Hewlêr (Rûdaw) - Welatên Erebî “neçarkirina Filistîniyan a koçberiyê û valakirina Xezeyê” red dikin.
Di serî de Misir û Erebistana Siûdî, 12 welatên Erebî di daxuyaniyeke hevbeş de valakirina Xezeyê û koçberkirina Filistîniyan wekî “binpêkirineke eşkere ya qanûnên navneteweyî” û “gefeke li ser aramiya herêmê” bi nav kir.
Li gorî daxuyaniya Wezareta Karên Derve ya Misirê, Wezîrê Karên Derve bi hevtayên xwe yên Erebistana Siûdî, Îmarata Erebî, Kuweyt, Uman, Behreyn, Urdin, Îraq, Cezayîr, Tûnis, Morîtanya û Sûdanê re bi telefonê axivî.
Wezîrên karên derve yên van welatên Erebî plana Donald Trump a “dûrxistina Filistîniyan û kontrolkirina Xezeyê” red kir.
Hat diyarkirin ku helwesta Ereban a li hemberî meselaya Filistînê neguheriye û plan wekî binpêkirina mafên Filistîniyan û gefeke li ser ewlehî û aramiya herêmê hat binavkirin.
Her wiha hat destnîşankirin ku ev plan dê bihevrejiyana gelan û derfeta aştiyê jî ji holê rake.
Di daxuyaniyê de hat ragihandin ku çareseriya li ser bingeha du dewletan a pirsgirêka Îsraîl-Filistînê garantiya çareseriyeke mayînde ye ji bo aştî û aramiyê ye.
Plana Trump a “valakirina Xezeyê û dûrxistina Filistîniyan”
Trump di civîna çapemeniyê ya li gel Serokwezîrê Îsraîlê Benjamin Netanyahu de ragihand ku Amerîka dê Xezeyê kontrol bike.
Trump da zanîn ku Xeze niha wêran bûye û destnîşan kir, ji bo Filistîniyên li Xezeyê çûyîna kampên nû yên ku dê li welatên cîran bi taybetî jî li Misir û Urdinê werin avakirin çêtir be.
Trump destnîşan kir ku bijardeyeke din a şêniyên Xezeyê ji bilî derketina ji wir nîne.
Donald Trump her wiha xwest ku Xezeyê bike “Rivieraya Rojhilata Navîn.”
