Hewlêr (Rûdaw) - Li navçeya Geverê ya parêzgeha Colemêrgê ya Bakurê Kurdistanê minîbûsa karkeran ji rê derket û wergeriya.
Di bûyerê de 2 kes mirin û 3 kes jî birîndar bûn.
Bûyer demjimêr derdora 05:30 xulekên vê sibehê li gundikê Sêgûzanê yê girêdayî gundê Şagilordê yê bi navçeya Geverê çêbû.
Minîbûsa karkerên şantiyeyê ku Ezber Pertevê 38 salî diajot şemitî û ji rê derket. Piştre jî kendalekî çû xwarê û ket nav rûbar.
Li gor çavkaniyên xwecihî karkerên di minîbûsê de Necdet Ozşahîn ê 47 salî û Levent Safali yê 45 salî li cihê bûyerê mirin.
Her wiha şofêrê minîbûsê jî tevî 2 kesên din birîndar bûne.
Li ser agahdarkirinê tîmên tenduristiyê çûn cihê bûyerê û birîndar rakirin Nexweşxaneya Dewletê ya Geverê.
Hatiye ragihandin ku derbarê bûyerê de lêkolîn hatiye destpêkirin.
Li gorî amarên fermî di sala 2024an de li Tirkiye û Bakurê Kurdistanê 623 hezar û 148 qezayên trafîkê çêbûne.
Di wan qezayan de 2 hezar û 713 kes mirine û 388 hezar û 644 kes jî birîndar bûne.
