Hewlêr (Rûdaw) - Saziya Keşnasiyê ya Tirkiyeyê ji bo piraniya parêzgehên Bakurê Kurdistanê de hişyariya ba û barana zêde da.
Saziya Keşnasiyê ji welatiyan xwest ku li hemberî bandorên neyînî yên keş û hewayê tedbîrên xwe wergirin.
Li gorî daxuyaniya ku ji aliyê Rêveberiya Giştî ya Saziya Keşnasiyê ya Tirkiyeyê ve hatiye belavkirin dê ji demjimêrên êvara 8ê Kanûna Pêşîn û şûn de li parêzgehên Mereş, Meletî, Semsûr, Xarpet, Dîlok û navçeyên derdora wan baran bibare.
Li gorî heman saziyê tê pêşbînîkirin ji demjimêrên şeva 8ê Kanûna Pêşîn û sibeha 9ê Kanûna Pêşîn û şûn de li parêzgehên Dêrsim, Mûş, Amed, Çewlig, Mêrdîn, Êlih, Bedlîs, Sêrt, Şirnex, Colemêrgê û derdora wê û li bakurê parêzgeha Rihayê jî baraneke gur bibare.
Ji bo navçeyên bilind û çiyayî yên li başûrê parêzgehên Wan, Erzirom, Erzinganê û bakurê Colemêrgê û rojavayê Şirnexê jî hişyariya berfbarîneke zêde hatiye dayîn.
Saziya Keşnasiyê daxwaz ji welatiyan kiriye ku li hemberî bandorên neyînî yên keş û hewayê tedbîrên pêwîst wergirin.
.jpg&w=3840&q=75)
