وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

رۆژهەڵاتی ناوەڕاست

گوتەبێژی هاوپەیمانان لەبارەی "مەترسیی حەشدی شەعبی بۆ سەر کەرکووک" روونکردنەوە دەدات

لەلایەن دیار کوردە 8/9/2017
"ئێمە پێمانوایە ئەبوبەکر بەغدادی تاوەکو ئێستا لە ژیاندایە"

رووداو- هەولێر 

گوتەبێژی هاوپەیمانان پێشبینی دەکات کەمتر لە هەزار چەکداری داعش لە حەویجە مابن. لەبارەی مەترسی حەشدی شەعبی بۆ سەر کەرکووک و ئەو ئەگەرەی هێرش بکەنە سەر پێشمەرگە گوتی: "هەر شتێک ببێتە رێگر لەبەردەم جێبەجێکردنی تێکشکاندنی داعش جێی نیگەرانییە بۆ هاوپەیمانان".


رایان دیڵن، گوتەبێژی هاوپەیمانێتیی نێودەوڵەتیی دژی داعش بەسەرۆکایەتیی ئەمریکا، لەکاتی بەشداریکردنی لە گەشتی هەواڵەکانی نیوڕۆژی تۆڕی میدیایی رووداو رایگەیاند: "ئەو چەکدارانەی لە حەویجە ماون یان دەبێت خۆیان بەدەستەوە بدەن، یان دەکوژرێن". گوتیشی: "لەماوەی هەفتەیەکدا فڕۆکەکانی هاوپەیمانان 15 هێرشیان بۆ سەر بنکە و بارەگاکانی داعش لە حەویجە ئەنجامداون". 

لەبارەی حەشدی شەعبیش زیاتر گوتی: "عەبادی دەڵێت هەموو هێزە عێراقییەکان بە حەشدی شەعبیشەوە لەژێر فەرمانی ئەودان و رێنماییەکانی ئەو جێبەجێ دەکەن. ئامانجمان تێکشکاندنی داعش و نەهێشتن و کوشتنیانە لە عێراق و سووریا، هەر شتێک دەبێتە رێگر لەبەردەم جێبەجێکردنی ئەم ئەرکە جێی نیگەرانییە بۆ هاوپەیمانان، ئێمە هەموو شتێک دەکەین بۆ ئەوەی دڵنیابین سەرنجەکە لەسەر شەڕی داعش دەمێنێتەوە".

رووداو: بەپێی زانیاری و چاودێرییەكانی ئێوە ئێستا چەند چەكداری داعش لە ناوچەی حەویجەی نزیك كەركووك هەن؟

رایان دیڵن: بەڵێ، ئێمە پێشبینی دەکەین کەمتر لە هەزار چەکداری داعش لە حەویجە مابن. ئەو چەکدارانەش یان دەبێت خۆیان بەدەستەوە بدەن، یان لە ئۆپەراسیۆنی داهاتوودا بۆ تێکشکاندنی داعش لەو ناوچە کەمانەی کە ماون، دەکوژرێن.

رووداو: بەپێی زانیارییەكانی ئێوە، ئایا چەكدارانی داعش لە حەویجە چەكی پێویستیان بۆ شەڕێكی درێژخایەن هەیە؟

رایان دیڵن: پێشبینی دەکەین، هاوکات ئێمە هەمیشە پلان بۆ خراپترین حاڵەت دادەنێین و هیوای باشترین دەخوازین، ئەگەر سەیری ئەو ئۆپەراسیۆنە بکەین کە بەم دواییانە لە تەلەعفەر بینیمان، ئەنجامێکی زۆر باشی هەبوو، بەڵام هێشتا پلان بۆ خراپترین دۆخ دادەنێین.

رووداو: دوای ئەو هەرەسهێنانە گشتییەی تووشی هێزەكانی داعش بووە، ئایا چەكدارانی داعش لە لە حەویجە توانای بەرگریكردنیان ماوە؟

رایان دیڵن: هەموو پلانەکە ئەوەیە بۆ تێکشکاندنی داعش لەو ناوچە کەمانەی لەدەست رێکخراوەکەدا ماون ئۆپەراسیۆن ئەنجامبدرێت. پێموایە لە رابردوودا سەلمێندراوە شەڕەکان لە بەرژەوەندی هێزە عێراقییەکاندان، لەماوەی سێ ساڵی رابردوودا لە تکریت بۆ رومادی، بۆ فەللوجە و موسڵ و تەلەعفەر زیاتر لە 40 هەزار کیلۆمەتر دووجا لەدەستی داعش دەرهێندراوە، سەرکەوتنی هێزە عێراقییەکان لە حەویجە و رۆژئاوای ئەنباریش دەبینین".

رووداو: هێزێكی زۆری حەشدی شەعبی لە دەوروبەری كەركووك و حەویجە كۆكراوەتەوە، ئایا هیچ هاوئاهەنگییەک لەنێوان هاوپەیمانان و سوپای عێراق و پێشمەرگەدا هەیە سەبارەت بە ئۆپەراسیۆنی حەویجە؟

رایان دیڵن: ئۆپەراسیۆنەکە لەلایەن هێزە عێراقییەکانەوەیە، رۆڵی هاوپەیمانانیش هەر وەکو سەرەتا پشتیوانیکردنە لە هێزە ئەمنییەکانی عێراق بە پێدانی زانیاریی هەواڵگری و راوێژپێدان لەگەڵ بۆردوومانکردن. تەنیا لەماوەی هەفتەی رابردوودا 15 هێرشی ئاسمانیمان لە حەویجە ئەنجامداون، سەرنجمان لەسەر بارەگا سەرەکییەکانی داعش و کۆگاکانی چەک و ئۆتۆمبێلە بۆمبڕێژکراوەکان بووە. لەم هەوڵانەشمان بەردەوام دەبین. لەکاتی ئەنجامدانی ئۆپەراسیۆنەکەش  لەگەڵ هێزە عێراقییەکان هاوئاهەنگ دەبین وەک چۆن لە تەلەعفەر و موسڵ و تەواوی کەمپەینەکە بۆ تێکشکاندنی داعش کردوومانە".

رووداو: مەترسی ئەوە هەیە ئەو هێزە زۆرەی حەشدی شەعبی بۆ هێرشكردنە سەر كەركووك و هێزەكانی پێشمەرگە بەكاربهێندرێت، بەتایبەتی كە هەندێك فەرماندەی حەشدی شەعبی بە ئاشكرا ئەو هەڕەشەیە دەکەن، ئایا هاوپەیمانێتیی نێودەوڵەتیی دژی داعش چی بۆ رێگەگرتن لە ئاڵۆزبوونێكی لەوشێوەیە كردووە؟

رایان دیڵن: هاوپەیمانان پشتیوانی لە هێزە ئەمنییەکانی عێراق دەکەن، هەروەها سەرۆکوەزیران گوتوویەتی هەموو هێزە عێراقییەکان بە حەشدی شەعبیشەوە لەژێر فەرمانی ئەودان و رێنماییەکانی ئەو جێبەجێ دەکەن. ئامانجی هاوپەیمانان زۆر روونە کە تێکشکاندنی داعشە و نەهێشتن و کوشتنیانە لە عێراق و سووریا، هەر شتێک دەبێتە رێگر لەبەردەم جێبەجێکردنی ئەم ئەرکە جێی نیگەرانییە بۆ هاوپەیمانان، هەروەها دەبێت جێی نیگەرانیش بێت بۆ هەر لایەنێکی دیکە کە ئۆپەراسیۆن لە عێراق ئەنجامدەدات، ئێمە هەموو شتێک دەکەین بۆ ئەوەی دڵنیابین سەرنجەکە لەسەر شەڕی داعش دەمێنێتەوە.

رووداو: بەپێی زانیارییەكانی ئێوە ئێستا بەگشتی چەند چەكداری داعش لە عێراق ماون؟

رایان دیڵن: گوتمان کەمتر لە هەزار چەکدار لە حەویجە ماون، پێشبینیش دەکەین لە ناوچەکانی ئەلقائیم و عانا و راوە دوو هەزار چەکداری داعش هەبن، لەگەڵ ئەوەشدا بە هەزاران چەکداری دیکەی داعش سنوورەکانی سووریایان بڕیوە و بەرەو سنوورەکانی دێرەزوور رایانکردووە. چونکە ئێستا هێڵێکی کراوە هەیە لە عانە و راوەوە بۆ دێرەزوور، هاوپەیمانان هێرشی ئاسمانی لە دژی چەکدارەکانی داعش و سەرچاوەکانیان لە ناوچەکە ئەنجامداوە، لەماوەی هەفتەی رابردووشدا لە عانا و راوە و ئەلقایم 18 هێرشی ئاسمانیمان لە دژی داعش ئەنجامداون.

رووداو: ئەی چەند چەكداری داعش لە سووریا ماون؟

رایان دیڵن: پێشبینی دەکەین کەمتر لە هەزار و 500 چەکدار لە رەققە مابن. هاوکات لە ناوچەکانی دێرەزوور و بۆ ئەبوکەمال شەش بۆ هەشت هەزار چەکداری داعش مابن.

رووداو:چەند پاسی چەكدارانی داعش كە بەپێی رێككەوتنی حیزبوڵڵا و حكومەتی سووریا لە سنووری لوبنانەوە  بۆ سنووری عێراق دەهێنرێن، لەژێر چاودێری ئێوەدا ماون؟

رایان دیڵن:  هیچ یەکێک لەو پاسانە لەچوارچێوەی رێککەوتنی نێوان حیزبوڵڵای لوبنان و داعش نەگەیشتوونەتە سنوورەکانی عێراق، ژمارەیان 17 پاسە و ئێمە بەردەوامین لە چاودێریکردنی 11پاسیان کە لە نیوەی رێگەی دێرەزوور لە باکووری رۆژئاوای ئەبوکەمال گیریانخواردووە، لە چاودێکردنیشیان بەردەوام دەبین، بەردەوامیش دەبین لە دۆزینەوەی ئەو داعشانەی دەیانەوێت بچن هاوکارییان بکەن، هەروەها هێرش دەکەینە سەر ئەو چەکدارانەش کە لە کاروانەکە دوورکەوتوونەتەوە، هاوکات ئێمە ئازار بەو مەدەنییانە ناگەیێنین کە لەگەڵیاندان. حکومەتی عێراق و هاوپەیمانان بەشێک نین لەو رێککەوتنە و دڵنیاش دەبینەوە کە هیچ یەکێک لەو چەکدارانە لە سنوورەکانی عێراق نزیکنابنەوە وەک بەشێک لەو رێککەوتنە.

رووداو: تائێستا فڕۆكەكانی هاوپەیمانان چەند هێرشیان كردوونەتە سەر ئەو پاسانەی چەكدارانی داعش؟

رایان دیڵن: بۆ ئەوی روونبێت، ئێمە هیچ هێرشێکمان بۆ سەر هیچ یەکێک لەو پاسانە ئەنجام نەداوە، بەڵام لەگەڵ ئەوەشدا ئێمە توانیومانە بەسەرکەوتوویی هێرش بکەینە سەر 40 ئۆتۆمبێلی داعش کە دەیانویست بچن هاوکارییان بکەن. هەروەها لە 29ی ئابەوە تاوەکو ئێستا نزیکەی 85 چەکداری داعشمان کوشتوون. لە چاودێریکردنی ئەو چەکدارانە بەردەوام دەبین و هەر کاتێک گونجاوبوو هێرشیان دەکەینە سەر. لەسەر ئەم پرسە قسەمان لەگەڵ رووسیا کردووە بۆ ئەوەی قسە لەگەڵ رژێمی سووریا بکەن، بەو مەبەستەی چەکدارەکان لەو گرووپە جیابکاتەوە و هەروەها رێگە بە ژن و منداڵەکان بدرێت بچنە شوێنێکی دیکە.

رووداو: چەند لە پاسەکان خێزان و ژن و منداڵی چەكدارانی داعشیان هەڵگرتوون؟

رایان دیڵن: ئەوان تێکەڵن لەو 11 پاسەدا، بەڵام هەرکاتێک زانیمان پاسێک تەنیا چەکداری داعشی تێدایە، ئەوا هێرشی دەکەینە سەر و نامێنێت، بەڵام ئەو 11پاسە هەموویان تێکەڵاون و لە نێوەڕاستی دێرەزووردان.

رووداو: بۆچی وازتان لە چاودێریكردنی ئەو 7 پاسەی چەكدارانی داعش هێنا كە بەرەو تەدموور چوون؟

رایان دیڵن: ئەو پاسانە بەردەوامبوون لە چوونیان بۆ تەدموور و دووردەکەوتنەوە، ئەگەر ئەو پاسانە بگەڕێنەوە نزیک سنوورەکانی عێراق دەکرێنە ئامانج، بەڵام ئەوان بەرەو تەدموور رۆشتن، بۆیە ئێمە چیدیکە چاودێرییان ناکەین، چونکە دەبێت لەبیرمان بێت ئێستا سەرنجی ئێمە لەسەر تێکشکاندنی داعشە لە پایتەختەکەیان لە رەققە، پێشڕەوییەکانیش لەو شارە زۆر بەباشی دەچنە پێشەوە، ئێستا زیاتر لە %60ی شارەکە لەلایەن هێزەکانی سووریای دیموکراتەوە کۆنترۆڵکراوەتەوە.

رووداو: چۆن دەڕواننە چوونی هێزەكانی رووسیا بۆ ناوچەی عەفرین، ئایا ئەوە بە ئاگاداری ئێوە بووە؟

رایان دیڵن: ئەمە ئەو ناوچەیە نییە کە ئێمە ئۆپەراسیۆنی لێ ئەنجام دەدەین، بۆیە نامەوێ قسە لەسەر ئەمە بکەم، ئێستا ئامانجی ئێمە لەسەر داعشە لە رەققە، کاتێکیش لێرە تەواوبووین، بەدوای دەرفەتی دیکەدا دەگەڕێین بۆ هێرشکردنە سەر داعش لە دۆڵی رووباری فورات.

رووداو: هاوكاری ئێوە بۆ هێزەكانی سووریای دیموكرات بەردەوامە؟

رایان دیڵن: بەڵێ، هێزەکانی سووریای دیموکرات هێزێکی خۆسەلمێنەری هاوبەشن لە باکووری سووریا و سەلماندوویانە دەتوانن داعش تێکبشکێنن، وەک لە منبج و تەبقە بینیمان و ئێستاش لە نیوەی رەققە لەبەرچاومانە، ئەوان بەردوامن لە پێشڕەوییەکانیان و بەردەوامن لە بەدەستهێنانی دەستکەوتی گرنگ، لەماوەی 24 کاژێری رابردوودا توانیویانە 10 ناوچە (بلۆک) لە شارەی رەققە کۆنترۆڵ بکەنەوە، ئێمە پشتیوانییان دەبین تاوەکو داعش لە رەققە تێکدەشکێندرێت.

رووداو: راستە هێزەكانی رووسیا دەڵێن وەزیری جەنگی داعشیان لە دێرەزوور كوشتووە؟

رایان دیڵن: ناتوانین ئەوە پشتڕاست بکەینەوە، ئەوە دەزانین کە رووسیا و رژێم و هێرشی ئاسمانیان لە دەورووبەری شاری دێرەزوور ئەنجامداوە، رەنگە ئەوە راستبێت، بەڵام هاوپەیمانان ناتوانن پشتڕاستی بکەنەوە.

رووداو: ئەبوبەكر بەغدادی هێشتا لە ژیاندا ماوە؟

رایان دیڵن: ئێمە پێمانوایە ئەبوبەکر بەغدادی تاوەکو ئێستا لە ژیاندایە، چونکە هیچ بەڵگەیەکمان نەبینیوە مردنی بسەلمێنێت، نازانین لە کوێیە بەڵام هەموو رۆژێک چاودێری دەکەین، کە دۆزیمانەوە هێرشی دەکەینەسەر و دەیکوژین یان دەستگیری دەکەین.

رووداو: هاوپەیمانان هیچ پلانێكیان هەیە بۆ ئەو خانەوادە داعشانەی لە كوردستان و عێراق و سووریا خۆیان رادەست کردووە؟

رایان دیڵن: نەخێر (هاوپەیمانان هیچ پلانێکیان نییە)، بەتایبەتیش لە عێراق کە وڵاتێکی سەروەرە، ئەوانەی دەستگیرکراون و ئەوانەش خۆیان بەدەستەوە داوە، شتێکە پەیوەستە بە حکومەتی عێراق و ئەوان دەتوانن مامەڵە لەگەڵ ئەم پرسەدا بکەن. لە سووریاش  چەکدارانی داعش و خانەوادەکانیان لەلایەن هێزەکانی سووریای دیموکرات دەستگیرکراون، ئەوانیش لەڕێگەی ئەنجوومەنە سەربازی و مەدەنییەکان مامەڵەیان لەگەڵدا دەکرێت کە لەو ناوچانەی هاوپەیمانانی لێن دامەزراون. ئامانجی هاوپەیمانان پشتیوانیکردنە لە هاوبەشەکانیان بۆ شکاندنی داعش، ئەوەش رێک ئەو شتەیە کە ئێمە دەیکەین.

داڕشتنەوە؛ عومەر شایان


ببە بەشێک لە (رووداوی تۆ)

بابەت و وێنە و ڤیدیۆکانت لەگەڵ رووداو بەش بکە

قسەی تۆ

rizgar | 12/12/2017 10:38:45 م
به ڕێزم هه‌ ڤال من له گه ڵتم ، قسه کانت زۆر جوانن ، به ڵا م ئه گه ر شه ڕ ڕویدا ئه وا به شێکی زۆری کورد پاڵپشتی عیڕاق ئه که ن . ئه شبێت به...
Haidari | 13/12/2017 07:59:58 ص
Dast xosh qsekant zor rasten
قوباد قەوماندی!
| دوێنێ کاژێر 08:22 | (6)
Rebwar | 13/12/2017 06:31:46 ص
dastxosh
حەشدی دوای داعش
| 12 کاژێر لەمەو بەر | (1)
نةناسراو | 12/12/2017 11:48:58 ص
ناراستن پارة هةية من زانياري وردم هةية گةر دةتةوئت برؤ لة تويتةر سةيري tanker trackersبكة بةندةرئ جةيهاني توركيا ١٢ مليون بةرميل نةوتي كوردستان لئ...
 حکومەت چەند بڕیارێکی نوێ لەبارەی مووچە دەردەکات
| دوێنێ کاژێر 02:37 | (1)

لە بەشەکانی دیکەی رووداوەوە

تۆماری دەنگدەران گەورەترین ئاستەنگی بەردەم هەڵبژاردنە 4 کاژێر لەمەو بەر |

تۆماری دەنگدەران گەورەترین ئاستەنگی بەردەم هەڵبژاردنە

هەڵسوڕاوێکی گۆڕان: متمانەمان بە كۆمیسیۆن نییە زۆرتر
  دوای تۆمارکردنی گۆڵێک، هاندەرانی فلۆریدا یاریگاکە ورچباران دەکەن 6 کاژێر لەمەو بەر |

دوای تۆمارکردنی گۆڵێک، هاندەرانی فلۆریدا یاریگاکە ورچباران دەکەن

ورچە فڕێدراوەکان دەبەخشرێنە نەخۆشخانەیەکی زۆرتر
0.218 seconds