Operasyona Trump petrol erzan kir

Hewlêr (Rûdaw) - Hêza Deryayî ya Amerîkayê bi armanca vekirina Tengava Hurmizê ya ji bo keştiyan dest bi operasyoneke nû kir û vê yekê jî petrol erzan kir.

Doh bihayê petrolê bi rêjeya ji sedî 6an zêde bûbû.

Lê belê îro piştî vekirina bazarên Asyayê, bihayê petrolê zêdetirî ji sedî 1ê daket.

Hêzên Deryayî yên Amerîkayê diyar kir Îranê heta bi astekê kontrola Tengava Hurmizê ji dest daye.

Ev yek jî dikare ji bo veguhastina petrola Rojhilata Navîn rê veke.

Bihayê petrola brent 1,22 dolaran an jî bi rêjeya ji sedî 1,1ê daket û bermîla wê bi 113,22 dolaran tê kirîn û firotin.

Bihayê petrola brent piştî roja duşemê bi rêjeya ji sedî 5,8an zêde bûbû.

Petrola Teksasê ya Amerîkayê 2,02 dolaran an jî bi rêjeya ji sedî 1,9an daket û bermîla wê bû 104,40 dolar.

Ev jî piştî wê yekê tê ku roja borî bi rêjeya ji sedî 4,4an zêde bûbû.

Operasyona Amerîkayê metirsî kêm kirin

Hêza Deryayî ya Amerîkayê roja duşemê bi armanca vekirina Tengava Hurmizê ya ji bo keştiyan dest bi operasyoneke nû kir.

Şirketa Maerskê ragihand ku keştiya bi navê “Alliance Fairfax”ê ya ku taybet e bi veguhastina otomobîlan û alaya Amerîkayê hildigire, bi hevkariya artêşa Amerîkayê di Tengava Hurmizê re derbas bûye.

Vê yekê jî metirsiyên qutbûna peydakirina petrolê heta radeyekê ji holê rakir.

Tengav bi temamî nehatiye vekirin

Şirovekarê Bazarên Darayî yê Şirketa Şêwirmendiyê KCM Tradeyê Tim Waterer li ser vê mijarê got:

Derketina serkeftî ya wê keştiya ku Maersk xwediyê wê ye, bûye alîkar ku hinek metirsiyên qutbûna dabînkirinê ji holê rabin.

Ev yek nîşan dide ku di rewşa niha de derbasbûna bi silamet a keştiyan bi awayekî sînordar dikare çêbibe û ev jî dê bibe alîkar ku hinek metirsî kêm bibin.

Lê belê hîn jî ev kêm e û tengav bi yekcarî nehatiye vekirin.”

Hinek şîrovekaran daketina kêm a îro ya bihayê petrolê bi pêvajoya komkirina karê ve girê daye.