Hewlêr (Rûdaw) - Tora Medyayî ya Rûdawê ji çend çavkaniyên agahdar naveroka civînên li Şamê bi dest xist.
Li gorî agahiyên Rûdawê, plansaziya tevlîkirina şervanên Hêzên Sûriyeya Demokratîk (HSD) ya di nava lîwayên leşkerî de diyar bûye.
Berê li ser avakirina sê lîwayên leşkerî li parêzgeha Hisîçayê (Hesekê) peymanek hatibû kirin.
Ev lîwayên leşkerî dê li Hisîça (Hesekê), Qamişlo û Dêrikê bin.
Her wiha lihevkirin li ser avakirina lîwayeke din a li Kobaniyê jî hatiye kirin. Ev lîwaye dê ser bi birêvebiriya hêzên ewlehiya giştî ya li Helebê be.
Lîwayeke taybet ji bo şervanên Efrînê
Fermandarê Giştî yê HSDyê Mezlûm Ebdî daxwaza avakirina lîwayeke taybet ji bo şervanên Kurd ên ji Efrînê kiribû.
Li gorî zanyariyên Rûdawê, Lîwaya Efrînê jî hatiye pêkanîn lê ev lîwaye hîn li herêma Cizîrê ye û derbasî cihê xwe yê li Efrînê nebûye.
YPJ derbasî Wezareta Karên Navxwe ya Sûriyeyê dibe
Li ser çarenivîsa Yekîneyên Parastina Jinan (YPJ) jî, Fermandara Giştî ya YPJyê Newoz Ehmeda ku bi nasnavê "Tolîn" tê naskirin, li gel vê şandeyê li Şamê ye.
Newoz Ehmed li gel Wezîrê Karên Navxwe yê Sûriyeyê civiya.
Çavkaniyan ji Rûdawê re ragihand ku YPJ dê di nava yekîneyên rûbirûbûna terorê yên ser bi Wezareta Karên Navxwe ya Sûriyeyê de cih bigire.
Perwerdeya bi Kurdî
Di civîn û dan û standinan de, li ser mijara perwerdehiya bi zimanê Kurdî jî peymaneke destpêkê hatiye kirin.
Li gorî vê peymanê, waneyên teorîk dê bi zimanê Kurdî werin dayîn û waneyên zanistî jî dê bi zimanê Erebî bin.
Ango dê 4 - 5 wane bi zimanê Kurdî werin dayîn. Di nav van waneyan de cografya, dîrok û zanistên civakî hene.
