Aloziya li Îranê û bêhnvedana li Amerîkayê petrol biha kir

Hewlêr (Rûdaw) - Bihayê petrolê doh ber bi bilindbûnê ve çû û bihayê bermîleke petrola brent a Deryaya Bakur 37 sentan zêde bû û derket 64 dolar û 13 sentan.

Bihayê petrola sivik a Teksasa Amerîkayê (WTI) jî 25 sentan zêde bû û gihişt 59 dolar û 44 sentan.

Ji ber bêhnvedana 3 rojan a li Amerîkayê, daxwaza kirîna petrolê ya ji aliyê şirket û rafîneriyan ve zêde bû.

Tevî kêmkirina aloziyên li Rojhilata Navîn, şirket hîn jî ji rewşa Îranê û îhtimala êrişa Amerîkayê ya li ser wî welatî bi fikar in.

Damezrênerê Şirketa Şêwirmendiyê ya Again Capitalê John Kilduff li ser mijarê got:

"Bilindbûna bihayê petrolê ya roja Înê, wekî gavekê ye ji bo dagirtina depoyan beriya destpêkirina rojên bêhnvedanê yên li Amerîkayê."

Li aliyê din, keştiya balafirhilgir a Abraham Lincoln ji Deryaya Çînê ber bi Kendavê ve tê û tê çaverêkirin ku vê hefteyê bigihe Kendavê.