وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

نێچیرڤان بارزانی: سەربەخۆییمان بە شەڕ ناوێت

لەلایەن گۆڤەند مستەفا 27/9/2017
تەواوی هەڤپەیڤینی نێچیرڤان بارزانی، سەرۆکی حکومەتی هەرێمی کوردستان لەگەڵ میدیاکانی تورکیا

رووداو - هەولێر 

سەرۆکی حکومەتی هەرێمی کوردستان هەنگاوەکانی قۆناخی دوای گشپرسیی ئاشکرادەکات، لەبارەی کاردانەوەی بەغدا و وڵاتانی دراوسێش لەکاتی راگەیاندنی سەربەخۆیی دەڵێت: "ئێمە سەربەخۆییەکمان ناوێت  شەڕ دروست بکات، بەڵکو دەمانەوێت بە دیالۆگ و بە لێکتێگەیشتن لەگەڵ بە‌غدا بگەینە ئەو پرسە". لەبارەی ئەگەری گەمارۆ خستنە سەر کوردستانیش دەڵێت: "ئەگەر گەمارۆیە دابنرێت کاریگەری لەسەر خەڵک دەبێت، بەڵام کەس لەبرسان نامرێت و ئەو کاروانە بەردەوام دەبێت، پرسیاری ئێمە ئەوەیە بۆ بگاتە ئەو قۆناخە، ئێمە نامانەوێت و تەمەننا دەکەین نەگاتە ئەو قۆناخە".

رۆژی چوارشەممە 27-9-2017 نێچیرڤان بارزانی، سەرۆکی حکومەتی هەرێمی کوردستان لە هەڤپەیڤینێکدا لەگەڵ میدیا تورکییەکان لەبارەی قۆناخی دوای گشتپرسی، پەیوەندییەکانی هەرێمی کوردستان لەگەڵ بەغدا و تورکیا و ئێران و کاردانەوەکانیان، ئەگەری داخستنی سنوورەکان بەسەر باشووری کوردستان، واژۆکردنی گرێبەستی بەرهەمهێنانی گاز لەگەڵ رۆسنەفت و هەڵکردنی ئاڵای ئیسرائیل لە کەرنەڤاڵەکانی گشتپرسی قسەی کرد.

لە وەڵامی ئەو پرسیارەی: ئەگەر هاتوو هەڵوێستەکانی تورکیا هەروا تووند و بەردەوامبن و هەندێک رێککار بگرێتەبەر، بەتایبەت ئێستا مانۆری هاوبەشی سەربازی لەگەڵ عێراق بەردەوامە، ئەگەر بێت و پێشڕەوییەکانیان بەرەو خاکی کوردستان بێت، ئێوە لەبەرامبەر ئەوەدا پلانتان چی دەبێت؟ نێچیرڤان بارزانی گوتی: "باوەڕناکەم ئەوە ببێت، تا ئەوکاتەی مانۆری خۆیان لەنێو خاکی تورکیا دەکەن ئەوە پەیوەستە بە خۆیان، بەس ئەگەر بیانەوێت بپەڕنەوە بۆ ئەوبەر، ئەوا بەدڵنیاییەوە ئێمە هەڵوێستمان دەبێت، لەڕاستیشدا من پێموانییە ئەوە بکرێت".

لەبارەی واژۆکردنی گرێبەستی بەرهەمهێنانی گاز لەگەڵ کۆمپانیای رۆسنەفت و راکێشانی بۆری بۆ تورکیا، نێچیرڤان بارزانی گوتی: "ئەو رێککەوتنەی ئێمە لەگەڵ رۆسنەفت کردمان بۆ دروستکردنی بۆرییەکی گازە لە کوردستانی عێراق بۆ تورکیا و لەوێشەوە بۆ ئەوروپا، بەپێی ئەو رێککەوتنەی ئێمە لەگەڵ تورکیا هەمانە، بەپێی رێککەوتنەکە بەشێک لەو گازە بۆ تورکیا دەبێت، چونکە تورکیا پێویستی بە گازی زیاتر هەیە، ئەو گازەی بە تورکیای دەدەین لەگەڵ ئیزافەی ئەو گازەی هەیە لەڕێگەی تورکیاوە بۆ ئەوروپای دەنێرین".

سەرۆکی حکومەتی هەرێمی کوردستان لە هەڤپەیڤینەکەدا چەندجارێک جەختی لەوە کردەوە کە دەیانەوێت بە دیالۆگ لەگەڵ بەغدا هەموو شتێك ببڕێنەوە، لە وەڵامی ئەو پرسیارەشدا ئەگەر بە دیالۆگ چارەسەر نەبوو، چ هەنگاوێک دەگرنەبەر؟ رایگەیاند: "ئێمە مکوڕین لەسەر دیالۆگ، هیچ چارەسەری دیکە نییە، نە بۆ ئەوان چارەسەری دیکە هەیە نە بۆ ئێمەش".

لەبارەی بڕیارەکانی پەرلەمانی عێراقیش گوتی: "ئەو بڕیارانە و ئەو قسانەی لە پەرلەمانی عێراق دەکرێن، کتومت ئەگەر پرسیار لە ئێمە بکەیت بۆ گشتپرسیتان کرد، ئێمەش دەڵێین لەبەر ئەو ئەقڵیەتە و لەبەر شێوەی بەڕێوەبەردنی ئەو وڵاتە ئێمە گشتپرسیمان کرد، ئەوان بە زمانێکی زۆر دوور لە هەموو برایەتی و دۆستایەتییەک و هاووڵاتیبوون لەنێو پەرلەمان قسەیان لەسەر ئێمە کرد، ئێمە بۆیە گشتپرسیمان کرد، چونکە مەترسیمان لەو ئەقڵیەتە هەیە، بەڵام ئێمە دەمانەوێت کێشەکان بە دیالۆگ چارەسەر بکرێن".

هەڵکردنی ئاڵای ئیسرائیل لە کەرنەڤاڵەکانی گشتپرسی و دەنگدانەوەی پرسەکە لە تورکیا تەوەرێکی دیکەی هەڤپەیڤینەکەی نێچیرڤان بارزانی بوو و رایگەیاند: " هەڵکردنی ئاڵای ئیسرائیل هیچ پەیوەندییەکی بە سیاسەتی حکومەتی هەرێمی کوردستانەوە نییە، ئەگەر بە ئەقڵانی سەیری ئەو بابەتە بکەین، باشترین یارمەتی بۆ ئێمە ئەوەیە کە ئەو کارە نەکرێت، نە ئاڵای ئیسرائیل هەڵبکرێت و نە بەوشێوەیەش قسەی لەسەر بکرێت، ئەوە شتێک نییە ئێمە وەکو هەرێمی کوردستان بەرنامەمان بۆی دانابێت و بکرێت، هاوکات ئێمە بەشێوەیەکی فەرمی هیچ پەیوەندییەکمان لەگەڵ ئیسرائیل نییە، لەگەڵ ئەوەش ئێمە دوژمنایەتیمان لەگەڵ هیچ میللەتێکی دونیادا نییە".

دەقی هەڤپەیڤینەکە:

نێچیرڤان بارزانی: ئێمە لە بێئومێدی و بێهوایی بەرەو گشتپرسی چووین، بەداخەوە بەغدا 13 ساڵ دەرفەتی هەبوو بۆ ئەوەی بڕوا بە ئێمە بهێنێت کە مانەوەمان لەگەڵ ئەوان باشترە لەوەی دەربچین، دیسانەوە دەڵێم ئێمە لە بێهیوایی خۆمان لەگەڵ بەغدا پەنامان بۆ گشتپرسی برد. بابەتی داخستنی سنوورەکان لە بەرژەوەندی هیچ لایەکدا نییە، نە لە بەرژەوەندی ئێمەدایە نە لە بەرژەوەندی تورکیا و خەڵکی هەردوولا زەرەر دەکەن، هەناردەکرنی کاڵاکانی تورکیا وەکو نموونە لە ساڵی 2016  لەڕێگەی دەروازەی ئیبراهیم خەلیل بۆ کوردستان و بۆ عێراق 10 ملیار دۆلار بووە، هاوکات بە هەزارەها هەلی کاری هەم لە تورکیا و هەم لە کوردستان رەخساندووە. ئەو ئامانجەشی کە دانراوە ئەوە بووە لە 2017 بۆ 2018 بگاتە 14 ملیار دۆلار، بازاڕی عێراق و کوردستان بازاڕی یەکلاکردنەوەی کاڵاکانی تورکیایە، چ بەرژەوەندییەک لەوەدایە ئەو دەرگایە دابخرێت لەکاتێکدا هەردوولامان زەرەرمەندین.

بەڕای ئێمە هیچ دەلیلێکی ئەوەندە گەورە نییە ئەو جۆرە بڕیارە بدرێت. لە مەسەلەی بۆری نەوت راستە لەدەست تورکیایە، بەڵام ئێمە رێککەوتنێکمان لەگەڵ تورکیا هەیە کە دەمێکە واژۆکراوە، تورکیاش هەمیشە ئەوەی دەرخستووە کە شوێنێکی ئەمینە بۆ گەیاندنی وزە لەو ناوچەیە بۆ ئەوروپا و بۆ تورکیا، ئێمە دەمانەوێت هەر بەوشێوەیە بمێنێتەوە، نامانەوێت بابەتی گشتپرسی لە کوردستانی عێراق بەوشێوەیە تەفسیربکرێت کە دژی ئەمنی قەومی تورکیایە، بەپێچەوانەوە ئێستا ئێمە لە مەسەلەی وزە خەریکی دەستپێکردنی بۆری گازین هەم بۆ تورکیا و هەم لەڕێگەی تورکیاوە بۆ ئەوروپا، ئەمە پرۆژەیەکی واقیعییە و لەم ساڵانەی داهاتوودا جێبەجێ دەکرێت.

من پێموایە بیرکردنەوە لەو مەسەلانە لە بەرژەوەندی هیچ لایەکدا نییە، باشترین یارمەتی کە تورکیا و وڵاتانی دیکە بدەن بە ئێمە ئەوەیە جارێک داوا لە بەغدا بکەن بۆ واتان کرد گەلی کوردستان وا بیربکاتەوە؟ ترسی گەلی ئێمە لە عێراقدا ترسێکی حەقیقییە لە ئاییندەی خۆی. من دەتوانم زۆر نموونەیان بۆ بهێنمەوە، بەڵام سەرنج دەخەمە سەر دوو نموونەی زۆر گرنگ، یەکەمیان: کاتێک هاتن یاسایان بۆ حەشدی شەعبی دەرکرد، حەشدی شەعبی کۆمەڵێک میلیشیان هاتوون یاسایان بۆ دەرکردن، هەر بەو یاسایە دەبێت پڕچەک بکرێن و لەڕووی داراییەوە هەموو شتێکیان بۆ دابین بکرێت، پێشمەرگە لەگەڵ ئەو دوژمنە تاوەکو ئێستا کە داعشە نزیکەی 1800 شەهیدی داوە، 10 هەزار برینداریشمان داوە، پەرلەمانی عێراق و حکومەتی عێراق ئامادەنین باسیشیان بکەن، باشە ئێمە چۆن خۆمان بە هاووڵاتی ئەو وڵاتە بزانین کە بەوشێوەیە رەفتار لەگەڵ ئێمە دەکات، وڵاتانی دەرەوە یارمەتی عێراق دەدەن، بانکی نێودەوڵەتی یارمەتی عێراق دەدات، IMF پارە دەداتە عێراق، دۆخی هەرێمی کوردستان بەوشێوەیەیە لەڕووی ئابوورییەوە کە ئێمە بەشێکین لە عێراق بەڵام ئەوان ئامادەنین تەنانەت دۆلارێکیش بدەنە هەرێمی کوردستان، بۆیە واباشترە لەبری ئەوەی بە ئێمە بڵێن بۆ ئەمەتان کرد، بە بەغدا بڵێن بۆ واتان لە کورد کرد بگاتە ئەو قۆناخە، بەغدا پاڵی بە ئێمەوە نا، ئێمە ساڵی 2003 کە چووینەوە بۆ عێراق، پێش ساڵی 2003 هەموو شتێکمان هەبوو، بە ئارەزووی خۆمان گەڕاینەوە بۆ عێراق، چونکە بە ئێمەیان گوت عێراقێکی دیموکراتی فیدراڵییە لەسەر ئەو بنەمایەش ئێمە گەڕاینەوە، هەموو شتێکیشمان کرد بۆ ئەوەی بەڕاستی عێراق بە یەکپارچەیی بمێنێتەوە.

دوای 13 ساڵ ئێمە پرسیار لە خۆمان دەکەین ئێمە لە کوێی ئەو عێراقەین؟ ئەو عێراقە چی لێهات؟ ئایا دیموکراتە؟ ئایا ئەو عێراق بەڕاستی فیدراڵییە؟ ئایا ئەو عێراقە  بەو دەستوورە پابەندە کە هەمووجارێک ئەوان باسی دەکەن؟ هیچ یەکێک لەوانە نییە، هەر ئەمانەش هۆکاری ئەوەبوون ئێمە ئەو هەڵوێستە وەربگرین.

باسی دەستوور دەکەن، ئەو ماددانەی کە خۆیان پێیانخۆش بێت لە خزمەتی تائیفەیەکی دیاریکراو بێت جێبەجێ دەکرێت، ئەوانەی دیکە کە لە خزمەتی ئەواندا نییە، هەمووی پشتگوێ دەخرێت و هیچیشی جێبەجێ ناکرێت، بەس هەر بە ئێمە دەڵێن دەستوور و دەستوور وەکو ئەوەی بڵێی ئەو دەستوورە قورئانە، بەڵام وا نییە، ئەمڕۆ ئەوەی ئێمە لە عێراق دەبینین، عێراقێکی شەراکەت نییە، عێراق هەموو شەراکەتێکی تێکداوە، ئەمڕۆ ئەو حکومرانییەی لە عێراق دەکرێت حکومڕانییەکی تائیفییە، ئەگەر ئێمە ئەوانە باس بکەین دەبێت وڵاتانی دەرەوە بزانن ئەمانە هۆکار بوونە بۆ ئەوەی ئێمە بەرەو گشتپرسی بچین.

پرسیار: بەڕێز سەرۆکوەزیران یەکێک لە رەخنەکانی سەرۆککۆماری تورکیا لەسەر هەبوونی ئاڵای ئیسرائیل بوو، ئەمەش بە سرووشتی خۆی هەڵوێستێکی گەورەی لە تورکیا دروستکرد،  هەروەها جەنابی سەرۆککۆماری تورکیا گوتی لە دیداریدا لەگەڵ سەرۆکی ئەمریکا پەیامی خۆی پێگەیاندووە، لەسەر ئەو بابەتە دەمانەوێت بیروبۆچوونی ئێوە بزانین.
 
نێچیرڤان بارزانی: بابەتی هەڵکردنی هەر ئاڵایەک جیا لەو ئاڵایەی خۆمان هەمانە کە ئاڵای کوردستانە، هیچ پەیوەندییەکی بە سیاسەتی حکومەتی هەرێمی کوردستانەوە نییە، کە بە سیاسەت دەیەوێت ئاڵای ئیسرائیل لەو بۆنانە هەڵبکرێت، ئەگەر بە ئەقڵانی سەیری ئەو بابەتە بکەین، باشترین یارمەتی بۆ ئێمە ئەوەیە کە ئەو کارە نەکرێت، نە ئاڵای ئیسرائیل هەڵبکرێت و نە بەوشێوەیەش قسەی لەسەر بکرێت، ئەوە شتێک نییە ئێمە وەکو هەرێمی کوردستان بەرنامەمان بۆی دانابێت و بکرێت، هاوکات ئێمە بەشێوەیەکی فەرمی هیچ پەیوەندییەکمان لەگەڵ ئیسرائیل نییە، لەگەڵ ئەوەش ئێمە دوژمنایەتیمان لەگەڵ هیچ میللەتێکی دونیادا نییە.

ئیسرائیل پەیوەندی لەگەڵ وڵاتان هەیە، لەوانە پەیوەندی لەگەڵ میسر و تورکیا هەیە و باڵیۆزخانەیان هەیە، بۆیە بابەتی ئاڵای ئیسرائیل لە قەبارەی خۆی یەکجار زۆر گەورەکراوەتەوە، کە لەڕاستیدا من واینابینم ئەوەندە گەورەبێت، لەهەمانکاتیشدا واینابینم هەڵکردنی ئاڵای ئیسرائیل هیچ سوودێکی بۆ هەرێمی کوردستان هەبێت.

پرسیار: بەڕێز سەرۆکوەزیران گشتپرسی ئەنجامدرا، ئایا لەو قۆناخە هیچ دیدارێکتان لەگەڵ تورکیا هەیە لەوبارەیەوە؟ 

نێچیرڤان بارزانی: بەدڵنیایەوە پەیوەندی ئێمە لەگەڵ تورکیا پەیوەندییەکی کۆنە، ئەو پەیوەندییە بەردەوامیش دەبێت، بەدڵنیاییەوە ئێمە ناتوانین سنوورەکان بگۆڕین، سنوورەکان لە شوێنی خۆیانن، پەیوەندی برایانەی نێوان ئێمە و تورکیا هەر بەردەوام دەبێت، بەدڵنیاییەوە ئەو ئارەزووەمان هەیە بۆ قسەکردن و دانیشتن لەگەڵ تورکیا.

پرسیار: ئەگەر هاتوو هەڵوێستەکانی تورکیا هەروا تووند و بەردەوامبن و هەندێک رێککار بگرێتەبەر، بەتایبەت ئێستا مانۆری هاوبەشی سەربازی لەگەڵ عێراق بەردەوامە، ئەگەر بێت و پێشڕەوییەکانیان بەرەو خاکی کوردستان بێت، ئێوە لەبەرامبەر ئەوەدا پلانتان چی دەبێت؟

نێچیرڤان بارزانی: باوەڕناکەم ئەوە ببێت، تا ئەوکاتەی مانۆری خۆیان لەنێو خاکی تورکیا دەکەن ئەوە پەیوەستە بە خۆیان، بەس ئەگەر بیانەوێت بپەڕنەوە بۆ ئەوبەر، ئەوا بەدڵنیاییەوە ئێمە هەڵوێستمان دەبێت، لەڕاستیشدا من پێموانییە ئەوە بکرێت.

پرسیار: هەفتەی رابردوو رێککەوتنێکتان لەگەڵ کۆمپانیای رۆسنەفتی رووسی واژۆکرد، ئەو پرۆژەیەی هەیە لەو بڕوایەدای بەشێکی زۆری لەسەر تورکیا بێت، دەکرێت هەندێ روونکردنەوەی زیاترمان بدەنێ تورکیا لەکوێی ئەو پرۆژەیەدایە؟

نێچیرڤان بارزانی: ئەو رێککەوتنەی ئێمە لەگەڵ رۆسنەفت کردمان بۆ دروستکردنی بۆرییەکی گازە لە کوردستانی عێراق بۆ تورکیا و لەوێشەوە بۆ ئەوروپا، بەپێی ئەو رێککەوتنەی ئێمە لەگەڵ تورکیا هەمانە، بەپێی رێککەوتنەکە بەشێک لەو گازە بۆ تورکیا دەبێت، چونکە تورکیا پێویستی بە گازی زیاتر هەیە، ئەو گازەی بە تورکیای دەدەین لەگەڵ ئیزافەی ئەو گازەی هەیە لەڕێگەی تورکیاوە بۆ ئەوروپای دەنێرین.

رێککەوتنەی ئێمە لەگەڵ رۆسنەفت بۆ دروستکردنی بۆری ئەو گازەیە کە بڕوات بۆ تورکیا، ئەوان لە قۆناخی یەکەم یەک ملیار دۆلاریان وەکو سەرمایە بۆ دروستکردنی ئەو بۆرییە داناوە، دیدارەکانی ئێمەش لەگەڵ رۆسنەفت بەردەوامن بۆئەوەی بگەینە رێککەوتنێکی هاوبەش لەگەڵ رۆسنەفت و کۆمپانیایەکی تورکی یان کۆمپانیایەکی دەرەوە بۆ جێبەجێکردنی ئەو بۆرییە.

پرسیار: ئێوە باستان لەوەکرد کە ئێمە گشتپرسیمان کردووە هەڕەشەنین بۆ سەر هیچ کەسێک، بۆ سەربەخۆیی کوردستان خەڵکی ترسێکی زۆری هەیە، ئێوە لە کۆنگرەیەکی رۆژنامەڤانیدا راتانگەیاند کە ئێمە هەڕشە نین بۆ سەر هیچ لایەک، دەکرێت زیاتر روونیبکەنەوە دامەزراندنی ئەو دەوڵەتە نابێتە هەڕەشەیەک بۆ سەر تورکیا؟

نێچیرڤان بارزانی: جارێ دوو شت گرنگن، یەکەم ئەوەی ئێمە کردوومانە لە چوارچێوەی عێراقدا کردوومانە، هەر لە چوارچێوەی سنووری عێراقیشدا دەمێنێتەوە، دووەم ئێمە سەربەخۆییەکمان ناوێت  شەڕ دروست بکات، بەڵکو دەمانەوێت بە دیالۆگ و بە لێکتێگەیشتن لەگەڵ بە‌غدا بگەینە ئەو پرسە،
ئێمە بەم گشتپرسییە رەغبەتی میللەتی خۆمان پیشانی دونیا و بەغدا دا، هەنگاوی دووەمی ئێمە ئەوەیە داوادەکەین بەغدا لەسەر مێزی گفتوگۆ ئەو کێشانە لەگەڵ ئێمە یەکلابکاتەوە، من دەڵێم ئێمە بەهیچ شێوەیەک هەڕەشە نین بۆ سەر تورکیا ئەویش لەبەر هۆکارێکی زۆر سادە.

پرسیار: بەشێکی هەرە زۆری خەڵكی تورکیا بەتایبەت نەتەوەپەرستەکان وابیردەکەنەوە و مەترسی ئەوەیان هەیە بیروبۆچوونی هەرێم و پەکەکە لە داهاتوودا کوردستانێکی سەربەخۆیە، ئەو بیروبۆچوونەش رۆژ بە رۆژ لە تورکیا بەربڵاوتر دەبێتەوە، بۆیە کۆمەڵگەی تورکیا پێویستی بە بۆچوونێکی دڵنیاکەرەوە هەیە.

نێچیرڤان بارزانی: هیچ لێکچوونێک لەنێوان داواکاری کورد و داواکاری پەکەکە نییە، دوو شتی زۆر لە یەکتر جیاوازن، ئێمە کە باسی ئەو مەسەلەیە دەکەین باسی کوردستانی عێراق دەکەین، ئێمە بەهیچ شێوەیەک نە مەبەستمان ئەوەیە باسی هیچ شوێنێکی دیکە بکەین نە دەشیکەین، سرووشتی مەسەلەی کورد لە عێراق تایبەتمەندی خۆی هەیە، هەندێک واقیع هەیە کە دەبێت هەڵسوکەوتی لەگەڵ بکرێت، ئێمە لە کوردستان دەمانەوێت بە خۆشی و ئارامی بژین و نامەوێت کێشە هەبێت، کەرکووک باشترین نموونەیە بۆ پێکەوەژیانی هەموو پێکهاتەکان.

پرسیار: بەڕێز سەرۆکوەزیران پێش ئەنجامدانی گشتپرسی چ ئێوە چ جەنابی کاک مەسعود پەیامتان هەبووە، هەموو پەیامەکانیش ئیجابی بوون، ئێستاش پەیامەکانتان ئیجابین، بەڵام پەیامەکانی عەبادی زۆر تووندن و هەندێک بڕیاری تووندیشی بردوونەتە پەرلەمان، ئەگەر بێت و ئەو هەڵوێستانە بەردەوامبن و ئامادەی دیالۆگ و دانوستاندن نەبن، چۆن پرسی سەربەخۆیی بە ئەنجام دەگەیێنن؟

نێچیرڤان بارزانی: ئەو بڕیارانە و ئەو قسانەی لە پەرلەمانی عێراق دەکرێن، کتومت ئەگەر پرسیار لە ئێمە بکەیت بۆ گشتپرسیتان کرد، ئێمەش دەڵێین لەبەر ئەو ئەقڵیەتە و لەبەر شێوەی بەڕێوەبەردنی ئەو وڵاتە ئێمە گشتپرسیمان کرد، ئەوان بە زمانێکی زۆر دوور لە هەموو برایەتی و دۆستایەتییەک و هاووڵاتیبوون لەنێو پەرلەمان قسەیان لەسەر ئێمە کرد، ئێمە بۆیە گشتپرسیمان کرد، چونکە مەترسیمان لەو ئەقڵیەتە هەیە، بەڵام ئێمە دەمانەوێت کێشەکان بە دیالۆگ چارەسەر بکرێن.

پرسیار: ئەگەر بە دیالۆگ چارەسەر نەبوو، چ هەنگاوێک دەگرنەبەر؟

نێچیرڤان بارزانی: ئێمە مکوڕین لەسەر دیالۆگ، هیچ چارەسەری دیکە نییە نە بۆ ئەوان چارەسەری دیکە هەیە نە بۆ ئێمەش.

پرسیار: دیارە لە ئەنجوومەنی وەزیرانی عێراق سەبارەت بە کوردستان چەند بڕیارێک دەرکران، یەکێک لەو بڕیارانە ئەوەیە ئەو ناوچانەی پێشمەرگەیان لێیە کە پێیان دەگوترێت ناوچە کێشە لەسەرەکان، دەگوترێت دەبێت بگەڕێنەوە ژێر دەسەڵاتی سوپای عێراق، سەبارەت بە جێبەجێکردنی ئەو بڕیارەش دەسەڵات بە حەیدەر عەبادی دراوە وەکو فەرماندی گشتیی هێزە چەکدارەکانی عێراق، سەبارەت بەو ناوچە کێشە لەسەرانە بیروبۆچوونی ئێوە چییە، ئایا پێشمەرگە لەو ناوچانە پاشەکشە دەکات؟

نێچیرڤان بارزانی: ئێمە ئەو ناوچانەمان لەدەستی داعش دەرهێناوە، لەبەر داعشیش پاراستوومانە، بەدڵنیایەوە ئامادەشین بۆ ئەوە گفتوگۆ بکەین چۆن بیانپارێزین، بەڵام یەکلایەنە ئەوان تەسەروف بکەن بەدڵنیاییەوە ئێمەش هەڵوێستمان دەبێت.

پرسیار: هەڵوێستی ئێران چۆن دەبینن؟

نێچیرڤان بارزانی: لە میدیاوە تووندن، بەڵام لەڕووی عەمەلییەوە شتەکان هەمووی وەکو خۆیەتی و هیچ گۆڕانکارییەک نەبووە، پەیامی ئێمە بۆ ئێرانیش هەمان ئەو پەیامەیە کە بۆ تورکیای دەنێرین، دەمانەوێت پەیوەندی دۆستایەتی و برایەتی و دراوسێیەتی ئێمە لەگەڵ ئێران بەردەوامبێت، لەڕاستیدا تاوەکو ئێستاش لەگەڵ ئێران شتەکان بە ئاسایی دەڕۆن و هەرەوەکو خۆیەتی.

پرسیار: ئێمە ماوەی چەند رۆژێکە لە کوردستانین و لە شەقام چاومان بە هاووڵاتیانی تورکیا کەوتووە، ئەوان نیگەرانن لەوەی تورکیا دەروازەکان دادەخات یان نا، ئەوان مەترسی چۆنییەتی گەڕانەوەیان هەیە، ئایا ئێوە چ دڵنیاییەک بە هاووڵاتیانی تورکیا لە هەرێمی کوردستان دەدەن؟

نێچیرڤان بارزانی: پێموایە دەبێت ئەنقەرە ئەو دڵنیاییەیان پێبدات، چونکە داخستنی ئەو دەرگایانە نە لە بەرژەوەندی هاووڵاتیانی تورکیایە، نە لە بەرژەوەندی هاووڵاتیانی ئێمەیە، نە لەڕووی ئابوورییەوە دروستە ئەو بڕیارە بدرێت، نە لەڕووی سیاسییەوە دروستە ئەو بڕیارە بدرێت، نە لەڕووی کۆمەڵایەتیشەوە کە دراوسێی یەکین دروستە ئەو بڕیارە بدرێت، هاوکات هیچ شتێکی ئەوەندە گەورەش رووینەداوە کە بەڕاست هەڕەشەیەک بێت بۆ ئەمنی قەومی تورکیا کە بەڕاستی ئێمە هەڕەشەبین تا ئەو بڕیارە بدرێت.


پرسیار: ئەگەر خەڵک بکەویتە کێشە، ئایا دەبێتە گوشار لەسەر ئێوە؟

نێچیرڤان بارزانی: بەدڵنیایەوە دەبێتە گوشار لەسەر ئێمە، هیچ گومانی تێدا نییە کێشە دەبێت و کێشەی گەورە دەبێت، بەتایبەت لەڕووی مرۆییەوە کێشە دروست دەبێت، بەتایبەیت بۆ ئەو خەڵکانەی نەخۆشن و ئەوانەی بازرگانی دەکەن، بە هەر هۆکارێک بێت ئەوانە هەموویان روویان لە تورکیایە، ئەگەر ئەو دەرگایە دابخرێت بەدڵنیایی کێشە دەبێت.

پرسیار: ئەگەر بێت و بەهۆی لێکەوتەکانی گشتپرسییەوە گرژی و ئاڵۆزی دروست ببێت، ئایا کاریگەری لەسەر ئەو هێزانەی تورکیا دەبێت کە لێرە هەن، بۆنموونە ئەوانەی لە باشیک جێگیربوونە کێشەیان بۆ دروست دەبێت؟

نێچیرڤان بارزانی: ئێمە هیوادارین نەگاتە ئەو قۆناخە، ئێمە  لە ساڵانی رابردوو هاریکارییەکی دوورودرێژمان لەگەڵ سوپای تورکیا هەبووە، لە شەڕی دژ بە داعشیش لە چوارچێوەی ئەو هێزانەی لێرەبوون مەشق و راهێنانیان بە پێشمەرگە کردووە، ئێمە هیوادارین هەرگیز نێوانی ئێمە نەگاتە ئەو ئاستەی ئەو جۆرە کێشانە دروست ببن.

بەڕاستی دەمەوێت ئەوە بڵێم ئەو گشتپرسییەی ئێمە کردوومانە، لە تورکیا زۆر لە قەبارەی خۆی گەورەتر دەکرێت، هەرگیز تێناگەم ئەمە بۆ؟ پرسیارێکە لە خەڵکی خۆمان کراوە، وەکو گوتوومانە و هەمیشەش جەختمان لەسەر کردووەتەوە کە دەمانەوێت بە دیالۆگ لەگەڵ بەغدا بکرێت، باشە کوێی ئەو پرسیارە هەڕەشەیە بۆ ئەمنی قەومی تورکیا؟ من بەس ئەو پرسیارە دەکەم، شتێکمان نەکردووە نە ئەوەندە گەورە بێت کە بەوشێوەیە کاردانەوە پیشان بدرێت، بە ڕوای من هیچ پێویستیش ناکات، چونکە ئێمە هەر دراوسێی یەکدی دەمێنین و هەر پێویستیشمان بە یەکدی هەیە، ناشمانەوێت ئەو پەیوەندییەی 10 ساڵە هەمانە لەسەر شتێک کە هیچ ئەوەندە ناهێنێت، تێکبچێت.

پرسیار: بەڕێز سەرۆکوەزیران ئێوە هەمیشە لەگەڵ دیالۆگدان، بەڵام ئەگەر هاتوو گەمارۆ خرایە سەر کوردستان، حکومەتی هەرێمی کوردستان لەبەرامبەر ئەو گەمارۆیە چی بۆ هاووڵاتیانی هەرێمی کوردستان دەکات؟

نێچیرڤان بارزانی: بەدڵنیاییەوە ئەگەر ئەو ئابڵوقەیە دابنرێت، کاریگەری لەسەر خەڵک دەکات، کەسیش لەبرسان نامرێت، ئەو کاروانە بەردەوام دەبێت، بەڵام پرسیاری ئێمە ئەوەیە بۆ بگاتە ئەو مەرحەلەیە، ئێمە نامانەوێت بگاتە ئەوە، تەمەننا دەکەین نەشگاتە ئەو مەرحەلەیە.

پێداچوونەوە: دەرباز ساڵح

کۆمێنتەکان

 
سليمان دوسكي | 29/9/2017
بژیت بارزانی قورباتت بم

 

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

hogir adil | 14/12/2017 05:38:43 ص
proud of you dear hero
Karkuk | 14/12/2017 05:40:46 ص
Deliri Bawery To Peshmargay
عوسمان بایدەمیر بەهۆی بەکارهێنانی ناوی کوردستان سزادرا
| دوێنێ کاژێر 07:50 | (3)
rizgar | 12/12/2017 10:38:45 م
به ڕێزم هه‌ ڤال من له گه ڵتم ، قسه کانت زۆر جوانن ، به ڵا م ئه گه ر شه ڕ ڕویدا ئه وا به شێکی زۆری کورد پاڵپشتی عیڕاق ئه که ن . ئه شبێت به...
Haidari | 13/12/2017 07:59:58 ص
Dast xosh qsekant zor rasten
قوباد قەوماندی!
| 12/12/2017 | (6)
Rebwar | 13/12/2017 06:31:46 ص
dastxosh
حەشدی دوای داعش
| 13/12/2017 | (1)

لە بەشەکانی دیکەی رووداوەوە

شاندێکی نێودەوڵەتی پێشێلکارییەکانی داعش و حەشدی شەعبی و پەکەکە تۆماردەکات 11 کاژێر لەمەو بەر |

شاندێکی نێودەوڵەتی پێشێلکارییەکانی داعش و حەشدی شەعبی و پەکەکە تۆماردەکات

شاندێکی یەکێتیی مافپەروەرانی نێودەوڵەتی گەیشتە زۆرتر
  هەڵوێستی حکومەتی سووریا لەبارەی هێزە کوردییەکانی رۆژئاوای کوردستان 13 کاژێر لەمەو بەر |

هەڵوێستی حکومەتی سووریا لەبارەی هێزە کوردییەکانی رۆژئاوای کوردستان

بەشار جەعفەری وەسفی پەیامنێرێکی رووداو دەکات زۆرتر
وێنەگرتن لەنێو هەردوو حەرەمی مەککە و مەدینە قەدەخەکرا 14 کاژێر لەمەو بەر |

وێنەگرتن لەنێو هەردوو حەرەمی مەککە و مەدینە قەدەخەکرا

هەر کەسێک سەرپێچی بکات سزادەدرێت زۆرتر
0.282 seconds