Hewlêr (Rûdaw) – PWKyê êrişa li Kobaniyê şermezar kir û got, “Bi êriş û siyaseta li dijî Kurdan hatiye avakririn miletê Kurd û doza miletê Kurd a rewa ya neteweyî û demokratîk ji hole ranabe.”
Roja duşemê (17ê Adarê) berê sibehê saet derdora 04:00an di êrişeke bi dronan de li gundê Berxbotanê yê bajarê Kobaniyê yê Rojavayê Kurdistanê 10 sivîl şehîd ketin û sivîlek jî birîndar bû.
Hêzên Sûriyeya Demokratîk (HSD) ragihand ku Tirkiyeyê ev êriş kiriye.
Li aliyê din, Navenda Têkoşîna li Dijî Dezenformasyonê ya Tirkiyeyê got, "Îdiayên ku dibêjin Tirkiyeyê dê û bav û 7 zarokên wan kuştine ne rast in."
Partiya Welatparêzên Kurdistanê (PWK) bi daxuyaniyekê ew êriş kir şermezar kir û got:
“Li gorî agahiyên ku hatine belavkirin, di êrişeke asmanî ya dewlet Tirkiyeyê de, li başûrê bajarê Kobaniyê li navbera gundê Qumçî û BerxBotanê yê Rojavayê Kurdistanê, şeva borî 9 kesên sivîl ku piraniya wan zarok û jin bûn, canê xwe ji dest da û 2 kes jî birîndar bûn.
Em vê êrişa dewleta Tirkiyeyê şermezar dikin.
Em bangî dewleta Tirkiyeyê dikin ku dawî li hemû êriş û operasyonên xwe yên leşkerî yên li ser Rojava, Bakur û Başûrê Kurdistanê bîne.
Bi êriş û siyaseta li ser dijayetiya Kurdan hatiye avakirin, miletê Kurd jî doza wî ya rewa ya neteweyî û demokratîk jî ji hole ranabe.”
