوو كە كاك نەوشیروان بكوژن یان تەسلیم بە ئێران یان عێراقی بكەن بەرامبەر بە پارەیەكی زۆر. بۆیە ئەو هێزانەی لەو ناوچەیە بوون كە مەلا بەختیار سەرپەرشتی دەكردن، هێزی زۆریان كۆكردووەتەوە و ویستوویانە لە ژێر گوشاردا كاك نەوشیروان رزگار بكەن. لەو حاڵەتە گرژییەدا كە كاك نەوشیروان لەو ئەشكەوتە بووە، كاوە شێخ لەتیف ماوەیەك لەگەڵی دەبێت. دوو كەسی دیكەش كە هاوڕێی منن، ئیدی بەرنامەی راكردن دادەنێن و شەوێك رادەكەن.



کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟
نیشانەکردن : هەڤاڵ كوێستانی
2839 ژمارەی بینین

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Rebwar | 21/01/2019 12:09:08 م
Dastxosh
دوای ئۆكتۆبەرچییەكان نۆرەی بەرهەم ساڵحە
| 19 کاژێر لەمەو بەر | (1)
سیپان | 19/01/2019 08:19:55 ص
به راستى كاره ساته..وەک کوردیک روژ نیه خەفەت نەخوم بو کچانى کوردى ئیزیدى.گریانم دیت.ئەوەى کچى کوردى ئیزیدى بە ناموسى کورد نەزانیت با خوى به کورد...
بەکرحەسەن | 19/01/2019 11:21:23 ص
زۆر دەستخۆش، هیوادارم هەر بەردەوام بیت، کارێکی زۆر جوانە،کارێکی زۆر بەرزە،هیوادارم بیکەیت بە کتێب،دڵنیاش بە وەک ئەدەبیش بەشێک دەبێت لە ئەدەبی...
هەموو شتێكی داعشی پێ جوان بوو تەنیا كەنیزەكڕاگرتن نەبێ
| 19/1/2019 | (2)
ره شید | 19/01/2019 10:49:00 ص
هه تا کوردستان به شیک بیت له عیراق ئه مریکا و ئه وانیتریش ناتوانن کورد وه ک حه لیفیکی ستراتیژیک بو خویان دا بنین ! به واتایه کی دیکه کورد هه تا نه...
لە چاوەڕوانیی گۆڕانكارییە هەرێمییەكاندا
| 19/1/2019 | (1)

لە بەشەکانی دیکەی رووداوەوە

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات 12 کاژێر لەمەو بەر |

حکومەتی بەریتانیا رێساکانی هاتنی پزیشکانی بیانی بۆ وڵاتەکە ئاساندەکات

ساڵانە رێگە بە 1500 پزیشكی بیانی دەدرێت زۆرتر
کەمخەوی درێژخایەن هۆکارە بۆ توڕەبوونی بەردەوام 18 کاژێر لەمەو بەر |

کەمخەوی درێژخایەن هۆکارە بۆ توڕەبوونی بەردەوام

کاتی خەوتن مێشک هەموو زانیارییەکان دەگۆڕێت زۆرتر
0.235 seconds