Hewlêr (Rûdaw) - Li parêzgeha Wanê ya Bakurê Kurdistanê li Komeleya Perwerde û Çandê ya Sîpanê, bi beşdariya dengbêj, nivîskar û melayan dîwana dengbêjan hat lidarxistin.
Dengbêjê navdar Kazo bi kilamên xwe civat şên kir.
Li Komeleya Perwerde û Çandê ya Sîpanê ya li Wanê dengbêj û hezkiriyên çanda Kurdî civiyan.
Dengbêj Kazo di dîwanê de bi mêvanan re serpêhatiyên xwe jî parve kirin û wî bi kilamên xwe yên klasîk mêvan birin serdemên berê.
"Hevalê min Îsmaîl dengbêjekî delal e"
Dengbêj Kazo spasiya Komeleya Sîpanê kir û li ser dengbêjên ciwan jî axivî û got:
“Em îro li Wanê li Komeleya Sîpanê ne. Endamên wê mela û hunermend in û ya me hemûyan e.
Hevalê min Îsmaîl Seylan bi rastî dengbêjekî gelekî delal e. Bi qaîde û meqam dibêje.”
"Min bandên Kazo guhdarî dikir"
Di civatê de dengbêjên ciwan jî amade bûn û wan jî kilam gotin.
Yek ji wan dengbêjan Îsmaîl Seylan bû ku behsa bandora Kazo ya li ser xwe kir û got:
“Ez 12-13 salî bûm, min banda mamoste Kazo xist teyîbê û deriyê odeyê girt.
Min ew band sê caran ji serî heta dawiyê zivirand û guhê xwe da kilamên wî. Min gelekî ji deng û şêwaza wî hez dikir.”
"Em bûrsê didin xwendekarên beşa Kurdî"
Yek ji armancên sereke yên Komeleya Sîpanê parastin û pêşxistina zimanê Kurdî ye.
Komele ji bo zarok û mezinan kursên zimanê Kurdî li dar dixe û piştgiriyê dide xwendekarên beşa zimanê Kurdî.
Serokê Komeleya Perwerde û Çandê ya Sîpanê Omer Şaybak li ser xebatên xwe got:
“Niyeta me ew e ku em îsal bûrsê bidin 10 xwendekarên beşa Kurdî yên zanîngehan.
Me par jî da û bi îzna Xwedê em dê îsal jî bidin. Her wiha kesên ku dixwazin fêrî zimanê xwe bibin tên ba me û em li vir dersên Kurdî didin wan.”
Komeleya Perwerde û Çandê ya Sîpanê sala 2024an hatiye avakirin û ji bilî xebatên çand û ziman, xebatên ekolojiyê jî dike.
Komele ji aliyê rewşenbîr, nivîskar û welatiyan ve timî tê ziyaretkirin.
