رووداو - ئەنقەرە
سەرۆکوەزیرانی تورکیا لە نوێترین لێدوانیدا لەبارەی گشتپرسیی باشووری کوردستان دەڵێت: چارەسەر ئەوەیە هەولێر و بەغدا کێشەکان بە گفتوگۆ چارەسەر بکەن. ئاماژە بۆ ئەوەش دەکات کە بژاردەی یەکەمیان جوڵاندنی هێز نییە و دەیانەوێت بە دیپلۆماسی، سیاسی و ئابووری پرسەکە یەکلایی بکەنەوە.
درەنگانی شەوی رابردوو لە گفتوگۆیەکدا لەگەڵ رۆژنامەڤانان بینالی یڵدرم رایگەیاند: "بۆ تورکیا و ئێران و زۆربەی وڵاتانی جیهان گشتپرسی جێگەی قبوڵ نییە و دانی پێدا نانێن، بۆیە تاکە چارەسەر ئەوەیە ئیدارەی کوردی عێراق گفتوگۆ قبوڵ بکات و کێشەکان بە گفتوگۆ چارەسەر بکات، بەغداش مافەکانیان بدات".
بە ئاماژەدان بەوەی پێش ئەوەی کێشەکە گەورەتر بێت دەرفەت بۆ چارەسەر هەیە، سەرۆکوەزیرانی تورکیا گوتی: "تێناگەین مادام ئیدارەی باکووری عێراق سەربەخۆیی راناگەیێنێت بۆچی گشتپرسییان کرد، خۆیان دەڵێن بۆ ئەوە کردوویانە لە دانوستاندن لەگەڵ بەغدا بەهێزبن، کەواتە با بفەرموون دەست بە گفتوگۆ بکەن و عێراق ئامادەیە، ئێران و تورکیاش پشتگیری دەکەن و کۆمەڵگەی نێودەوڵەتیش لەگەڵ ئەم بژاردەیەیە".
لەبارەی هەبوونی پەیوەندیش لەگەڵ هەولێر و بەرپرسانی کورد بینالی یڵدرم گوتی: "پێش ئەنجامدانی ریفراندۆم پەیوەندی هەبوون، بەڵام لەدوای ئەنجامدانی پرۆسەکە هیچ پەیوەندییەک نەبووە". ئاماژەی بەوەش کرد کە جوڵاندنی هێز بژاردەی یەکەمیان نییە و دەیانەوێت بە دیپلۆماسی، سیاسی و ئابووری پرسەکە یەکلایی بکەنەوە.
رەجەب تەیب ئەردۆغان، سەرۆککۆماری تورکیا کە لەسەرەتاوە دژی ئەنجامدانی گشتپرسیی باشووری کوردستان وەستاوەتەوە، بڕیارە پێش سەردانەکەی بۆ تاران لە 4-10-2017 دا لەگەڵ پارتە ئۆپۆزیسیۆنەکانی وڵاتەکەی، لەوانە (جەهەپە و مەهەپە) کۆببێتەوە و بۆچوونیان لەبارەی گشتپرسی وەربگرێت.