رووداو - کەرکووک
لە دوای 16 ئۆکتۆبەری ساڵی رابردووەوە حکومەتی عێراق دەستیکردووە بە گۆڕانکاری لە پۆستەکانی کەرکووک؛ بەڕێوەبەرە کوردەکان لادەبات و عەرەب و تورکمانەکان لەو پۆستانە دادەنێت. لەنوێترین بڕیاردا بە فەرمانی سەرۆکوەزیرانی عێراق بەڕێوەبەری تەندروستیی کەرکووک لە پۆستەکەی لابرا و کەسێکی تورکمان لە جێگەکەی دانرا.
لە دوای 16ی ئۆکتۆبەری ساڵی رابردوو کە سوپای عێراق و حەشدی شەعبی هێرشیان کردە سەر کەرکووک، سەرۆکی ئەنجوومەن و بەشێک لە ئەندامانی ئەنجوومەن و بەڕێوەبەری چەند فەرمانگەیەک کە کورد بوون شارەکەیان جێهێشت، دواتر حکومەتی عێراق دەستیکرد بە پڕکردنەوە و گۆڕانکاری لە پۆستەکانی کەرکووک، ئێستا کورد تەنیا پۆستی چەند فەرمانگەیەکی لەدەستدا ماوە.
لە دوای رووداوەکانی 16 ئۆکتۆبەری 2017 کورد ئەم پۆستانەی لەدەستداوە:
پارێزگاری کەرکووک
سەرۆکی ئەنجوومەنی پارێزگا
قایمقامی کەرکووک
بەڕێوەبەری پۆلیسی نەهێشتنی تاوان
بەڕێوەبەری پۆلیسی فریاکەوتن
بەڕێوەبەری خۆراک
بەڕێوەبەری خانووبەرە
سەرۆکی دەستەی دەستپاکی
بەڕێوەبەری رێگەوبان
بەڕێوەبەری تەندروستی
بەڕێوەبەری کشتوکاڵ
سەرۆکی دەستەی وەبەرهینان
بەڕێوەبەری چالاکی وەرزشی و لاوان
بەڕێوەبەری خوێندنی کوردی
بەڕێوەبەری پۆلیسی قەزا و ناحییەکان.
وەرگرتنەوەی ئەو پۆستانە لەکاتێکدایە، لە هەڵبژاردنی ئەنجوومەنی پارێزگاکان و پەرلەمانی عێراق کورد لە کەرکووک زۆرینە بوو؛ بەجۆرێک لەکۆی 41 کورسی ئەنجوومەنی پارێزگا 26 کورسی بەدەستهێناوە. لە هەڵبژاردنی رابردووی پەرلەمانیشدا، سەرەڕای بایکۆتی پارتی، لە کۆی 12 کورسی شەش کورسی بەدەستهێناوە.
ئەحمەد عەسکەری، ئەندامی ئەنجوومەنی پارێزگای کەرکووک بە (تۆڕی میدیایی رووداو)ی راگەیاند "هەر گۆڕنکارییەک لە کەرکووک دژی کورد بکرێت، کورد خۆی تاوانبارە. ئەگەر ئەندامانی ئەنجوومەن و سەرۆکی ئەنجوومەن لە کەرکووک بوونایە حکومەتی عێراق نەیدەتوانی یەک بەڕێوەبەری کورد لاببات".