Hewlêr (Rûdaw) – Serokê Herêma Kurdistanê Nêçîrvan Barzanî, bangî mamosteyan kir ku ji ber derengketina dayîna mûçeyan sektora perwerdeyê nekin qurbaniya rewşê.
Merasîma 14mîn a Derçûna Xwendekarên Zanîngeha Soranê bi rê ve çû.
Serokê Herêma Kurdistanê Nêçîrvan Barzanî jî beşdarî merasîma derçûna xwendekarên Zanîngeha Soranê bû.
Li Zanîngeha Soranê ku nêzîkî 6 hezar xwendekar hene, îsal hezar 366 xwendekar der çûn.
Zanîngeha Soranê ji bo sala xwendinê ya 2023-2024an hezar û 568 xwendekar wergitin.
“Zanist ji bo Kurdistaneke Bihêz”
Merasîma derçûna îsal a Zanîngeha Soranê, bi dirûşmeya “Zanist ji bo Kurdistaneke Bihêz” hat lidarxistin.
Di merasîmê de, Serokê Herêma Kurdistanê Nêçîrvan Barzanî gotarek pêşkeş kir.
Nêçîrvan Barzanî di axaftina xwe ya li vê merasimê de, pîrozbahî li xwendekarên derçûyî yên zanîngehê kir û ji bo hewlên wan destxweşî li mamosteyên zanîngehê jî kir.
“Hikûmet girîngiyê bi navçeya Soranê dide”
Nêçîrvan Barzanî diyar kir ku dema wan sala 2009an Zanîngeha Soranê damezrand, wan hêvî dikir ku bi sedan kur û keç di gelek waran de bibin pispor û wekî îro jiyaneke nû ava bikin û wiha pê de çû:
“Biryara damezrandina Zanîngeha Soranê beşeke ji projeyên Hikûmeta Herêma Kurdistanê bû. Niha jî hikûmetê bi avakirina rêveberiyeke serbixwe ya li Soranê nîşan da ku ew girîngiya bi herêmê dide.
Ez ji bo hewlên dabinkirina elektrîk, av û avadaniyê û ji bo gavên ku di gelek waran de hatine avêtin spasiya rêveberiya Soran dikim. Ez dê her tim ji rêveberiya Soranê re piştevan bim.”
“Zanîngeha Soranê roleke mezin di pêşketina Kurdistanê de lîstiye”
Nêçîrvan Barzanî bal kişand ser wê yekê ku Zanîngeha Soranê di heyama 14 salên xwendina xwe de roleke mezin di pêşketina Herêma Kurdistanê de lîstiye.
Serokê Herêma Kurdistanê da zanîn ku pêşketina li herêmê bi saya berdêlên gelê Soranê û şehîdan bûye û got, “Îro em wan bi rûmet û serbilindiyeke mezin bi bîr tînin.”
“Divê çareserî li ser esasên destûrê be”
Nêçîrvan Barzanî herwiha ragihand ku hikûmeta Herêma Kurdistanê bi hikûmeta Îraqê re di nav danûstandinên cidî de ye û wiha domand:
“Em ji bo helwesta wî ya berpirsyar spasiya hikûmeta Sûdanî (Serokwezîrê Îraqê) dikin. Ji bo çareserkirina pirsgirêkên di navbera Herêma Kurdistanê û hikûmeta Iraqê de me hemû niyeta xwe ya baş nîşan daye.
Em hêvîdar in em bigihin çareseriyekê ku li ser esasê destûrê û di berjewendiyê hemû Îraqê de be.”
“Maf û deskeftî dê bi yekîtiyê bên partastin”
Di heman demê de Nêçîrvan Barzanî bal kişand ser girîngiya yekrêziya navbera aliyên siyasî yên Herêma Kurdistanê û got:
“Ji bo nehiştina nakokiyên siyasî û çareserkirina pirsgirêkan pêwîste hemû aliyên siyasî û pêkhateyên siyasî bi têgihiştineke hevbeş werin cem hev. Maf û destkeftiyên me yên destûrî tenê bi yekîtiyê dê bên parastin.”
Banga ji bo mamosteyan
Derbarê mamostayên ku ji ber mûçeyê wan nayê dayîn û tevlî xwepêşandanan dibin jî Nêçîrvan Barzanî got:
“Em rewşê ji nêz ve dişopînin. Hûn dikarin dilniya bin ku Hikûmeta Herêma Kurdistanê ji bo serastkirina rewşê gelekî dixebite.”
Herî dawî Serokê Herêma Kurdistanê ji mamostayan xwest ku deriyên dibistanan negirin û sektora perwerdeyê nekin qurbaniya rewşê.
