Hewlêr (Rûdaw) – Bûyerên xeniqîna di avê de li Bakurê Kurdistanê berdewam in û îro li parêzgeha Wanê 2 kes û li parêzgeha Rihayê jî 2 kes xeniqîn.
Li navçeya Bîracikê ser bi parêzgeha Rihayê ya Bakurê Kurdistanê, îro 30ê Hezîranê 2 welatiyên di Çemê Feratê de avjenî dikirin xeniqîn.
Li gor zanyariyan îro piştî nîvro 30ê Hezîranê di navbera gundê Zerê û Tibilê yên navçeya Bîracikê de 5 kesên ji bo avjeniyê ketin Çemê Feratê, lê avê ew bi xwe re birin.
Li ser agahdarkirinê tîmên tendirustiyê û tîmên rizgarkirinê bo cihê bûyerê hatin şandin.
Di encama xebatan de 3 kes hatin rizgarkirin û 2 kes xeniqîn.
Li gor ajansa fermî ya Tirkiyê, di bûyerê de Baran Yavuz ê 16 salî û Mûslûm Yavuz ê 43 salî xeniqîne.
Li Wanê jî du kes xeniqîn
Li navçeya Tuşbayê ya ser bi parêzgeha Wanê ya Bakurê Kurdistanê ve jî îro 30ê Hezîranê Firat Eker û Mazlum Genez ên 21 salî dema di nav Gola Wanê de avjenî dikirin xeniqîn.
Li gor agahiyan, 7 kes li sînorê navçeya Tuşbayê ketin nav Gola Wanê ji bo ku avjeniyê bikin, lê du kes ji wan binav bûn û piştî demekê nehatin dîtin.
Di encama xebatan de termê her du ciwanan ji golê hatin derxistin û bo nexweşxaneyê hatin veguhestin.
Hatiye zanîn ku 5 kesên din karîne xwe rizgar bikin.
Derbarê bûyerê de lêpirsîn hatiye destpêkirin.
