وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەزاران ماسی لە بابل مرداربوون

لەلایەن رووداو 2/11/2018
8686 ژمارەی بینین

رووداو - هەولێر

بڵاوبوونەوەی نەخۆشی گەنیوبوونی گوێچكە ماسی لە پارێزگای بابل بووە هۆی مرداربوونی هەزاران ماسی و زیانێكی زۆریشی بە سامانی ماسی گەیاندووە، لایەنە پەیوەندیدارەكانیش هۆكاری بڵاوبوونەوەی بۆ سست رۆیشتنی ئاوی رووبارەكان و كەڵەكەبوونی پاشماوەی ماسییەكان دەگەڕێننەوە.

حەمید نایف، گوتەبێژی وەزارەتی كشتوكاڵی حكومەتی عێراق بەتۆڕی میدیایی رووداوی راگەیاند "ئەو نەخۆشییە لە دەریاچەكانی بابل لە قەزای موسەیەب بڵاوبووەتەوە و دەست بەجێ فەرمانبەرانی ڤێرتێنەری وەزارەت و ساڵح حەسەنی، وەزیری كشتوكاڵ سەردانی ناوچەیەكان كرد و بەدواداچونیان بۆ ئەو كێشەیە كرد دەركەوت كە نەخۆشی گەنیوبوونی گوێچكە ماسی بەكتریاییە، کە لە هەشتاكانی سەدەی رابردووەوە هەیە و بە تێپەڕینی كات ئەو بەكتریایە دەبێتە كەڕوو و دواتر دەبێتە هۆی مردنی ماسییەكان".

د. مەهدی سەهەر ئەلجبووری، بریکاری وەزارەتی کشتوکاڵی عێراق لە راگەیێندراوێکدا، مرداربوونی ماسی لە پارێزگاکانی بابل، بەغدا و دیالە بۆ چەند هۆکارێک دەگەڕێنێتەوە، لەوانە کەمبوونەوەی ئاستی ئاوی رووباری دیجلە و فورات، گیرانەوەی ئاوی پێویست بۆ ئەو کێڵگانەی ماسیان تێدا بەخێودەکرێت.هاوکات پیسبوونی ئاوی رووبارەکان و پاکنەکردنەوەیان بۆ ماوەیەکی درێژ و گوێپێنەدانی خاوەن کێڵگەکانی ماسییە بە رێنماییەکان بە جۆرێک بەخێوکردنی زیاتر 25 ماسی لە  مەترێک چوارگۆشە کە دەبێتە هۆی کەمبوونەوەی ئۆکسجینی پێویست و بڵاوبونەوەی گازی ئەمۆنیا.

لە راگەیێندراوەکەدا هاتووە وەزارەتی کشتوکاڵ لیژنەیەکی پێکهێناوە بۆ لادانی کێڵگە ماسییە نایاساییەکان.

وەزارەتی تەندروستی و ژینگەی عێراق بە هاوئاهەنگی لەگەڵ پارێزگاری بابل، هاوردەکردنی ماسی بۆ پارێزگاکە قەدەخەدەکات و لیژنەیەکی بۆ بەدواداچوونی هۆکاری ئەو رووداوە پێکهێناوە.

کەریم عەسکەر، بەڕێوەبەری گشتی فەرمانگی پارێزگاری و چاککردنی ژینگە لە ناوچەی فوراتی ناوەڕاست لە راگەیێندراوێکدا رایگەیاندووە، وەزارەتی تەندروستی و ژینگە تیمێکی پێکهێناوە بۆ رێگریکردن لە مرداربوونی ماسییەکان و چارەسەرکردنی دۆخەکە بە زووترین کات.

لە لایەکی دیکەوە پۆلیسی پارێزگای بابل لە بەیاننامەیەکدا ئەو هەواڵەی رەتکردەوە، کە لە بەشێک لە لاپەڕەکانی تۆڕەکۆمەڵاتییەکان بڵاوکراوەتەوە، هێزەکانی وەزارەتی ناوخۆی عێراق، کارمەندێکی لیوای عەلی ئەکبریان لەگەڵ پێنج ئێرانی دەستگیرکردووە، لەو کاتەی کیسی ژەهراویان فڕێداوەتە نێو رووباری فورات، بۆ حەوزەکانی بەخێوکردنی ماسی پارێزگای بابل.

 
داڕشتنەوە؛ راوچی حەسەن 


0.329 seconds