Hewlêr (Rûdaw) - Serok Mesûd Barzanî bi Serokê PWKyê Mustafa Ozçelîk, Serokê PSKyê Bayram Bozyel, Serokê HAK-PARê Duzgun Kaplan pêvajoya li Tirkiyeyê û bandora wê ya li ser hemû pêvajoya siyasî û doza Kurdan gotûbêj kir.
Serok Mesûd Barzanî îro li navçeya Pirmamê ya Hewlêrê Serokê Partiya Welatparên Kurdistanê (PWK) Mustafa Ozçelîk, Serokê Partiya Sosyalîst a Kurdistanê (PSK) Bayram Bozyel, Serokê Partiya Maf û Azadiyan (HAK-PAR) Duzgun Kaplan û Alîkarê Serokê PSKyê Mesut Tek qebûl kirin.
Ofîsa Serok Mesûd Barzanî derbarê hevdîtinê daxuyaniyek da.
Li gorî daxuyaniyê, di hevdîtinê de behsa pêvajoya niha li Tirkiye û Bakurê Kurdistanê heye û bandora wê ya li ser hemû pêvajoya siyasî û doza Kurdan hat kirin.
Di daxuyaniyê de hat gotin ku hemû aliyan tekezî li li ser piştevaniya pêvajoya aşitî û gihîştina çareseriya li Tirkiyeyê kiriye.
Her wiha di civînê de behsa guherînên siyasî yên dawî û ewlehiyê yên herêmê û bi taybetî yên Sûriye û Rojavayê Kurdistanê hat kirin.
Serok Barzanî ji şandeya mêvan re behsa rewş û paşaroja gelê Kurd, derfet û metirsiyan kir.
