Hewlêr (Rûdaw) - Serokwezîrê Herêma Kurdistanê Mesrûr Barzanî got, “Astengî nikarin rê li ber bipêşketina Herêma Kurdistanê bigirin.”
Serokwezîrê Herêma Kurdistanê Mesrûr Barzanî beşdarî “Lûtkeya Cîhanî ya Hikûmetan” a li Dubaiyê bû.
Mesrûr Barzanî di panela bi navê "Derbaskirina ji Astengiyan û Bikaranîna Derfetan" axivî û qala pirsgirêkên Hewlêr û Bexdayê û çend mijarên din kir.
Serokwezîr got, "Herêma Kurdistanê bûye herêmeke aram û pêşketî ku dikare li Rojhilata Navîn a aloz bibe mînak.”
Mesrûr Barzanî derbarê pêwendiyên Hewlêr û Bexdayê got ku ew "ji bo çareserkirina pirsgirêkên siyasî" hemû hewlan didin û diyar kir, "Gotûbêj û dan û standin du bijardeyên herî baş in ji bo aramî û bipêşketina Îraqê."
“Ewlehî û aramiya Herêma Kurdistanê roleke girîng gerandiye”
Mesrûr Barzanî li ser rewşa Herêma Kurdistanê ragihand:
"Ewlehî û aramiya Herêma Kurdistanê roleke girîng di rakişandina veberhênana derve û teşwîqkirina bipêşketina aborî de dîtiye.
Hikûmeta Herêma Kurdistanê ji bo curedarkirina çavkaniyên dahatê û bipêşxistina sektora taybet dixebite da ku aboriyeke domdar bi pêş bixe û derfetên kar ji bo ciwanan peyda bike û girêdana bi sektora taybet re kêm bike."
“Em girîngiyê bi perwerdeyê didin”
Mesrûr Barzanî di beşeke axaftina xwe de dabaşa sektora perwerdeyê jî kir û anî zimên:
"Girîngîdayîna bi perwerde û fêrbûnê li pêşiya karên Hikûmeta Herêma Kurdistanê ne.
Ji bo vê armancê me hewlên mezin dane da ku ev qad (perwerde) bi pêş bikeve bigihêje asta welatên cîhanê.
Em serbilind in ku hinek zanîngeh û enstîtuyên fermî û taybet ên Herêma Kurdistanê di pêgihandina nifşan de rolê dilîzin da ku di hemû waran de xizmetê bikin."
“Elektronîkkirina xizmetguzariyan li pêşiya karên hikûmetê ye”
Serokwezîr Barzanî li ser elektronîkkirina xizmetguzariyan jî wiha axivî:
"Elektronîkkirina xizmetguzariyan li pêşiya karên Hikûmeta Herêma Kurdistanê ye da ku xizmetguzarî baş bibin, rêkarên birêvebiriyê hêsan bibin, şefafiyet zêde bibe û em rûbirûyî gendeliyê bibin."
Mesrûr Barzanî pêwendiyên Herêma Kurdistanê yên bi Îmaratê re bi rengî "erênî" pênase kirin.
Wî diyar kir ku "Herêma Kurdistanê dixwaze sûdê ji ezmûna serkeftî ya Îmaratê” bibîne û diyar kir ku ew dixwazin bi taybetî vê yekê di warên çaksaziya aborî û birêvebirina hikûmetê de bikin.
Serokwezîr careke din bal kişand ser girîngiya avakirina aboriyeke nerm û curbicur da ku bikaribe xwe li gel guherîn û werçerxên cîhanî biguncîne.
Barzanî got ku curedarkirin çavkaniyên dahatê û xurtkirina sekrora taybet alîkariya bidestxistina vê xwesteka aborî dikin.
Serokwezîr amaje pê kir ku divê xelk bibe tewera sereke ya her hikûmeta ku hewla serkeftinê dide.
Mesrûr Barzanî diyar kir ku Hikûmeta Herêma Kurdistanê ji bo vê armancê bi awayekî cidî dixebite da ku bersivê bide pêdiviyên xelkê û jiyana gel baştir bike.
Şandeyeke Hikûmeta Herêma Kurdistanê bi serokatiya Mesrûr Barzanî û beşdariya Qubad Talebanî 10ê Sibata 2025an çû Îmaratê ji bo beşdarî Lûtkeya Cîhanî ya Hikûmetan bibe.
Lûtkeya Cîhanî ya Hikûmetan di navbera 11 û 13ê vê mehê de li Dubaiyê bi beşdariya zêdetirî 30 serokdewlet û serokwezîrên hikûmetan tê lidarxistin.
.webp&w=3840&q=75)
