Hewlêr (Rûdaw) - Li gorî amarên Navenda Rîskê ya Yekitiya Bankayên Tirkiyeyê, li Tirkiye û Bakurê Kurdistanê 3 milyon û 998 hezar û 602 kes nikarin deynê xwe yên krediyên kesayetî û kartên krediyan bidin.
Aborînas Prof. Dr. Şenol Babuşcu amarên deynên welatiyan ên krediyên bankayan û kartên krediyê yên li gor Navenda Rîskê ya Yekitiya Bankayên Tirkiyeyê eşkere kir.
Li gorî amaran di 2 mehên destpêkê yên sala 2025an de hejmara welatiyên ku ji ber deynê krediyên kesayetî û kartên krediyê şopandina yasayî hat destpêkirin li gorî heman mehên sala borî ji sedî 44 zêde bû û derbarê 259 hezar kesan şopandina yasayî hat destpêkirin.
Hejmara welatiyên ji ber deynê kartên krediyê di bin şopandina yasayî de ne di du mehan de 167 hezar kes zêde bû û gihişte 345 hezar kesan.
Meha Sibatê ya 2025an deynê krediyên kesayetî gihişte 4 trilyon û 281 milyar lîre ku dike nêzîkî 113 milyar dolar.
