Hewlêr (Rûdaw) - Encumena Dadweriya Bilind a Îraqê li ser lêpirsîna Elî Mearic Suweyc Behadlî hûrgiliyên balkêş bi raya giştî re parve kirin.
Alîkarê Wezîrê Petrolê yê Karûbarên Dabeşkirinê Elî Mearic Suweyc Behadlî doh di operasyoneke mezin a gendeliyê de hatibû desteserkirin.
Li gorî daxuyaniya ku xwe dispêre dadwerê lêpirsînê yê Dadgeha Cezayê ya Têkoşîna li Dijî Gendeliyê ya Navendî, piştî lêpirsînên destpêkê dest danîne ser hinek pereyên neqd û milkên Behadlî.
Bi milyonan dolar di dîwêr de veşartibûn
Di daxuyaniyê de hat diyarkirin ku miqdarê wan pereyan 11 milyon dolar û 4 milyar dînar e.
Encumena Dadweriyê wêneyên operasyonê belav kirin.
Di wêneyan de tê dîtin ku bi milyonan dolar xistine 4 çenteyên cuda.
Ew çente di dîwêrekî de hatibûn veşartin ku cihekî taybet ji bo veşartinê lê hatibû çêkirin.
Di dîmenan de her wiha çenteyekî din ê tijî qutiyên kartonî û saeteke destan a luks jî xuya dikin.
Dadgehê da zanîn ku ji bilî pereyên neqd, dest danîne ser gelek xanî û milkên wî gumanbarî jî.
Doh li Bexda û çend parêzgehên din operasyonek hat destpêkirin.
Operasyon bi piştgiriya Hêzên Asmanî yên Îraqê pêk hat.
Di operasyonê de gelek navên di asta bilind de hatin desteserkirin.
Serokê Hevpeymaniya Ezmê Musenna Samerayî û Bahadli jî di nav wan kesan de bûn.
Amerîkayê ceza dabû wî
Elî Mearic Suweyc Behadliyê ku yek ji navên sereke yê operasyona gendeliyê ye, di heman demê de yekem berpirsê Wezareta Petrolê ya Îraqê ye ku ji sala 2003yan ve Amerîkayê ceza lê biriye.
Wezareta Xezîneyê ya Amerîkayê 7ê Gulana 2026an daxuyaniyek dabû.
Wezaretê dabû zanîn ku wan di çarçoveya pêngava "Xezeba Aborî" de Behadliyê xistiye lîsteya cezayan.
Rayedarên Amerîkayî Behadliyê bi bikaranîna xirab a posta wî tohmetbar dikin.
Ew dibêjin ku wî ji bo berjewendiya Îranê û komên çekdar qaçaxçitiya petrolê hêsan kiriye.
Tohmeta qaçaxçitiya petrolê ya ji bo Îranê
Li gorî îdiayan, Behadliyê çavê xwe li veguhestina petrolê girtiye.
Her roj bi milyonan dolaran petrol ji qada Geyareyê ya Mûsilê bi tankeran dihat veguhestin.
Petrol dibirin şirketa bi navê "VS OIL"ê ya li herêma Xor Zubeyrê ya Besrayê.
Li wir petrola Îranê û petrola Îraqê tevlihev dikirin.
Paşê ew petrol bi belgeyên sexte yên di bin navê "petrola Îraqê" de li bazarên cîhanê dihat firotin.
Kariyera wî ya siyasî û bilindbûna wî
Siyasetmedarê Şîe yê 60 salî Behadlî li Mîsanê ji dayîk bûye.
Ew endezyarekî petrolê ye û ji Zanîngeha Bexdayê derçûye.
Kariyera wî rastî bilindbûneke balkêş hatiye.
Wî li Mîsanê wekî endezyar dest bi karê xwe kiriye.
Sala 2014an ji Hevpeymaniya Dewleta Qanûnê ya bi serokatiya Nûrî Malikî wekî parlamenterê Mîsanê hat hilbijartin.
Wî li parlamentoyê wekî Alîkarê Serokê Komîteya Petrol û Gazê kar kir.
Di hilbijartinên 2018an de ji Hevpeymaniya Nesrê ya bi serokatiya Heyder Ebadî bû namzed lê nehat hilbijartin.
Piştî sala 2019an di nav Wezareta Petrolê de bi lez bilind bû.
Herî dawî di hikûmeta Mihemed Şiya Sûdanî de wekî Alîkarê Wezîr hat destnîşankirin.
Berdevkê Hevpeymaniya Nesrê Eqîl Rudeyni li ser Behadliyê ji Rûdawê re axivî û got:
“Piştî ku wî karê xwe yê li Wezareta Petrolê wergirt, ti pêwendiyên wî bi hevpeymaniya me re nemabûn."
.jpg&w=3840&q=75)