رووداو - هەولێر
چوار حیزبی رۆژهەڵاتی کوردستان (حدک، حدکا، کۆمەڵەی شۆڕشگێڕان و پژاک) پشتگیرییان بۆ خۆپیشاندان و ناڕەزایەتییەکانی شارەکانی رۆژهەڵات و ئێران راگەیاند. حدک بانگەوازێک ئاراستەی هێز و لایەنە ئۆپۆزیسیۆنە کوردی و ئێرانییەکان دەکات لەسەر بەرنامەی هاوبەش بۆ قۆناخی داهاتوو و خۆئامادەکردن بۆ رووبەڕووبوونەوەی هەلومەرجی نوێ و ئاراستەکردنی خۆپیشاندەران رێکبکەون.
حدکا و کۆمەڵە داوا لە وڵاتان و رێکخراوە نێودەوڵەتییەکان دەکەن پشتیوانی خۆپیشاندەران بکەن
حیزبی دیموکراتی کوردستانی ئێران- حدکا و کۆمەڵەی شۆڕشگێڕی زەحمەتکێشانی کوردستانی ئێران لە راگەیێندراوێکی هاوبەشدا دەڵێن: "سهرچاوهی سەرەکی ئەم ناڕهزایهتییانە قەیرانی ئابووری و گرفتە کەڵەکەبووە ئابووری و سیاسییەکانی نێو ئێرانە، کە ئاکامی چەندین دەیە حکومەتی ستەمکارانە و قەیرانخوڵقێنیی کۆماری ئیسلامییە".
هەردوو حیزب دەشڵێن: "ئهم خۆپیشاندانانه ئاماژهیهكن بۆ تووڕهیی پەنگخواردووی ساڵانێک له حكومڕانێكی ناكارامه، گهندهڵ، نادادپهروهر و دیكتاتۆر كه هیچ مهجاڵێک بۆ دهربڕینی ناڕهزایهتی بهشێوهیهكی مهدەنیانه به شارۆمهندان نادا".
حدکا و کۆمەڵە لە راگەیێندراوەکەیاندا داوا لە هەموو کۆڕ و کۆمەڵە مرۆڤدۆستەکان و ناوەندە سیاسی و بڕیاردەرەکانی جیهان دەکەن پشتیوانی داواکانی خەڵکی ئێران بن و گوشار بۆ رژێم بێنن کە هەرچی زووترە خۆپیشاندەرە دەستبەسەرکراوەکان و هەموو دەستبەسەرکراوانی دیکە لە بزووتنەوە جەماوەرییەکان لە کوردستان و لە نەتەوەکانی دیکە لە ئێران ئازادبکات.
پژاک: سەرچاوەی هەموو خۆپیشاندانەکان بۆ کێشە سیاسییەکان دەگەڕێتەوە
پژاک باس لەوە دەکات کە هەندێک لایەن بەمەبەست بێ یان بێ مەبەست ناڕەزایەتییەکانی گەلی ئێرانیان بە هۆکاری ئابوورییەوە بەستووەتەوە، زیاتر دەڵێت: "بەڵام باش دەزانین هۆکاری هەموو کێشەکان سەرچاوەکەیان بۆ کێشەی سیاسی دەگەڕێتەوە، هەتاوەکو چارەسەرێکی دیموکراتی نەبێت و رێبازەکانی چارەسەر بەسەرنەکرێنەوە، هیچ کێشەیەکی ئێران چارەسەرناکرێت، هەموو گۆڕانکارییەکی مەیدانی و ژیانیش بەوەوە بەستراوەتەوە، هەر چالاکییەک لە ئێران ئەنجامبدرێت رەوایە".
بەڕای پژاک: "تاکە ئامانجی ناڕازیبوونی خەڵک لە ئێراندا دژی سەرکوتکارییەکانی حکومەتی ئێرانە لەسەر گەل لە ناوخۆدا، ئەم تێکۆشانە هەستیار و دۆخە نالەبارە بۆ گەلی ئێران خاوەن گەرەنتی و شوێنێکی تایبەتە، بۆ پاراستنی هێزی دیموکراسیش خاوەن گەرەنتییەکی تایبەتە".
حدک: خۆپیشاندانەکان چەند پەیامێکیان لێ دەخوێندرێتەوە
هەروەها حیزبی دیموکراتی کوردستان (حدک) پەیامێکی لەبارەی خۆپیشاندانەکان ئاراستەی خەڵکی رۆژهەڵاتی کوردستان و ئێران، ناوەندە نێودەوڵەتییەکانی داکۆکی لە دیموکراسی و مافی مرۆڤ، هێز و رێکخراوە خەباتکارەکانی کوردستان و ئێران کردووە و دەڵێت: "خۆپیشاندانەکانی ئێستای خەڵکی ئێران، هەم لەڕووی راشکاویی درووشم و داخوازی خۆپیشاندەران، هەم لە روانگەی بەشداریی چین و توێژە جۆراوجۆرەکانی خەڵک و هەروەها پانتایی جوگرافی و گشتگیربوونیان، بەراورد لەگەڵ ناڕەزایەتی دەربڕینەکانی ساڵانی پێشوو، زۆر جیاواز و کەموێنەن".
داواش لە وڵاتانی دیموکرات و ناوەندە نیودەوڵەتییەکانی بەرگریکاری دیموکراسی و مافی مرۆڤ دەکات "پشتیوانی خەڵکی زۆرلێکراو و وەزاڵەهاتووی ئێران بن کە بەدەستی بەتاڵ بەڵام بە ئیرادەیەکی بەهێز و بە داخوازی رەواوە هاتوونە سەر شەقام و داوای دیموکراسی و ئازادی و سەرەتاییترین مافەکانی خۆیان دەکەن".
بەبۆچوونی حدک، ئەگەرچی ئەم بزووتنەوەیە ماوە و دەرفەتی پێویستە بۆئەوەی لەڕووی نێوەڕۆکی درووشم و داخوازەکانییەوە و لەبارەی بەشداری خەڵک و راکێشانی پێشوازی و پشتیوانیی توێژ و بەشە جۆراوجۆرەکانی کۆمەڵ خۆی دابڕێژێ، بەو حاڵەش ئەو خۆپیشاندانانەی لە چەندین شاری گەورە و دەیان شاری دیکەی پارێزگە و ناوچە جیاوازەکانی ئێران لە ماوەی 4 رۆژی رابردوودا بەڕێوەچوون، بەڕوونی چەند پەیامێکیان لێ دەخوێندرێتەوە:
- خەڵکی ئێران لە باری ژیان و گوزەرانەوە لە خراپترین بارودۆخدان و جگەلەوەی رووناکییەک بۆ دەرچوون لەم دۆخە بەدیناکەن، رۆژ بە رۆژ بەرەو خراپتربوون دەچن. وای لێهاتووە سەرەتاییترین پێویستییەکانی ژیانیان بەشێوەیەکی سەرسوڕهێنەر گرانتر دەبێ و لە دابینکردنیان داماو و دەستەوەستانن، هەر بۆیە رێگایەک جگە لە هاتنە سەرشەقام و بەرزکردنەوەی دەنگی ناڕەزایەتییان بۆ نەماوەتەوە.
- دەستاودەستکردنی دەوڵەت و پۆستی سەرۆککۆماری و مەجلیس لەنێوان ئەم یا ئەو قۆڵی نێو رێژیم، گۆڕانێکی جیددی لە هەلومەرجی ژیانی ئەواندا پێکناهێنێ و بێکاری، گرانی، بێ داهاتی و دەیان کێشەی ژیانی رۆژانەی ئەوان هەر لە جێگای خۆیەتی. گەڵاڵەکردنی بودجەی دەوڵەتی رووحانی بۆ ساڵی 1397 کە لەم دوایانەدا مەجلیس پەسندی کرد، ئەم راستییە تاڵەی سەلماندەوە کە ئەمجاریش ئەولەوییەت هەر بە سوپای پاسداران و بنکە و ناوەندەکانی سەر بە بەیتی رەهبەری و دامودەزگا سەرکوتکەرەکانە و، کێشە و گرفتەکانی خەڵک پشتگوێخراون.
- ئەگەر ئاڵوگۆڕێکیش بەسەر پێوەندییەکانی کۆماری ئیسلامی و دنیای دەرەوەدا پێکبێ و پاش چەندین ساڵ گەمارۆی سیاسی و ئابووریی ئێران، رێککەوتننامەیەکی وەک بەرجامی لێبکەوێتەوە و لەم سۆنگەیەوە دراوە دەستبەسەرداگیرکراوەکانی ئێران ئازادببن، یا پێوەندیی ئابووری و بازرگانیی ئێران لەگەڵ بەشێک لە وڵاتانی جیهان ئاسایی ببێتەوە، خێروبێرەکەی بۆ خەڵکی ئێران ناگەڕێتەوە و هەر دەچێتەوە گیرفانی تاقمی دەسەڵاتدار و دەست و پێوەندەکانیان.
- لە حاڵێکدا زۆربەی خەڵکی ئێران بەدەست هەژاری و نەدارییەوە دەناڵێنن، سەرپەنایەکی دڵنیایان نییە و بە زەحمەتێکی زۆرەوە دەتوانن تێچووی خوێندن و دەرمانی منداڵەکانیان و تەنانەت نانی وشکی ئەوان دابینبکەن، ساڵانە بە میلیارد دولار داهاتی ئێران لە سیاسەت و بەرنامەی دەستوەردەرانەی ئەو رژێمە لەدەرەوەی سنوورەکانی بەتایبەتی لە سووریا و لوبنان و یەمەن خەرجدەکرێ و بە فیڕۆدەدرێت.
- گەندەڵیی ئابووری و ئیداری نێو سیستەمی دەسەڵاتدارێتی، یا ناکارامەیی و لێنەهاتوویی دامودەزگای دەوڵەتی و حکومەتی لە رووبەڕووبوونەوە لەگەڵ داوا و چاوەڕوانییەکانی خەڵک لە هەر بوارێکدا، بەتایبەت بەم یا ئەو دەوڵەت یا قۆناخێکی دیاریکراو لە تەمەنی کۆماری ئیسلامی نین، بەڵکو بەشێکی جیانەبووەوە و هەمیشەیی لە نێوەڕۆک و سرووشتی ئەو رژێمەن، چارەسەرناکرێن و کۆتاییان پێنایە.
- لەگەڵ ئەوەی کەم ساڵ هەیە هەڵبژاردنێک لە ئێران دا بەڕێوەنەچێ، بەڵام ئەو هەڵبژاردنانە ئازاد نین و بە جۆرێک موهەندیسی کراون و دەکرێن کە رێگەنادرێ نوێنەرانی راستەقینەی خەڵک بگەنە ناوەندەکانی دەسەڵات و بڕیاردان. رێگای گۆڕینی دەستوور و یاساکانی وڵاتیش کە سەرچاوەی زەوتکردنی زۆربەی ماف و ئازادییەکانی خەڵکن، نادرێ. دەسەڵات جگە لەوەی رێگای بەشداریی خەڵکی لە بەڕێوەبردنی کاروباری سیاسیی وڵاتی خۆیاندا بەستووە، بەتووندیش هەر چەشنە ناڕەزایەتی دەربڕینێک سەرکوت دەکات.
حیزبی دیموکراتی کوردستان وێڕای دەربڕینی پشتیوانیی خۆی بۆ خۆپیشاندانەکانی "خەڵکی وەزاڵەهاتووی ئێران دژی رژێمی زۆردار، بێزراو و گەندەڵی کۆماری ئیسلامی، تووندوتیژی نواندنی هێزە سەرکوتکەرەکان بەرامبەر خەڵک و گرتن و دەستبەسەرکردنی خۆپیشاندەران بەتووندی مەحکوم دەکات".
حدک بانگەوازێک ئاراستەی هێزە ئۆپۆزیسیۆنە کوردی و ئێرانییە دەکات
حیزبی دیموکراتی کوردستان جگە لەوەی لەسەر پێویستیی یەکگرتن و پشتیوانیی کۆمەڵانی خەڵکی ئێران سەرەڕای جیاوازییە نەتەوەیی و ئایینییەکانیان و شێلگیربوونیان لە سەر خۆپیشاندان و ناڕەزایەتی دەربڕین دژی کۆماری ئیسلامی پێدادەگرێ، هێز و لایەنەکانی ئۆپۆزیسیۆنی کورد و ئێران بانگهێشت دەکات لەسەر بەرنامەی هاوبەش بۆ قۆناخی داهاتوو و خۆئامادەکردن بۆ رووبەڕووبوونەوە لەگەڵ هەلومەرجی نوێ لەیەک نزیکببنەوە و هەرچی زووە رێکبکەون.
حدک پێیوایە "گومانی تێدانییە کە یەکگرتن و هاوکاریی هێز و رێکخراوەکانی ئۆپۆزیسیۆن لەگەڵ یەک و بایەخدانیان بە ئەرکە پێویستەکانی ئەم قۆناخە، هەم لەسەر گوڕوتین و ئاراستە و رێڕەو و ئامانجی خۆپیشاندانەکانی خەڵک لە نێوخۆی ئێران کاریگەری دیاری دەبێ، هەم لە راکێشانی پشتیوانیی کۆڕ و کۆمەڵی نێودەوڵەتی بۆ لای ویست و داخوازییەکانی خەڵکی وەزاڵەهاتووی ئێران کاریگەری بەرچاوی دەبێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ