Hewlêr (Rûdaw) - Li nahiyeya Qerehencîrê ya Kerkûkê di şerê navbera çekdarên DAIŞê û hêzên asayîşa Herêma Kurdistanê de DAIŞiyek hat kuştin.
Herwiha endamekî asayîşê di şer de canê xwe ji dest da.
Hat ragihandin ku 2 çekdarên DAIŞê îro sibehê li nahiyeya Qerehencîrê ya Kerkûkê êrişî marketekê kiriye.
Piştî êrişê çekdarên DAIŞê xwe li nav dibistanekê vedişêrin.
Hêzên asayîşa Herêma Kurdistanê çûn cihê bûyerê û di navbera çekdarên DAIŞê û hêzên asayîşê de şer derket.
Birêveberê nahiyeya Qerehencîrê Avêsta Mihemed li ser mijarê ji Rûdawê re axivî û got:
“Îro sibehê saet 07:00an 2 çekdarên DAIŞê êrişî supermarketekê kiriye û piştre xwe li nav dibistanekê vedişêrin.
Piştî ku hêzên asayîşê gihîştin cihê bûyerê, çekdarên DAIŞê bi hêzên asayîşê re pev çûne.
Çekdarek hate kuştin û çekdarê din jî birîndar bû.”
Avêsta Mihemed ragihand “Di pevçûnê de endamekî asayîşê şehîd ketiye û 2 endamên asayîşê jî birîndar bûn.”
