Hewlêr (Rûdaw) - Li parêzgeha Wanê ya Bakurê Kurdistanê, hefteya borî bi tohmeta qaçaxçîtiya koçberan 14 kes hatin desteserkirin û 3 ji wan hatin girtin.
Birêvebiriya Ewlehiyê ya Wanê ragihand, xebatên rêlibergirtina koçberên neyasayî û qaçaxçîtiya koçberan û bazirganiya mirovan berdewam in.
Li tevahiya parêzgehê ji bo desteserkirina qaçaxçiyên koçberan di navbera 2 û 9ê Adara 2025ê de operasyon hatin kirin.
Di operasyonan de bi tohmeta “qaçaxçîtiya koçberan û bazirganiya mirovan” de 14 kes hatin desteserkirin û ew birin Birêvebiriya Ewlehiyê ya Wanê.
Piştî wergirtina îfadeyan 14 kes ji bo Dadgeha Wanê hatin şandin.
Dadgeha Wanê derbarê 3 kesan de biryara girtinê da û 11 kes jî berdan.
Parêzgeha Wanê bi taybetî ji bo koçberên Efxan, Îranî û Pakistanî wekî rêyeke derbasbûna Tirkiye û Ewropayê tê bikaranîn.
