Hewlêr (Rûdaw) - Şêwrimendê Ewlehiya Neteweyî ya Îraqê Qasim Erecî ji ber wergirtina xelata Webyyê Tora Medyayî ya Rûdawê pîroz kir.
Belgefîlma Rûdawê ya bi navê “Korowai” di nav zêdetirî 13 hezar berheman de Xelata Webbyê wergirt.
Qasim Eracî peyamek ji Rûdawê re şand û di wê peyama xwe de got:
"Ez bi kêfxweşî pîrozbahiyê li Tora Medyayî ya Rûdawê dikim ku yek ji dezgehên ragihandinê yên bi qalîte ye li Îraqê tê hesibandin û xelata Webbyê bi belgefîlma xwe Korowaiyê wergirtiye."
Ev nasandin ji bo me cihê serbilindiyê ye, nemaze dema ku em dibînin ku rêxistinên medyaya navneteweyî yên wekî CNN û Bloombergê bi xurtî pê re hevrikiyê dikin.”
Qasim Erecî amaje bi wê yekê jî kir ku wergirtina xelata Rûdawê, girîngiya wê saziyê di qada medyaya cîhanî de nîşan dide.
“Rûdaw saziyeke cihereng e”
Qasim Erecî herwiha di berdewamiya peyama xwe de got:
“Em vê serketina bi qalîte bilind dinirxînin û em hêvîdar in ku ev saziya hêvîdar û cihêreng û beşdariya xwe ya bi qelîte li Îraqa me ya nû, bi taybetî li Kurdistana Îraqê di xizmetkirina geşepêdana ragihandinê de berdewam bike. ”
Belgefîlma “Korowai”yê ya Rûdawê, ji bo Xelata Webbyê ya 2024an ku bi navê Oscarên Înternetê jî tê naskirin, bi bûbû berbijêr.
Belgefîlma Rûdawê di beşa şêweya Geşt û Jiyanê (Travel and Lifestiyle) de rikeberî bi çend belgefîlmên Amerîkî, Zelandaya Nû û Gurcistanê re dkir.
Dimênên Korowaiyê li nava darsitanên Papuaya Rojava yên li Endonezyayê ji aliyê rojnameger û derhênerê Rûdawê Roj Elî Zale ve hatine girtin û behsa çîroka eşîra bi navê Korowaiyê dike.
Heta sala 1970yî kesî nizanîbû ku ew eşîr heye û endamên eşîrê “Korowai”yan jî nizanîbû ku ji bilî darsitanê jiyaneke din heye.
“Goştê mirovan dixwin”
Eşîra Korowaiyan wekî eşîra herî dawî ye ku goştê mirovan dixwe.
Li gorî baweriya wê eşîrê, hinek caran rihek bedenê mirov kontrol dike ku ew ruh wekî “Xaxwa”yê tê naskirin.
Eger endamên eşîrê ji kesekî bikevin gumanê ku Xaxwayê ew kontrol kiriye, endamên din ên eşîrê Xaxwayê dikujin û goştê wê dixwin û wisa bawer dikin ku Xaxwa ji holê radibe.
Xelata Webbyê sala 1996an hatiye damezirandin û salane ji aliyê Akademiya Navneteweyî ya Huner û Zanistên Digital (IADAS) ve tê pêşkeşkirin.
Xelata Webbyê wekî Oscara Înternetê tê pênaskirin û du pêvajoyên belavkirina xelatê hene.
Di destpêkê de IADAS belgefîlman diyar dike û piştre belgefîlm ji aliyê jûriyên cihanî ve tên diyarkirin.
Herwiha hinek ji belgefîlman jî ji aliyê xelkê ve tên diyarkirin û xelk dengê xwe dide da ku ew fîlm xelatê bistînin.
Îsal bîneran bi rêya dengdanê belgefîlma Korowaiyê hêjayî xelatê dît.
Bidestxistina xelatê jêhatîbûn û pêşkeftina di teknîkên dîjîtal de destnîşan dike.
Di nava biserketiyên salên berê yên xelatê de Google, NASA, New York Times, BBC, Apple, Facebook, Instagram, YouTube, TikTok, Netflix, Snapchat û gelek saziyên din hene.
