Hewlêr (Rûdaw) - Serokê Herêma Kurdistanê Nêçîrvan Barzanî ragihand ku mirina xwendekaran a ji ber qezaya li Germiyanê ew ji dil xembar kiriye.
Li gundê Hesîreyê yê li ser rêya Kelar û Kifriyê minîbûsa xwendekaran qulibî.
4 xwendekaran canê xwe ji dest da û 7 xwendekar jî birîndar bûn.
Serokê Herêma Kurdistanê Nêçîrvan Barzanî derbarê bûyerê peyamek belav kir.
Nêçîrvan Barzanî di peyamê de xemgîniya xwe nîşan da û ji malbat û mirovên qurbaniyan re sersaxî xwest.
Nêçîrvan Barzanî di peyama xwe de wiha got:
“Bûyera diltezîn a îro mirina hinek xwendekarên amadehiyê û birîndarbûna çend kesên din a ji ber qezeya trafîkê ya li ser rêya Kelar û Kifriyê ez ji dil xembar kirim.
Ez sersaxiyê ji malbatên qurbaniyan re dixwazim û di vê xema bi êş de hevsoz û hevxemê wan im.
Ji Xwedayê mezin dixwazim ku rehma xwe li qurbaniyan bike û sebrê bide malbat û mirovên wan.
Herwiha ji birîndaran re jî şîfaya bilez dixwazim.”
