Hewlêr (Rûdaw) - Serok Mesûd Barzanî li ser qebûlkirina projeyasaya vegerandina mal û milkên Kurdan ên li Kerkûkê peyamek belav kir û got, “Vegerandina mafê xwedîmafan e.”
Parlamentoya Îraqê projeyasayên vegerandina mal û milkên Kurd û Tirkmenan ên li Kerkûkê, efûya giştî, rastkirina yasaya medenî qebûl kirin.
Serok Barzanî piştî wê biryarê peyamek belav kir û ragihand:
“Ev biryar li cihê xwe ye û vegerandina mafê xwedîmafan e, ji ber vê ez destxweşiyê li Serokatiya Parlamentoya Îraqê, fraksiyonên Kurdistanî û hemû wan aliyan dikim ku rola wan di derbaskirin û pejirandina vê yasayê de hebû.”
Derbaskirina van projeyasayan bi destê yekrêziya aliyên Kurdistanî bû.
Serok Barzanî li ser vê yekê anî ziman:
“Ez hêvîdar im ku ev bibe destpêkek ji bo rastkirin û çareserkirina hemû wan şaşî û nerastiyên ku li dijî berjewendiyên welatiyên Îraqê di dirêjahiya dîroka dewleta Îraqê de hatine kirin.”
