Hewlêr (Rûdaw)- Dijeterora Kurdistanê diyar kir ku ji ber bombebarana balafirên Tirkiyeyê li Mawetê yek jê fermandar 3 gerîlayên PKKyê canê xwe ji dest daye.
Li gorî zanyariyan îro danê sibehê li gundê Gelaleyê yê navçeya Mawetê yê Silêmaniyê 2 otomobîl û baregeheke gerîlayên PKKyê ji aliyê Tirkiyeyê ve hatin bombebarankirin.
Dijeterora Kurdistanê diyar kir ku berpirsek û 3 gerîlayên PKKyê di wê bombebaranê de canê xwe ji dest daye.
“Herêmên çiyayî hatine bombebarankirin”
Li aliyê din Qeymeqamê Mawetê Kameran Hesen jî li ser bûyerê ji Rûdawê re got:
“Saet, 10:40an herêmên Baskê Qelê, daristana Xendekê û gundê Gomespê ya li derdora Gelaleyê ji aliyê dronên Tirkiyeyê ve hatin bombebarankirin.
Em heta niha nizanin zerer çi ye, ji ber ku herêmên hatine bombebarankirin dûr in û çiyayî ne.”
Li gorî gotina Kameran Hesen, çiyayên hatine bombebarankirin berdewamiya Çiyayê Asosê ne û gerîlayên PKKyê jî li wan herêman hene.
Rêxistina CPTyê ya Amerîkayê diyar kir ku di 9 mehên sala borî de Tirkiyeyê nêzîkî hezar û 600 caran axa Herêma Kurdistanê bombebaran kiriye.
Li gorî CPTyê sala 2023yan Tirkiyeyê hezar û 548 caran axa Herêma Kurdistanê bombebaran kiribû.
Her li gorî amarên rêxistinê, ji ber şerê PKK û Tirkiyeyê zêdetirî 170 gundên Herêma Kurdistanê bi tevahî hatine valakirin û 602 gund jî di bin metirsiya valabûnê de ne.
.webp&w=3840&q=75)