Hewlêr (Rûdaw) - Heyeta Îmraliyê dê sibe biçe serdana Rêberê PKKyê Abdullah Ocalan û vê carê siyasetmedarê Kurd Ahmed Turk jî di nav Heyeta Îmraliyê de cih digire.
Heyeta Îmraliyê ya DEM Partiyê dê sibe li girtîgeha li Girava Îmraliyê bi Serokê PKKyê Abdullah Ocalan re sêyemîn hevdîtina xwe pêk bîne.
Hat diyarkirin ku Ahmet Turk jî dê di di nav heyeteê de cih bigire.
DEM Partiyê ragihand ku Heyeta Îmraliyê ya vê carê ji 7 kesan pêk tê.
Kesên ku di nav Heyeta Îmraliyê de cîh digirin ev in:
Ahmet Turk, Pervîn Buldan, Sirri Sureyya Onder, Tulay Hatimogullari, Tuncer Bakirhan, Cengîz Çiçek, Faîk Ozgur Erol
Her wiha DEM Partiyê da zanîn ku piştî hevdîtina li Îmraliyê, heyet dê sibe (27ê Sibatê) li Stenbolê civîneke çapemeniyê li dar bixe û derbarê hevdîtinê û encamên wê de agahiyên berfireh bide.
Ofîsa Çapemeniyê ya DEM Partiyê got, "Eger ti astengî pêk neyên em li bendê ne ku Birêz Ocalan daxuyaniyeke dîrokî bide.”
