وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

کوردستان

ئەمیرەکانی داعش داوا لە ژنەكانیان دەكەن خۆیان بدەنە دەست پێشمەرگە

لەلایەن ناسر عەلی 28/9/2017
ژمارەیەک وێنەی نێو مۆبایلی چەکدارانی داعش
ژمارەیەک وێنەی نێو مۆبایلی چەکدارانی داعش

رووداو- عەیازییە

كاتێك مانگی رابردوو سوپای عێراق و حەشدی شەعبی هێرشیان كردە سەر قەزای تەلەعفەر، چەكدارانی داعش دەیانزانی تەنیا دوو رێگەیان لەبەردەمە، یان شەڕكردن تاوەكو مردن، یان خۆڕادەستكردن. ئەو چەكدارانەی هاوژین و منداڵیان هەبوو، بە تایبەتی ئەمیرەكان، هەرزوو پشتێنی بۆمبڕێژكراویان لێ‌ بەستن و پێیانگوتن لە تەلعەفەر بڕۆن، ئەگەر گەیشتنە چەكدارانی حەشدی شەعبی خۆتان بتەقێننەوە، ئەگەریش گەیشتنە پێشمەرگە خۆتان تەسلیم بكەن.  

بەپێی ئەو ئامارانەی لە دەزگا ئەمنی و سەربازییەكانی هەرێمی كوردستانەوە دەست (رووداو) كەوتوون، لە ماوەی ئۆپەراسیۆنی كۆنترۆڵكردنەوەی قەزای تەلەعفەردا 200 خێزانی چەكدارانی داعش لە نزیك ناحیەی عەیازییە خۆیان رادەستی هێزەكانی پێشمەرگە كردووە. هەندێك لەوانە خێزانی ئەو كوردانەی باكوور و رۆژهەڵاتی كوردستانن كە چوونەتە ریزی چەكدارانی داعش، هەندێكیشیان خێزانی چەكدارانی بیانیی رێكخراوەكەن.

بە گوتەی پێشمەرگەكان و ئەو فەرماندە سەربازییانەی لێكۆڵینەوەیان لەگەڵ خێزانی ئەو چەكدارانە كردووە، هەریەك لەو خێزانانە چیرۆكێكیان هەبووە كە هەندێكیان زۆر سەرنجڕاكێشن. 

ئەمیرە و هەردوو ژنەكەی خوشكی یەكدین!

ئەوكاتەی تیمێكی (تۆڕی میدیایی رووداو) سەرقاڵی رووماڵی شەڕی كۆنترۆڵكردنەوەی ناحیەی عەیازییەی سەر بە قەزای تەلعەفەر بوون، دوو ژن كە سەرتاپای جەستەیان بە جلی رەش داپۆشیبوو، لە سەنگەرەكانی پێشمەرگە نزیكبوونەوە و خۆیان رادەستی هێزەكانی پێشمەرگە كرد، یەكێك لە ژنەكان چوار منداڵی هەبوو، ئەوەی دیكەشیان دوو منداڵی هەبوو.

دوو ژنەكە هەردووكیان خوشك بوون و عەرەبی سووری بوون، یەكێك لە ژنەكان چیرۆكی شووكردنی بە چەكدارێكی داعش گێڕایەوە و گوتی: "هەشت ساڵ لەمەوبەر لە رەققە شووم بە پیاوێك كرد كە خەڵكی دیمەشق بوو. لە سەرەتای هاتنی چەكدارانی داعش بۆ رەققە، پەیوەندی پێیانەوە كرد. دایكم و باوكم نەبوون، تەنیا خوشكێكم هەبوو، ئەویش بڕیاری دا لەگەڵ ئێمە بژی".

 وەك ئەو ژنە گێڕایەوە، ماوەیەك دوای پەلاماردانی شاری مووسڵ لەلایەن داعشەوە، داوا لە هاوژینەكەی دەكرێ‌ بچێتە مووسڵ، بۆیە خۆی و خوشكەی ناچار دەبن لەگەڵی بڕۆن.

ئەو ژنە دواتر تووشی سەرسوڕمان بووە كاتێك زانیویەتی كە مێردەكەی پەیوەندی لەگەڵ خوشكەكەی هەیە. ئەو ژنە بە (رووداو)ی گوت: "سەرەتا وەكو خوشك و برا مامەڵەی لەگەڵ خوشكەكەم دەكرد و زۆر رێزی لێدەگرت، بەڵام دوای ئەوەی چووە ناو داعش، هەستم كرد هەڵسوكەوتی بەرامبەر خوشكەكەم گۆڕاوە، گومانم دەكرد پەیوەندییان هەبێ‌، بەڵام دواتر لە مووسڵ گومانەكەم راست دەرچوو، خوشكەكەم لە مێردەكەم دووگیان بوو".

كاتێك ئەو ژنە پرسیاری لە هاوژینەكەی كردووە كە ئایا ئەوە دژی شەریعەتی ئیسلام نییە؟ هاوژینەكەی گوتوویەتی "بۆ ئەوەی خوشكەكەت بپارێزم ئەو كارەم كرد، ئەو كارەی من كردوومە شەرع رێی پێداوە".

بەپێی شەریعەتی ئیسلام، نابێت پیاو لە یەك كدا دوو هاوسەری هەبن كە خوشكی یەك بن. ئەو ژنە باسی چارەنووسی هاوژینەكەی كرد و گوتی "پێش ساڵێك لە مووسڵ كوژرا. ئێمە هەر لە مووسڵ ماینەوە هەتا سوپا هات، دوایی چووینە تەلعەفەر كە تەلعەفەریش گیرا روومان لە عەیازییە كرد".

ژنێكی ئێزدی بۆ مێردە داعشەكەی دەگری

رۆژی سێی ئابی 2014 كە داعش هێرشی كردە سەر قەزای شنگال و دەوروبەری، خەولە لەگەڵ هاوژینەكەی و سێ‌  منداڵەكەیان كەوتنە دەست چەكدارانی داعش. هاوژینەكەی هەر لەنێو شنگال لەلایەن چەكدارانی داعشەوە كوژرا. خەولە و منداڵەكانی لەگەڵ چەندین خێزانی دیكە دەبردرێنە تەلعەفەر و پاشانیش مووسڵ. لە مووسڵ ئەمیرێكی داعش كە كوردێكی شاری مێردینی باكووری كوردستان بووە، خەولە لە خۆی مارە دەكات.

ئەو ئەمیرە كوردەی داعش وەك خەولە باسی دەكات، بەشداری لە چەندین شەڕی داعشدا كردووە، دوای كۆنترۆڵكردنەوەی مووسڵ رووی لە تەلعەفەر كردووە، لە دوای هێرشی سوپا و حەشدیش بۆ سەر تەلعەفەر، خەولە و ئەمیرەكەی داعش بڕیار دەدەن خۆیان تەسلیمی پێشمەرگە بكەن.
پێشمەرگەیەك لە سەنگەرەكانی نزیك عەیازییە چیرۆكی خۆڕادەستكردنی ئەو ئەمیرەی داعشی بۆ (رووداو) گێڕایەوە و گوتی "پیاوێكی كوردی ئێزدی لەگەڵ كوڕەكەی كە پێشتر هەماهەنگییان لەگەڵ دەزگا ئەمنییەكان كردبوو، هاتنە لای ئێمە، پیاوەكە پێیگوتین ئێستا كچەكەم كە پێشتر لەلایەن داعشەوە رفێنراوە دێتەوە".

بەگوتەی پێشمەرگەكە، باوكی ئافرەتە ئێزدییەكە پێشتر بە تەلەفۆن قسەی لەگەڵ كچەكەی كردبوو، ئەمیرەكەی داعش كە ناوی فورات بوو، رازی بووبوو خەولە بگەڕێتەوە نێو كەسوكارەكەی، بەڵام بەو مەرجەی ئەویش لەگەڵی بچێ و لەوێ‌ گەرەنتی بدەنێ كە بە سەلامەتی دەیگەیێننە سووریا.

وەك ئەو پێشمەرگەیە باسی كرد، دوای ماوەیەك چاوەڕوانیی باوك و كوڕەكە، نزیكەی 25 كەس كە زۆربەیان ژن و منداڵ بوون، لە گوندی (قەسەب راعی)یەوە بەرەو سەنگەرەكانی پێشمەرگە هاتن. خەولەشیان لەگەڵ بوو.

ئەو پێشمەرگەیە گوتی "باوك و برای ئەو ژنە كوردە، لەگەڵ ئێمە چاوەڕێی گەیشتی ئەوان بوون. 200 مەترێك مابوو بگەنە سەنگەری پێشمەرگە راوەستان. مێردی خەولە سەرپەرشتیی ئەو گرووپەی دەكرد، دیاربوو هەموویان دەستیان ماچ كرد، وەك ئەوەی ئەوانی رزگار كردبێ‌. برای ئافرەتە ئێزدییەكە خۆی بۆ نەگیرا و پێش ئەوەی بگەنە سەنگەرەكانی پێشمەرگە چووە لایان و توند باوەشی لە خوشكەكەی دا".

برای خوشكەكە بە هەواڵێكی ناخۆشەوە دەگەڕێتەوە سەنگەرەكانی پێشمەرگە و دەڵێت "ئەو پیاوە پشتێنێكی بۆمبڕێژكراوی لەخۆی بەستووە و دەڵێت ئەگەر ئۆتۆمبێلێكم بۆ ئامادە نەكەن و بە سەلامەتی نەمگەیەننە سووریا، ئەوا خۆم بە خەولە و منداڵەكانیدا دەتەقێنمەوە".

وەك ئەو پێشمەرگەیە دەڵێت، نزیكەی كاژێرێك لە دوورەوە قسە لەگەڵ ئەو ئەمیرەی داعش كراوە كە خۆی تەسلیم بكات، تەنانەت كەسوكاری ژنەكەش زۆر لێی پاڕانەوە كە گەرەنتی سەلامەتیی ژیانی دەكەن لەبن دەستی پێشمەرگە، بەڵام ئەمیرەكەی داعش ئامادە نەبوو خۆی تەسلیم بكات. 

 ئەو ئەمیرەی داعش ناوی فورات بووە و خەڵكی شاری مێردینی باكووری كوردستان بووە، سەرەتای ساڵی 2015 بە خێزانەوە پەیوەندی بە داعشەوە كردووە.

پێشمەرگەكە باسی چارەنووسی ئەمیرەكەی داعش دەكات و دەڵێت: "دوای ئەوەی ئامادە نەبوو خۆی تەسلیم بكات، نیشانەگرێكی پێشمەرگە، توانی گوللەیەكی قەناس لە سەری بدات و بیكوژێت، كاتێكیش چووینە سەر تەرمەكەی، بینیمان پشتێنێكی بۆمبڕێژكراوی لە خۆی بەستبوو، ئەگەر خۆی بتەقاندبایەوە دەیتوانی هەموویان بكوژێ‌".

پێشمەرگەكە دەڵێت "پاش ئەوەی ئەمیرەكەی داعشمان كوشت، چووینە سەر تەرمەكەی، خەولە كە لە نزیكییەوە وەستابوو دەستی بە گریان كرد و گوتی: بۆ كوشتتان، دەزانن چەند باش بوو بۆ من و منداڵەكانم؟ رێگەی نەدا كەس هیچمان لێ‌ بكات. ئەگەر ئەو نەبووایە خوا دەزانێ‌ ئێستا چیمان بەسەرهاتبوو. من فرمێسك بۆ باشییەكانی ئەو بەرامبەر من و منداڵەكانم دەڕێژم". 
 
وا حاڵی كرابوون كە پێشمەرگە كافرن

ژنی چەكدارەكانی داعش دوای ئەوەی خۆیان رادەستی پێشمەرگە دەكرد، لەلایەن پێشمەرگەی ژنەوە دەپشكنران، پێشمەرگەیەكی ژن قسەی هەندێك لەو ژنانەی بۆ (رووداو) گێڕایەوە و گوتی: "پرسیاری زۆربەیان ئەوە بوو كە پێشمەرگە چیمان لێدەكەن؟ ئێمە ناكوژن؟ چونكە دەڵێن پێشمەرگە كافرن. منیش پێمدەگوتن ئێوە بە هەڵە حاڵی كراون، پێشمەرگەش موسوڵمانن، زۆربەیان نوێژ دەكەن، بە رۆژوو دەبن، بەڵام زۆربەیان باوەڕیان نەدەكرد".

سەبارەت بە ناسنامەی ئەو ژنانە، پێشمەرگەكە كە نەیویست ناوی بڵاوبكرێتەوە، گوتی "خەڵكی زۆر وڵاتی جیهانیان تێدابوو، حەوت لەو ژنە چەكدارانەی داعش خەڵكی شارەكانی باكووری كوردستان بوون، هەندێكیان خەڵكی توركیا بوون، توركەكان زۆربەیان خەڵكی شاری قۆنیا بوون. ئەو ژنانە بە قەناعەتەوە لەگەڵ هاوژینەكانیان چووبوونە ریزەكانی داعش و باوەڕیان بە فیكری داعش هەبوو".

"خۆتان بە حەشدی شەعبیدا بتەقێننەوە"

بە گوتەی ئەوانەی یەكەمجار ئەو ژنانەیان بینیوە، بەشێكی زۆر لە ژنەكان پشتێنی بۆمبڕێژكراویان بەستووە، بەڵام لە سەنگەرەكانی پێشمەرگەدا هیچ ژنێك خۆی نەتەقاندووەتەوە.

ئەو پێشمەرگە ژنە نهێنیی ئەوە ئاشكرا دەكات و دەڵێت: "زۆربەی ئەو ژنانەی لە دوا رۆژەكانی كۆنترۆڵكردنەوەی تەلعەفەردا خۆیان رادەستی پێشمەرگە دەكرد، ژنی ئەمیرە گرنگەكانی داعش بوون، بەشێكیان پشتێنی بۆمبڕێژكراویان لە خۆیان بەستبوو، كاتێك لێمان دەپرسین چۆن بوو خۆتان پێدا نەتەقاندینەوە؟ هەندێكیان راستییەكەیان بۆ باسدەكردین و دەیانگوت مێردەكانیان پشتێنی بۆمبڕێژكراویان بۆ دروستكردبوون، بەڵام پشتێنی بچووك بوون، هی ئەوە نەبوون خەڵكێكی زۆر لەگەڵ خۆیان بكوژن، مێردەكانیان پێیانگوتبوون بڕۆن لە تەلعەفەر دەربچن، ئەگەر گەیشتنە پێشمەرگە پشتێنەكە فڕێ‌ بدەن و خۆتان تەسلیمی ئەوان بكەن، بەڵام ئەگەر لە رێگا گەیشتنە حەشدی شەعبی بەهیچ شێوەیەك خۆتان تەسلیم مەكەن و خۆتان بتەقێننەوە، چونكە ئەوان جێی متمانە نین و دەستدرێژیتان دەكەنە سەر، هەر بۆیە كاتێك نزیكی سەنگەرەكانی پێشمەرگە دەبوونەوە پشتێنەكەیان فڕێ‌ دەدا".

بەگوتەی ئەو ژنە پێشمەرگەیە، هەندێك لەو ژنانە تەنانەت پارەی وڵاتەكانی خۆیان هەر پێمابوو كە لە كاتی هاتنیان بۆ نێو داعش لەگەڵ خۆیان هێنابوو. ئەو گوتی "تمەنی ئێرانی، لیرەی توركی، ریاڵی سعودی، یۆرۆ، دۆلار و زۆر جۆری دیكەی دراویان پێبوو". هەروەها گوتی "زۆربەیان پارەیەكی كەمیان پێبوو، بەڵام هەبوو پارەیەكی زۆری پێبوو، بۆ نموونە ژنێكیان 20 هەزار یۆرۆی پێبوو".

نامە دڵدارییەكانی داعش

گوندی سەهل ئەلمالحی سەر بە ناحیەی عەیازییە یەكەم وێستگەی گەیشتنی خێزانی چەكدارانی داعش بوو، جگە لە هاوژین و منداڵانی داعش، بەشێك لەو چەكدارانەی خۆیان رادەست دەكرد، یەكەم شوێنی گەیشتنیان قوتابخانەی گوندی سەهل ئەلمالح بوو، ئەو رۆژەی ئێمە لەوێ بووین، لە دوورەوە بینیم پێشمەرگەیەك بەناوی ساڵح محەممەد زۆر بە وردی  دەوروبەری قوتابخانەكەی دەپشكنی.

ساڵح محەممەد بە (رووداو)ی گوت "ئەم قوتابخانەیە یەكەم وێستگەی وەرگرتنی ئەوانەیە كە خۆیان رادەست دەكەن، ئەوان كە دەگەنە ئێرە، بەشێك لەو شتانەی پێیانە فڕێی دەدەن و نایانەوێ‌ نهێنییەكانیان ئاشكرا ببن، بەڵام تاوەكو ئێستا هەشت میمۆری مۆبایل و دوو میمۆری كامێرام دۆزیونەتەوە كە فڕێیان داون، هەندێكیشمان لەكاتی پشكنینی چەكدارەكان دەستكەوتوون".

ساڵح محەممەد سەبارەت بە نێوەڕۆكی میمۆرییەكان گوتی "بەشێكی زۆریان فۆڕمات كراون، دیارە ئەوەش بۆ ئەوەیە زانیارییەكانیان بپارێزن، چونكە ئەوان لەو باوەڕەدابوون دواتر رزگار دەبن و بە بەرنامەی تایبەت زانیارییەكانی نێو میمۆرییەكە دەگەڕێننەوە. ئەوانەشی فۆرمات نەكرابوون، وێنەی تایبەتی خۆیان و خێزانەكانیان، سروود و قورئان، دیمەنی مەشق و سەربڕینی هاووڵاتیان و سەربازانی سوپای عێراق و حەشدی شەعبی تێدابوو".

ساڵح مەحموود دەڵێت جگە لە میمۆری، چەند كەرەستەیەكی دیكەی دۆزیوەتەوە. سێ‌ قەمەم دۆزینەوە كە یەكێكیان لە تەوالێت بوو، هەروەها چەند كاغەزێكم دۆزینەوە كە هەندێكیان نامەی دڵداری بوون، مێژوویان زۆر كۆن بوو، یەكێك لە نامەكان بە زمانی رووسی نووسرابوو، ئەوانی دیكەش بە ئینگلیزی".

200 ژنی بیانی خۆیان تەسلیمی پێشمەرگە كردووە

موقەدەم نەعمان گەلناسكی كە فەرماندەیەكی پێشمەرگەیە لە نزیك گوندی عەیازیە، ژمارەی ئەو ژنە بیانیانەی ئاشكرا كرد كە لە ماوەی شەڕی تەلعەفەردا خۆیان تەسلیمی هێزەكانی پێشمەرگە كردووە. موقەدەم نەعمان گوتی "لە ماوەی 20 رۆژدا 200 ژنی بیانی خۆیان رادەستی پێشمەرگە كرد كە زۆربەیان هاوژینی ئەمیرەكانی داعش بوون".

موقەدەم نەعمان ئاماژەی بە ناسنامەی ئەو ژنانە كرد و گوتی: "خەڵكی سووریا، توركیا، ئێران، قەتەر، ئەمریكا، ئەڵمانیا، بەریتانیا، ئۆكراینا، رووسیا، كازاخستان، ئۆزبەكستان، ئازەربایجان، چین و وڵاتانی دیكە بوون". گوتیشی: "ژمارەیەكیشیان خەڵكی باكوور و رۆژهەڵاتی كوردستان بوون". 

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟

ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

Ahmad Jamel
Ahmad Jamel | 16/10/2017 09:02:59 م
خیانەت هەموو گەلی کوردی و پیشمەرگەی گریاد
پەرلەمانتارێکی گۆڕان دەقی رێککەوتنی بافڵ تاڵەبانی و ھادی عامری بڵاودەکاتەوە
| دوێنێ کاژێر 10:12 | (1)
Kori Boukan | 16/10/2017 03:57:51 م
من ته نيا داواكارم كه ئاگاتان له سنوره كانى روژئاوا بىت. هىندىك جولانه وه ى مه ترسىى دار له پيرانشار ديتراوه.
هاشمی: ئەوەی لە کەرکووک روودەدات بە هاوئاهەنگی بافل تاڵەبانی و قاسم سولەیمانییە
| دوێنێ کاژێر 06:27 | (1)
rzgar | 16/10/2017 01:53:16 م
خودابی پارێزیت
Kardo | 16/10/2017 03:12:53 م
سه لا مه تى بو كاک کوسره ت و هه موو پیشمه رگه ی کوردستان .به نه فره ت بن ئه وانه ی خیانه تیان له کورد و له که رکووک کرد
 برینداربوونی کۆسرەت رەسول رەتدەکرێتەوە
| دوێنێ کاژێر 03:07 | (3)
Aso | 16/10/2017 11:13:30 ص
ئه گه ر خيانه تى ئه مريكا نه بوايه كورد واى به سه ر نه ئه هات ، تكايه مه كه ونه تاوانبارى يه كترى ، ئه گه ر يه كيتيش باليكى خراپ تصرفى كردبيت ، هه...
حەشدی شەعبی هەوڵی دابڕینی کەرکووک لە هەولێر و سلێمانی دەدات
| دوێنێ کاژێر 11:07 | (1)

لە بەشەکانی دیکەی رووداوەوە

هەڵامەتمە یان نەخۆشییەکی سەخت؟ 5 کاژێر لەمەو بەر |

هەڵامەتمە یان نەخۆشییەکی سەخت؟

دە نیشانەی جیاکەرەوە زۆرتر
 رەنگکوێری چییە؟ بۆچی پیاوان زۆرتر تووشدەبن؟ 7 کاژێر لەمەو بەر |

رەنگکوێری چییە؟ بۆچی پیاوان زۆرتر تووشدەبن؟

رەنگکوێری زۆرتر تووشی پیاوان دەبێت زۆرتر
شوان قەڵادزەیی کۆچی دوایی کرد 7 کاژێر لەمەو بەر |

شوان قەڵادزەیی کۆچی دوایی کرد

لەکاتی گەڕانەوەی لە کەرکووک تووشی رووداوی هاتووچۆ زۆرتر
0.297 seconds