Amerîkayê li Îranê dest bi pêleke nû ya êrişan kir

Hewlêr (Rûdaw) - Fermandariya Navendî ya Hêzên Amerîkayê (CENTCOM) ragihand ku bi fermana Serokê Amerîkayê Donald Trump, wan dest bi pêleke nû ya êrişên asmanî ya li armancên li nav axa Îranê kiriye.

Di êrişeke berê ya Îranê ya li Urdinê de, 2 leşkerên Amerîkayê hatin kuştin û leşkerek jî winda bû.

Fermandariya Navendî ya Hêzên Amerîkayê (CENTCOM) di daxuyaniyekê de destnîşan kir ku saet 01:00ê destê sibehê ya bi dema Hewlêrê dest bi êrişê hatiye kirin.

CENTCOMê da zanîn ku armanca wan "lawazkirina şiyana Îranê ya ji bo çêkirina metirsiyê ya li ser keştiyên bazirganî yên li Tengava Hurmizê û cezadana Supaya Pasdaran a Îranê ye" ku berpirsên êrişa li leşkerên Amerîkayê yên li Urdinê ne.

Beriya destpêkirina êrişan, Rêberê Dînî yê Îranê Mucteba Xamineyî hişyarî dabû Washingtonê û ragihandibû ku dê Amerîka baca "hewldana ji bo berfirehkirina şer" bide.

Xamineyî îmzeya Donald Trump wekî "bêqîmet û bêbawer" pênase kir û hişyariya "şikestineke mezintir" da Amerîkayê.

Li beramberî vê yekê, Wezîrê Şer ê Amerîkayê Pete Hegseth li ser hesabê xwe yê tora civakî Xê nivîsî, "Qurbanîdana leşkerên me tenê vîna me ya ji bo rûbirûbûnê xurttir dike."

Belavbûna şer a li welatên Kendavê

Alozî tenê di navbera Washington û Tehranê de nemane û li çend welatên herêmê jî belav bûne:

Kuweyt: Supaya Pasdaran a Îranê ragihand ku wan êrişî navenda piştgiriya leşkerî ya Amerîkayê ya li Kampa Arîfcanê û Baregeha Asmanî ya Elî Salimê kiriye. Li hêla din, Şirketa Petrolê ya Kuweytê piştrast kir ku zerer gihîştiye yek ji tesîsên wan ên petrolê.

Behreyn: Medyaya Îranê dibêje Baregeha Asmanî ya Şêx Îsaya ku balafirên şer ên Amerîkayê lê ne, hatiye armanckirin.

Urdin: Televîzyona fermî ya Îranê ragihand ku di êrişeke dronî ya li baregeheke Amerîkayê ya li Ezraqê de, 2 balafirên şer ên Amerîkayê hatine têkbirin.

Erebistana Siûdî: Piştî ku êrişeke mûşekî li herêmê hat kirin, li navçeyên Xerc û Yenbûyê zengilê metirsiyê lê da û ji şêniyan hat xwestin ku herin stargehan.

Şerê ji bo kontrolkirina Tengava Hurmizê

Ev şerê ku meha Sibatê dest pê kiriye, armanca Amerîka û Îsraîlê tê de têkbirina bernameya mûşekî ya Îranê û komên nêzîkî wê ye.

Niha şer gihîştiye qonaxa kontrolkirina Tengava Hurmizê ku rêya pênceka petrola cîhanê ye.

Îran, Amerîkayê bi wê yekê tohmetbar dike ku dixwaze dest deyne ser tengavê û li hêla din, Amerîka dibêje ku ew tenê dorpêça deryayî dixe ser Îranê.

Yekîtiya Ewropayê û welatên Kendavê di daxuyaniyeke hevbeş de ji Îranê xwest ku yekser êrişên xwe yên li ser keştivaniyê rawestîne û tengavê vekirî bihêle.

Li gorî amarên fermî ji destpêka şer heta niha 16 leşkerên Amerîkayê hatine kuştin û zêdetirî 420 leşker jî birîndar bûne.

Wezareta Tenduristiyê ya Îranê ragihand ku di 3 hefteyên borî de 50 kes di êrişên Amerîkayê de hatine kuştin û zêdetirî 500 kesî jî birîndar bûne.