وەرە ژوورەوە / خۆت تۆمار بکە

وەک میوان بابەت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

وەکو میوان کۆمێنت دابنێ

ئیمەیلەکەت بە کەس پیشان نادرێت
کۆمێنتەکەت بەناوی خۆت بڵاوبکەوە

چوونە ژوورەوە

یان وەکو بەکارهێنەر پەیوەندیمان پێوە بکە
 

ئیمەیل

 

كوردى | Kurdî | English | Türkçe | عربي
Rudaw

هەڤپەیڤین

نوێترین بەرنامەکان هەموویان ببینە
  • مۆفەق روبەیعی، پەرلەمانتاری عێراق
  • ئەشرەف شەرەف نووروڵڵا، ئامۆزای مام جەلال
  • بۆچی زۆربەی وڵاتانی جیهان دژی گشتپرسیی کوردستانن؟
  • دیداری نێچیرڤان بارزانی لەگەڵ ژمارەیەک لە دەزگاکانی راگەیاندن
  • سەرۆک کۆماری ئۆسیتیای باشوور: ئەگەر گەل ئامانجی سەربەخۆی بێت، دێتەدی
  • هەڤپەیڤین 09/09/2017
  • هادی عامری، سەرکردەی حەشدی شەعبی
  • ئۆزتورک یڵماز، جێگری سەرۆکی جەهەپە
  • کەیا ئیزۆل، سەرۆکی فیدراسیۆنی کۆمەڵە کوردستانییەکان لە سوید
  • هونەرمەندی لوبنانی، لەیال عەبوود
  • لاڤرۆڤ هەڵوێستی رووسیا لەبارەی گشتپرسی بۆ رووداو باسدەکات
  • جەیمز جێفری، باڵیۆزی پێشووی ئەمریکا لە عێراق و تورکیا
  • فازڵ میرانی، سکرتێری مەکتەبی سیاسی پارتی
  • هەڤپەیڤین لەگەڵ جواو ڤالدۆ ڤێرا
  • ئیرلندۆر هارالدسۆن، رۆژنامەوانی ئایسلەندی

هادی عامری، سەرکردەی حەشدی شەعبی

 
رووداو: به‌ڕێز هادی سوپاس بۆ ئه‌م ده‌رفه‌ته‌. له‌ سه‌ره‌تادا ده‌مه‌وێ به‌پرسیاركردن له‌باره‌ی په‌یوه‌ندییه‌كانتان له‌گه‌ڵ به‌ڕێز مه‌سعود بارزانی سه‌رۆكی هه‌رێمی كوردستانه‌وه‌ ده‌ست پێبكه‌م. له‌ میانی شه‌ڕی دژ به‌داعش چه‌ندین جار دیداری هاوبه‌شتان هه‌بوو، هاوئاهه‌نگیتان هه‌بوو له‌باره‌ی دژایه‌تیكردنی داعش. ئایا په‌یوه‌ندی دێرینت له‌گه‌ڵ به‌ڕێزیان هه‌بووه‌؟ ئێستا په‌یوه‌ندییه‌كانتان چۆنه‌؟ 

هادی عامری: به‌ناوی خوای گه‌وره‌ و میهره‌بان، سوپاس و پێزانین بۆ یه‌زدانی مه‌زن و سڵاو و دروود بۆ گیانی په‌یامبه‌ر محه‌ممه‌د دروودی خوای له‌سه‌ر بێت. بێگومان په‌یوه‌ندییه‌كانمان له‌گه‌ڵ برایان و هه‌ڤاڵانی كورد له‌ هه‌رێمی كوردستان، په‌یوه‌ندییه‌كی دێرینه‌. په‌یوه‌ندی من له‌گه‌ڵ برایانی پارتی له‌ ساڵی 1981ـه‌وه‌ ده‌ستی پێكرد. ئێمه‌ له‌ ساڵی 1980 له‌ دهۆك و چیای گارا بووین. ئه‌وسا له‌گه‌ڵ برای به‌ڕێزم هۆشیار زێباری و بابه‌كر زێباری پێكه‌وه‌بووین. په‌یوه‌ندییه‌كی له‌مێژینه‌م له‌گه‌ڵیان هه‌یه‌ و هه‌روه‌ها په‌یوه‌ندییه‌كی زۆر باشم له‌گه‌ڵ برای به‌ڕێزم مه‌سعود بارزانی هه‌یه‌ و هه‌روه‌ها په‌یوه‌ندییه‌كی باشمان له‌گه‌ڵ ره‌وانشاد ئیدریس بارزانی هه‌بوو. بۆیه‌ په‌یوه‌ندییه‌كانمان له‌مێژینه‌یه‌ به‌تایبه‌تی له‌و كاته‌ی هه‌ڤاڵان له‌ ناوچه‌ی سێگۆشه‌ی سنووری عێراقی، توركی، ئێرانی بوون له‌ ناوچه‌ی رۆژان. به‌مه‌ش په‌یوه‌ندییه‌كانمان له‌گه‌ڵ برایانی كورد، په‌یوه‌ندییه‌كی نوێ نییه‌، به‌ڵكو په‌یوه‌ندییه‌كی دێرینه‌. په‌یوه‌ندی خه‌باتی هاوبه‌ش و په‌یوه‌ندی به‌شداربوونه‌ له‌ به‌ره‌یه‌كی جه‌نگ كه‌ پێكه‌وه‌ خه‌بات و جیهادمان ده‌كرد دژ به‌رژێمی پێشوو كه‌ هه‌ژموونی خۆی به‌سه‌ر گه‌لی عێراقی به‌زۆره‌مله‌ سه‌پاندبوو. دووپاتی ده‌كه‌مه‌وه‌، په‌یوه‌ندییه‌كانمان په‌یوه‌ندی ئه‌مڕۆ نییه‌ و په‌یوه‌ندییه‌كانمان دوای رووخانی رژێم دروستنه‌بووه‌ به‌ڵكو په‌یوه‌ندییه‌كی دێرینمان هه‌یه‌ و شانازی به‌م په‌یوه‌ندییه‌مان ده‌كه‌ین له‌گه‌ڵ هاوخه‌باتانی كورد و له‌سه‌رووی هه‌مووشیانه‌وه‌ برای به‌ڕێزم مه‌سعود بارزانی. به‌هه‌مان شێوه‌ په‌یوه‌ندییه‌كی تۆكمه‌شمان له‌گه‌ڵ برای به‌ڕێزمان جه‌لال تاڵه‌بانی هه‌یه‌. له‌گه‌ڵ زۆربه‌یان په‌یوه‌ندی دۆستانه‌مان هه‌یه‌ وه‌ك برای به‌ڕێزم كه‌ریم سنجاری وه‌زیری ناوخۆ و برای به‌ڕێزم فازڵ و زۆربه‌ی سه‌ركرده‌كانی كورد و په‌یوه‌ندییه‌كانمان دێرین و دۆستانه‌ و خه‌باتگێڕییه‌ و پێكه‌وه‌ له‌ به‌ره‌ی خه‌باتكردن بووین كه‌ سه‌رده‌مانێكی زۆر سه‌خت بوون. ئه‌وسا نه‌ ئۆتۆمبێلمان هه‌بوو نه‌ هامه‌ڕ و تاكه‌ هۆكارمان به‌پێ رۆشتن بوو كه‌ ئه‌وسا ده‌یانگووت رینۆ 11. ئه‌مه‌ش وایكرد په‌یوه‌ندییه‌كانمان دۆستانه‌تر بێت و تۆكمه‌تر بێت و به‌رده‌وامیش بێت.

رووداو: كۆبوونه‌وه‌كانتان له‌گه‌ڵ شاندی باڵای گشتپرسیی چۆن به‌ڕێوه‌چوو له‌ به‌غدا؟

هادی عامری: ئێمه‌ پێشوازیمان له‌ شانده‌كه‌ كرد. له‌ سه‌ره‌تادا ستایشی حكومه‌تی هه‌رێم و سه‌رۆكی هه‌رێم كرد له‌باره‌ی ئه‌م هه‌نگاوه‌ پیرۆزه‌ و پێشوازیمان له‌ سه‌رۆكی شانده‌كه‌ كرد كه‌ برای به‌ڕێزم دكتۆر رۆژ بوو. ئه‌و، هاوڕێیه‌كی دێرینی منه‌، په‌یوه‌ندییه‌كی دۆستانه‌ی خه‌باتگێڕانه‌ و حكومییه‌. له‌ سه‌رده‌می خه‌بات كه‌ پێكه‌وه‌ خه‌باتی هاوبه‌شمان ده‌كرد و له‌ سه‌رده‌می حكومه‌تیش كاتێك جێگری سه‌رۆكوه‌زیران بوو منیش وه‌زیر بووم. بۆیه‌ په‌یوه‌ندییه‌كی باشمان له‌گه‌ڵ برای به‌ڕێزم دكتۆر رۆژ هه‌یه‌. ئێمه‌ پێشوازیمان له‌م شانده‌ كرد. پێمواییه‌ هیچ كێشه‌یه‌ك نییه‌ چاره‌سه‌ر نه‌كرێت. هه‌موو كێشه‌یه‌ك به‌دیالۆگ چاره‌سه‌ر ده‌كرێت. به‌ده‌ر له‌م بژارده‌یه‌ هه‌موو بژارده‌یه‌كی دیكه‌ش ره‌ت ده‌كه‌ینه‌وه‌. چونكه‌ ناگه‌ینه‌ ئه‌نجام. دیالۆگ تاكه‌ چاره‌یه‌، ئه‌وسا پێم راگه‌یاندن و ئه‌مڕۆش زۆر به‌ڕاشكاوی ده‌یڵێمه‌وه‌، ئه‌گه‌ر جددی بن بۆ گرتنه‌به‌ری چاره‌سه‌ركردن، به‌دڵنیاییه‌وه‌ ده‌گه‌ینه‌ رێگه‌ چاره‌یه‌ك، به‌هه‌ڤاڵانیشم راگه‌یاند له‌كاتی كۆبوونه‌وه‌كانماندا و پێیانم راگه‌یاند، هیچ رێگه‌یه‌كی دیكه‌ نییه‌ بیگرینه‌ به‌ر بۆ چاره‌سه‌ركردنی كێشه‌ ناوخۆییه‌كانمان جگه‌ له‌ دیالۆگ. خاڵی دووه‌میش، سازشكردن له‌ نێوان یه‌كدی عه‌یبه‌ نییه‌، به‌ڵام سازشكردن بۆ بیانییه‌كان ئه‌مه‌ عه‌یبه‌ و شه‌رمه‌زارییه‌. به‌ڵام سازشكردن بۆ یه‌كدیمان، پێم وایه‌ ئه‌مه‌ لوتكه‌ی وه‌فایی و دڵسۆزییه‌ بۆ گه‌ل و نیشتمانمان كه‌ عێراقه‌ به‌ عه‌ره‌ب و كورد و توركمان و ئاشووریه‌كانه‌وه‌. من كه‌ ده‌ڵێم عێراق مه‌به‌ستم هه‌موو پێكهاته‌كانه‌ به‌عه‌ره‌ب و كورد و توركمان و ئاشووری و شه‌به‌ك و ئێزیدی و كریستیانه‌كان و هه‌موو ئه‌مانه‌ ده‌گرێته‌وه‌.

رووداو: كه‌ی شاندی هاوپه‌یمانی نیشتمانی سه‌ردانی هه‌ولێر ده‌كات؟

هادی عامری: من دوای دیدارم له‌گه‌ڵ برایانمان له‌م شانده‌، به‌غدام جێهێشت و به‌ره‌و ته‌له‌عفه‌ر به‌ڕێكه‌وتم و گه‌ڕامه‌وه‌ به‌ره‌ی جه‌نگ. وه‌ك ده‌زانن دوایین پێشهاته‌كان له‌ ته‌له‌عفه‌ره‌. ته‌نیا دوێنێ گه‌ڕامه‌وه‌ به‌غدا و به‌شداریم له‌ كۆبوونه‌وه‌ كرد له‌گه‌ڵ سه‌رۆكوه‌زیران و دووباره‌ هاتمه‌وه‌ به‌ره‌ی جه‌نگ. بۆیه‌ به‌وردی زانیاریم نییه‌، چ بڕیارێكیان داوه‌، به‌ڵام دڵنیام شاندی هاوپه‌یمانی نیشتمانی و شاندی حكومی سه‌ردانه‌كه‌یان ئه‌نجام ده‌ده‌ن. پێمانوابووه‌ و ئێستاش پێمانوایه‌ هیچ كێشه‌یه‌ك چاره‌سه‌ر ناكرێت، ئه‌گه‌ر دیالۆگ نه‌كرێت.

رووداو: هیچ هیوایه‌ك هه‌یه‌ بۆ گه‌یشتن به‌ڕێككه‌وتنێك كه‌ هه‌ردوولایه‌ن قایل بكات؟

هادی عامری: پێموایه‌ ده‌گه‌ینه‌ ئه‌نجام، بۆچی نه‌گه‌ینه‌ ئه‌نجام. ئه‌گه‌ر نیازپاكی هه‌بێ بۆ چاره‌سه‌ركردن، ئه‌گه‌ر پێمانوابێت هیچ رێگه‌چاره‌یه‌كی دیكه‌مان نییه‌ جگه‌ له‌ دیالۆگ، ئه‌وسا رێكده‌كه‌وین. به‌ڵام ئه‌گه‌ر به‌زاره‌كی به‌یه‌كدی بڵێین دیالۆگ ده‌كه‌ین، به‌ڵام له‌ ناخه‌وه‌ دیالۆگمان پێ قه‌بوڵ نه‌كرێت، به‌هیچ شێوه‌یه‌ك له‌ هیچ قۆناخێك ناگه‌ینه‌ ئه‌نجام. به‌ برایانی شانده‌كه‌شم راگه‌یاند، ئه‌گه‌ر نیازپاكی و جدییه‌ت هه‌بێت، رێكده‌كه‌وێن و ده‌گه‌ینه‌ ئه‌نجام. ئاڵۆزترین كێشه‌كانی جیهان، چاره‌سه‌ركران و رێككه‌وتن. بۆیه‌ پێم وانییه‌ نه‌گه‌ینه‌ ئامانج ئه‌گه‌ربێت و نیازپاكی و جددیه‌ت هه‌بێت، به‌تایبه‌تی له‌نێوان یه‌كدیمان كه‌ كه‌سوكاری یه‌كدین.

رووداو: نیازپاكی و جدییه‌ت له‌ حكوومه‌تی عێراقی و له‌ به‌غدا به‌دی ده‌كرێت؟

هادی عامری: ئێمه‌ پێمانوایه‌ رێگاكان ده‌گیرێنه‌به‌ر، ئه‌مڕۆ هه‌مان نیاز هه‌یه‌ و به‌غداش پێی وایه‌ هه‌مان رێگا بگیرێته‌به‌ر، به‌ڵام كێشه‌یه‌كمان هه‌یه‌، كه‌ بریتییه‌ له‌ هه‌ڵپه‌ساردنی كێشه‌كان و دواخستنی چاره‌سه‌ركردنی كێشه‌كان. هه‌ڵپه‌ساردن و دواخستنی كێشه‌كان، دۆخه‌كه‌ و كێشه‌كه‌ ئاڵۆزتر ده‌كات. ئێمه‌ هه‌ندێكجار سڕكه‌ره‌وه‌ به‌كارده‌هێنین. هه‌نگاو به‌ره‌و قوڵایی كێشه‌كان نانێین و له‌ بنه‌ڕه‌تییه‌وه‌ نایكه‌ینه‌وه‌. پێموایه‌ كێشه‌ قووڵه‌كه‌ی نێوان هه‌رێم و ناوه‌ند پرسی نه‌وته‌. پێموایه‌ ئه‌گه‌ربێت و به‌نیازێكی پاك و جددی و دروست هه‌نگاو بنێین بۆ چاره‌سه‌ركردنی پرسی نه‌وت، به‌دڵنیاییه‌وه‌ چاره‌سه‌ر ده‌كرێت. به‌غدا ده‌ڵێت هه‌رێم نه‌وت هه‌نارده‌ ده‌كات به‌بێ ئه‌وه‌ی داهاته‌كه‌ی بگه‌ڕێنێته‌وه‌ به‌غدا و له‌به‌ر ئه‌م هۆیه‌شه‌، 17%ی بودجه‌ی هه‌رێمیان بڕی. پێموایه‌ ئه‌مه‌ سه‌ره‌تا و قوڵایی كێشه‌كانی نێوان هه‌ولێر و به‌غدایه‌ كه‌ پێویست به‌چاره‌سه‌ركردن ده‌كات. ئه‌گه‌ر سازانێكی جددی كرا بۆ ئه‌وه‌ی یاسایه‌ك دابڕێژرێت بۆ نه‌وت و هه‌رێم هه‌نگاوێك به‌ره‌و پێشه‌وه‌ بنێت و به‌غداش به‌هه‌مان شێوه‌ هه‌نگاوێك به‌ره‌و پێشه‌وه‌ بنێت، بۆیه‌ پێموایه‌ هیچ رێگرییه‌ك نامێنێت بۆ ئه‌وه‌ی هه‌ردوولایه‌ن بگه‌نه‌ چاره‌سه‌ر و ئامانجی هاوبه‌ش. هه‌ندێك جار پرسه‌ بنه‌ڕه‌تییه‌كان پێویسته‌ به‌ئه‌نجامدانی نه‌شته‌رگه‌ریی هه‌یه‌ ناكرێت كێشه‌كان به‌هه‌ڵپه‌سێردراوه‌یی و دواخستنه‌وه‌ بهێڵدرێت. ئه‌م دوو فاكته‌ره‌ وایكردووه‌ كێشه‌كانی نێوان هه‌رێم و به‌غدا به‌ره‌و ئاڵۆزی زیاتر ببات. پێموایه‌ ئه‌گه‌ر دانیشتنی جددی بكرێت و پرسه‌ گرنگه‌كان بخرێنه‌ به‌رباس و لێكۆڵینه‌وه‌، وه‌ك ئه‌و یاسایه‌ كه‌ ده‌ڵێت، به‌دواداچوون بۆ هه‌موو شتێك وه‌ك ئه‌وه‌یه‌ به‌دواداچوون بۆ هیچ شتێك نه‌كرابێت. بۆیه‌ ناكرێت هه‌موو كه‌یسه‌كان بكرێنه‌وه‌ و تاوتوێ و گه‌نگه‌شه‌ بكرێت. چونكه‌ كات ته‌واو نابێت و ناگه‌ینه‌ ئامانج. بۆیه‌ پێویست به‌وه‌ ده‌كات په‌نجه‌ له‌سه‌ر پرسه‌ گرنگه‌كان دابنێین بۆ ئه‌وه‌ی چاره‌سه‌ر بكرێن. ئه‌گه‌ر پرسه‌ گرنگه‌كان چاره‌سه‌ر بكرێن، هه‌موو پرسه‌كانی دیكه‌ لاوه‌كی ده‌بن و چاره‌سه‌رییان بۆ ده‌دۆزرێته‌وه‌. خاڵی سه‌ره‌كی و بنه‌ڕه‌تی هه‌یه‌، له‌ خاڵێكه‌وه‌ ده‌ستپێده‌كات تا چوار پێنج شه‌ش خاڵ ئه‌مانه‌ سه‌ره‌كیین. حكومه‌تی به‌غدا ده‌ڵێت گومرگه‌كان، حكومه‌تی هه‌رێم ده‌ڵێت بازگه‌كان، ئه‌و شتێك ده‌ڵێت ئه‌وی دیكه‌ش شتێكی دیكه‌ ده‌ڵێت. بۆیه‌ پێویست ده‌كات له‌ پرسی نه‌وته‌وه‌ ده‌ست پێبكه‌ن تا سه‌رجه‌م خاڵه‌ سه‌ره‌كی و بنه‌ڕه‌تییه‌ هاوبه‌شه‌كانی نێوان هه‌ردوولا. بۆ ئه‌وه‌ی ده‌ستیان له‌سه‌ر دابنێین و چاره‌سه‌ریان بكه‌ین. هیچ شتێك نییه‌ نه‌گه‌ینه‌ چاره‌سه‌ر. پێموایه‌ نابێت، كێشه‌كان دوابخرێن. هه‌ڵپه‌ساردن و دواخستن و پشتگوێخستن و سڕكردنی به‌هیچ شێوه‌یه‌ك ناگه‌ینه‌ ئامانج كه‌ ئه‌مه‌ش خاڵی گه‌وهه‌رین كه‌ كێشه‌كانی نێوان ئێمه‌ و هه‌رێمی ئاڵۆزتر كردووه‌.

رووداو: كێ هۆكاری ئه‌مه‌یه‌؟

هادی عامری: با به‌ویژدانه‌وه‌ قسه‌ بكه‌م كێشه‌ له‌نێوان حكومه‌تی هه‌رێم و به‌غدا له‌سه‌ر پرسی شایسته‌ داراییه‌كانی كۆمپانیا بیانییه‌كانی بواری نه‌وتی كاركردوو له‌ عێراق سه‌ریهه‌ڵدا. كێشه‌ له‌سه‌ر ئه‌م خاڵه‌ روویدا، له‌سه‌ر گوژمه‌یه‌كی دیاریكراو. ده‌بوایه‌ دانیشتنێكی خێرا بكرایه‌ بۆ ئه‌وه‌ی بزانرێت، شایسته‌ داراییه‌كانی كۆمپانیا بیانییه‌كان چه‌نده‌ و پێویسته‌ چه‌ند بدرێت. بۆ ئه‌وه‌ی كێشه‌كان ئاڵۆز نه‌كرێن و به‌ره‌و چاره‌سه‌ر هه‌نگاو بنێت. ئه‌گه‌ر پاره‌ نه‌بوو، به‌كۆمپانیاكان بڵێن كه‌ پاره‌مان نییه‌ و پێدانی گوژمه‌كان دوابخه‌ن بۆ واده‌یه‌كی دیكه‌ بۆ ئه‌وه‌ی میكانیزمێكی گونجاو بدۆزرێته‌وه‌ بۆ چۆنێتی و چه‌ندێتی پاره‌دان. نه‌ حكومه‌تی هه‌رێم په‌ڕاوی گرێبه‌سته‌كانی به‌حكوومه‌تی ناوه‌ند نه‌دا، نه‌ حكوومه‌تی ناوه‌ندیش گوێی به‌خواسته‌كانی حكوومه‌تی هه‌رێم نه‌دا. بۆیه‌ پێموایه‌ هه‌ردوولایه‌ن به‌رپرسیارن. من نامه‌وێ ئۆباڵی كێشه‌كان بخه‌مه‌ سه‌ر هه‌ردوولایه‌ن، چونكه‌ هه‌ردووكیان به‌رپرسیارن. له‌ دروستكردنی په‌یوه‌ندییه‌كان و هه‌روه‌ها له‌ چاره‌سه‌ركردنی كێشه‌كان، ناكرێت كێشه‌كان تاكلایه‌نه‌ به‌ڕێوه‌ببردرێت. ده‌بێ هه‌ردوولایه‌ن ئاماده‌یی خۆیان بنوێنن بۆ ئه‌وه‌ی كێشه‌ی نه‌وت چاره‌سه‌ر بكرێت. چاره‌سه‌ری كێشه‌كانی كۆمپانیا بیانییه‌ كاركردووه‌كانی نێو هه‌رێمی كوردستان بدۆزرێته‌وه‌. ئه‌م كێشانه‌ ئه‌گه‌ر هه‌نگاوی به‌رجه‌سته‌كراوی بۆ بنرێت، ده‌توانرێت دواتر سه‌رجه‌م كێشه‌كان بخریته‌ گفتوگۆكردنه‌وه‌. ناكرێت كێشه‌كان هێنده‌ بچووك بكرێنه‌وه‌ باس له‌ كێشه‌ ناوخۆییه‌كان بكرێت فه‌رمانبه‌رێك به‌مشێوه‌یه‌ مامه‌ڵه‌ی كرد و فه‌رمانبه‌رێكیش له‌ فه‌رمانگه‌یه‌كی دیكه‌ ئه‌مه‌ی گووت. من له‌ سه‌ره‌تادا بۆچوونم وابوو، ئێستاش به‌هه‌مان شێوه‌، ئه‌گه‌ر بێت و پرسه‌ گرنگه‌كان تاوتوێ بكرێن به‌دوورگرتنی ره‌واج پێدانی میدیایی و باسكردنیان له‌ راگه‌یاندنه‌كان و موزایه‌ده‌كردن. به‌بۆچوونی من پرسه‌كان به‌ئارامی و نهێنییه‌وه‌ ئه‌نجامی بده‌ن. با پێكه‌وه‌ دانیشتنی بۆ بكه‌ین، بسازێین، دیالۆگ بكه‌ین، تاوتوێ بكه‌ین. به‌ڵام ناكرێت له‌ دوای كۆبوونه‌وه‌كه‌ ده‌ربچیت و به‌راگه‌یاندنه‌كان بڵێیت، كۆبووینه‌وه‌ و ئاخاوتنمان كرد به‌ڵام نه‌گه‌یشتینه‌ ئامانج و هه‌رای بۆ بنێیته‌وه‌، هه‌رگیز ناگه‌ینه‌ ئامانج. پێویسته‌ سه‌رجه‌م كێشه‌كان به‌دیالۆگ چاره‌سه‌ربكرێن. ته‌نانه‌ت جه‌نگه‌كانیش به‌هه‌مان شێوه‌ن. جه‌نگه‌كان ناچارت ده‌كه‌ن هه‌نگاو به‌ره‌و دیالۆگ ببه‌یت. هیچ شتێك نییه‌، به‌دیالۆگ چاره‌سه‌ر نه‌بێت.

رووداو: دیالۆگ دوای گشتپرسیی به‌رده‌وام ده‌بێت؟

هادی عامری: زۆر به‌ڕاشكاوی ده‌یڵێم، گشتپرسیی ده‌بێته‌ هۆی ئاڵۆزكردنی دۆخه‌كان. به‌بۆچوونی خۆم، له‌وانه‌یه‌ گشتپرسیی دۆخه‌كه‌ ئاڵۆزتر بكات. چاره‌سه‌ر نییه‌، چونكه‌ ئێمه‌ داوامانكرد گشتپرسیی نه‌كرێت، سازان بكه‌ین چاره‌سه‌ر بدۆزینه‌وه‌. برایان ده‌سبه‌جێ به‌ره‌و گشتپرسیی هه‌نگاویان نا. ئه‌گه‌ر به‌ره‌و گشتپرسیی بچن، كه‌واته‌ چاره‌سه‌ریان ناوێت. ترسم له‌وه‌دایه‌ گشتپرسیی دۆخه‌كه‌ زۆر ئاڵۆزبكات. من چه‌ندین جار بانگه‌شه‌م بۆ برایانم كرد چاو به‌بڕیاری گشتپرسی بگێڕن. پرسی گشتپرسیی پێداگیركردن و نه‌كردن نییه‌. به‌رژه‌وه‌ندی هه‌رێم له‌ كوێیه‌؟ من كه‌ ده‌ڵێم عێراق مه‌به‌ستم هه‌رێمیشه‌، پێویسته‌ بیر له‌ به‌رژه‌وه‌ندی گشتیی بكه‌ینه‌وه‌. ئه‌گه‌ر له‌م خاڵه‌ نه‌گه‌ینه‌ ئه‌نجامێك، چاره‌سه‌ری بۆ كێشه‌كانی دیكه‌ نادۆزرێته‌وه‌. به‌بۆچوونی من ده‌كرێت بگه‌ینه‌ ده‌ره‌نجامێك. هه‌رێم ته‌نیا كێشه‌ی له‌گه‌ڵ حكوومه‌تی ناوه‌ند هه‌یه‌؟ له‌ناوخۆی هه‌رێم كێشه‌ هه‌یه‌ و زۆر شت ده‌زانین به‌ڵام نامانه‌وێت له‌ راگه‌یاندن باسیان بكه‌ین. به‌ڵێ، كێشه‌ی ناوخۆی هه‌رێم هه‌یه‌ و له‌گه‌ڵ ناوه‌ندیش هه‌یه‌تی. به‌هه‌مان شێوه‌ حكوومه‌تی ناوه‌ندیش كێشه‌ی ناوخۆی هه‌یه‌. بۆیه‌ پێموایه‌ نابێت په‌له‌ بكه‌ین له‌ كێشه‌ سه‌ره‌كییه‌كان. پێویسته‌ گرنگترین سێ چوار خاڵ بكه‌ینه‌ رۆژه‌ڤ و پرسی گفتوگۆكانمان. ئه‌گه‌ر ئه‌مانه‌ چاره‌سه‌ییان بۆ دۆزرایه‌وه‌، ئه‌وانی دیكه‌ش بێگومان چاره‌سه‌ر ده‌كرێن. به‌ڵام ئه‌گه‌ر 200 خاڵ بكه‌یته‌ رۆژه‌ڤی كۆبوونه‌وه‌ و باس له‌ هه‌ڵسوكه‌وت خاڵێكی پشكنین و فه‌رمانبه‌رێك بكه‌یت، به‌هیچ شێوه‌یه‌ك ناگه‌ینه‌ چاره‌سه‌ر. دیسان ده‌یڵێمه‌وه‌، پێویسته‌ نیازپاكی و جدییه‌ت و دروستی هه‌بێت بۆ ئه‌وه‌ی كێشه‌كان چاره‌سه‌ری بۆ بدۆزرێته‌وه‌. 

رووداو: په‌یوه‌ندی نێوان هه‌ولێر و به‌غدا دوای گشتپرسیی چۆن ده‌بێت؟

هادی عامری: نازانم، من ترسم له‌ ئاڵۆزبوونی كێشه‌كان هه‌یه‌، به‌ڕاشكاوی ده‌یڵێم ترسم هه‌یه‌ له‌ ئاڵۆزبوونی كێشه‌كان. حكوومه‌تی عێراقی پێی وایه‌ هیچ بژارده‌یه‌ك نییه‌ جگه‌ له‌ دیالۆگ.

رووداو: به‌ڵام به‌شێوه‌یه‌كی دیموكراسی و ئاشته‌وایی ئه‌نجامی ده‌دات؟

هادی عامری: با من روونی بكه‌مه‌وه‌. ئێمه‌ له‌ په‌رله‌مان كۆبووینه‌وه‌ و دواتر ده‌نگمان له‌سه‌ر ده‌ستووردا. ده‌ستوور به‌ به‌شداریپێكردنێكی ره‌های كورد نووسرایه‌وه‌. نه‌ شیعه‌ نه‌ كورد بۆیان نییه‌ ره‌خنه‌ له‌ ده‌ستوور بگرن. سووننه‌ به‌ئاستێكی لاواز به‌شدارییان كرد، ئه‌وان پێیان وابوو كه‌ به‌هۆی رووخانی رژێم، له‌ پرۆسه‌ی نوێدا لاواز ده‌بن و به‌شێكیان به‌شدارییان نه‌كرد و كێشه‌ی نێوخۆییان هه‌بوو. به‌ڵام شیعه‌ و كورد به‌شدارییه‌كی به‌هێزیان هه‌بوو له‌ نووسینه‌وه‌ی ده‌ستوور بۆیه‌ نابێ ره‌خنه‌ش بگرن. ئێمه‌ له‌ده‌ستوور نووسیمان عێراقێكی یه‌كپارچه‌ و یه‌كگرتوو. مادده‌ی یه‌كه‌می ده‌ستووری عێراق جه‌ختمانكرده‌وه‌. له‌ هه‌موو كۆبوونه‌وه‌كانمان له‌گه‌ڵ برایانی كورد پێمان ده‌ڵێن ده‌بێت پابه‌ندی ده‌ستووربن. به‌ڵام ده‌ستوور باس له‌ گشتپرسیی ناكات. گه‌لی عێراق ده‌نگی به‌ده‌ستووری عێراقێكی یه‌كپارچه‌ی یه‌كگرتوودا. بۆیه‌ كاتێك باس له‌ ده‌ستوور ده‌كرێت، ئایا له‌ هیچ شوێنێكی ده‌ستوور باس له‌ گشتپرسیی كراوه‌. من ناڵێم گشتپرسیی پرۆسه‌یه‌كی دیموكراسی نییه‌، به‌ڵام ئێمه‌ ده‌ستوورمان نوسییه‌وه‌، گه‌لی عێراقیش ده‌نگیدا و گه‌لی كوردیش ده‌نگیان به‌ده‌ستووردا و پرسی هاوبه‌شی سه‌ره‌كیشمان عێراقێكی یه‌كگرتووه‌. عێراقێكی فیدراڵی و دیموكراتی و یه‌كگرتوو. له‌سه‌ر ئه‌مه‌ رێككه‌وتین. ئێستا هه‌وڵ ده‌ده‌یت به‌ره‌و گشتپرسیی هه‌نگاو بنێیت، ئه‌مجاره‌ ئه‌وان پرسێكی دیكه‌یان گرتووه‌ته‌به‌ر. كاتێك ئێمه‌ش پرسێكی دیكه‌ باس ده‌كه‌ین، ئه‌وان ده‌سبه‌جێ هانا بۆ ده‌ستوور ده‌به‌ن.

رووداو: ناكرێت، سیاسییه‌كانی عێراق ئارام بگرن له‌ به‌رامبه‌ر ئه‌م مافه‌ دیموكراسییه‌ جه‌ماوه‌رییه‌؟

هادی عامری: پرۆسه‌ی دیموكراسی چی، با به‌ڕاشكاوی قسه‌ بكه‌ین. ده‌كرێت ئێمه‌ بڵێین، گشتپرسیی له‌ شوێنی دیكه‌ی عێراق بكه‌ین یان له‌ به‌غدا بیكه‌ین و برایانی كوردیش به‌شداربن، به‌ڵام ده‌ستبه‌رداری مادده‌ی 140 بن، ئایا كورد قه‌بووڵی ده‌كات؟ هه‌رێم قبوڵی ده‌كات؟

رووداو: به‌ڵام ئێستاشی له‌گه‌ڵ بێت ئه‌م مادده‌یه‌ جێبه‌جێ نه‌كراوه‌؟

هادی عامری: به‌ڵام كورد به‌رده‌وام مادده‌ی 140 و كه‌ركووك باس ده‌كات. ئه‌مانه‌ ناوچه‌ی بۆچوونی جیاوازن نه‌ك ناوچه‌ جێ ناكۆكه‌كان. بۆ نموونه‌ ئێمه‌ ده‌ڵێن با پرسی كه‌ركووك هه‌ڵوه‌شێنینه‌وه‌ و مادده‌ی 140 له‌ ده‌ستوور په‌كبخه‌ین. ئه‌مه‌ چۆن ده‌كرێت. ئێمه‌ رێككه‌وتووین له‌سه‌ر مادده‌ی 140 و رێككه‌وتین له‌سه‌ر جێبه‌جێكردنی به‌پێی میكانیزمی به‌دیكراو بۆ ناوچه‌ بۆچوونه‌ جیاوازه‌كان یان ناوچه‌ كێشه‌ له‌سه‌ره‌كان یاخود چ ده‌سته‌واژه‌یه‌كی بۆ به‌كارده‌هێنیت گرنگ نییه‌. به‌ڵام له‌ ده‌ستوور ئه‌م خاڵه‌مان جێگیركردووه‌ به‌وه‌ی مادده‌ی 140 چه‌ند میكانیزمێكی یاسایی و ده‌ستووری هه‌یه‌ پێویسته‌ بگیرێته‌به‌ر بۆ چاره‌سه‌ركردنی كێشه‌كان. ئه‌گه‌ر ئێمه‌ بڵێین با مادده‌ی 140 پشتگوێ بخه‌ین و با ده‌ست به‌گشتپرسیی بكه‌ین له‌ شوێنێكی دیكه‌، ئایا برایانی كورد ناڕه‌نجێن؟ ئێ خۆ ئه‌مه‌ش هه‌وڵێكی دیموكراسییه‌ و با له‌ رێگه‌ی ریفراندۆم چاره‌سه‌ر بكرێت. مامه‌ڵه‌كردنی دیموكراسی سه‌ر سه‌رم و سه‌رچاومه‌ به‌ڵام به‌و مه‌رجه‌ی ئه‌و مامه‌ڵه‌ دیموكراسییه‌ به‌پێچه‌وانه‌ی ده‌ستوور نه‌بێت. ده‌ستوور باس له‌ عێراقێكی یه‌كگرتوو ده‌كات. ده‌ستوور پێمان ده‌ڵێت كورد دۆست و برامانن و ماف و ئه‌ركیان هه‌یه‌ وه‌ك چۆن ئێمه‌ش هه‌مانه‌. ئه‌گه‌ر بێت و گشتپرسیی بكه‌ن بۆ ئه‌وه‌ی سیسته‌می حوكمڕانی كوردستان بكه‌نه‌ سه‌رۆكایه‌تی یان په‌رله‌مانی، ئه‌وسا هیچ كێشه‌یه‌كمان نییه‌، چونكه‌ ئه‌مه‌ له‌ چوارچێوه‌ی ده‌ستوور ده‌كرێت. چونكه‌ پرسی هه‌رێم و سه‌رۆكایه‌تی هه‌رێم هه‌یه‌. با سه‌رۆكی هه‌رێم له‌نێو په‌رله‌مان هه‌ڵبژێردرێت یان له‌نێو خه‌ڵك، ئه‌مه‌ كێشه‌ نییه‌، چۆن ده‌یكه‌ن با بیكه‌ن. هه‌ر رێگه‌ چاره‌یه‌ك گه‌لی برای كورد پێیان باش بێت له‌ سیسته‌می سه‌رۆكایه‌تی یان له‌ سیسته‌می په‌رله‌مانی ئێمه‌ په‌یوه‌ندیمان پێوه‌ نییه‌، به‌ڵام كاتێك پرسه‌كه‌ تایبه‌ت ده‌بێت به‌عێراق، باس له‌ گشتپرسیی بكه‌ن، گشتپرسی بۆ چی؟ گشتپرسیی بۆ جیابوونه‌وه‌ له‌ عێراق.

رووداو: له‌سه‌ره‌تای هه‌ڤپه‌یڤینه‌كه‌دا گوتت په‌یوه‌ندییه‌كی به‌هێز و باش و تۆكمه‌مان له‌گه‌ڵ سه‌ركردایه‌تی كورد هه‌یه‌. له‌ یه‌كێك له‌ لێدوانه‌كانتدا هۆشداریت به‌گه‌لی كورد داوه كه‌ داوای جیابوونه‌وه‌ ده‌كه‌ن و داوای سه‌ربه‌خۆیی ده‌كه‌ن و هه‌روه‌ها بۆ سووننه‌ كه‌ داوای فیدراڵی ده‌كه‌ن پێویسته‌ رووبه‌ڕوویان ببینه‌وه‌؟

هادی عامری: له‌ كوێ؟

رووداو: لێدوانێكت هه‌یه‌.

هادی عامری: پێم بڵێ له‌ كوێ؟ من باوه‌ڕم به‌ده‌ستوور هه‌یه‌. هه‌روه‌ها باوه‌ڕم به‌وه‌ هه‌یه‌ كه‌ هه‌رێم خاوه‌ن سیسته‌مێكی حوكمڕانی خۆی هه‌یه‌ به‌ڵام كاتێك پێم ده‌ڵێیت جیابوونه‌وه‌. من لێره‌ ده‌وه‌ستم. چونكه‌ ئه‌مه‌ پێشێلكاری ده‌ستووره‌. من له‌ دژی دامه‌زراندنی هه‌رێم نیم، به‌ڵام له‌ دژی دامه‌زراندنی هه‌رێمم له‌سه‌ر بنه‌مای نه‌ژادی. ئه‌مه‌ش هه‌ڵوێستێكی روون و ئاشكرایه‌.

رووداو: كه‌واته‌ به‌چه‌ك رووبه‌ڕوویان ده‌بنه‌وه‌؟

هادی عامری: نه‌خێر من وام نه‌گووت. من ده‌ڵێم له‌و كاته‌ی ده‌ست به‌چه‌ك ده‌گرین ئه‌گه‌ر بێت و سیسته‌می هه‌رێمایه‌تی له‌سه‌ر بنه‌مای نه‌ژادی و تایفه‌گه‌ری دابمه‌زرێت. من پرسیارێكت لێ ده‌كه‌م. ئه‌گه‌ر هه‌رێمی نه‌ژادی و تایفه‌گه‌ری دابمه‌زرێنین، واته‌ هه‌رێمی كوردی و هه‌رێمی عه‌ره‌بی. سنووری هه‌رێمی كوردی له‌ كوێ بێت و سنووری عه‌ره‌بی له‌ كوێ بێت؟ رێكناكه‌وین ناكۆك ده‌بین. ناكۆكییه‌كان قوڵ ده‌بن و په‌نا بۆ چه‌ك ده‌به‌ین. یان ئه‌گه‌ر هه‌رێمێكی تایفه‌گه‌ری دابمه‌زرێنین. هه‌رێمی سووننی و هه‌رێمی شیعی، ئه‌ی سنووره‌كانیان له‌ كوێ ده‌بێت چۆن ده‌ست پێ ده‌كات و له‌ كوێ كۆتایی پێدێت؟ تۆ پێم بڵێ؟ چۆن ناوچه‌كان دابه‌ش بكه‌ین؟ ته‌نانه‌ت له‌سه‌ر دابه‌شكردنی ژوورێك ناكۆك ده‌بین. ئه‌گه‌ر مكوڕی بكرێت، ناكۆكییه‌كان قوڵتر ده‌بن. من ئه‌و كه‌سه‌م كه‌ زۆر باوه‌ڕم به‌سیسته‌می هه‌رێمایه‌تی هه‌یه‌ به‌ڵام ئه‌و هه‌رێمانه‌ی له‌سه‌ر بنه‌مای كارگێڕین. بۆ نموونه‌ ویلایه‌ته‌ یه‌كگرتووه‌كانی ئه‌مریكا به‌ڵام من ترسم له‌ دامه‌زراندنی سیسته‌می هه‌رێمایه‌تی له‌سه‌ر بنه‌مای نه‌ژادی و تایفه‌گه‌ری هه‌یه‌.

رووداو: بۆچی هه‌رێمی به‌سڕه‌تان ره‌تكرده‌وه‌؟ زۆر داوایان كرد.

هادی عامری: هه‌رێمی به‌سڕه‌ ئه‌گه‌ر له‌ ژێر ناونیشانێكی كارگێڕی بێت، هیچ كێشه‌یه‌كمان نابێت. تۆ پێت وانه‌بێت من پشتیوانی له‌ مه‌ركه‌زییه‌ت ده‌كه‌م، من دژی مه‌ركه‌زییه‌تم. من باوه‌ڕم به‌سییسته‌می هه‌رێمی هه‌یه‌ له‌سه‌ر بنه‌مای پارێزگاكان و كارگێڕییه‌كان. من هۆشداریمداوه‌ و هۆشداریش ده‌ده‌م ئه‌گه‌ر هه‌ر نیازێك هه‌بێت به‌ دامه‌زراندنی سیسته‌می هه‌رێمایه‌تی له‌سه‌ر بنه‌مای نه‌ژادی و تایفه‌گه‌ری، له‌وانه‌یه‌ ده‌رگای ناكۆكییه‌كان له‌سه‌ر پشت بكرێنه‌وه‌. هیچ شتێك وه‌ك ناكۆكی نییه‌ كه‌ زیانمان پێ بگه‌یێنێت. بۆیه‌ كاتێك ئێمه‌ ده‌ڵێین پێویسته‌ له‌ دژی ئه‌م جۆره‌ پرۆژانه‌ بوه‌ستین ئه‌وه‌ مانای ئه‌وه‌ ناگه‌یێنێت كه‌ دووره‌ په‌رێزبین لێی. هه‌ندێك جار لایه‌نی به‌رامبه‌ر هۆشداریت پێده‌دات له‌ ئه‌گه‌ری گرتنه‌به‌ری ئه‌م رێگایه‌ دووچاری كێشه‌ت ده‌كات. واته‌ كاتێك تۆ هۆشداری پێ ده‌ده‌یت، مانای ئه‌وه‌ نییه‌ دژایه‌تی بكه‌یت. جیاوازی له‌ نێوان هۆشداری و هه‌ڕه‌شه‌ هه‌یه‌. بۆ نموونه‌ كاتێك پزیشكت هۆشداریت پێ ده‌دات به‌ نه‌كێشانی جگه‌ره‌ یان نه‌خواردنی گۆشتی سوور و تۆش به‌پێچه‌وانه‌ بیكه‌یت، ئه‌وسا به‌هه‌موو شێوه‌یه‌ك خۆت تووشی به‌ڵای گه‌وره‌ ده‌كه‌یت. پزیشكه‌كه‌ت بۆ به‌رژه‌وه‌ندی تۆ هۆشداریت پێ ده‌دات نه‌ك هه‌ڕه‌شه‌ت لێ بكات. بۆیه‌ ده‌یڵێمه‌وه‌ هه‌ر پڕۆژه‌یه‌ك له‌سه‌ر بنه‌مای تایفه‌گه‌ری و نه‌ژادی دابمه‌زرێت، ده‌رگای ناكۆكییه‌كان و شه‌ڕانگێزی به‌سه‌ر پشتدا ده‌كاته‌وه‌.


عامری
"سەبارەت بە ئێمە لەبارەی ناكۆكی، ئەوە ناكۆكی كاركردنە، ناكۆكی گەوهەری  نین، ناكۆكی تێڕوانینەكانە لەبارەی كاركردن، ئێمە پێمانوایە بەشداریكردنی  حەشد  لەسەرجەم شەڕەكان كاتێك سوپاو پۆلیس و دژە تیرۆرو حەشدو چەكدارانی  ناوچەكە كۆدەبنەوە  سەركەوتنەكە خێراو گەورە دەبێت،  هەروەها كەمترین  زیانیشی دەبێت، چەندین جار ئەوكێشەیەمان هەبووە، ئێمە رێزی بڕیاری  سەرۆكوەزیرانمان گرت تایبەت بە بەشدارینەكردنی حەشد لە شەڕی موسڵ، ئێمە  لە دوو شەڕ بەشداریمان نەكردووە، ئەو دوو شەڕەی بەشداریمان تێدا نەكردوون  درێَژەیان كێشاوە، زیانی زۆریان بەركەوتوە لەرووی مادی و مەعنەویەوەـ شەڕی  رامادی كە زیاتر لە 9 ـ 10 مانگی خایاند، هەروەها شەڕی موسڵیش بەشداریمان  تێدا نەكرد، لە هەموو ئەو شەڕانەی پێشبینی دەكرا و بەیەكگرتوویی بەشداریمان  بەکردبێت درێژەیان كێشاوە، بێجی بەشداریمان نەكرد بە جیا جیا بەشداریمان كرد،  بەڵام كاتێك یەكمانكگرت ماوەی هەفتەیەك شەڕەكە كۆتاییهات، پێشبینیش دەكرا  كە شەڕی بێجی چەند مانگێك بخایەنێت، بە یەك هەفتە شەڕەكە تەواو بوو،  شەڕی فەللـوجە هەموویان پێیانوابوو شەڕی فەللـوجە لانی كەم شەش مانگ  تاوەكو ساڵێك دووساڵ دەخایەنێت بەلای هەندێك كەس، شەڕی  فەللـوجە، نەك  تەنیا فەللـوجە، گەڕمە، سەقڵاویە، فەللـوجە، هەروەها ئەو ناوچەیەی  بەئاراستەی رۆژئاوای فوڕاتن، هەموو ئەو ناوچانە لە ماوەی 33 رۆژدا  كۆنتڕۆڵكرانەوە، سەرەڕای ئەوەی زیاتر لە هەفتەیەك شەرەكە دواخرا بە  پاساوی دەرچوونی خەڵكی سڤیل، كاتێك ئێمە قسە لەسەر ئەو پرسە دەكەین  دەڵێین بەشداریكردنی حەشد، ئەمڕۆ لە تەلەعفەر پەیامێكی روونە،  بەشداریكردنی حەشد لە شەڕ، کارەکان خێرادەكات، ورە بەرزدەبێتەوە سوپا و پۆلیسی  فیدڕاڵی و حەشد هەموویان ورەیان بەرزدەبێتەوە، لە هەر شەڕێك پێكەوەبن  سەركەوتن خێرا دەبێت، ئەوە خوێنی عێراقییە،  خوێنی عێراقیەکانمان بەلاوە گرنگە.   لەبەر ئەوە دەمانەوێ‌ حەشد بەشداربێت بەڵام نەك بەشداریەكی سادە بەڵكو  سووربوونمان لەسەر پاراستنی گیانی عێراقیەکان. رێزمان لە هەڵوێَستی سەرۆكوەزیران گرت  لەشەڕی موسڵ شەڕی موسڵیش درێژەی كێشاو زیانێكی زۆر یشی لێكەوتەوە  وێرانكاریش كەم نییە، لەبەر ئەوە ئەوەبوو قسەمان لەبارەیەوە دەكرد، دەشڵێم  ئەو رەخنەیەش لێرەوە ئاراستەی سەرۆكوەزیران دەكەم وەكو برایەك وەكو  جیاوازی لە كاركردن، تێڕوانینی جیاواز لە كاركردن، ئەو سەرۆكوەزیرانەو  لەگەڵیداینەو پشتگیریشی دەكەین تاوەكو ئێستا بە هەموو شێوەیەك پشتگیری  سەرۆكوەزیرانی عێراق دەكەین، رەوشی عێراق داوامان لێدەكات هەمووان  یەكگرتووبین بۆ رزگاركرنی عێراق، بەڵام كاتێك ئەم هەڵوێستە وەردەگرین  مانای ئەوە نییە ئەوە هەڵوێستێكی دوژمنكارانەیە بەرامبەر سەرۆك وەزیران."
رووداو"

"پەیوەندییەكی برایانەیە، وە بەهێزە، ئیمە دوو رۆژ لەمەوبەر  كۆبویوینەتەوە، نەخێر هیچمان لەگەڵ  سەرۆكوەزیران نییە، جەنابی  سەرۆكوەزیران برامانە لەگەڵیداین ئەمڕۆ وڵات پێویستی بەوەیە هەموومان  لەپشتیەوە بین لە پێناو دەركردن و نەهێشتنی شەڕی داعش، جا ئێمە بەو  عەقڵیەیەتە كاردەكەین هەر بەو ئامانجەش كاردەكەین، مەسەلەیەك هەیە دەڵێت  لە كاتی ئاساییدا پرسەكان كێشەیان لەسەر نابێت، لەبەر ئەوە ئەو  مەسەلە  من دەگرێًتەوە، بەپێی خەملاندنی من سەرۆكوەزیرانی عێراق برامانە،  فەرماندەی گشتی هێزە چەكدارەكانە، لەو هەموو ئەو ئۆپەراسیۆنانەی حەشد  بەشداری تێداكردوە هیچ ئۆپەراسیۆنێك بەبێ هەماهەنگی لەگەڵ سەرۆكوەزیران و  فەرماندەی گشتی هێزە چەكدارەكان نەكراوە، ئەوە تەلەعفەر لە مانگی 11ەوە  گەمارۆمانداوە رەئی وابوو گرنگە لەگەڵ سوپاو هێزە ئەمنییەكان بچینە نێو  تەلەعفەر، سوپاو هێزە ئەمنییەكان بەشەڕی موسڵەوە سەرقاڵ بوون ئێمەش  دەستتێوەردانمان نەكرد، لە مانگی 11 ەوە گەمارۆمان داوە من جارێكیان قسەم  لەگەڵ سەرۆكوەزیران كرد گوتم ئەوە ئارامی و بوێریە كەسێك ئامانجەكەی  گەمارۆدابێت و زیاتر ە 8 ـ 9 مانگ چاوەڕێی دەركردنی فەرمان بكات، ئێمەش  ناچاربووین ئەو شەڕە جێبێڵین تاوەكو برایان كۆتایی بە شەری موسڵ دێنن،  بۆیە بەئاراستەی سنوورەكان بەڕێكەویتن و گەییشتینە سنووری نێوان عێراق و  سووریا كە كەمتر لە 200 مەتر لەوێوە دوورە.

"سەبارەت بە ئێمە ئەو پرسانە بەدەست ئێمە نین،ـ ئێستا مەرجەعیەتی ئاینی  هەیە، تێڕوانینی جیاواز هەیە، رێز لە تێڕوانینەكان دەگرین، بەڵام ئەمڕۆ  بڕیار بەدەست خەڵكە گەل مەرجەعیەتی باڵا ، تێڕوانینی هەموو برا  سیاسییەكانمان جەخت لەسەر ئەوە دەكەنەوە كە حەشد وەكو دەزگایەك  بمێنێتەوەو لەژێر فەرمانی فەرماندەی گشتی هێزە چەكدارەكان بێت، هاوەشێوەی  سوپا، پۆلیسی قیدڕاڵی و دژە تیرۆر با حەشدیشمان هەبێت لەگەڵ دامەزراوەی  سەربازی تێكەڵی بكەین نەك هەڵیبوەشێنینەوە، هەڵوەشاندنەوەی كێشەكە چارەسەر  ناكات، مانەوەی وەكو دامەزراوەیەكی سەربەخۆ، بەڵام هەروەها پرسی بوونی  چەك تەنیا بەدەست دەوڵەتەوە زۆر گرنگە. خوازیارم هەموو لایەنەكان جیددی بن لە  پرسی تایبەتكردنی چەك بەدەست دەوڵەتەوە.

" بێگومان، بەرژەوەندی عێراق دەخوازێت حەشد بمێنێ،  لەبەرژەوەندی عێراقدایە حەشد بمێنێ‌، بەرژەوەندی ئاسایشی عێراق. ئەو ناوچەیە  فراوانە زۆر گرینگە دامەزراوەیەكی سەربازی تێدابێت، نەك بڵیین مادام حەشد  هەیە با سوپا هەڵوەشێنینەوە، كەسێك دەڵێت با پۆلیسی فیدڕاڵی  هەڵوەشێنینەوە، یەكێكی دیكە دەڵێت با دەزگای دژە تیرۆر هەڵوەشێنینەوە،  من پێموایە دەزگا ئەمنییەكان دەزگای دژە تیرۆر، سوپا، پۆلیس، حەشد گرنگە  بمێننەوە، پاشان ئێمە تاوانێكمان نەكردوە هەموو جیهان دەیكات، هەموو  رژێمەكان دەیكەن، ئەوە سعودیە سوپای هەیەو پاسەوانی نیشتیمانیشیان هەیە،  نەك تەنیا ئێمە، ئەوە ئەمریكیەكان سوپایان هەیەو پاسەوانی نیشتیمانی و  پۆلیسیان هەیە لەبەر ئەوە ئەو كارە هەر دەمێنێتەوە، ئێستا تۆ  دامەزراوەیەكی ئەمنی لەو بوارەی پێویستیەتی، بوونی حەشدو مانەوەی حەشد  هەرەشەیە بۆ هەرەشەكان، بەڵێ‌ ئێمە جەخت دەكەینەوە كە  دەبێ حەشد لە  چوارچێوەی دامەزراوەی ئەمنی بێت".


"نەخێر سەربەخۆبێ، سەربەخۆبێ و راستەوخۆش پەیوەندی بە فەرماندەی گشتی  هێزە چەكدارەكان بێت، دەستەیەك وەكو دەزگای دژە تیرۆر، ئامادە وەكو  دەزگای دژە تیرۆر، فەرماندەكانیشی پەیوەندیان بە فەرماندەی گشتیەوە دەبێت،  هەروەها پێویستە هەموو كار و كردەوە سەربازییەكان پەیوەندیان بە فەرماندەی  گشتی هێزە چەكدارەكانەوە هەبێت.

"مەرجەعیەتی ئاینی لە نەجەف كە فەتوای دامەزراندنی حەشدی دەركرد، خۆ  لەخۆمانەوە نەهاتوین چەكمان بەشانەوە كردبێ.

بەڕێز سیستانی خودا بیپارێزێ ئەو خاوەن بیرۆكەكەیە ئەو بوو عێراقی  رزگاركرد، راشكاوانە بڵێم لەو كاتەدا، ئێمە بەو شێوەیە نەبووین، لەگەڵ  هەندێك حالەت مامەلەمان كردووە، بەڵام ئەو فتواكەی دەركرد خودا  بیپارێزێ، لە ئەنجامی ئەو فەتوایەشەوە حەشد دامەزراو سەریهەڵداو كاریكردو  ئەمرٍۆش ورەی بۆ هەمووان گەڕاندووەتەوە، بابەتەكە باسی حەشدە، لەبەر ئەوە  مانەوەی، ئەمڕۆ من وەكوشارەزایەكی ئەمنی دەڵێم مانەوەی حەشد گرینگە، وەكو حیزب  نییە، شەڕ كۆتایی بێت من دەگەڕێمەوە هۆڵی پەرلەمان و سەر كاری سیاسی،  ئێستا من وەكو جەنگاوەرێكم لە نێو حەشدی شەعبی من لەبەر ئەوەم نییە چونكە  لە نێو حەشدم پێداگری بكەم لەسەر مانەوەی حەشد، نەخێر نێوان من و خوابێت  وەكو شارەزایەكی ئەمنی پێموایە مانەوەی حەشد پێویستە بۆ  عێراق و خاكی عێراق."

"ئێمە حەقمان بەسەر ئەمریكیەكانەوە نییە. ئەمە بڕیارێكی عێراقییە بۆ خەڵكی بیانی  بێنمە نێو بابەتەكە؟ عێراق نیشتیمانە ئێمە هیچ رۆژێك دەستمان لە بڕیاری  ئەمیركیەکان وەرنەداوە، ئەمریكیەكان  ئاسایشی نیشتمانیان دامەزراند،  ئێمە پێمان نەگوتون ئێوە بۆ  ئاسایشی نیشتیمانیتان دروست كردوە؟  ئەمە بڕیارێكی نێوخۆییە، سعودیەكان گۆڕانكاریان كرد، نەخێر ئێمە دەست  لەبڕیارەكانی ئەوان وەرنادەین، بڕیار عێراقییە من بۆ خەڵكی بێگانە بێنمە  ناوی؟ بڕیارێكی ئەمنییەو تایبەتە بە عێراقییەكان، بۆ بچم بۆچوونی ئەمریكیەكان  وەرگرم، چیمان لەوانداوە بۆ مەگەر ئەوان بۆچوونی ئێمەیان وەرگرتووە؟ ئەگەر ئێستا  بیانەوێ‌ شتێك بكەن دێن دەڵێن عێراق ئێمە ئەو شتە دەكەین، چیمان  لەوانداوە ئێمە كار بۆ بەرژەوەندی وڵات دەكەین گوێ بەو دەوڵەت و بەو  دەوڵەت نادەین، بەرژەوەندی عێراق لە كوێ بێت ئەوە دەکەین، بەرژەوەندی گەلانی عێراقمان بەلاوە گرنگە. لەبەر ئەوە من گوێ بەو پرسانە نادەم تەنانەت ئەگەر هاتیشتن ئایا  رێزی دەگرن

"ئێستا ئێمە هەموو پشتمان حكومەتە، با ئەوان بیدەنە حكومەت ئێمە لە  حكومەت وەردەگرین ئێمە خێر بەخۆڕایی وەرناگرین، من پێموایە دەبێ هەموو  هاوكارییەكان بێنەوە لای حكومەت، هەمووی رادەستی حكومەتی فیدڕاڵی بكرێت،  حكومەتی فیدڕاڵیش دابەشیا بكاتەوە

"هەر هاوكاریەك لە هەر وڵاتێكەوە بۆ حكومەتی فیدڕاڵی دێت، با حكومەتی  فیدڕاڵی دابەشی بكات، بۆ سوپا، پۆلیس، سبەینێ‌ ولاتێك لە وڵاتەكەكان بڵێت  من هێندە ئۆتۆمبێلی جۆری هامرت دەدەمێ‌  یان تانك، دەیداتێ‌ بەڵام پێی  ناڵێت بڕۆ بیدە بە حەشد دەڵێت بیدە بە حكومەتی فیدڕاڵی، حكومەتی   فیدڕاڵیش بەسەر سوپاو پۆلیس و حەشدو دژە تیرۆردا دابەشیان دەكات ، ئەوە بڕیاری  حكومەتە.

" هەرگیزا و هەرگیز، تەنانەت ئێراییەكانیش لەسەرەتای جەنگ لەگەڵ داعش، هەموو  ئەو توانا سەربازییەی لە ئێرانەوە دەهات لە رێگەی حكومەتەوە وەردەگیراو  هەر لە رێگەی حكومەتیشیەوە دابەش دەكرا بەهیچ شێوەیەك راستەخۆ نەبووە،  هەرگیز."

"ئێمە لە زۆربەی شەڕەكاندا داوای پشتگیری ئاسمانیمان لە هاوپەیمانان  نەكردوە، ئێمە یەكێك لە هۆكارەكان بەڕاستی هەڵەی تێدایە، لە زۆر ناوچەش  هەڵە كراوە، ئێمە گوتمان لەگەڵ حەشد بەرپرسیاریتان ناكەین بەوەی بڵَین  ئەوە هەڵەیە، پێتان دەڵێن ئێوە بە ئەنقەست كردوتانە، لەبەر ئەوە لە هەموو  ئەو ئۆپەراسیۆنانەی حەشد ئەنجامیداون لە 9/6/2014 تاوەكو ئەمڕۆ داوای پاڵپشتی  ئاسمانی هاوپەیمانی نێودەوڵەتیمان نەكردووە، هەموو شەڕەكانیشمان بەبێ  هاوپەیمانی نێودەوڵەتی جێبەجێكردوە، بەڵێ‌ بە پاڵپشتی فرۆكەجەنگییەكانی  عێراق بووە ، ئەو پاڵەوانانەی لە هەموو شەڕەكان هاوكاری باشیان كردوین ،  پێویستمانە تاوەكو ئەمڕۆش پێویستمانە

" لەدەیان كەس تێپەڕناكات هەندێك جار ژمارەیان دەگاتە نێوان 50  ـ 100  راوێژكار، بەڵام هەندێك جار تەنانەت 10 نەفەریشیان لێرەنین، بزانە من چی  دەڵێم ئەو كێشانە پەیوەندییان بە منەوە نییە، سەرەتا من قسە ناكەم سەرۆكوەزیران قسە  دەكات، ئەوانە هاتن، پسپۆڕانی ئێرانی بە رەزامەندی حكومەت و بە رەزامەندی  سەرۆكوەزیران ، سەرۆكوەزیرانیش ئەو پرسەی لە میونیخ لە ئەڵمانیا  روونكردەوە كاتێك لێیانپرسی پسپۆڕانی ئێرانی تەنانەت قاسم سولەیمانی لە  نێو خاكی عێراقە بەسازان لەگەڵ حكومەتی ئێرانی ، لە نێوان ئێمەیە وەكو  حكومەتی عێراق و حكومەتی ئێران، ، ئیستا چەند ئەمریكی لە عێراق هەنە چەند پسپۆری ئەمریكی ؟ ، بەهەزاران

"بەڵێ‌ بە هەماهەنگی، بۆ دونیامان لێ قاو دەدەن، جۆرەها پسپۆڕ لێرە هەن،  فەرەنسی، ئەڵمانی، ئوستوڕاڵی، پسپۆڕانیان لێرەن بۆ كەس باسیان ناكات،  باسی كەمیینەیەك دەكات، دەڵێم یان باسی تۆ دەكەم، یان دەڵێن پسپۆڕانی  ئەمریكی بە هەزارانن، بەشێكیان دەڵێن ژمارەیان لەنێوان 5 ـ 7 هەزاردایە،  بەشێكیشیان پێیانوایە لەوە زیاترن، بۆ ئەگەر ژمارەی ئێرانییەكان گەییشتە 50  ـ 100 دونیا هەڵدەستێنن و دەڵێت ئاها هاتوون، ئاساییە مادام لەگەڵ  حكومەتی فیدڕاڵ سازان هەیە.

"هەڵبەتە ئێمە رەخنەمان گرت، بەڵام ئەم پرسە پەیوەندی بە سووریاوە هەیە،  ئێمە دەستوەردان ناكەین، ئێمە رەخنمەمان گرت، لە هەواڵەكان دەبیسین كە  گواستراونەتەوە ناوچە ئەلبوكەمال راشكاوانە رەخنەمان گرت و ئەوە قبول  ناكەین، بەڵام پرسێكی ناوخۆییەو دەتوانن بۆ هەر شوێنێك بیانگوازنەوە،     كاتێك ئێَمە رەخنەمان پێشكەشكردو گوتمان رەخنەمان لەو هەڵس وكەوتە هەیە ئەوان گوتیان ئێمە، نازانم براونەتە ئەلبۆكەمال پڕۆسەكە لە  تەڕتەڕ دەستپێدەكات تاوەكو دەگاتە  ناوچەی حمێمێ‌ كە 200 كیلۆمەتر لە  سنووری عێراقەوە دوورە، باشە بۆ لە ئەلبۆكەمال جێگیریان دەكەن، بەڵێ‌  ئەگەر ئێوە بڵێن ئەلبۆكەمال واتا ئەو پرسە دژی ئێمەیە، ئەوانیان هێناوەتە  سەر سنووری نێوانمان، ئەوان دەڵێن پرسەكە گەڵاڵەكراوە پرسیارو رەخنەی  ئێمەش هەرماوەو ئێستاش رەخنەمان هەیە لە پڕۆسەی گواستنەوەی ئەوانە بۆ  ناوچەی ئەلبۆكەمال، پرسێكی ناوخۆیی سووریەو پەیوەندی بە ئێمە نییە،

"پرسێكی ناوخۆی سووریەو پەیوەندی بەئێمە نییە لەبەر ئەوەی پێمانگوتن  دەیان ریككەوتن كراوە، هی حەلەب 10 هەزار لە دەوروبەری دیمەشق گوازرانەوە  قەت رەخنەمان نەگرتوە ، بەڵام كە دەڵێن بۆ ئەلبۆكەمال، بۆیە ناوەرۆكی  رێككەوتنەكەیەو ئەگەر هێنایانن بۆ ئەلبۆكەمال ئێمەش رەخنە تۆماردەكەین و  قبولیشی ناكەین و بە هەنگاوێكی نەرێنیە لەبەرامبەر عێراق."

"نازانین پێشمانگوتن وەرن كۆپیەكەمان بدەنێ‌، ئەوان دەڵێن داعش لە هیچ  شوێنێك نەماوە لە سووریال جگە لە ناوچەیەكی گەمارۆدراو لە نێَوان  دیرەزورو سنووری عێراقی، ئەو ناوچەیە، ئەو ناوچەیە، رقە گەمارۆدراوە  لەلایەن هێزەكانی  سووریای دیموكرات و هاوپەیمانی نێودەوڵەتی، تاقە ناوچە  كە بواری تێدایە بیانگوازنەوەو هێزی دیكەی تێدا نەبێت، ئێستا بەرەی نوسرە  لەئەدلیبە، هەموو ئەو سازانانەی لەگەڵ نوسرە روودەدەن دەگوازرێنەوە  ئەدلیب، هەروەها هەموو ئەو سازانانەی دەكرێن، ئەوە یەكەمجارە رێككەوتن  لەگەڵ داعش دەكرێت یەكەمجارە، بەڵام لەگەڵ نوسرەو ئەحڕاڕ شام لەگەڵ  زۆربەی گرووپە چەكدارەكان سازان نەبووە دەڵێن ئەوە پرسێكی سووریایە كەس  بۆی نییە دەستتێوەردان بكات، ئێمە بەتوندی رەخنەمان لەو هەڵس و كەوتە گرت  كە لەسەر ئەوە رێكبكەون بیانگوازنەوە ئەلبۆكەمال،  ئێستاش راست دەرچوو  گواستویانەتەوە بۆ ئەلبۆكەمال، ئەگەر وەكو دەڵێن بۆ حمێمە نەبێت كە  بنكەیەكە دەكەوێتە باشووری رۆژئاوای مەیادین كە نزیكەی 150 ـ 200  كیلمۆمەتر لە سنووری عێراق ـ سووریاوە دوورە، بەڵام ئەگەر رێككەوتنەكە  لەسەر ئەلبۆكەمال كرابێت، رەخنەمان دەبێت جێگای رەخنەو قبولكردن نییە

"گوێبگرە، دەیان رێككەوتن لەو رێككەوتنامانەی كراون لەگەڵ بەرەی نوسرە،  بەرەی نوسرە بەپێی پۆلێنكردنی ئەمریكی تیرۆریست نییە؟ نوسرە تیرۆریست  نییە؟ بە پۆلینی رووسی تیرۆریستە بەپیێ‌ پۆلێنی ئەمریكی تیرۆریستە،  بەپۆلینی یەكێتی ئەوروپا تیرۆریستە، هەندێك گرووپی چەكدار هەیە پێیان  دەڵێن ئەحڕاڕ شام و ئەوانەی دەڵێن ئێمە تیرۆریست نین، بەڵام ئەو نوسرانە   دەیان رێككەوتنی پێشوو لە نێوا حكومەتی سووری و دەستپێشخەری نێودەوڵەتی  رویانداوەو بە دەستكەوتیان زانیوەو نزیكەی 10 هەزار كەسیان گواستەوە نەك  یەك یەك، خێزانەكان لەگەڵ جەنگاوەرەكانیان لە حەلەبە، بەڵام ئەو كات  گواستنەوەی چەكداران و خانەوادەكانیان بە سەركەوتنێكی دیپۆلۆماتی  لێكدایەوە، ئێستا پێش كەمتر لە 10 رۆژ گرووپی نوسرە لە عرسال گوازراونەوە  بۆ ئەدلیب كەسیش باسی نەكرد، ئەو ناوچەیە خێزان و منداڵی تێدایە چیان  لێبكەن، ئەگەر حیزبولڵا سوورە لەسەر كوشتنیان خۆیان و منداڵەكانیان،  ئێستا سەبارەت بە ئێمە من پێموایە،  پێموایە ئەو سازانە خێزانی تێدایە  منداڵی تێدایە ئێستا ئێمە ژن و منداڵا لە ناوچەیەك بن چیان لیبكەین،  بیانكوژین،

ئەگەر داعشیش بن چیان لێبكەین ئەگەر ئەوانە خێزانەكانیان گەمارۆدان چی  دەڵێن وەرن ئێمەو خێزانەكانمان بكوژن، ئەوان و خێزانەكانیشیان بكوژین  ئەگەر پێداگریان كرد ئەی لایەنی مرۆڤایەتی لە كوێیە، راستە دوژمنن بەڵام  لەرووی شارستانیەوە ژن و منداڵ چی؟، لە هەندێك شەڕ خانەوادەی داعشەكان  رۆییشتون نەمانزانیوە ، پاشەكشەیان كرد دەمانتوانی لێیشیان بدەین بەڵام  نابێ خێزانن مەدەنین، ئەو تاوانبارە، خێزانەكەی چیبكات.

"ئەوە هۆكارەكە نییە من پێموایە یەكێك لە هۆكارەكان، من دڵنیام، من لە  جەزیرەی خالیدیە بووم ساڵی رابردوو، گەمارۆماندان گوتمان خێزان و  منداڵیان لەگەڵ نییە پێداگریمان كرد، گوتیان گفتوگۆبكەین دانوستان بكەن،  قبول نەكرا تاوەكو كۆنتڕۆڵمان كردەوە بە تەواوی گەمارۆماندان و بەتەواوی  لەناومانبردن، بەڵام ئەگەر مەدەنیان لەگەڵا بونایە بەراستی جیاواز دەبوو،  من لە پرسی  پێمگووتی وەستانێك هەیە لە بابەتی فەللـوجە من پێداگریم كرد  ئەگەر خەڵكی مەدەنی دەرنەچێت ئێمە ناچینە نێویەوە، لەبەر ئەوە لە هەموو  شەڕەكان لێدوانەكانی منتان بیستوون، پێش شەڕ داوا لە مەدەنییەكان دەكەم  ناوچەكە جێبێڵن ئامۆژگاریان دەكەم بە گرنگی رۆیشتنیان چونكە كە موشەك و  گووللـە دەتەقێنیت دۆست و دوژمن لەیەكدی جیاناكاتەوە، كەسی مەدەنی و  چەكدار لەیەكدی جیا ناكاتەوە، بێنە بەرچاوت ئەو هەڵوێستەت كەوتە پێش چی  دەكەی، چی لە خەڵكی سڤیل دەكەی، وەكو پێت دەڵێم ئێمە لە عێراق ئەگەر  پرسەكە بووە مەدەنی یەكسەر دەبڕێتەوەـ خەڵكی مەدەنی رووبەرووی مەترسی  ناكەینەوە، تەنانەت خێزانەكانی داعشەكانیش، پرسێكی مرۆییە، هیچ كەسێك  وەكو من شەڕی داعشی نەكردوە، كەس وەكو من نازانێت مەترسی داعش چەندە،  بەڵام بەخوا لەبەرامبەر خەڵكی سڤیل جیاوازە، دووبارە دیڵێمەوە سازان و  رێككەوتن لە سووریا پرسێكی سووریە، رێككەوتنی نێوان حیزبولڵا و رژێمی  سووریاو داعش و بەرەی نوسرە ئەوە پرسێكی سووریە، رەخنەی توندی ئێمە وەكو  عێراقی گواستنەوەیانە بۆ سنووری عێراق

"سەرەتا هەرێم، حكومەتی برایانی كورد ، ئەوان بەشداربوون لەوەی كە مالیكی  ویلایەتی دووەمیش پۆستی سەرۆكوەزیران وەربگرێتەوە، ئەو كات ئێمە  لەپەرلەمان بووین و هەڵوێستمان روون بوو تاوەكو دوواتر ناچار بووین و  سەیری سازانی ئەوانی دیكەمان كردو بەو ئاراستە رۆییشتین كە گرتمانەبەر،  دووەم لەو خولەی مالیكی ویستی ویلایەتی سێیەم وەرگرێتەوە لە  هەڵبژاردنەكانی 2014 من لەگەڵ دەوڵەتی یاسا دابەزین، من كە لەگەڵا  ئیئتیلافێك دادەبەزم رێز لەو ئیئتیلافە دەگرم، ئێمە لەگەڵ دەوڵەتی یاسا  بەشداری هەڵبژاردنمان كرد، ئێستاش هەر لەگەڵ دەوڵەتی یاسام تاوەكو كۆتایی  ئەم خولە، من شتی ناشیرین ناكەم، لەگەڵ كەسێك رێكبكەوم و دواتر لە نیوەی  رێگە جێیبیڵم ئەوە ناكەم، لەكاری سیاسی رەوشتم هەیە، خەڵك مالیكیان قبولە  مالیكیان قبول نییە من لەگەڵ دەوڵەتی یاسا رێككەوتوو لەگەڵ مالیكی ئێمە  لەگەڵ دەوڵەتی یاساین نەك لەگەڵ مالیكی، راستە مالیكی سەرۆكی ئیئتیلافە  شانازی بە مالیكی برامان دەكەم، لەبەر ئەوەی ئێستا كۆمەڵێك پێمدەڵێن  تاكەی لەگەڵ دەوڵەتی یاسا دەمێنیتەوە پێیان دەڵێم تاوەكو كۆتایی ئەم خولە  لەگەڵ دەوڵەتی یاسا دەمێنمەوە، خولەكە چوار ساڵەو لە پەرلەمان تاوەكو  كۆتایی ئەم خولە لەگەڵ دەوڵەتی یاساداین، لەگەڵ دەوڵەتی یاسا هاوپەیمانی  دەكەین ئەوە جێگای توێژینەوەیە ئێستا ئەگەر هەیە هاوپەیمانی بكەین ئەگەر  هەیە نەیكەین

" بودجەی نەبریوە مالیكی، مالیكی تاوەكو دوایین حكومەتی عێراق 17%ی  دەدایە هەرێم، ئەوە چەواشەكارییە، چەواشەكردنی گەلی كوردە، مالیكی بودجەی  نەبڕیوە، تاوەكو دوایین حكومەت من لە نێو حكومەت بووم، دكتۆر رۆژ لە نێو  حكومەت بوو، هەموومان لە نێو حكومەت بووین، تاوەكو دوایین كات حكومەتی   عێراقی تاوەكو سەرەتای ساڵی 2014ش بودجەی رەوانەدەكرد، كێشەكە دواتر  روویدا، دوای هەڵبژاردنەكان لەسەر پرسی نەوت، یان دەبێ ئەو نەوتەی  هەناردە دەكرێنت بێن لەسەری رێككەوین، یان بڵێن بڕی ئەوەندە بۆ  ئێوە  هێندەش بۆ ئێمە، من هاتم من خستمەڕوو، پێمگوتن وەرن یان دەبێ هەموو  نەوتەكە كۆبكرێتەوە یان هەر كەسەو بۆخۆی هەناردە بكات، هەرێم بر ِی 17%ی  بۆ خۆی هەناردە دەكات، ئەگەر نا هەموو ئەو نەوتەی هەناردەی دەكەی لەگەڵا  ئەوەی حكومەتی ناوەندی هەناردەی دەكات لە سندوقێك كۆبكرێتەوە لە وەزارەتی  دارایی عێراقی ئەوەندەمان هەیە بڕی 17%م دەوێت فەرمو 17%ێ‌ خۆت بەرە،  لەبەر ئەوە تاوەكو كۆتاییهاتنی حكومەتی مالیكی بودجەی لەسەر هەرێم نەبڕی،  ئێوە دژی مالیكی كاردەكەن بڕی بڕی بڕی ،  مالیكی نەیبریوە، تاوەكو كۆتایی  ساڵی 2013 بەردەوام بوو، چوار مانگی یەكەمی 2014 هیچ كێشەیەك نەبوو،  پاشان كە داش هات لە 6/9 دەرچووم ئیتر ئاگام لە بڕیارەكانی ئەنجوومەنی  وەزیران نەما، بەڵام تاوەكو 9/6/ كێشە هەبوو بەڵام هەر باسی یەكخستنی  پرسی نەوت بوو".

بەرنامەیەکی گفتوگۆیی گشتی کراوەیە و هەر جارەی لەگەڵ کەسایەتییەکی ناسراوی سیاسی و فیکری و خاوەن ئەزمون لە بوارە جیاجیاکان سازدەکرێت ، بەرنامەکە تۆمارییە و هەفتانە لە ماوەی 24 خولەک پێشکەش دەکرێت هەر جارەی لە لایەن یەکێک لە پێشکەشکارانی رووداو پێشکەش دەکرێت 

کۆمێنتەکان

 
کۆمێنتێکی نوێ دابنێ
وەکو میوان کۆمێنت دادەنێی یان بە چوونە ژوورەوە؟
1

ئەم بەرنامەیە بەش بکە

سەبارەت بە بەرنامە
0.234 seconds