Hewlêr (Rûdaw) – Vegera xelkê ya ji Libnanê ber bi Rojavayê Kurdistanê ve berdewam dike.
Li gorî zanyariyên Maseya Krîzê ya Rêveberiya Xweser heta niha 18 hezar û 875 koçber ji Libnanê vegeriyane Rojavayê Kurdistanê.
Li gorî maseyê hejmara kesên ji Libnanê vegeriyane 6 hezar û 705 mêr, 5 hezar û 935 jin, 6 hezar û 158 zarok, 58 Libnanî û 19 cenaze ne.
Li gorî zanyariyan kesên ji Libnanê vedigerin an di malên xwe de yan jî li gel xizmên xwe bi cih dibin.
Her wiha kesên mal û xizmên wan li herêmê tune bin jî Rêveberiya Xweser ji wan re navendan dabîn dike.
Nûnertiya Rêveberiya Xweser a Libnanê û Komeleya Çanda Civakî ya Newrozê vegera xelkê organîze dikin.
2 hezar û 96 kes ji Libnanê çûne Şêx Meqsûdê
Li aliyê din, heta niha zêdetirî 2 hezar kesî ji ber şerê li Libnanê çûne taxên Eşrefiye û Şêx Meqsûdê yên Helebê.
Maseya Krîzê ya Taxên Eşrefiye û Şêx Meqsûdê jî diyar kir ku 2 hezar û 96 kes ji Libnanê gihîştine her du taxên Kurdan.
Li gorî zanyariyên maseyê piraniya kesên gihîştine welatiyên ji Sûriye û Rojavayê Kurdistanê ne.
Şerê Îsraîl û Hemasê derbasî Libnanê bûye.
Ji 20ê Îlonê ve Îsraîl bi tundî Beyrûta paytexta Libnanê bombebaran dike.
Li gorî zanyariyan heta niha milyonek û 400 hezar Libnanî ji ber êrişên Îsraîlê koçber bûne.
Her wiha bi hezaran Kurdên ji Rojavayê Kurdistanê û xelkê Sûriyeyê jî vegeriyane.
.webp&w=3840&q=75)
