Hewlêr (Rûdaw) - Li parêzgeha Mereşê, 61 hezar û 721 mexdûrên erdhejê di konteyneran de dijîn.
Li Tirkiye û Bakurê Kurdistanê, tevî ku di ser erdhejên 6ê Sibatê yên Mereşê re zêdetirî 6 mehan derbas bûbin jî heta niha bi dehhezaran kes di kon û konteyneran de dijîn.
Serokatiya Rêveberiya Karesat û Rewşên Bilez a Tirkiyeyê (AFAD), amarên kesên ku li Mereşê di konteyneran de dijîn belav kirin.
Li gorî amaran, piştî erdhejê li Mereşê û navçeyên wê li 51 cihan 23 hezar û 212 konteyner hatine danîn.
61 hezar û 721 mexdûrên erdhejê di wan konteyneran de dijîn.
AFADê herwiha ragihand ku 2 hezar û 500 dikan hatine temamkirin û çêkirina 19 hezar û 418 avahiyan berdewam dike.
Li aliyê din, di amaran de hejmara kesên li konbajaran dijîn nehatiye eşkerekirin.
Di erdhejên 6ê Sibatê de li 11 bajarên Tirkiye û Bakurê Kurdistanê zêdetirî 50 hezar kesî canê xwe ji dest da.
Di wan erdhejan de zerera herî zêde li Mereşê û navçeyên wê bû.
