Hewlêr (Rûdaw) - Asayîşa Rêveberiya Xweser li Kampa Holê ya parêzgeha Hisîçaya Rojavayê Kurdistanê operasyonek kir.
Hêzên Asayîşê roja înê dest bi operasyona ewlehiyê kir.
Armanca operasyonê ew e ku şaneyên razayî yên DAIŞê yên li Kampa Holê werin hilweşandin.
Endamê Birêvebiriya Giştî ya Asayîşê Hêlat Mihemed got:
“Operasyon di demekê de ye ku şaneyên razayî yên DAIŞê di nava kampê de dest bi liv û tevgerê kiriye.”
Li gorî Asayîşê, şaneyên razayî yên DAIŞê ji hundir û derveyî kampê hewl didin aloziyan derxînin, çekan dişînin nava kampê û alîkariya xelkê dikin ku ji kampê birevin.
Di operasyonê de hejmarek kes hatin desteserkirin ku guman heye endamên rêxistina DAIŞê bin.
Asayîşê her wiha dest danî ser hinek çek û amûrên pêwendiyê.
Endamê Birêvebiriya Giştî ya Asayîşê Mehmûd Husên jî anî ziman:
“Serê sibeha îro, me Kampa Holê dorpêç kir, bi taybetî beşê Elfayiza ku cihê jinên DAIŞî ye.
Armanca vê operasyonê şopandina şaneyên razayî yên DAIŞê bû ku li nav û derdora kampê ne.”
Zêdeyî 40 hezar kesî li Kampa Holê hene ku piraniya wan jin û zarok in û malbatên çekdarên DAIŞê ne.
Nêzîkî 16 hezar ji niştecihên kampê Sûriyeyî ne, nêzîkî 15 hezar jî Îraqî û yên din jî xelkê welatên din in.
.webp&w=3840&q=75)