Hewlêr (Rûdaw) - Dadgeha Bilind a Tirkiyeyê, navê kurt ê Partiya Gelan a Wekhevî û Demokrasiyê (DEM Partî) qebûl kir.
Partiya Çepên Kesk, 15ê Çiriya Pêşîna 2023yan di 4emîn Kongreya Asayî de navê partiyê kiribû Partiya Gelan a Wekhevî û Demokrasiyê û kurteya wê jî kiribû HEDEP.
Dadgeha Bilind a Tirkiyeyê bi hinceta ku navê HEDEPê dişibe kurteya navê Partiya Demokratîk a Gel (HADEP) ku sala 1994an hatibû avakirin biryar dabû navê HEDEPê bê guhertin.
Rêveberiya Partiya Gelan a Wekhevî û Demokrasiyê li ser biryara Dadgeha Bilind kom bû û roja 11ê Kanûna Pêşîna 2023yan biryar da navê kurt ê nû yê partiyê bibe “DEM Partî.”
Dadgeha Bilind a Tirkiyeyê, navê kurt ê Partiya Gelan a Wekhevî û Demokrasiyê wekî “DEM Partî” qebûl kir û li ser malpera xwe jî bi wî awayî nivîsand.
Li aliyê din, Dadgeha Bilind a Tirkiyeyê, serlêdana jinûveavakirina Partiya Çepên Kesk a ku 24ê Çiriya Paşîna 2023yan hatibû kirin qebûl kir.
Bi avakirina Partiya Çepên Kesk re hejmara partiyên siyasî yên li Tirkiyeyê bû 141.
