Hewlêr (Rûdaw) - Fermandariya Biryargeha Navenda Parastina Gel (NPG) ragihand, “Çalakiya fedaî ya li hemberî navenda TUSAŞê ya li Enqereyê ji aliyê tîmeke xweser a Tabûra Nemiran ve hate kirin.”
Fermandariya Biryargeha Navenda Parastina Gel (NPG) a ku bi ser HPGyê ve ye (HPG baskê çekdar ê PKKyê ye) li ser êrişa li Enqereyê daxuyanî da.
Li Enqereyê roja çarşemê êrişî Şirketa Hevpar a Pişesaziya Feza û Hewavaniyê ya Tirkan (TUSAŞ) hat kirin.
Li gorî daxuyaniya Wezîrê Karên Navxwe yê Tirkiyeyê Alî Yerlîkaya di êrişê 5 kes hatine kuştin û 22 kes jî birîndar bûne.
Li gorî daxuyaniya Yerlîkaya 2 kesên ku êriş encam daye jî hatine kuştin.
Fermandariya Biryargeha Navenda Parastina Gel (NPG) di daxuyaniya xwe de got:
“Çalakiya fedaî ya ku 23yê Çiriya Pêşînê saet 15:30î li Enqereyê li navenda TUSAŞê hate kirin, ji aliyê tîmeke xweser a Tabûra Nemiran ve hate kirin.
Lehengên vê çalakiya dîrokî jî hevrêyên me Asya Alî (Mîne Sevjîn Alçîçek) û Rojger Hêlîn (Alî Orek) in.
Ev çalakiya ku demeke dirêj beriya niha hatibû plankirin û bi rengekî serkeftî hat bicihanîn, ti eleqeya wê bi rojeva siyasî ya meha dawî re nîne ku li Tirkiyeyê tê nîqaşkirin.
Tabûra Nemiran wekî prensîb tim û tim çalakiyan nake lê belê dem bi dem li hemberî hedefên stratejîk û girîng, dûrî ji rojeva rojane li hemberî kiryarên qirker, komkujî û kiryarên tecrîdê yên dewleta Tirk çalakiyên fedaî yên ji bo hişyarkirinê pêk tîne.
Çalakiya ku hate kirin jî di vê çarçoveyê de li dijî kiryarên li Kurdistanê hate kirin.”
"Hedefeke leşkerî ye"
Fermandariya Biryargeha Navenda Parastina Gel (NPG) her wiha anî ziman:
“Tê zanîn, çekên ku ji aliyê TUSAŞê ve tên çêkirin li Kurdistanê jin û zarok jî di nav de bi hezaran mirovên me yên sivîl qetil kirine.
Mafê her rêxistin, sazî û mirovên welatparêz ên Kurdistanî ye ku li hemberî navendên ku çekên komkujiyê hildiberînin, çalakiyan bikin.
Tevgera me û hêzên wê ku ne tenê ji bo gelê Kurdistanê her wiha ji bo gelên Tirkiyeyê û qezençkirina wan dest bi têkoşînê kiriye, ti carî sivîlan nake hedef.
Di vê mijarê de, berê bêyî em bixwazin, ji neçarî yan jî bi şêweyên cuda hin kar hatibin kirin jî tevgera me îzahata vê yekê ji gelên me re kiriye û rexnedayina wê daye.
Ji xwe TUSAŞa ku çalakî li hemberî wê hate kirin hedefeke leşkerî ye.
Di vê çalakiyê de ji neçarî sivîlekî jiyana xwe ji dest da ku ji bilî vî sivîlî li hemberî sivîlan ti êriş nehatiye kirin.”
NPGyê her wiha nasnameyên her du gerîlayên Tabûra Nemiran ên ku êrişa li Enqereyê encam da jî eşkere kirin.
Li gorî daxuyaniyê, “Mîne Sevjîn Alçîçeka bi nasnav Asya Alî li Îzmîrê ji dayîk bûye û Alî Orekê bi nasnav Rojger Hêlîn jî li Şirnexê ji dayîk bûye.”
