Hewlêr (Rûdaw) – Artêşa Tirkiyeyê bi dronan êrişî Girê Miştenûrê yê Kobaniyê kir.
Çavdêriya Mafên Mirovan a Sûriyeyê (SOHR) ragihand ku dronên artêşa Tirkiyeyê êrişî xalên leşkerî yên li ser Girê Miştenûrê yê Kobaniyê kir.
Serokê Çavdêriya Mafên Mirovan a Sûriyeyê (SOHR) Ramî Ebdulrehman ji Rûdawê re ragihand, artêşa Tirkiyeyê Girê Miştenûrê yê Kobaniyê ku navendeke leşkerî li ser e bombebaran kiriye.
Li gorî zanyariyên Rûdawê, êrişa Tirkiyeyê saet 15:00an hatiye kirin.
Serokê Çavdêriya Mafên Mirovan a Sûriyeyê (SOHR) Ramî Ebdulrehman got:
“Dûman ji cihê bombebaranê bilind dibe û li gorî zanyariyên destpêkê kuştî û birîndar hene.”
Li gorî Çavdêriya Mafên Mirovan a Sûriyeyê (SOHR), artêşa Tirkiyeyê ji destpêka îsal ve 198 caran êrişî Rojavayê Kurdistanê kiriye.
Li gorî amaran 86 kesan di wan êrişan de canê xwe ji dest daye û 49 şervan û 77 sivîl ku di nav wan de jin û zarok jî hene birîndar bûne.
