Hewlêr (Rûdaw) - Koça kargehên tekstîl û konfeksiyonan a ji Tirkiyê a ber bi welatên din ve dest pê kir.
Serokê Giştî yê Sendîkaya Oz Îplîk-Îşê Rafî Ay, eşkere kir ku ji ber krîza aborî markeyên navdar kargehên xwe vediguhêzin derve û got, “Eger heye krîzeke nû ya bêkariyê derkeve.”
Rafî Ay da zanîn ku ew jî wekî kedkaran naxwazin bibin mexdûrê vê yekê û got: “Eger ev sektor neyê rizgarkirin, em dê 20 milyar dolar hinarde û 1,5 milyon karkeran ji dest bidin.”
Li gor medyaya Tirkiyeyê, krîza aborî wek hemû sektoran bandor li sektorên tekstîl û konfeksiyonê jî kiriye.
“Markeyên navdar kargehên xwe dibin derveyî Tirkiyeyê”
Rafî Ay diyar ku krîza aborî pişt li sektor û karkerên wan şikandiye û got: “Markeyên navdar kargehên xwe dibin derveyî welat.”
Li gorî Ay, di vê sala dawiyê de hejmareke zêde ya markeyên di sektorên tekstîl û konfeksiyonê de kargehên xwe birine welatên Misir, Cezayîr, Tunis û Bangladeşê û 604 kargehên biçûk hatine girtin û 134 hezar karkeran jî karên xwe ji dest dane.
“20 milyar dolar ji dest didin”
Ay bang li aliyên peywendîdar kir ku çareseriyekê ji vê yekê re bibînin û got: “Eger na em dê 20 milyar dolar hinarde û 1,5 milyon karkeran ji dest bidin. Herwiha dê sektor serûbinî hev bibe.”
Serokê Giştî yê Sendîkaya Oz Îplîk-Îşê Rafî Ay da zanîn ku dema ew marke biçin vegera wan zehmet e û got:
“Di demekê de ku damezrandin kêm dibe, bazara navxwe teng dibe, marke ji Tirkiyeyê derdikevin û hinarde kêm dibe lê kesek jî xwe nalivîne.”
